৮. অঙ্গুলিমালত্থেরগাথা

৮৬৬. ‘‘গচ্ছং ৰদেসি সমণ ‘ট্ঠিতোম্হি’, মমঞ্চ ব্রূসি ঠিতমট্ঠিতোতি;

পুচ্ছামি তং সমণ এতমত্থং, ‘কথং ঠিতো ত্ৰং অহমট্ঠিতোম্হি’’’.

৮৬৭. ‘‘ঠিতো অহং অঙ্গুলিমাল সব্বদা, সব্বেসু ভূতেসু নিধায দণ্ডং;

তুৰঞ্চ পাণেসু অসঞ্ঞতোসি, তস্মা ঠিতোহং তুৰমট্ঠিতোসি’’.

৮৬৮. ‘‘চিরস্সং ৰত মে মহিতো মহেসী, মহাৰনং সমণো পচ্চপাদি [পচ্চুপাদি (সব্বত্থ)];

সোহং চজিস্সামি সহস্সপাপং, সুত্ৰান গাথং তৰ ধম্মযুত্তং’’.

৮৬৯. ইচ্চেৰ চোরো অসিমাৰুধঞ্চ, সোব্ভে পপাতে নরকে অন্ৰকাসি [অকিরি (ম. নি. ২.৩৪৯)];

অৰন্দি চোরো সুগতস্স পাদে, তত্থেৰ পব্বজ্জমযাচি বুদ্ধং.

৮৭০. বুদ্ধো চ খো কারুণিকো মহেসি, যো সত্থা লোকস্স সদেৰকস্স;

‘তমেহি ভিক্খূ’তি তদা অৰোচ, এসেৰ তস্স অহু ভিক্খুভাৰো.

৮৭১. ‘‘যো চ পুব্বে পমজ্জিত্ৰা, পচ্ছা সো নপ্পমজ্জতি;

সোমং লোকং পভাসেতি, অব্ভা মুত্তোৰ চন্দিমা.

৮৭২. ‘‘যস্স পাপং কতং কম্মং, কুসলেন পিধীযতি [পিথীযতি (সী. স্যা.)];

সোমং লোকং পভাসেতি, অব্ভা মুত্তোৰ চন্দিমা.

৮৭৩. ‘‘যো হৰে দহরো ভিক্খু, যুঞ্জতি বুদ্ধসাসনে;

সোমং লোকং পভাসেতি, অব্ভা মুত্তোৰ চন্দিমা.

৮৭৪. [দিসা হি (স্যা. ক., ম. নি. ২.৩৫২)] ‘‘দিসাপি মে ধম্মকথং সুণন্তু, দিসাপি মে যুঞ্জন্তু বুদ্ধসাসনে;

দিসাপি মে তে মনুজে ভজন্তু, যে ধম্মমেৰাদপযন্তি সন্তো.

৮৭৫. ‘‘দিসা হি মে খন্তিৰাদানং, অৰিরোধপ্পসংসিনং;

সুণন্তু ধম্মং কালেন, তঞ্চ অনুৰিধীযন্তু.

৮৭৬. ‘‘ন হি জাতু সো মমং হিংসে, অঞ্ঞং ৰা পন কিঞ্চনং [কঞ্চিনং (সী. স্যা.), কঞ্চনং (?)];

পপ্পুয্য পরমং সন্তিং, রক্খেয্য তসথাৰরে.

৮৭৭. [থেরগা. ১৯] ‘‘উদকঞ্হি নযন্তি নেত্তিকা, উসুকারা নমযন্তি [দমযন্তি (ক.)] তেজনং;

দারুং নমযন্তি [দমযন্তি (ক.)] তচ্ছকা, অত্তানং দমযন্তি পণ্ডিতা.

৮৭৮. ‘‘দণ্ডেনেকে দমযন্তি, অঙ্কুসেভি কসাহি চ;

অদণ্ডেন অসত্থেন, অহং দন্তোম্হি তাদিনা.

৮৭৯. ‘‘‘অহিংসকো’তি মে নামং, হিংসকস্স পুরে সতো;

অজ্জাহং সচ্চনামোম্হি, ন নং হিংসামি কিঞ্চনং [কঞ্চিনং (সী. স্যা.), কঞ্চনং (?)].

৮৮০. ‘‘চোরো অহং পুরে আসিং, অঙ্গুলিমালোতি ৰিস্সুতো;

ৰুয্হমানো মহোঘেন, বুদ্ধং সরণমাগমং.

৮৮১. ‘‘লোহিতপাণি পুরে আসিং, অঙ্গুলিমালোতি ৰিস্সুতো;

সরণগমনং পস্স, ভৰনেত্তি সমূহতা.

৮৮২. ‘‘তাদিসং কম্মং কত্ৰান, বহুং দুগ্গতিগামিনং;

ফুট্ঠো কম্মৰিপাকেন, অনণো ভুঞ্জামি ভোজনং.

৮৮৩. ‘‘পমাদমনুযুঞ্জন্তি, বালা দুম্মেধিনো জনা;

অপ্পমাদঞ্চ মেধাৰী, ধনং সেট্ঠংৰ রক্খতি.

৮৮৪. ‘‘মা পমাদমনুযুঞ্জেথ, মা কামরতিসন্থৰং [সন্ধৰং (ক.)];

অপ্পমত্তো হি ঝাযন্তো, পপ্পোতি পরমং সুখং.

৮৮৫. ‘‘স্ৰাগতং নাপগতং, নেতং দুম্মন্তিতং মম;

সৰিভত্তেসু ধম্মেসু, যং সেট্ঠং তদুপাগমং.

৮৮৬. ‘‘স্ৰাগতং নাপগতং, নেতং দুম্মন্তিতং মম;

তিস্সো ৰিজ্জা অনুপ্পত্তা, কতং বুদ্ধস্স সাসনং.

৮৮৭. ‘‘অরঞ্ঞে রুক্খমূলে ৰা, পব্বতেসু গুহাসু ৰা;

তত্থ তত্থেৰ অট্ঠাসিং, উব্বিগ্গমনসো তদা.

৮৮৮. ‘‘সুখং সযামি ঠাযামি, সুখং কপ্পেমি জীৰিতং;

অহত্থপাসো মারস্স, অহো সত্থানুকম্পিতো.

৮৮৯. ‘‘ব্রহ্মজচ্চো পুরে আসিং, উদিচ্চো উভতো অহু;

সোজ্জ পুত্তো সুগতস্স, ধম্মরাজস্স সত্থুনো.

৮৯০. ‘‘ৰীততণ্হো অনাদানো, গুত্তদ্ৰারো সুসংৰুতো;

অঘমূলং ৰধিত্ৰান, পত্তো মে আসৰক্খযো.

৮৯১. ‘‘পরিচিণ্ণো মযা সত্থা, কতং বুদ্ধস্স সাসনং;

ওহিতো গরুকো ভারো, ভৰনেত্তি সমূহতা’’তি.

… অঙ্গুলিমালো থেরো….