১. খদিরৰনিযরেৰতত্থেরগাথা

৬৪৫. ‘‘যদা অহং পব্বজিতো, অগারস্মানগারিযং;

নাভিজানামি সঙ্কপ্পং, অনরিযং দোসসংহিতং.

৬৪৬. ‘‘‘ইমে হঞ্ঞন্তু ৰজ্ঝন্তু, দুক্খং পপ্পোন্তু পাণিনো’;

সঙ্কপ্পং নাভিজানামি, ইমস্মিং দীঘমন্তরে.

৬৪৭. ‘‘মেত্তঞ্চ অভিজানামি, অপ্পমাণং সুভাৰিতং;

অনুপুব্বং পরিচিতং, যথা বুদ্ধেন দেসিতং.

৬৪৮. ‘‘সব্বমিত্তো সব্বসখো, সব্বভূতানুকম্পকো;

মেত্তচিত্তঞ্চ [মেত্তং চিত্তং (সী. স্যা.)] ভাৰেমি, অব্যাপজ্জরতো [অব্যাপজ্ঝরতো (সী. স্যা.)] সদা.

৬৪৯. ‘‘অসংহীরং অসংকুপ্পং, চিত্তং আমোদযামহং;

ব্রহ্মৰিহারং ভাৰেমি, অকাপুরিসসেৰিতং.

৬৫০. ‘‘অৰিতক্কং সমাপন্নো, সম্মাসম্বুদ্ধসাৰকো;

অরিযেন তুণ্হীভাৰেন, উপেতো হোতি তাৰদে.

৬৫১. ‘‘যথাপি পব্বতো সেলো, অচলো সুপ্পতিট্ঠিতো;

এৰং মোহক্খযা ভিক্খু, পব্বতোৰ ন ৰেধতি.

৬৫২. ‘‘অনঙ্গণস্স পোসস্স, নিচ্চং সুচিগৰেসিনো;

ৰালগ্গমত্তং পাপস্স, অব্ভমত্তংৰ খাযতি.

৬৫৩. ‘‘নগরং যথা পচ্চন্তং, গুত্তং সন্তরবাহিরং;

এৰং গোপেথ অত্তানং, খণো ৰো মা উপচ্চগা.

৬৫৪. ‘‘নাভিনন্দামি মরণং, নাভিনন্দামি জীৰিতং;

কালঞ্চ পটিকঙ্খামি, নিব্বিসং ভতকো যথা.

৬৫৫. ‘‘নাভিনন্দামি মরণং…পে… সম্পজানো পতিস্সতো.

৬৫৬. ‘‘পরিচিণ্ণো মযা সত্থা, কতং বুদ্ধস্স সাসনং;

ওহিতো গরুকো ভারো, ভৰনেত্তি সমূহতা.

৬৫৭. ‘‘যস্স চত্থায পব্বজিতো, অগারস্মানগারিযং;

সো মে অত্থো অনুপ্পত্তো, সব্বসংযোজনক্খযো.

৬৫৮. ‘‘সম্পাদেথপ্পমাদেন, এসা মে অনুসাসনী;

হন্দাহং পরিনিব্বিস্সং, ৰিপ্পমুত্তোম্হি সব্বধী’’তি.

… খদিরৰনিযরেৰতো থেরো….