১২. দ্ৰাদসমৰগ্গো

১. জেন্তত্থেরগাথা

১১১. ‘‘দুপ্পব্বজ্জং ৰে দুরধিৰাসা গেহা, ধম্মো গম্ভীরো দুরধিগমা ভোগা;

কিচ্ছা ৰুত্তি নো ইতরীতরেনেৰ, যুত্তং চিন্তেতুং সততমনিচ্চত’’ন্তি.

… জেন্তো থেরো….

২. ৰচ্ছগোত্তত্থেরগাথা

১১২. ‘‘তেৰিজ্জোহং মহাঝাযী, চেতোসমথকোৰিদো;

সদত্থো মে অনুপ্পত্তো, কতং বুদ্ধস্স সাসন’’ন্তি.

… ৰচ্ছগোত্তো থেরো….

৩. ৰনৰচ্ছত্থেরগাথা

১১৩. ‘‘অচ্ছোদিকা পুথুসিলা,গোনঙ্গুলমিগাযুতা;

অম্বুসেৰালসঞ্ছন্না, তে সেলা রমযন্তি ম’’ন্তি.

… ৰনৰচ্ছো থেরো….

৪. অধিমুত্তত্থেরগাথা

১১৪. ‘‘কাযদুট্ঠুল্লগরুনো, হিয্যমানম্হি [হীযমানম্হি (সী.)] জীৰিতে;

সরীরসুখগিদ্ধস্স, কুতো সমণসাধুতা’’তি.

… অধিমুত্তো থেরো….

৫. মহানামত্থেরগাথা

১১৫. ‘‘এসাৰহিয্যসে পব্বতেন, বহুকুটজসল্লকিকেন [সল্লকিতেন (সী.), সল্লরিকেন (স্যা.)];

নেসাদকেন গিরিনা, যসস্সিনা পরিচ্ছদেনা’’তি.

… মহানামো থেরো….

৬. পারাপরিযত্থেরগাথা

১১৬. ‘‘ছফস্সাযতনে হিত্ৰা, গুত্তদ্ৰারো সুসংৰুতো;

অঘমূলং ৰমিত্ৰান, পত্তো মে আসৰক্খযো’’তি.

… পারাপরিযো [পারাসরিযো (সী.), পারংপরিযো (ক.)] থেরো ….

৭. যসত্থেরগাথা

১১৭. ‘‘সুৰিলিত্তো সুৰসনো,সব্বাভরণভূসিতো;

তিস্সো ৰিজ্জা অজ্ঝগমিং, কতং বুদ্ধস্স সাসন’’ন্তি.

… যসো থেরো….

৮. কিমিলত্থেরগাথা

১১৮. ‘‘অভিসত্তোৰ নিপততি, ৰযো রূপং অঞ্ঞমিৰ তথেৰ সন্তং;

তস্সেৰ সতো অৰিপ্পৰসতো, অঞ্ঞস্সেৰ সরামি অত্তান’’ন্তি.

… কিমিলো [কিম্বিলো (সী. স্যা.)] থেরো….

৯. ৰজ্জিপুত্তত্থেরগাথা

১১৯. ‘‘রুক্খমূলগহনং পসক্কিয, নিব্বানং হদযস্মিং ওপিয;

ঝায গোতম মা চ পমাদো, কিং তে বিল়িবিল়িকা করিস্সতী’’তি.

… ৰজ্জিপুত্তো থেরো….

১০. ইসিদত্তত্থেরগাথা

১২০. ‘‘পঞ্চক্খন্ধা পরিঞ্ঞাতা, তিট্ঠন্তি ছিন্নমূলকা;

দুক্খক্খযো অনুপ্পত্তো,পত্তো মে আসৰক্খযো’’তি.

… ইসিদত্তো থেরো….

ৰগ্গো দ্ৰাদসমো নিট্ঠিতো.

তস্সুদ্দানং –

জেন্তো চ ৰচ্ছগোত্তো চ, ৰচ্ছো চ ৰনসৰ্হযো;

অধিমুত্তো মহানামো, পারাপরিযো যসোপি চ;

কিমিলো ৰজ্জিপুত্তো চ, ইসিদত্তো মহাযসোতি.

এককনিপাতো নিট্ঠিতো.