১৫. মোঘরাজমাণৰপুচ্ছা

১১২২. ‘‘দ্ৰাহং সক্কং অপুচ্ছিস্সং, (ইচ্চাযস্মা মোঘরাজা)

ন মে ব্যাকাসি চক্খুমা;

যাৰততিযঞ্চ দেৰীসি, ব্যাকরোতীতি মে সুতং.

১১২৩. ‘‘অযং লোকো পরো লোকো, ব্রহ্মলোকো সদেৰকো;

দিট্ঠিং তে নাভিজানাতি, গোতমস্স যসস্সিনো.

১১২৪. ‘‘এৰং অভিক্কন্তদস্সাৰিং, অত্থি পঞ্হেন আগমং;

কথং লোকং অৰেক্খন্তং, মচ্চুরাজা ন পস্সতি’’.

১১২৫. ‘‘সুঞ্ঞতো লোকং অৰেক্খস্সু, মোঘরাজ সদা সতো;

অত্তানুদিট্ঠিং ঊহচ্চ, এৰং মচ্চুতরো সিযা;

এৰং লোকং অৰেক্খন্তং, মচ্চুরাজা ন পস্সতী’’তি.

মোঘরাজমাণৰপুচ্ছা পন্নরসমা নিট্ঠিতা.