৪. রট্ঠপালত্থেরগাথা

৭৬৯. [ম. নি. ২.৩০২] ‘‘পস্স চিত্তকতং বিম্বং, অরুকাযং সমুস্সিতং;

আতুরং বহুসঙ্কপ্পং, যস্স নত্থি ধুৰং ঠিতি.

৭৭০. ‘‘পস্স চিত্তকতং রূপং, মণিনা কুণ্ডলেন চ;

অট্ঠিং তচেন ওনদ্ধং, সহ ৰত্থেহি সোভতি.

৭৭১. ‘‘অলত্তককতা পাদা, মুখং চুণ্ণকমক্খিতং;

অলং বালস্স মোহায, নো চ পারগৰেসিনো.

৭৭২. ‘‘অট্ঠপদকতা কেসা, নেত্তা অঞ্জনমক্খিতা;

অলং বালস্স মোহায, নো চ পারগৰেসিনো.

৭৭৩. ‘‘অঞ্জনীৰ নৰা চিত্তা, পূতিকাযো অলঙ্কতো;

অলং বালস্স মোহায, নো চ পারগৰেসিনো.

৭৭৪. ‘‘ওদহি মিগৰো পাসং, নাসদা ৰাগুরং মিগো;

ভুত্ৰা নিৰাপং গচ্ছাম, কন্দন্তে মিগবন্ধকে.

৭৭৫. ‘‘ছিন্নো পাসো মিগৰস্স, নাসদা ৰাগুরং মিগো;

ভুত্ৰা নিৰাপং গচ্ছাম, সোচন্তে মিগলুদ্দকে.

৭৭৬. ‘‘পস্সামি লোকে সধনে মনুস্সে, লদ্ধান ৰিত্তং ন দদন্তি মোহা;

লুদ্ধা ধনং সন্নিচযং করোন্তি, ভিয্যোৰ কামে অভিপত্থযন্তি.

৭৭৭. ‘‘রাজা পসয্হপ্পথৰিং ৰিজেত্ৰা, সসাগরন্তং মহিমাৰসন্তো;

ওরং সমুদ্দস্স অতিত্তরূপো, পারং সমুদ্দস্সপি পত্থযেথ.

৭৭৮. ‘‘রাজা চ অঞ্ঞে চ বহূ মনুস্সা, অৰীততণ্হা মরণং উপেন্তি;

ঊনাৰ হুত্ৰান জহন্তি দেহং, কামেহি লোকম্হি ন হত্থি তিত্তি.

৭৭৯. ‘‘কন্দন্তি নং ঞাতী পকিরিয কেসে, অহো ৰতা নো অমরাতি চাহু;

ৰত্থেন নং পারুতং নীহরিত্ৰা, চিতং সমোধায ততো ডহন্তি.

৭৮০. ‘‘সো ডয্হতি সূলেহি তুজ্জমানো, একেন ৰত্থেন [এতেন গত্থেন (ক.)] পহায ভোগে;

ন মীযমানস্স ভৰন্তি তাণা, ঞাতী চ মিত্তা অথ ৰা সহাযা.

৭৮১. ‘‘দাযাদকা তস্স ধনং হরন্তি, সত্তো পন গচ্ছতি যেন কম্মং;

ন মীযমানং ধনমন্ৰেতি [মন্ৰিতি (ক.)] কিঞ্চি, পুত্তা চ দারা চ ধনঞ্চ রট্ঠং.

৭৮২. ‘‘ন দীঘমাযুং লভতে ধনেন, ন চাপি ৰিত্তেন জরং ৰিহন্তি;

অপ্পপ্পং হিদং জীৰিতমাহু ধীরা, অসস্সতং ৰিপ্পরিণামধম্মং.

৭৮৩. ‘‘অড্ঢা দলিদ্দা চ ফুসন্তি ফস্সং, বালো চ ধীরো চ তথেৰ ফুট্ঠো;

বালো হি বাল্যা ৰধিতোৰ সেতি, ধীরো চ নো ৰেধতি ফস্সফুট্ঠো.

৭৮৪. ‘‘তস্মা হি পঞ্ঞাৰ ধনেন সেয্যা, যায ৰোসানমিধাধিগচ্ছতি;

অব্যোসিতত্তা হি ভৰাভৰেসু, পাপানি কম্মানি করোতি মোহা.

৭৮৫. ‘‘উপেতি গব্ভঞ্চ পরঞ্চ লোকং, সংসারমাপজ্জ পরম্পরায;

তস্সপ্পপঞ্ঞো অভিসদ্দহন্তো, উপেতি গব্ভঞ্চ পরঞ্চ লোকং.

৭৮৬. ‘‘চোরো যথা সন্ধিমুখে গহীতো, সকম্মুনা হঞ্ঞতি পাপধম্মো;

এৰং পজা পেচ্চ পরম্হি লোকে, সকম্মুনা হঞ্ঞতি পাপধম্মো.

৭৮৭. ‘‘কামা হি চিত্রা মধুরা মনোরমা, ৰিরূপরূপেন মথেন্তি চিত্তং;

আদীনৰং কামগুণেসু দিস্ৰা, তস্মা অহং পব্বজিতোম্হি রাজ.

৭৮৮. ‘‘দুমপ্ফলানীৰ পতন্তি মাণৰা, দহরা চ ৰুড্ঢা চ সরীরভেদা;

এতম্পি দিস্ৰা পব্বজিতোম্হি রাজ, অপণ্ণকং সামঞ্ঞমেৰ সেয্যো.

৭৮৯. ‘‘সদ্ধাযাহং পব্বজিতো, উপেতো জিনসাসনে;

অৰজ্ঝা ময্হং পব্বজ্জা, অনণো ভুঞ্জামি ভোজনং.

৭৯০. ‘‘কামে আদিত্ততো দিস্ৰা, জাতরূপানি সত্থতো;

গব্ভৰোক্কন্তিতো দুক্খং, নিরযেসু মহব্ভযং.

৭৯১. ‘‘এতমাদীনৰং ঞত্ৰা, সংৰেগং অলভিং তদা;

সোহং ৰিদ্ধো তদা সন্তো, সম্পত্তো আসৰক্খযং.

৭৯২. ‘‘পরিচিণ্ণো মযা সত্থা, কতং বুদ্ধস্স সাসনং;

ওহিতো গরুকো ভারো, ভৰনেত্তি সমূহতা.

৭৯৩. ‘‘যস্সত্থায পব্বজিতো, অগারস্মানগারিযং;

সো মে অত্থো অনুপ্পত্তো, সব্বসংযোজনক্খযো’’তি.

… রট্ঠপালো থেরো….