১২. দ্ৰাদসকনিপাতো

১. সীলৰত্থেরগাথা

৬০৮. ‘‘সীলমেৰিধ সিক্খেথ, অস্মিং লোকে সুসিক্খিতং;

সীলং হি সব্বসম্পত্তিং, উপনামেতি সেৰিতং.

৬০৯. ‘‘সীলং রক্খেয্য মেধাৰী, পত্থযানো তযো সুখে;

পসংসং ৰিত্তিলাভঞ্চ, পেচ্চ সগ্গে পমোদনং [পেচ্চ সগ্গে চ মোদনং (সী. পী.)].

৬১০. ‘‘সীলৰা হি বহূ মিত্তে, সঞ্ঞমেনাধিগচ্ছতি;

দুস্সীলো পন মিত্তেহি, ধংসতে পাপমাচরং.

৬১১. ‘‘অৰণ্ণঞ্চ অকিত্তিঞ্চ, দুস্সীলো লভতে নরো;

ৰণ্ণং কিত্তিং পসংসঞ্চ, সদা লভতি সীলৰা.

৬১২. ‘‘আদি সীলং পতিট্ঠা চ, কল্যাণানঞ্চ মাতুকং;

পমুখং সব্বধম্মানং, তস্মা সীলং ৰিসোধযে.

৬১৩. ‘‘ৰেলা চ সংৰরং সীলং [সংৰরো সীলং (সী.), সংৰরসীলং (সী. অট্ঠ.)], চিত্তস্স অভিহাসনং;

তিত্থঞ্চ সব্ববুদ্ধানং, তস্মা সীলং ৰিসোধযে.

৬১৪. ‘‘সীলং বলং অপ্পটিমং, সীলং আৰুধমুত্তমং;

সীলমাভরণং সেট্ঠং, সীলং কৰচমব্ভুতং.

৬১৫. ‘‘সীলং সেতু মহেসক্খো, সীলং গন্ধো অনুত্তরো;

সীলং ৰিলেপনং সেট্ঠং, যেন ৰাতি দিসোদিসং.

৬১৬. ‘‘সীলং সম্বলমেৰগ্গং, সীলং পাথেয্যমুত্তমং;

সীলং সেট্ঠো অতিৰাহো, যেন যাতি দিসোদিসং.

৬১৭. ‘‘ইধেৰ নিন্দং লভতি, পেচ্চাপাযে চ দুম্মনো;

সব্বত্থ দুম্মনো বালো, সীলেসু অসমাহিতো.

৬১৮. ‘‘ইধেৰ কিত্তিং লভতি, পেচ্চ সগ্গে চ সুম্মনো;

সব্বত্থ সুমনো ধীরো, সীলেসু সুসমাহিতো.

৬১৯. ‘‘সীলমেৰ ইধ অগ্গং, পঞ্ঞৰা পন উত্তমো;

মনুস্সেসু চ দেৰেসু, সীলপঞ্ঞাণতো জয’’ন্তি.

… সীলৰো থেরো….

২. সুনীতত্থেরগাথা

৬২০. ‘‘নীচে কুলম্হি জাতোহং, দলিদ্দো অপ্পভোজনো;

হীনকম্মং [হীনং কম্মং (স্যা.)] মমং আসি, অহোসিং পুপ্ফছড্ডকো.

৬২১. ‘‘জিগুচ্ছিতো মনুস্সানং, পরিভূতো চ ৰম্ভিতো;

নীচং মনং করিত্ৰান, ৰন্দিস্সং বহুকং জনং.

৬২২. ‘‘অথদ্দসাসিং সম্বুদ্ধং, ভিক্খুসঙ্ঘপুরক্খতং;

পৰিসন্তং মহাৰীরং, মগধানং পুরুত্তমং.

৬২৩. ‘‘নিক্খিপিত্ৰান ব্যাভঙ্গিং, ৰন্দিতুং উপসঙ্কমিং;

মমেৰ অনুকম্পায, অট্ঠাসি পুরিসুত্তমো.

৬২৪. ‘‘ৰন্দিত্ৰা সত্থুনো পাদে, একমন্তং ঠিতো তদা;

পব্বজ্জং অহমাযাচিং, সব্বসত্তানমুত্তমং.

৬২৫. ‘‘ততো কারুণিকো সত্থা, সব্বলোকানুকম্পকো;

‘এহি ভিক্খূ’তি মং আহ, সা মে আসূপসম্পদা.

৬২৬. ‘‘সোহং একো অরঞ্ঞস্মিং, ৰিহরন্তো অতন্দিতো;

অকাসিং সত্থুৰচনং, যথা মং ওৰদী জিনো.

৬২৭. ‘‘রত্তিযা পঠমং যামং, পুব্বজাতিমনুস্সরিং;

রত্তিযা মজ্ঝিমং যামং, দিব্বচক্খুং ৰিসোধযিং [দিব্বচক্খু ৰিসোধিতং (ক.)];

রত্তিযা পচ্ছিমে যামে, তমোখন্ধং পদালযিং.

৬২৮. ‘‘ততো রত্যা ৰিৰসানে, সূরিযস্সুগ্গমনং পতি;

ইন্দো ব্রহ্মা চ আগন্ত্ৰা, মং নমস্সিংসু পঞ্জলী.

৬২৯. ‘‘‘নমো তে পুরিসাজঞ্ঞ, নমো তে পুরিসুত্তম;

যস্স তে আসৰা খীণা, দক্খিণেয্যোসি মারিস’.

৬৩০. ‘‘ততো দিস্ৰান মং সত্থা, দেৰসঙ্ঘপুরক্খতং;

সিতং পাতুকরিত্ৰান, ইমমত্থং অভাসথ.

৬৩১. [সু. নি. ৬৬০ সুত্তনিপাতেপি] ‘‘‘তপেন ব্রহ্মচরিযেন, সংযমেন দমেন চ;

এতেন ব্রাহ্মণো হোতি, এতং ব্রাহ্মণমুত্তম’’’ন্তি.

… সুনীতো থেরো….

দ্ৰাদসকনিপাতো নিট্ঠিতো.