১১. একাদসনিপাতো

১. সংকিচ্চত্থেরগাথা

৫৯৭. ‘‘কিং তৰত্থো ৰনে তাত, উজ্জুহানোৰ পাৰুসে;

ৰেরম্ভা রমণীযা তে, পৰিৰেকো হি ঝাযিনং.

৫৯৮. ‘‘যথা অব্ভানি ৰেরম্ভো, ৰাতো নুদতি পাৰুসে;

সঞ্ঞা মে অভিকিরন্তি, ৰিৰেকপটিসঞ্ঞুতা.

৫৯৯. ‘‘অপণ্ডরো অণ্ডসম্ভৰো, সীৰথিকায নিকেতচারিকো;

উপ্পাদযতেৰ মে সতিং, সন্দেহস্মিং ৰিরাগনিস্সিতং.

৬০০. ‘‘যঞ্চ অঞ্ঞে ন রক্খন্তি, যো চ অঞ্ঞে ন রক্খতি;

স ৰে ভিক্খু সুখং সেতি, কামেসু অনপেক্খৰা.

৬০১. ‘‘অচ্ছোদিকা পুথুসিলা, গোনঙ্গুলমিগাযুতা;

অম্বুসেৰালসঞ্ছন্না, তে সেলা রমযন্তি মং.

৬০২. ‘‘ৰসিতং মে অরঞ্ঞেসু, কন্দরাসু গুহাসু চ;

সেনাসনেসু পন্তেসু, ৰাল়মিগনিসেৰিতে.

৬০৩. ‘‘‘ইমে হঞ্ঞন্তু ৰজ্ঝন্তু, দুক্খং পপ্পোন্তু পাণিনো’;

সঙ্কপ্পং নাভিজানামি, অনরিযং দোসসংহিতং.

৬০৪. ‘‘পরিচিণ্ণো মযা সত্থা, কতং বুদ্ধস্স সাসনং;

ওহিতো গরুকো ভারো, ভৰনেত্তি সমূহতা.

৬০৫. ‘‘যস্স চত্থায [যস্সত্থায (সী.)] পব্বজিতো, অগারস্মানগারিযং;

সো মে অত্থো অনুপ্পত্তো, সব্বসংযোজনক্খযো.

৬০৬. ‘‘নাভিনন্দামি মরণং, নাভিনন্দামি জীৰিতং;

কালঞ্চ পটিকঙ্খামি, নিব্বিসং ভতকো যথা.

৬০৭. ‘‘নাভিনন্দামি মরণং, নাভিনন্দামি জীৰিতং;

কালঞ্চ পটিকঙ্খামি, সম্পজানো পতিস্সতো’’তি.

… সংকিচ্চো থেরো….

একাদসনিপাতো নিট্ঠিতো.