৯. নৰমৰগ্গো

৮১. ‘‘যং মযা পকতং পাপং, পুব্বে অঞ্ঞাসু জাতিসু;

ইধেৰ তং ৰেদনীযং, ৰত্থু অঞ্ঞং ন ৰিজ্জতী’’তি.

… সমিতিগুত্তো থেরো….

৮২. ‘‘যেন যেন সুভিক্খানি, সিৰানি অভযানি চ;

তেন পুত্তক গচ্ছস্সু, মা সোকাপহতো ভৰা’’তি.

… কস্সপো থেরো….

৮৩. ‘‘সীহপ্পমত্তো ৰিহর, রত্তিন্দিৰমতন্দিতো;

ভাৰেহি কুসলং ধম্মং, জহ সীঘং সমুস্সয’’ন্তি.

… সীহো থেরো….

৮৪. ‘‘সব্বরত্তিং সুপিত্ৰান, দিৰা সঙ্গণিকে রতো;

কুদাস্সু নাম দুম্মেধো, দুক্খস্সন্তং করিস্সতী’’তি.

… নীতো থেরো….

৮৫. ‘‘চিত্তনিমিত্তস্স কোৰিদো, পৰিৰেকরসং ৰিজানিয;

ঝাযং নিপকো পতিস্সতো, অধিগচ্ছেয্য সুখং নিরামিস’’ন্তি.

… সুনাগো থেরো….

৮৬. ‘‘ইতো বহিদ্ধা পুথু অঞ্ঞৰাদিনং, মগ্গো ন নিব্বানগমো যথা অযং;

ইতিস্সু সঙ্ঘং ভগৰানুসাসতি, সত্থা সযং পাণিতলেৰ দস্সয’’ন্তি.

… নাগিতো থেরো….

৮৭. ‘‘খন্ধা দিট্ঠা যথাভূতং, ভৰা সব্বে পদালিতা;

ৰিক্খীণো জাতিসংসারো, নত্থি দানি পুনব্ভৰো’’তি.

… পৰিট্ঠো থেরো….

৮৮. ‘‘অসক্খিং ৰত অত্তানং, উদ্ধাতুং উদকা থলং;

ৰুয্হমানো মহোঘেৰ, সচ্চানি পটিৰিজ্ঝহ’’ন্তি.

… অজ্জুনো থেরো….

৮৯. ‘‘উত্তিণ্ণা পঙ্কপলিপা, পাতালা পরিৰজ্জিতা;

মুত্তো ওঘা চ গন্থা চ, সব্বে মানা ৰিসংহতা’’তি.

… দেৰসভো থেরো….

৯০. ‘‘পঞ্চক্খন্ধা পরিঞ্ঞাতা, তিট্ঠন্তি ছিন্নমূলকা;

ৰিক্খীণো জাতিসংসারো, নত্থি দানি পুনব্ভৰো’’তি.

… সামিদত্তো থেরো….

ৰগ্গো নৰমো নিট্ঠিতো.

তস্সুদ্দানং –

থেরো সমিতিগুত্তো চ, কস্সপো সীহসৰ্হযো;

নীতো সুনাগো নাগিতো, পৰিট্ঠো অজ্জুনো ইসি;

দেৰসভো চ যো থেরো, সামিদত্তো মহব্বলোতি.