৫. পঞ্চমৰগ্গো

১. সিরিৰড্ঢত্থেরগাথা

৪১. ‘‘ৰিৰরমনুপতন্তি ৰিজ্জুতা, ৰেভারস্স চ পণ্ডৰস্স চ;

নগৰিৰরগতো চ ঝাযতি, পুত্তো অপ্পটিমস্স তাদিনো’’তি.

… সিরিৰড্ঢো থেরো….

২. খদিরৰনিযত্থেরগাথা

৪২. ‘‘চালে উপচালে সীসূপচালে ( ) [(চালা উপচালা, সীসূপচালা) (ক.)] পতিস্সতা [পটিস্সতিকা (স্যা. ক.)] নু খো ৰিহরথ;

আগতো ৰো ৰালং ৰিয ৰেধী’’তি.

… খদিরৰনিযো থেরো….

৩. সুমঙ্গলত্থেরগাথা

৪৩. ‘‘সুমুত্তিকো সুমুত্তিকো সাহু, সুমুত্তিকোম্হি তীহি খুজ্জকেহি;

অসিতাসু মযা নঙ্গলাসু, মযা খুদ্দকুদ্দালাসু মযা.

যদিপি ইধমেৰ ইধমেৰ, অথ ৰাপি অলমেৰ অলমেৰ;

ঝায সুমঙ্গল ঝায সুমঙ্গল, অপ্পমত্তো ৰিহর সুমঙ্গলা’’তি.

… সুমঙ্গলো থেরো….

৪. সানুত্থেরগাথা

৪৪. [সং. নি. ১.২৩৯] ‘‘মতং ৰা অম্ম রোদন্তি, যো ৰা জীৰং ন দিস্সতি;

জীৰন্তং মং অম্ম পস্সন্তী, কস্মা মং অম্ম রোদসী’’তি.

… সানুত্থেরো….

৫. রমণীযৰিহারিত্থেরগাথা

৪৫. ‘‘যথাপি ভদ্দো আজঞ্ঞো, খলিত্ৰা পতিতিট্ঠতি;

এৰং দস্সনসম্পন্নং, সম্মাসম্বুদ্ধসাৰক’’ন্তি.

… রমণীযৰিহারিত্থেরো….

৬. সমিদ্ধিত্থেরগাথা

৪৬. ‘‘সদ্ধাযাহং পব্বজিতো, অগারস্মানগারিযং;

সতি পঞ্ঞা চ মে ৰুড্ঢা, চিত্তঞ্চ সুসমাহিতং;

কামং করস্সু রূপানি, নেৰ মং ব্যাধযিস্সসী’’তি [বাধযিস্সসীতি (সী.), ব্যাথযিস্সসীতি (?)].

… সমিদ্ধিত্থেরো….

৭. উজ্জযত্থেরগাথা

৪৭. ‘‘নমো তে বুদ্ধ ৰীরত্থু, ৰিপ্পমুত্তোসি সব্বধি;

তুয্হাপদানে ৰিহরং, ৰিহরামি অনাসৰো’’তি.

… উজ্জযো থেরো….

৮. সঞ্জযত্থেরগাথা

৪৮. ‘‘যতো অহং পব্বজিতো, অগারস্মানগারিযং;

নাভিজানামি সঙ্কপ্পং, অনরিযং দোসসংহিত’’ন্তি.

… সঞ্জযো থেরো….

৯. রামণেয্যকত্থেরগাথা

৪৯. ‘‘চিহচিহাভিনদিতে [ৰিহৰিহাভিনদিতে (সী. স্যা.)], সিপ্পিকাভিরুতেহি চ;

ন মে তং ফন্দতি চিত্তং, একত্তনিরতং হি মে’’তি.

… রামণেয্যকো থেরো….

১০. ৰিমলত্থেরগাথা

৫০. ‘‘ধরণী চ সিঞ্চতি ৰাতি, মালুতো ৰিজ্জুতা চরতি নভে;

উপসমন্তি ৰিতক্কা, চিত্তং সুসমাহিতং মমা’’তি.

… ৰিমলো থেরো….

ৰগ্গো পঞ্চমো নিট্ঠিতো.

তস্সুদ্দানং –

সিরীৰড্ঢো রেৰতো থেরো, সুমঙ্গলো সানুসৰ্হযো;

রমণীযৰিহারী চ, সমিদ্ধিউজ্জযসঞ্জযা;

রামণেয্যো চ সো থেরো, ৰিমলো চ রণঞ্জহোতি.