৭. সত্তমৰগ্গো

৬১. ‘‘পস্সতি পস্সো পস্সন্তং, অপস্সন্তঞ্চ পস্সতি;

অপস্সন্তো অপস্সন্তং, পস্সন্তঞ্চ ন পস্সতী’’তি.

… ৰপ্পো থেরো….

৬২. ‘‘এককা মযং অরঞ্ঞে ৰিহরাম, অপৰিদ্ধংৰ ৰনস্মিং দারুকং;

তস্স মে বহুকা পিহযন্তি, নেরযিকা ৰিয সগ্গগামিন’’ন্তি.

… ৰজ্জিপুত্তো থেরো….

৬৩. ‘‘চুতা পতন্তি পতিতা, গিদ্ধা চ পুনরাগতা;

কতং কিচ্চং রতং রম্মং, সুখেনন্ৰাগতং সুখ’’ন্তি.

… পক্খো থেরো….

৬৪. ‘‘দুমৰ্হযায উপ্পন্নো, জাতো পণ্ডরকেতুনা;

কেতুহা কেতুনাযেৰ, মহাকেতুং পধংসযী’’তি.

… ৰিমলকোণ্ডঞ্ঞো থেরো….

৬৫. ‘‘উক্খেপকতৰচ্ছস্স, সঙ্কলিতং বহূহি ৰস্সেহি;

তং ভাসতি গহট্ঠানং, সুনিসিন্নো উল়ারপামোজ্জো’’তি.

… উক্খেপকতৰচ্ছো থেরো….

৬৬. ‘‘অনুসাসি মহাৰীরো, সব্বধম্মান পারগূ;

তস্সাহং ধম্মং সুত্ৰান, ৰিহাসিং সন্তিকে সতো;

তিস্সো ৰিজ্জা অনুপ্পত্তা, কতং বুদ্ধস্স সাসন’’ন্তি.

… মেঘিযো থেরো….

৬৭. ‘‘কিলেসা ঝাপিতা ময্হং, ভৰা সব্বে সমূহতা;

ৰিক্খীণো জাতিসংসারো, নত্থি দানি পুনব্ভৰো’’তি.

… একধম্মসৰনীযো থেরো….

৬৮. [উদা. ৩৭; পাচি. ১৫৩] ‘‘অধিচেতসো অপ্পমজ্জতো, মুনিনো মোনপথেসু সিক্খতো;

সোকা ন ভৰন্তি তাদিনো, উপসন্তস্স সদা সতীমতো’’তি.

… একুদানিযো থেরো….

৬৯. ‘‘সুত্ৰান ধম্মং মহতো মহারসং, সব্বঞ্ঞুতঞ্ঞাণৰরেন দেসিতং;

মগ্গং পপজ্জিং [পপজ্জং (ক.)] অমতস্স পত্তিযা, সো যোগক্খেমস্স পথস্স কোৰিদো’’তি.

… ছন্নো থেরো….

৭০. ‘‘সীলমেৰ ইধ অগ্গং, পঞ্ঞৰা পন উত্তমো;

মনুস্সেসু চ দেৰেসু, সীলপঞ্ঞাণতো জয’’ন্তি.

… পুণ্ণো থেরো….

ৰগ্গো সত্তমো নিট্ঠিতো.

তস্সুদ্দানং –

ৰপ্পো চ ৰজ্জিপুত্তো চ, পক্খো ৰিমলকোণ্ডঞ্ঞো;

উক্খেপকতৰচ্ছো চ, মেঘিযো একধম্মিকো;

একুদানিযছন্না চ, পুণ্ণত্থেরো মহব্বলোতি.