১০. দসমৰগ্গো

১. পরিপুণ্ণকত্থেরগাথা

৯১. ‘‘ন তথা মতং সতরসং, সুধন্নং যং মযজ্জ পরিভুত্তং;

অপরিমিতদস্সিনা গোতমেন, বুদ্ধেন দেসিতো ধম্মো’’তি.

… পরিপুণ্ণকো থেরো….

২. ৰিজযত্থেরগাথা

৯২. ‘‘যস্সাসৰা পরিক্খীণা, আহারে চ অনিস্সিতো;

সুঞ্ঞতা অনিমিত্তো চ, ৰিমোক্খো যস্স গোচরো;

আকাসেৰ সকুন্তানং, পদং তস্স দুরন্নয’’ন্তি.

… ৰিজযো থেরো….

৩. এরকত্থেরগাথা

৯৩. ‘‘দুক্খা কামা এরক, ন সুখা কামা এরক;

যো কামে কামযতি, দুক্খং সো কামযতি এরক;

যো কামে ন কামযতি, দুক্খং সো ন কামযতি এরকা’’তি.

… এরকো থেরো….

৪. মেত্তজিত্থেরগাথা

৯৪. ‘‘নমো হি তস্স ভগৰতো, সক্যপুত্তস্স সিরীমতো;

তেনাযং অগ্গপ্পত্তেন, অগ্গধম্মো [অগ্গো ধম্মো (সী.)] সুদেসিতো’’তি.

… মেত্তজি থেরো….

৫. চক্খুপালত্থেরগাথা

৯৫. ‘‘অন্ধোহং হতনেত্তোস্মি, কন্তারদ্ধানপক্খন্দো [পক্খন্নো (সী.), পক্কন্তো (স্যা. সী. অট্ঠ.)];

সযমানোপি গচ্ছিস্সং, ন সহাযেন পাপেনা’’তি.

… চক্খুপালো থেরো….

৬. খণ্ডসুমনত্থেরগাথা

৯৬. ‘‘একপুপ্ফং চজিত্ৰান, অসীতি [অসীতিং (সী.)] ৰস্সকোটিযো;

সগ্গেসু পরিচারেত্ৰা, সেসকেনম্হি নিব্বুতো’’তি.

… খণ্ডসুমনো থেরো….

৭. তিস্সত্থেরগাথা

৯৭. ‘‘হিত্ৰা সতপলং কংসং, সোৰণ্ণং সতরাজিকং;

অগ্গহিং মত্তিকাপত্তং, ইদং দুতিযাভিসেচন’’ন্তি.

… তিস্সো থেরো….

৮. অভযত্থেরগাথা

৯৮. ‘‘রূপং দিস্ৰা সতি মুট্ঠা, পিযং নিমিত্তং মনসিকরোতো;

সারত্তচিত্তো ৰেদেতি, তঞ্চ অজ্ঝোস তিট্ঠতি;

তস্স ৰড্ঢন্তি আসৰা, ভৰমূলোপগামিনো’’তি [ভৰমূলা ভৰগামিনোতি (সী. ক.)].

… অভযো থেরো….

৯. উত্তিযত্থেরগাথা

৯৯. ‘‘সদ্দং সুত্ৰা সতি মুট্ঠা, পিযং নিমিত্তং মনসিকরোতো;

সারত্তচিত্তো ৰেদেতি, তঞ্চ অজ্ঝোস তিট্ঠতি;

তস্স ৰড্ঢন্তি আসৰা, সংসারং উপগামিনো’’তি.

… উত্তিযো থেরো….

১০. (দুতিয)-দেৰসভত্থেরগাথা

১০০. ‘‘সম্মপ্পধানসম্পন্নো, সতিপট্ঠানগোচরো;

ৰিমুত্তিকুসুমসঞ্ছন্নো, পরিনিব্বিস্সত্যনাসৰো’’তি.

… দেৰসভো থেরো….

ৰগ্গো দসমো নিট্ঠিতো.

তস্সুদ্দানং –

পরিপুণ্ণকো চ ৰিজযো, এরকো মেত্তজী মুনি;

চক্খুপালো খণ্ডসুমনো, তিস্সো চ অভযো তথা;

উত্তিযো চ মহাপঞ্ঞো, থেরো দেৰসভোপি চাতি.