৯. হেমৰতসুত্তং

১৫৩. ‘‘অজ্জ পন্নরসো উপোসথো, (ইতি সাতাগিরো যক্খো)

দিব্বা [দিব্যা (সী. স্যা. কং. পী.)] রত্তি উপট্ঠিতা;

অনোমনামং সত্থারং, হন্দ পস্সাম গোতমং’’.

১৫৪. ‘‘কচ্চি মনো সুপণিহিতো, (ইতি হেমৰতো যক্খো)

সব্বভূতেসু তাদিনো;

কচ্চি ইট্ঠে অনিট্ঠে চ, সঙ্কপ্পস্স ৰসীকতা’’.

১৫৫. ‘‘মনো চস্স সুপণিহিতো, (ইতি সাতাগিরো যক্খো)

সব্বভূতেসু তাদিনো;

অথো ইট্ঠে অনিট্ঠে চ, সঙ্কপ্পস্স ৰসীকতা’’.

১৫৬. ‘‘কচ্চি অদিন্নং নাদিযতি, (ইতি হেমৰতো যক্খো)

কচ্চি পাণেসু সঞ্ঞতো;

কচ্চি আরা পমাদম্হা, কচ্চি ঝানং ন রিঞ্চতি’’.

১৫৭. ‘‘ন সো অদিন্নং আদিযতি, (ইতি সাতাগিরো যক্খো)

অথো পাণেসু সঞ্ঞতো;

অথো আরা পমাদম্হা, বুদ্ধো ঝানং ন রিঞ্চতি’’.

১৫৮. ‘‘কচ্চি মুসা ন ভণতি, (ইতি হেমৰতো যক্খো)

কচ্চি ন খীণব্যপ্পথো;

কচ্চি ৰেভূতিযং নাহ, কচ্চি সম্ফং ন ভাসতি’’.

১৫৯. ‘‘মুসা চ সো ন ভণতি, (ইতি সাতাগিরো যক্খো)

অথো ন খীণব্যপ্পথো;

অথো ৰেভূতিযং নাহ, মন্তা অত্থং চ [অত্থং সো (সী. পী. ক.)] ভাসতি’’.

১৬০. ‘‘কচ্চি ন রজ্জতি কামেসু, (ইতি হেমৰতো যক্খো)

কচ্চি চিত্তং অনাৰিলং;

কচ্চি মোহং অতিক্কন্তো, কচ্চি ধম্মেসু চক্খুমা’’.

১৬১. ‘‘ন সো রজ্জতি কামেসু, (ইতি সাতাগিরো যক্খো)

অথো চিত্তং অনাৰিলং;

সব্বমোহং অতিক্কন্তো, বুদ্ধো ধম্মেসু চক্খুমা’’.

১৬২. ‘‘কচ্চি ৰিজ্জায সম্পন্নো, (ইতি হেমৰতো যক্খো )

কচ্চি সংসুদ্ধচারণো;

কচ্চিস্স আসৰা খীণা, কচ্চি নত্থি পুনব্ভৰো’’.

১৬৩. ‘‘ৰিজ্জায চেৰ সম্পন্নো, (ইতি সাতাগিরো যক্খো)

অথো সংসুদ্ধচারণো;

সব্বস্স আসৰা খীণা, নত্থি তস্স পুনব্ভৰো’’.

১৬৪. ‘‘সম্পন্নং মুনিনো চিত্তং, কম্মুনা ব্যপ্পথেন চ;

ৰিজ্জাচরণসম্পন্নং, ধম্মতো নং পসংসতি’’.

১৬৫. ‘‘সম্পন্নং মুনিনো চিত্তং, কম্মুনা ব্যপ্পথেন চ;

ৰিজ্জাচরণসম্পন্নং, ধম্মতো অনুমোদসি’’.

১৬৬. ‘‘সম্পন্নং মুনিনো চিত্তং, কম্মুনা ব্যপ্পথেন চ;

ৰিজ্জাচরণসম্পন্নং, হন্দ পস্সাম গোতমং.

১৬৭. ‘‘এণিজঙ্ঘং কিসং ৰীরং [ধীরং (স্যা.)], অপ্পাহারং অলোলুপং;

মুনিং ৰনস্মিং ঝাযন্তং, এহি পস্সাম গোতমং.

১৬৮. ‘‘সীহংৰেকচরং নাগং, কামেসু অনপেক্খিনং;

উপসঙ্কম্ম পুচ্ছাম, মচ্চুপাসপ্পমোচনং.

১৬৯. ‘‘অক্খাতারং পৰত্তারং, সব্বধম্মান পারগুং;

বুদ্ধং ৰেরভযাতীতং, মযং পুচ্ছাম গোতমং’’.

১৭০. ‘‘কিস্মিং লোকো সমুপ্পন্নো, (ইতি হেমৰতো যক্খো)

কিস্মিং কুব্বতি সন্থৰং [সন্ধৰং (ক.)];

কিস্স লোকো উপাদায, কিস্মিং লোকো ৰিহঞ্ঞতি’’.

১৭১. ‘‘ছসু [ছস্সু (সী. পী.)] লোকো সমুপ্পন্নো, (হেমৰতাতি ভগৰা)

ছসু কুব্বতি সন্থৰং;

ছন্নমেৰ উপাদায, ছসু লোকো ৰিহঞ্ঞতি’’.

১৭২. ‘‘কতমং তং উপাদানং, যত্থ লোকো ৰিহঞ্ঞতি;

নিয্যানং পুচ্ছিতো ব্রূহি, কথং দুক্খা পমুচ্চতি’’ [পমুঞ্চতি (স্যা.)].

১৭৩. ‘‘পঞ্চ কামগুণা লোকে, মনোছট্ঠা পৰেদিতা;

এত্থ ছন্দং ৰিরাজেত্ৰা, এৰং দুক্খা পমুচ্চতি.

১৭৪. ‘‘এতং লোকস্স নিয্যানং, অক্খাতং ৰো যথাতথং;

এতং ৰো অহমক্খামি, এৰং দুক্খা পমুচ্চতি’’.

১৭৫. ‘‘কো সূধ তরতি ওঘং, কোধ তরতি অণ্ণৰং;

অপ্পতিট্ঠে অনালম্বে, কো গম্ভীরে ন সীদতি’’.

১৭৬. ‘‘সব্বদা সীলসম্পন্নো, পঞ্ঞৰা সুসমাহিতো;

অজ্ঝত্তচিন্তী [অজ্ঝত্তসঞ্ঞী (স্যা. কং. ক.)] সতিমা, ওঘং তরতি দুত্তরং.

১৭৭. ‘‘ৰিরতো কামসঞ্ঞায, সব্বসংযোজনাতিগো;

নন্দীভৰপরিক্খীণো, সো গম্ভীরে ন সীদতি’’.

১৭৮. ‘‘গব্ভীরপঞ্ঞং নিপুণত্থদস্সিং, অকিঞ্চনং কামভৰে অসত্তং;

তং পস্সথ সব্বধি ৰিপ্পমুত্তং, দিব্বে পথে কমমানং মহেসিং.

১৭৯. ‘‘অনোমনামং নিপুণত্থদস্সিং, পঞ্ঞাদদং কামালযে অসত্তং;

তং পস্সথ সব্বৰিদুং সুমেধং, অরিযে পথে কমমানং মহেসিং.

১৮০. ‘‘সুদিট্ঠং ৰত নো অজ্জ, সুপ্পভাতং সুহুট্ঠিতং;

যং অদ্দসাম সম্বুদ্ধং, ওঘতিণ্ণমনাসৰং.

১৮১. ‘‘ইমে দসসতা যক্খা, ইদ্ধিমন্তো যসস্সিনো;

সব্বে তং সরণং যন্তি, ত্ৰং নো সত্থা অনুত্তরো.

১৮২. ‘‘তে মযং ৰিচরিস্সাম, গামা গামং নগা নগং;

নমস্সমানা সম্বুদ্ধং, ধম্মস্স চ সুধম্মত’’ন্তি.

হেমৰতসুত্তং নৰমং নিট্ঠিতং.