৮. অট্ঠমৰগ্গো

১. ৰচ্ছপালত্থেরগাথা

৭১. ‘‘সুসুখুমনিপুণত্থদস্সিনা, মতিকুসলেন নিৰাতৰুত্তিনা;

সংসেৰিতৰুদ্ধসীলিনা [সংসেৰিতবুদ্ধসীলিনা (ক.)], নিব্বানং ন হি তেন দুল্লভ’’ন্তি.

… ৰচ্ছপালো থেরো….

২. আতুমত্থেরগাথা

৭২. ‘‘যথা কল়ীরো সুসু ৰড্ঢিতগ্গো, দুন্নিক্খমো হোতি পসাখজাতো;

এৰং অহং ভরিযাযানিতায, অনুমঞ্ঞং মং পব্বজিতোম্হি দানী’’তি.

… আতুমো থেরো….

৩. মাণৰত্থেরগাথা

৭৩. ‘‘জিণ্ণঞ্চ দিস্ৰা দুখিতঞ্চ ব্যাধিতং, মতঞ্চ দিস্ৰা গতমাযুসঙ্খযং;

ততো অহং নিক্খমিতূন পব্বজিং, পহায কামানি মনোরমানী’’তি.

… মাণৰো থেরো….

৪. সুযামনত্থেরগাথা

৭৪. ‘‘কামচ্ছন্দো চ ব্যাপাদো, থিনমিদ্ধঞ্চ [থীনমিদ্ধঞ্চ (সী. স্যা.)] ভিক্খুনো;

উদ্ধচ্চং ৰিচিকিচ্ছা চ, সব্বসোৰ ন ৰিজ্জতী’’তি.

… সুযামনো থেরো….

৫. সুসারদত্থেরগাথা

৭৫. ‘‘সাধু সুৰিহিতান দস্সনং, কঙ্খা ছিজ্জতি বুদ্ধি ৰড্ঢতি;

বালম্পি করোন্তি পণ্ডিতং, তস্মা সাধু সতং সমাগমো’’তি.

… সুসারদো থেরো….

৬. পিযঞ্জহত্থেরগাথা

৭৬. ‘‘উপ্পতন্তেসু নিপতে, নিপতন্তেসু উপ্পতে;

ৰসে অৰসমানেসু, রমমানেসু নো রমে’’তি.

… পিযঞ্জহো থেরো….

৭. হত্থারোহপুত্তত্থেরগাথা

৭৭. ‘‘ইদং পুরে চিত্তমচারি চারিকং, যেনিচ্ছকং যত্থকামং যথাসুখং;

তদজ্জহং নিগ্গহেস্সামি যোনিসো, হত্থিপ্পভিন্নং ৰিয অঙ্কুসগ্গহো’’তি.

… হত্থারোহপুত্তো থেরো….

৮. মেণ্ডসিরত্থেরগাথা

৭৮. ‘‘অনেকজাতিসংসারং, সন্ধাৰিস্সং অনিব্বিসং;

তস্স মে দুক্খজাতস্স, দুক্খক্খন্ধো অপরদ্ধো’’তি.

… মেণ্ডসিরো থেরো….

৯. রক্খিতত্থেরগাথা

৭৯. ‘‘সব্বো রাগো পহীনো মে, সব্বো দোসো সমূহতো;

সব্বো মে ৰিগতো মোহো, সীতিভূতোস্মি নিব্বুতো’’তি.

… রক্খিতো থেরো….

১০. উগ্গত্থেরগাথা

৮০. ‘‘যং মযা পকতং কম্মং, অপ্পং ৰা যদি ৰা বহুং;

সব্বমেতং পরিক্খীণং, নত্থি দানি পুনব্ভৰো’’তি.

… উগ্গো থেরো….

ৰগ্গো অট্ঠমো নিট্ঠিতো.

তস্সুদ্দানং –

ৰচ্ছপালো চ যো থেরো, আতুমো মাণৰো ইসি;

সুযামনো সুসারদো, থেরো যো চ পিযঞ্জহো;

আরোহপুত্তো মেণ্ডসিরো, রক্খিতো উগ্গসৰ্হযোতি.