৩. ততিযৰগ্গো

১. নিগ্রোধত্থেরগাথা

২১. ‘‘নাহং ভযস্স ভাযামি, সত্থা নো অমতস্স কোৰিদো;

যত্থ ভযং নাৰতিট্ঠতি, তেন মগ্গেন ৰজন্তি ভিক্খৰো’’তি.

… নিগ্রোধো থেরো….

২. চিত্তকত্থেরগাথা

২২. ‘‘নীলা সুগীৰা সিখিনো, মোরা কারম্ভিযং [কারংৰিযং (সী.), কারৰিযং (স্যা.)] অভিনদন্তি;

তে সীতৰাতকীল়িতা [সীতৰাতকদ্দিতকলিতা (সী.), সীতৰাতকলিতা (স্যা.)], সুত্তং ঝাযং [ঝানং (স্যা.), ঝাযিং (?)] নিবোধেন্তী’’তি.

… চিত্তকো থেরো….

৩. গোসালত্থেরগাথা

২৩. ‘‘অহং খো ৰেল়ুগুম্বস্মিং, ভুত্ৰান মধুপাযসং;

পদক্খিণং সম্মসন্তো, খন্ধানং উদযব্বযং;

সানুং পটিগমিস্সামি, ৰিৰেকমনুব্রূহয’’ন্তি.

… গোসালো থেরো….

৪. সুগন্ধত্থেরগাথা

২৪. ‘‘অনুৰস্সিকো পব্বজিতো, পস্স ধম্মসুধম্মতং;

তিস্সো ৰিজ্জা অনুপ্পত্তা, কতং বুদ্ধস্স সাসন’’ন্তি.

… সুগন্ধো থেরো….

৫. নন্দিযত্থেরগাথা

২৫. ‘‘ওভাসজাতং ফলগং, চিত্তং যস্স অভিণ্হসো;

তাদিসং ভিক্খুমাসজ্জ, কণ্হ দুক্খং নিগচ্ছসী’’তি.

… নন্দিযো থেরো….

৬. অভযত্থেরগাথা

২৬. ‘‘সুত্ৰা সুভাসিতং ৰাচং, বুদ্ধস্সাদিচ্চবন্ধুনো;

পচ্চব্যধিং হি নিপুণং, ৰালগ্গং উসুনা যথা’’তি.

… অভযো থেরো….

৭. লোমসকঙ্গিযত্থেরগাথা

২৭. ‘‘দব্বং কুসং পোটকিলং, উসীরং মুঞ্জপব্বজং;

উরসা পনুদিস্সামি, ৰিৰেকমনুব্রূহয’’ন্তি.

… লোমসকঙ্গিযো থেরো….

৮. জম্বুগামিকপুত্তত্থেরগাথা

২৮. ‘‘কচ্চি নো ৰত্থপসুতো, কচ্চি নো ভূসনারতো;

কচ্চি সীলমযং গন্ধং, কিং ত্ৰং ৰাযসি [কচ্চি সীলমযং গন্ধং, ত্ৰং ৰাসি (স্যা.)] নেতরা পজা’’তি.

… জম্বুগামিকপুত্তো থেরো….

৯. হারিতত্থেরগাথা

২৯. ‘‘সমুন্নমযমত্তানং, উসুকারোৰ তেজনং;

চিত্তং উজুং করিত্ৰান, অৰিজ্জং ভিন্দ হারিতা’’তি.

… হারিতো থেরো….

১০. উত্তিযত্থেরগাথা

৩০. ‘‘আবাধে মে সমুপ্পন্নে, সতি মে উদপজ্জথ;

আবাধো মে সমুপ্পন্নো, কালো মে নপ্পমজ্জিতু’’ন্তি.

… উত্তিযো থেরো….

ৰগ্গো ততিযো নিট্ঠিতো.

তস্সুদ্দানং –

নিগ্রোধো চিত্তকো থেরো, গোসালথেরো সুগন্ধো;

নন্দিযো অভযো থেরো, থেরো লোমসকঙ্গিযো;

জম্বুগামিকপুত্তো চ, হারিতো উত্তিযো ইসীতি.