২. দুতিযৰগ্গো

১. চূল়ৰচ্ছত্থেরগাথা

১১. ‘‘পামোজ্জবহুলো ভিক্খু, ধম্মে বুদ্ধপ্পৰেদিতে;

অধিগচ্ছে পদং সন্তং, সঙ্খারূপসমং সুখ’’ন্তি.

… চূল়ৰচ্ছো [চূলগৰচ্ছো (সী.)] থেরো….

২. মহাৰচ্ছত্থেরগাথা

১২. ‘‘পঞ্ঞাবলী সীলৰতূপপন্নো, সমাহিতো ঝানরতো সতীমা;

যদত্থিযং ভোজনং ভুঞ্জমানো, কঙ্খেথ কালং ইধ ৰীতরাগো’’তি.

… মহাৰচ্ছো [মহাগৰচ্ছো (সী.)] থেরো….

৩. ৰনৰচ্ছত্থেরগাথা

১৩. ‘‘নীলব্ভৰণ্ণা রুচিরা, সীতৰারী সুচিন্ধরা;

ইন্দগোপকসঞ্ছন্না, তে সেলা রমযন্তি ম’’ন্তি.

… ৰনৰচ্ছো থেরো….

৪. সিৰকসামণেরগাথা

১৪. ‘‘উপজ্ঝাযো মং অৰচ, ইতো গচ্ছাম সীৰক;

গামে মে ৰসতি কাযো, অরঞ্ঞং মে গতো মনো;

সেমানকোপি গচ্ছামি, নত্থি সঙ্গো ৰিজানত’’ন্তি.

… সিৰকো সামণেরো….

৫. কুণ্ডধানত্থেরগাথা

১৫. ‘‘পঞ্চ ছিন্দে পঞ্চ জহে, পঞ্চ চুত্তরি ভাৰযে;

পঞ্চসঙ্গাতিগো ভিক্খু, ওঘতিণ্ণোতি ৰুচ্চতী’’তি.

… কুণ্ডধানো থেরো….

৬. বেলট্ঠসীসত্থেরগাথা

১৬. ‘‘যথাপি ভদ্দো আজঞ্ঞো, নঙ্গলাৰত্তনী সিখী;

গচ্ছতি অপ্পকসিরেন, এৰং রত্তিন্দিৰা মম;

গচ্ছন্তি অপ্পকসিরেন, সুখে লদ্ধে নিরামিসে’’তি.

… বেলট্ঠসীসো থেরো….

৭. দাসকত্থেরগাথা

১৭. ‘‘মিদ্ধী যদা হোতি মহগ্ঘসো চ, নিদ্দাযিতা সম্পরিৰত্তসাযী;

মহাৰরাহোৰ নিৰাপপুট্ঠো, পুনপ্পুনং গব্ভমুপেতি মন্দো’’তি.

… দাসকো থেরো….

৮. সিঙ্গালপিতুত্থেরগাথা

১৮. ‘‘অহু বুদ্ধস্স দাযাদো, ভিক্খু ভেসকল়াৰনে;

কেৰলং অট্ঠিসঞ্ঞায, অফরী পথৰিং [পঠৰিং (সী. স্যা.)] ইমং;

মঞ্ঞেহং কামরাগং সো, খিপ্পমেৰ পহিস্সতী’’তি [পহীযভি (সব্বত্থ পাল়িযং)].

… সিঙ্গালপিতা [সীগালপিতা (সী.)] থেরো….

৯. কুলত্থেরগাথা

১৯. [ধ. প. ৮০, ১৪৫ ধম্মপদেপি] ‘‘উদকং হি নযন্তি নেত্তিকা, উসুকারা নমযন্তি [দমযন্তি (ক.)] তেজনং;

দারুং নমযন্তি তচ্ছকা, অত্তানং দমযন্তি সুব্বতা’’তি.

… কুলো [কুণ্ডলো (সী.), কুল়ো (স্যা. ক.)] থেরো….

১০. অজিতত্থেরগাথা

২০. ‘‘মরণে মে ভযং নত্থি, নিকন্তি নত্থি জীৰিতে;

সন্দেহং নিক্খিপিস্সামি, সম্পজানো পটিস্সতো’’তি [পতিস্সতোতি (সী. স্যা.)].

… অজিতো থেরো ….

ৰগ্গো দুতিযো নিট্ঠিতো.

তস্সুদ্দানং –

চূল়ৰচ্ছো মহাৰচ্ছো, ৰনৰচ্ছো চ সীৰকো;

কুণ্ডধানো চ বেলট্ঠি, দাসকো চ ততোপরি;

সিঙ্গালপিতিকো থেরো, কুলো চ অজিতো দসাতি.