৪. চতুত্থৰগ্গো

১. গহ্ৰরতীরিযত্থেরগাথা

৩১. ‘‘ফুট্ঠো ডংসেহি মকসেহি, অরঞ্ঞস্মিং ব্রহাৰনে;

নাগো সংগামসীসেৰ, সতো তত্রাধিৰাসযে’’তি.

… গহ্ৰরতীরিযো থেরো….

২. সুপ্পিযত্থেরগাথা

৩২. ‘‘অজরং জীরমানেন, তপ্পমানেন নিব্বুতিং;

নিমিযং [নিম্মিস্সং (সী.), নিরামিসং (স্যা.), নিমিনেয্যং (?)] পরমং সন্তিং, যোগক্খেমং অনুত্তর’’ন্তি.

… সুপ্পিযো থেরো….

৩. সোপাকত্থেরগাথা

৩৩. ‘‘যথাপি একপুত্তস্মিং, পিযস্মিং কুসলী সিযা;

এৰং সব্বেসু পাণেসু, সব্বত্থ কুসলো সিযা’’তি.

… সোপাকো থেরো….

৪. পোসিযত্থেরগাথা

৩৪. ‘‘অনাসন্নৰরা এতা, নিচ্চমেৰ ৰিজানতা;

গামা অরঞ্ঞমাগম্ম, ততো গেহং উপাৰিসি [উপাৰিসিং (সী.)];

ততো উট্ঠায পক্কামি, অনামন্তেত্ৰা [অনামন্তিয (সী.)] পোসিযো’’তি.

… পোসিযো থেরো….

৫. সামঞ্ঞকানিত্থেরগাথা

৩৫. ‘‘সুখং সুখত্থো লভতে তদাচরং, কিত্তিঞ্চ পপ্পোতি যসস্স ৰড্ঢতি;

যো অরিযমট্ঠঙ্গিকমঞ্জসং উজুং, ভাৰেতি মগ্গং অমতস্স পত্তিযা’’তি.

… সামঞ্ঞকানিত্থেরো….

৬. কুমাপুত্তত্থেরগাথা

৩৬. ‘‘সাধু সুতং সাধু চরিতকং, সাধু সদা অনিকেতৰিহারো;

অত্থপুচ্ছনং পদক্খিণকম্মং, এতং সামঞ্ঞমকিঞ্চনস্সা’’তি.

… কুমাপুত্তো থেরো….

৭. কুমাপুত্তসহাযকত্থেরগাথা

৩৭. ‘‘নানাজনপদং যন্তি, ৰিচরন্তা অসঞ্ঞতা;

সমাধিঞ্চ ৰিরাধেন্তি, কিংসু রট্ঠচরিযা করিস্সতি;

তস্মা ৰিনেয্য সারম্ভং, ঝাযেয্য অপুরক্খতো’’তি.

… কুমাপুত্তত্থেরস্স সহাযকো থেরো….

৮. গৰম্পতিত্থেরগাথা

৩৮. ‘‘যো ইদ্ধিযা সরভুং অট্ঠপেসি, সো গৰম্পতি অসিতো অনেজো;

তং সব্বসঙ্গাতিগতং মহামুনিং, দেৰা নমস্সন্তি ভৰস্স পারগু’’ন্তি.

… গৰম্পতিত্থেরো….

৯. তিস্সত্থেরগাথা

৩৯. [সং. নি. ১.২১, ৯৭]‘‘সত্তিযা ৰিয ওমট্ঠো, ডয্হমানোৰ [ডয্হমানেৰ (সব্বত্থ)] মত্থকে;

কামরাগপ্পহানায, সতো ভিক্খু পরিব্বজে’’তি.

… তিস্সো থেরো….

১০. ৰড্ঢমানত্থেরগাথা

৪০. ‘‘সত্তিযা ৰিয ওমট্ঠো, ডয্হমানোৰ মত্থকে;

ভৰরাগপ্পহানায, সতো ভিক্খু পরিব্বজে’’তি.

… ৰড্ঢমানো থেরো….

ৰগ্গো চতুত্থো নিট্ঠিতো.

তস্সুদ্দানং –

গহ্ৰরতীরিযো সুপ্পিযো, সোপাকো চেৰ পোসিযো;

সামঞ্ঞকানি কুমাপুত্তো, কুমাপুত্তসহাযকো;

গৰম্পতি তিস্সত্থেরো, ৰড্ঢমানো মহাযসোতি.