১৫. সোল়সকনিপাতো

১. অঞ্ঞাসিকোণ্ডঞ্ঞত্থেরগাথা

৬৭৩. ‘‘এস ভিয্যো পসীদামি, সুত্ৰা ধম্মং মহারসং;

ৰিরাগো দেসিতো ধম্মো, অনুপাদায সব্বসো.

৬৭৪. ‘‘বহূনি লোকে চিত্রানি, অস্মিং পথৰিমণ্ডলে;

মথেন্তি মঞ্ঞে সঙ্কপ্পং, সুভং রাগূপসংহিতং.

৬৭৫. ‘‘রজমুহতঞ্চ ৰাতেন, যথা মেঘোপসম্মযে;

এৰং সম্মন্তি সঙ্কপ্পা, যদা পঞ্ঞায পস্সতি.

৬৭৬. [ধ. প. ২৭৭ ধম্মপদে] ‘‘সব্বে সঙ্খারা অনিচ্চাতি, যদা পঞ্ঞায পস্সতি;

অথ নিব্বিন্দতি দুক্খে, এস মগ্গো ৰিসুদ্ধিযা.

৬৭৭. [ধ. প. ২৭৮ ধম্মপদে] ‘‘সব্বে সঙ্খারা দুক্খাতি, যদা পঞ্ঞায পস্সতি

অথ নিব্বিন্দতি দুক্খে, এস মগ্গো ৰিসুদ্ধিযা.

৬৭৮. [ধ. প. ২৭৯ ধম্মপদে] ‘‘সব্বে ধম্মা অনত্তাতি, যদা পঞ্ঞায পস্সতি;

অথ নিব্বিন্দতি দুক্খে, এস মগ্গো ৰিসুদ্ধিযা.

৬৭৯. ‘‘বুদ্ধানুবুদ্ধো যো থেরো, কোণ্ডঞ্ঞো তিব্বনিক্কমো;

পহীনজাতিমরণো, ব্রহ্মচরিযস্স কেৰলী.

৬৮০. ‘‘ওঘপাসো দল়্হখিলো [দল়্হো খিলো (স্যা. ক.)], পব্বতো দুপ্পদালযো;

ছেত্ৰা খিলঞ্চ পাসঞ্চ, সেলং ভেত্ৰান [ছেত্ৰান (ক.)] দুব্ভিদং;

তিণ্ণো পারঙ্গতো ঝাযী, মুত্তো সো মারবন্ধনা.

৬৮১. ‘‘উদ্ধতো চপলো ভিক্খু, মিত্তে আগম্ম পাপকে;

সংসীদতি মহোঘস্মিং, ঊমিযা পটিকুজ্জিতো.

৬৮২. ‘‘অনুদ্ধতো অচপলো, নিপকো সংৰুতিন্দ্রিযো;

কল্যাণমিত্তো মেধাৰী, দুক্খস্সন্তকরো সিযা.

৬৮৩. ‘‘কালপব্বঙ্গসঙ্কাসো, কিসো ধমনিসন্থতো;

মত্তঞ্ঞূ অন্নপানস্মিং, অদীনমনসো নরো.

৬৮৪. ‘‘ফুট্ঠো ডংসেহি মকসেহি, অরঞ্ঞস্মিং ব্রহাৰনে;

নাগো সঙ্গামসীসেৰ, সতো তত্রাধিৰাসযে.

৬৮৫. ‘‘নাভিনন্দামি মরণং…পে… নিব্বিসং ভতকো যথা.

৬৮৬. ‘‘নাভিনন্দামি মরণং…পে… সম্পজানো পতিস্সতো.

৬৮৭. ‘‘পরিচিণ্ণো মযা সত্থা…পে… ভৰনেত্তি সমূহতা.

৬৮৮. ‘‘যস্স চত্থায পব্বজিতো, অগারস্মানগারিযং;

সো মে অত্থো অনুপ্পত্তো, কিং মে সদ্ধিৰিহারিনা’’তি.

… অঞ্ঞাসিকোণ্ডঞ্ঞো [অঞ্ঞাকোণ্ডঞ্ঞো (সী. স্যা.)] থেরো….

২. উদাযিত্থেরগাথা

৬৮৯. [অ. নি. ৬.৪৩] ‘‘মনুস্সভূতং সম্বুদ্ধং, অত্তদন্তং সমাহিতং;

ইরিযমানং ব্রহ্মপথে, চিত্তস্সূপসমে রতং.

৬৯০. ‘‘যং মনুস্সা নমস্সন্তি, সব্বধম্মান পারগুং;

দেৰাপি তং নমস্সন্তি, ইতি মে অরহতো সুতং.

৬৯১. ‘‘সব্বসংযোজনাতীতং, ৰনা নিব্বনমাগতং;

কামেহি নেক্খম্মরতং [নিক্খম্মরতং (ক.)], মুত্তং সেলাৰ কঞ্চনং.

৬৯২. ‘‘স ৰে অচ্চরুচি নাগো, হিমৰাৰঞ্ঞে সিলুচ্চযে;

সব্বেসং নাগনামানং, সচ্চনামো অনুত্তরো.

৬৯৩. ‘‘নাগং ৰো কিত্তযিস্সামি, ন হি আগুং করোতি সো;

সোরচ্চং অৰিহিংসা চ, পাদা নাগস্স তে দুৰে.

৬৯৪. ‘‘সতি চ সম্পজঞ্ঞঞ্চ, চরণা নাগস্স তেপরে;

সদ্ধাহত্থো মহানাগো, উপেক্খাসেতদন্তৰা.

৬৯৫. ‘‘সতি গীৰা সিরো পঞ্ঞা, ৰীমংসা ধম্মচিন্তনা;

ধম্মকুচ্ছিসমাৰাসো, ৰিৰেকো তস্স ৰালধি.

৬৯৬. ‘‘সো ঝাযী অস্সাসরতো, অজ্ঝত্তং সুসমাহিতো;

গচ্ছং সমাহিতো নাগো, ঠিতো নাগো সমাহিতো.

৬৯৭. ‘‘সযং সমাহিতো নাগো, নিসিন্নোপি সমাহিতো;

সব্বত্থ সংৰুতো নাগো, এসা নাগস্স সম্পদা.

৬৯৮. ‘‘ভুঞ্জতি অনৰজ্জানি, সাৰজ্জানি ন ভুঞ্জতি;

ঘাসমচ্ছাদনং লদ্ধা, সন্নিধিং পরিৰজ্জযং.

৬৯৯. ‘‘সংযোজনং অণুং থূলং, সব্বং ছেত্ৰান বন্ধনং;

যেন যেনেৰ গচ্ছতি, অনপক্খোৰ গচ্ছতি.

৭০০. ‘‘যথাপি উদকে জাতং, পুণ্ডরীকং পৰড্ঢতি;

নোপলিপ্পতি তোযেন, সুচিগন্ধং মনোরমং.

৭০১. ‘‘তথেৰ চ লোকে জাতো, বুদ্ধো লোকে ৰিহরতি;

নোপলিপ্পতি লোকেন, তোযেন পদুমং যথা.

৭০২. ‘‘মহাগিনি পজ্জলিতো, অনাহারোপসম্মতি;

অঙ্গারেসু চ সন্তেসু, নিব্বুতোতি পৰুচ্চতি.

৭০৩. ‘‘অত্থস্সাযং ৰিঞ্ঞাপনী, উপমা ৰিঞ্ঞূহি দেসিতা;

ৰিঞ্ঞিস্সন্তি মহানাগা, নাগং নাগেন দেসিতং.

৭০৪. ‘‘ৰীতরাগো ৰীতদোসো, ৰীতমোহো অনাসৰো;

সরীরং ৰিজহং নাগো, পরিনিব্বিস্সত্যনাসৰো’’তি.

… উদাযী থেরো….

সোল়সকনিপাতো নিট্ঠিতো.