১১. একাদসমৰগ্গো

১. বেলট্ঠানিকত্থেরগাথা

১০১. ‘‘হিত্ৰা গিহিত্তং অনৰোসিতত্তো, মুখনঙ্গলী ওদরিকো কুসীতো;

মহাৰরাহোৰ নিৰাপপুট্ঠো, পুনপ্পুনং গব্ভমুপেতি মন্দো’’তি.

… বেলট্ঠানিকো থেরো….

২. সেতুচ্ছত্থেরগাথা

১০২. ‘‘মানেন ৰঞ্চিতাসে, সঙ্খারেসু সংকিলিস্সমানাসে;

লাভালাভেন মথিতা, সমাধিং নাধিগচ্ছন্তী’’তি.

… সেতুচ্ছো থেরো….

৩. বন্ধুরত্থেরগাথা

১০৩. ‘‘নাহং এতেন অত্থিকো, সুখিতো ধম্মরসেন তপ্পিতো;

পিত্ৰা [পীত্ৰান (সী. স্যা.)] রসগ্গমুত্তমং, ন চ কাহামি ৰিসেন সন্থৰ’’ন্তি.

… বন্ধুরো [বন্ধনো (ক.)] থেরো….

৪. খিতকত্থেরগাথা

১০৪. ‘‘লহুকো ৰত মে কাযো, ফুট্ঠো চ পীতিসুখেন ৰিপুলেন;

তূলমিৰ এরিতং মালুতেন, পিলৰতীৰ মে কাযো’’তি.

… খিতকো থেরো….

৫. মলিতৰম্ভত্থেরগাথা

১০৫. ‘‘উক্কণ্ঠিতোপি ন ৰসে, রমমানোপি পক্কমে;

ন ত্ৰেৰানত্থসংহিতং, ৰসে ৰাসং ৰিচক্খণো’’তি.

… মলিতৰম্ভো থেরো….

৬. সুহেমন্তত্থেরগাথা

১০৬. ‘‘সতলিঙ্গস্স অত্থস্স, সতলক্খণধারিনো;

একঙ্গদস্সী দুম্মেধো, সতদস্সী চ পণ্ডিতো’’তি.

… সুহেমন্তো থেরো….

৭. ধম্মসৰত্থেরগাথা

১০৭. ‘‘পব্বজিং তুলযিত্ৰান, অগারস্মানগারিযং;

তিস্সো ৰিজ্জা অনুপ্পত্তা, কতং বুদ্ধস্স সাসন’’ন্তি.

… ধম্মসৰো থেরো….

৮. ধম্মসৰপিতুত্থেরগাথা

১০৮. ‘‘স ৰীসৰস্সসতিকো, পব্বজিং অনগারিযং;

তিস্সো ৰিজ্জা অনুপ্পত্তা, কতং বুদ্ধস্স সাসন’’ন্তি.

… ধম্মসৰপিতু থেরো….

৯. সঙ্ঘরক্খিতত্থেরগাথা

১০৯. ‘‘ন নূনাযং পরমহিতানুকম্পিনো, রহোগতো অনুৰিগণেতি সাসনং;

তথাহযং ৰিহরতি পাকতিন্দ্রিযো, মিগী যথা তরুণজাতিকা ৰনে’’তি.

… সঙ্ঘরক্খিতো থেরো….

১০. উসভত্থেরগাথা

১১০. ‘‘নগা নগগ্গেসু সুসংৰিরূল়্হা, উদগ্গমেঘেন নৰেন সিত্তা;

ৰিৰেককামস্স অরঞ্ঞসঞ্ঞিনো, জনেতি ভিয্যো উসভস্স কল্যত’’ন্তি.

… উসভো থেরো….

ৰগ্গো একাদসমো নিট্ঠিতো.

তস্সুদ্দানং –

বেলট্ঠানিকো সেতুচ্ছো, বন্ধুরো খিতকো ইসি;

মলিতৰম্ভো সুহেমন্তো, ধম্মসৰো ধম্মসৰপিতা;

সঙ্ঘরক্খিতত্থেরো চ, উসভো চ মহামুনীতি.