২. গোদত্তত্থেরগাথা

৬৫৯. ‘‘যথাপি ভদ্দো আজঞ্ঞো, ধুরে যুত্তো ধুরস্সহো [ধুরাসহো (অট্ঠ.)];

মথিতো অতিভারেন, সংযুগং নাতিৰত্ততি.

৬৬০. ‘‘এৰং পঞ্ঞায যে তিত্তা, সমুদ্দো ৰারিনা যথা;

ন পরে অতিমঞ্ঞন্তি, অরিযধম্মোৰ পাণিনং.

৬৬১. ‘‘কালে কালৰসং পত্তা, ভৰাভৰৰসং গতা;

নরা দুক্খং নিগচ্ছন্তি, তেধ সোচন্তি মাণৰা [মানৰা (সী.)].

৬৬২. ‘‘উন্নতা সুখধম্মেন, দুক্খধম্মেন চোনতা;

দ্ৰযেন বালা হঞ্ঞন্তি, যথাভূতং অদস্সিনো.

৬৬৩. ‘‘যে চ দুক্খে সুখস্মিঞ্চ, মজ্ঝে সিব্বিনিমচ্চগূ;

ঠিতা তে ইন্দখীলোৰ, ন তে উন্নতওনতা.

৬৬৪. ‘‘ন হেৰ লাভে নালাভে, ন যসে ন চ কিত্তিযা;

ন নিন্দাযং পসংসায, ন তে দুক্খে সুখম্হি.

৬৬৫. ‘‘সব্বত্থ তে ন লিম্পন্তি, উদবিন্দুৰ পোক্খরে;

সব্বত্থ সুখিতা ধীরা, সব্বত্থ অপরাজিতা.

৬৬৬. ‘‘ধম্মেন চ অলাভো যো, যো চ লাভো অধম্মিকো;

অলাভো ধম্মিকো সেয্যো, যং চে লাভো অধম্মিকো.

৬৬৭. ‘‘যসো চ অপ্পবুদ্ধীনং, ৰিঞ্ঞূনং অযসো চ যো;

অযসোৰ সেয্যো ৰিঞ্ঞূনং, ন যসো অপ্পবুদ্ধিনং.

৬৬৮. ‘‘দুম্মেধেহি পসংসা চ, ৰিঞ্ঞূহি গরহা চ যা;

গরহাৰ সেয্যো ৰিঞ্ঞূহি, যং চে বালপ্পসংসনা.

৬৬৯. ‘‘সুখঞ্চ কামমযিকং, দুক্খঞ্চ পৰিৰেকিযং;

পৰিৰেকদুক্খং সেয্যো, যং চে কামমযং সুখং.

৬৭০. ‘‘জীৰিতঞ্চ অধম্মেন, ধম্মেন মরণঞ্চ যং;

মরণং ধম্মিকং সেয্যো, যং চে জীৰে অধম্মিকং.

৬৭১. ‘‘কামকোপপ্পহীনা যে, সন্তচিত্তা ভৰাভৰে;

চরন্তি লোকে অসিতা, নত্থি তেসং পিযাপিযং.

৬৭২. ‘‘ভাৰযিত্ৰান বোজ্ঝঙ্গে, ইন্দ্রিযানি বলানি চ;

পপ্পুয্য পরমং সন্তিং, পরিনিব্বন্তিনাসৰা’’তি.

… গোদত্তো থেরো….

চুদ্দসকনিপাতো নিট্ঠিতো.