৮. নাৰাসুত্তং

৩১৮. যস্মা হি ধম্মং পুরিসো ৰিজঞ্ঞা, ইন্দংৰ নং দেৰতা পূজযেয্য;

সো পূজিতো তস্মি পসন্নচিত্তো, বহুস্সুতো পাতুকরোতি ধম্মং.

৩১৯. তদট্ঠিকত্ৰান নিসম্ম ধীরো, ধম্মানুধম্মং পটিপজ্জমানো;

ৰিঞ্ঞূ ৰিভাৰী নিপুণো চ হোতি, যো তাদিসং ভজতি অপ্পমত্তো.

৩২০. খুদ্দঞ্চ বালং উপসেৰমানো, অনাগতত্থঞ্চ উসূযকঞ্চ;

ইধেৰ ধম্মং অৰিভাৰযিত্ৰা, অৰিতিণ্ণকঙ্খো মরণং উপেতি.

৩২১. যথা নরো আপগমোতরিত্ৰা, মহোদকং সলিলং সীঘসোতং;

সো ৰুয্হমানো অনুসোতগামী, কিং সো পরে সক্খতি তারযেতুং.

৩২২. তথেৰ ধম্মং অৰিভাৰযিত্ৰা, বহুস্সুতানং অনিসামযত্থং;

সযং অজানং অৰিতিণ্ণকঙ্খো, কিং সো পরে সক্খতি নিজ্ঝপেতুং.

৩২৩. যথাপি নাৰং দল়্হমারুহিত্ৰা, ফিযেন [পিযেন (সী. স্যা.)] রিত্তেন সমঙ্গিভূতো;

সো তারযে তত্থ বহূপি অঞ্ঞে, তত্রূপযঞ্ঞূ কুসলো মুতীমা [মতীমা (স্যা. ক.)].

৩২৪. এৰম্পি যো ৰেদগু ভাৰিতত্তো, বহুস্সুতো হোতি অৰেধধম্মো;

সো খো পরে নিজ্ঝপযে পজানং, সোতাৰধানূপনিসূপপন্নে.

৩২৫. তস্মা হৰে সপ্পুরিসং ভজেথ, মেধাৰিনঞ্চেৰ বহুস্সুতঞ্চ;

অঞ্ঞায অত্থং পটিপজ্জমানো, ৰিঞ্ঞাতধম্মো স সুখং [সো সুখং (সী.)] লভেথাতি.

নাৰাসুত্তং অট্ঠমং নিট্ঠিতং.