১. মহাকস্সপত্থেরগাথা

১০৫৪. ‘‘ন গণেন পুরক্খতো চরে, ৰিমনো হোতি সমাধি দুল্লভো;

নানাজনসঙ্গহো দুখো, ইতি দিস্ৰান গণং ন রোচযে.

১০৫৫. ‘‘ন কুলানি উপব্বজে মুনি, ৰিমনো হোতি সমাধি দুল্লভো;

সো উস্সুক্কো রসানুগিদ্ধো, অত্থং রিঞ্চতি যো সুখাৰহো.

১০৫৬. ‘‘পঙ্কোতি হি নং অৰেদযুং, যাযং ৰন্দনপূজনা কুলেসু;

সুখুমং সল্ল দুরুব্বহং, সক্কারো কাপুরিসেন দুজ্জহো.

১০৫৭. ‘‘সেনাসনম্হা ওরুয্হ, নগরং পিণ্ডায পাৰিসিং;

ভুঞ্জন্তং পুরিসং কুট্ঠিং, সক্কচ্চং তং উপট্ঠহিং.

১০৫৮. ‘‘সো মে [তং (সী. ক.)] পক্কেন হত্থেন, আলোপং উপনামযি;

আলোপং পক্খিপন্তস্স, অঙ্গুলি চেত্থ [পেত্থ (সী. ক.)] ছিজ্জথ.

১০৫৯. ‘‘কুট্টমূলঞ্চ [কুড্ডমূলঞ্চ (সী. স্যা.)] নিস্সায, আলোপং তং অভুঞ্জিসং;

ভুঞ্জমানে ৰা ভুত্তে ৰা, জেগুচ্ছং মে ন ৰিজ্জতি.

১০৬০. ‘‘উত্তিট্ঠপিণ্ডো আহারো, পূতিমুত্তঞ্চ ওসধং;

সেনাসনং রুক্খমূলং, পংসুকূলঞ্চ চীৰরং;

যস্সেতে অভিসম্ভুত্ৰা [অভিভুঞ্জতি (?)], স ৰে চাতুদ্দিসো নরো.

১০৬১. ‘‘যত্থ একে ৰিহঞ্ঞন্তি, আরুহন্তা সিলুচ্চযং;

তস্স বুদ্ধস্স দাযাদো, সম্পজানো পতিস্সতো;

ইদ্ধিবলেনুপত্থদ্ধো, কস্সপো অভিরূহতি.

১০৬২. ‘‘পিণ্ডপাতপটিক্কন্তো, সেলমারুয্হ কস্সপো;

ঝাযতি অনুপাদানো, পহীনভযভেরৰো.

১০৬৩. ‘‘পিণ্ডপাতপটিক্কন্তো, সেলমারুয্হ কস্সপো;

ঝাযতি অনুপাদানো, ডয্হমানেসু নিব্বুতো.

১০৬৪. ‘‘পিণ্ডপাতপটিক্কন্তো, সেলমারুয্হ কস্সপো;

ঝাযতি অনুপাদানো, কতকিচ্চো অনাসৰো.

১০৬৫. ‘‘করেরিমালাৰিততা, ভূমিভাগা মনোরমা;

কুঞ্জরাভিরুদা রম্মা, তে সেলা রমযন্তি মং.

১০৬৬. ‘‘নীলব্ভৰণ্ণা রুচিরা, ৰারিসীতা সুচিন্ধরা;

ইন্দগোপকসঞ্ছন্না, তে সেলা রমযন্তি মং.

১০৬৭. ‘‘নীলব্ভকূটসদিসা, কূটাগারৰরূপমা;

ৰারণাভিরুদা রম্মা, তে সেলা রমযন্তি মং.

১০৬৮. ‘‘অভিৰুট্ঠা রম্মতলা, নগা ইসিভি সেৰিতা;

অব্ভুন্নদিতা সিখীহি, তে সেলা রমযন্তি মং.

১০৬৯. ‘‘অলং ঝাযিতুকামস্স, পহিতত্তস্স মে সতো;

অলং মে অত্থকামস্স [অত্তকামস্স (?)], পহিতত্তস্স ভিক্খুনো.

১০৭০. ‘‘অলং মে ফাসুকামস্স, পহিতত্তস্স ভিক্খুনো;

অলং মে যোগকামস্স, পহিতত্তস্স তাদিনো.

১০৭১. ‘‘উমাপুপ্ফেন সমানা, গগনাৰব্ভছাদিতা;

নানাদিজগণাকিণ্ণা, তে সেলা রমযন্তি মং.

১০৭২. ‘‘অনাকিণ্ণা গহট্ঠেহি, মিগসঙ্ঘনিসেৰিতা;

নানাদিজগণাকিণ্ণা, তে সেলা রমযন্তি মং.

১০৭৩. ‘‘অচ্ছোদিকা পুথুসিলা, গোনঙ্গুলমিগাযুতা;

অম্বুসেৰালসঞ্ছন্না, তে সেলা রমযন্তি মং.

১০৭৪. ‘‘ন পঞ্চঙ্গিকেন তুরিযেন, রতি মে হোতি তাদিসী;

যথা একগ্গচিত্তস্স, সম্মা ধম্মং ৰিপস্সতো.

১০৭৫. ‘‘কম্মং বহুকং ন কারযে, পরিৰজ্জেয্য জনং ন উয্যমে;

উস্সুক্কো সো রসানুগিদ্ধো, অত্থং রিঞ্চতি যো সুখাৰহো.

১০৭৬. ‘‘কম্মং বহুকং ন কারযে, পরিৰজ্জেয্য অনত্তনেয্যমেতং;

কিচ্ছতি কাযো কিলমতি, দুক্খিতো সো সমথং ন ৰিন্দতি.

১০৭৭. ‘‘ওট্ঠপ্পহতমত্তেন, অত্তানম্পি ন পস্সতি;

পত্থদ্ধগীৰো চরতি, অহং সেয্যোতি মঞ্ঞতি.

১০৭৮. ‘‘অসেয্যো সেয্যসমানং, বালো মঞ্ঞতি অত্তানং;

ন তং ৰিঞ্ঞূ পসংসন্তি, পত্থদ্ধমানসং নরং.

১০৭৯. ‘‘যো চ সেয্যোহমস্মীতি, নাহং সেয্যোতি ৰা পন;

হীনো তংসদিসো [তীনোহং সদিসো (স্যা.)] ৰাতি, ৰিধাসু ন ৰিকম্পতি.

১০৮০. ‘‘পঞ্ঞৰন্তং তথা তাদিং, সীলেসু সুসমাহিতং;

চেতোসমথমনুত্তং, তঞ্চে ৰিঞ্ঞূ পসংসরে.

১০৮১. ‘‘যস্স সব্রহ্মচারীসু, গারৰো নূপলব্ভতি;

আরকা হোতি সদ্ধম্মা, নভতো পুথৰী যথা.

১০৮২. ‘‘যেসঞ্চ হিরি ওত্তপ্পং, সদা সম্মা উপট্ঠিতং;

ৰিরূল়্হব্রহ্মচরিযা তে, তেসং খীণা পুনব্ভৰা.

১০৮৩. ‘‘উদ্ধতো চপলো ভিক্খু, পংসুকূলেন পারুতো;

কপীৰ সীহচম্মেন, ন সো তেনুপসোভতি.

১০৮৪. ‘‘অনুদ্ধতো অচপলো, নিপকো সংৰুতিন্দ্রিযো;

সোভতি পংসুকূলেন, সীহোৰ গিরিগব্ভরে.

১০৮৫. ‘‘এতে সম্বহুলা দেৰা, ইদ্ধিমন্তো যসস্সিনো;

দসদেৰসহস্সানি, সব্বে তে ব্রহ্মকাযিকা.

১০৮৬. ‘‘ধম্মসেনাপতিং ৰীরং, মহাঝাযিং সমাহিতং;

সারিপুত্তং নমস্সন্তা, তিট্ঠন্তি পঞ্জলীকতা.

১০৮৭. ‘‘‘নমো তে পুরিসাজঞ্ঞ, নমো তে পুরিসুত্তম;

যস্স তে নাভিজানাম, যম্পি নিস্সায ঝাযতি [ঝাযসি (ক. অট্ঠ.)].

১০৮৮. ‘‘‘অচ্ছেরং ৰত বুদ্ধানং, গম্ভীরো গোচরো সকো;

যে মযং নাভিজানাম, ৰালৰেধিসমাগতা’.

১০৮৯. ‘‘তং তথা দেৰকাযেহি, পূজিতং পূজনারহং;

সারিপুত্তং তদা দিস্ৰা, কপ্পিনস্স সিতং অহু.

১০৯০. ‘‘যাৰতা বুদ্ধখেত্তম্হি, ঠপযিত্ৰা মহামুনিং;

ধুতগুণে ৰিসিট্ঠোহং, সদিসো মে ন ৰিজ্জতি.

১০৯১. ‘‘পরিচিণ্ণো মযা সত্থা, কতং বুদ্ধস্স সাসনং;

ওহিতো গরুকো ভারো, নত্থি দানি পুনব্ভৰো.

১০৯২. ‘‘ন চীৰরে ন সযনে, ভোজনে নুপলিম্পতি;

গোতমো অনপ্পমেয্যো, মুল়ালপুপ্ফং ৰিমলংৰ;

অম্বুনা নেক্খম্মনিন্নো, তিভৰাভিনিস্সটো.

১০৯৩. ‘‘সতিপট্ঠানগীৰো সো, সদ্ধাহত্থো মহামুনি;

পঞ্ঞাসীসো মহাঞাণী, সদা চরতি নিব্বুতো’’তি.

… মহাকস্সপো থেরো….

চত্তালীসনিপাতো নিট্ঠিতো.