৩. আনন্দত্থেরগাথা

১০১৭. ‘‘পিসুণেন চ কোধনেন চ, মচ্ছরিনা চ ৰিভূতনন্দিনা;

সখিতং ন করেয্য পণ্ডিতো, পাপো কাপুরিসেন সঙ্গমো.

১০১৮. ‘‘সদ্ধেন চ পেসলেন চ, পঞ্ঞৰতা বহুস্সুতেন চ;

সখিতং করেয্য পণ্ডিতো, ভদ্দো সপ্পুরিসেন সঙ্গমো.

১০১৯. ‘‘পস্স চিত্তকতং বিম্বং…পে… যস্স নত্থি ধুৰং ঠিতি.

১০২০. ‘‘পস্স চিত্তকতং বিম্বং…পে… ৰত্থেহি সোভতি.

১০২১. ‘‘অলত্তককতা …পে… নো চ পারগৰেসিনো.

১০২২. ‘‘অট্ঠপদকতা…পে… নো চ পারগৰেসিনো.

১০২৩. ‘‘অঞ্জনীৰ নৰা…পে… নো চ পারগৰেসিনো.

১০২৪. ‘‘বহুস্সুতো চিত্তকথী, বুদ্ধস্স পরিচারকো;

পন্নভারো ৰিসঞ্ঞুত্তো, সেয্যং কপ্পেতি গোতমো.

১০২৫. ‘‘খীণাসৰো ৰিসঞ্ঞুত্তো, সঙ্গাতীতো সুনিব্বুতো;

ধারেতি অন্তিমং দেহং, জাতিমরণপারগূ.

১০২৬. ‘‘যস্মিং পতিট্ঠিতা ধম্মা, বুদ্ধস্সাদিচ্চবন্ধুনো;

নিব্বানগমনে মগ্গে, সোযং তিট্ঠতি গোতমো.

১০২৭. ‘‘দ্ৰাসীতি বুদ্ধতো গণ্হিং, দ্ৰে সহস্সানি ভিক্খুতো;

চতুরাসীতিসহস্সানি, যে মে ধম্মা পৰত্তিনো.

১০২৮. ‘‘অপ্পস্সুতাযং পুরিসো, বলিবদ্দোৰ জীরতি;

মংসানি তস্স ৰড্ঢন্তি, পঞ্ঞা তস্স ন ৰড্ঢতি.

১০২৯. ‘‘বহুস্সুতো অপ্পস্সুতং, যো সুতেনাতিমঞ্ঞতি;

অন্ধো পদীপধারোৰ, তথেৰ পটিভাতি মং.

১০৩০. ‘‘বহুস্সুতং উপাসেয্য, সুতঞ্চ ন ৰিনাসযে;

তং মূলং ব্রহ্মচরিযস্স, তস্মা ধম্মধরো সিযা.

১০৩১. ‘‘পুব্বাপরঞ্ঞূ অত্থঞ্ঞূ, নিরুত্তিপদকোৰিদো;

সুগ্গহীতঞ্চ গণ্হাতি, অত্থঞ্চোপপরিক্খতি.

১০৩২. ‘‘খন্ত্যা ছন্দিকতো [খন্তিযা ছন্দিতো (?)] হোতি, উস্সহিত্ৰা তুলেতি তং;

সমযে সো পদহতি, অজ্ঝত্তং সুসমাহিতো.

১০৩৩. ‘‘বহুস্সুতং ধম্মধরং, সপ্পঞ্ঞং বুদ্ধসাৰকং;

ধম্মৰিঞ্ঞাণমাকঙ্খং, তং ভজেথ তথাৰিধং.

১০৩৪. ‘‘বহুস্সুতো ধম্মধরো, কোসারক্খো মহেসিনো;

চক্খু সব্বস্স লোকস্স, পূজনীযো বহুস্সুতো.

১০৩৫. ‘‘ধম্মারামো ধম্মরতো, ধম্মং অনুৰিচিন্তযং;

ধম্মং অনুস্সরং ভিক্খু, সদ্ধম্মা ন পরিহাযতি.

১০৩৬. ‘‘কাযমচ্ছেরগরুনো [গরুকো (সী.)], হিয্যমানে [হিয্যমানো (সী.)] অনুট্ঠহে;

সরীরসুখগিদ্ধস্স, কুতো সমণফাসুতা.

১০৩৭. ‘‘ন পক্খন্তি দিসা সব্বা, ধম্মা ন পটিভন্তি মং;

গতে কল্যাণমিত্তম্হি, অন্ধকারংৰ খাযতি.

১০৩৮. ‘‘অব্ভতীতসহাযস্স, অতীতগতসত্থুনো;

নত্থি এতাদিসং মিত্তং, যথা কাযগতা সতি.

১০৩৯. ‘‘যে পুরাণা অতীতা তে, নৰেহি ন সমেতি মে;

স্ৰজ্জ একোৰ ঝাযামি, ৰস্সুপেতোৰ পক্খিমা.

১০৪০. ‘‘দস্সনায অভিক্কন্তে, নানাৰেরজ্জকে বহূ;

মা ৰারযিত্থ সোতারো, পস্সন্তু সমযো মমং.

১০৪১. ‘‘দস্সনায অভিক্কন্তে, নানাৰেরজ্জকে পুথু;

করোতি সত্থা ওকাসং, ন নিৰারেতি চক্খুমা.

১০৪২. ‘‘পণ্ণৰীসতিৰস্সানি, সেখভূতস্স মে সতো;

ন কামসঞ্ঞা উপ্পজ্জি, পস্স ধম্মসুধম্মতং.

১০৪৩. ‘‘পণ্ণৰীসতিৰস্সানি, সেখভূতস্স মে সতো;

ন দোসসঞ্ঞা উপ্পজ্জি, পস্স ধম্মসুধম্মতং.

১০৪৪. ‘‘পণ্ণৰীসতিৰস্সানি, ভগৰন্তং উপট্ঠহিং;

মেত্তেন কাযকম্মেন, ছাযাৰ অনপাযিনী [অনুপাযিনী (স্যা. ক.)].

১০৪৫. ‘‘পণ্ণৰীসতিৰস্সানি, ভগৰন্তং উপট্ঠহিং;

মেত্তেন ৰচীকম্মেন, ছাযাৰ অনপাযিনী.

১০৪৬. ‘‘পণ্ণৰীসতিৰস্সানি, ভগৰন্তং উপট্ঠহিং;

মেত্তেন মনোকম্মেন, ছাযাৰ অনপাযিনী.

১০৪৭. ‘‘বুদ্ধস্স চঙ্কমন্তস্স, পিট্ঠিতো অনুচঙ্কমিং;

ধম্মে দেসিযমানম্হি, ঞাণং মে উদপজ্জথ.

১০৪৮. ‘‘অহং সকরণীযোম্হি, সেখো অপ্পত্তমানসো;

সত্থু চ পরিনিব্বানং, যো অম্হং অনুকম্পকো.

১০৪৯. ‘‘তদাসি যং ভিংসনকং, তদাসি লোমহংসনং;

সব্বাকারৰরূপেতে, সম্বুদ্ধে পরিনিব্বুতে.

১০৫০. ‘‘বহুস্সুতো ধম্মধরো, কোসারক্খো মহেসিনো;

চক্খু সব্বস্স লোকস্স, আনন্দো পরিনিব্বুতো.

১০৫১. ‘‘বহুস্সুতো ধম্মধরো, কোসারক্খো মহেসিনো;

চক্খু সব্বস্স লোকস্স, অন্ধকারে তমোনুদো.

১০৫২. ‘‘গতিমন্তো সতিমন্তো, ধিতিমন্তো চ যো ইসি;

সদ্ধম্মধারকো থেরো, আনন্দো রতনাকরো.

১০৫৩. ‘‘পরিচিণ্ণো মযা সত্থা, কতং বুদ্ধস্স সাসনং;

ওহিতো গরুকো ভারো, নত্থি দানি পুনব্ভৰো’’তি.

… আনন্দো থেরো….

তিংসনিপাতো নিট্ঠিতো.