১০. আল়ৰকসুত্তং

এৰং মে সুতং – একং সমযং ভগৰা আল়ৰিযং ৰিহরতি আল়ৰকস্স যক্খস্স ভৰনে. অথ খো আল়ৰকো যক্খো যেন ভগৰা তেনুপসঙ্কমি; উপসঙ্কমিত্ৰা ভগৰন্তং এতদৰোচ – ‘‘নিক্খম, সমণা’’তি. ‘‘সাধাৰুসো’’তি ভগৰা নিক্খমি. ‘‘পৰিস, সমণা’’তি. ‘‘সাধাৰুসো’’তি ভগৰা পাৰিসি.

দুতিযম্পি খো…পে… ততিযম্পি খো আল়ৰকো যক্খো ভগৰন্তং এতদৰোচ – ‘‘নিক্খম, সমণা’’তি. ‘‘সাধাৰুসো’’তি ভগৰা নিক্খমি. ‘‘পৰিস, সমণা’’তি. ‘‘সাধাৰুসো’’তি ভগৰা পাৰিসি.

চতুত্থম্পি খো আল়ৰকো যক্খো ভগৰন্তং এতদৰোচ – ‘‘নিক্খম, সমণা’’তি. ‘‘ন খ্ৰাহং তং, আৰুসো, নিক্খমিস্সামি. যং তে করণীযং, তং করোহী’’তি.

‘‘পঞ্হং তং, সমণ, পুচ্ছিস্সামি. সচে মে ন ব্যাকরিস্সসি, চিত্তং ৰা তে খিপিস্সামি, হদযং ৰা তে ফালেস্সামি, পাদেসু ৰা গহেত্ৰা পারগঙ্গায খিপিস্সামী’’তি.

‘‘ন খ্ৰাহং তং, আৰুসো, পস্সামি সদেৰকে লোকে সমারকে সব্রহ্মকে সস্সমণব্রাহ্মণিযা পজায সদেৰমনুস্সায যো মে চিত্তং ৰা খিপেয্য হদযং ৰা ফালেয্য পাদেসু ৰা গহেত্ৰা পারগঙ্গায খিপেয্য. অপি চ ত্ৰং, আৰুসো, পুচ্ছ যদাকঙ্খসী’’তি. অথ খো আল়ৰকো যক্খো ভগৰন্তং গাথায অজ্ঝভাসি –

১৮৩. ‘‘কিং সূধ ৰিত্তং পুরিসস্স সেট্ঠং, কিং সু সুচিণ্ণং সুখমাৰহাতি;

কিং সু [কিং সূ (সী.)] হৰে সাদুতরং রসানং, কথং জীৰিং জীৰিতমাহু সেট্ঠং’’.

১৮৪. ‘‘সদ্ধীধ ৰিত্তং পুরিসস্স সেট্ঠং, ধম্মো সুচিণ্ণো সুখমাৰহাতি;

সচ্চং হৰে সাদুতরং রসানং, পঞ্ঞাজীৰিং জীৰিতমাহু সেট্ঠং’’.

১৮৫. ‘‘কথং সু তরতি ওঘং, কথং সু তরতি অণ্ণৰং;

কথং সু দুক্খমচ্চেতি, কথং সু পরিসুজ্ঝতি’’.

১৮৬. ‘‘সদ্ধা তরতি ওঘং, অপ্পমাদেন অণ্ণৰং;

ৰীরিযেন [ৰিরিযেন (সী. স্যা. কং. পী.)] দুক্খমচ্চেতি, পঞ্ঞায পরিসুজ্ঝতি’’.

১৮৭. ‘‘কথং সু লভতে পঞ্ঞং, কথং সু ৰিন্দতে ধনং;

কথং সু কিত্তিং পপ্পোতি, কথং মিত্তানি গন্থতি;

অস্মা লোকা পরং লোকং, কথং পেচ্চ ন সোচতি’’.

১৮৮. ‘‘সদ্দহানো অরহতং, ধম্মং নিব্বানপত্তিযা;

সুস্সূসং [সুস্সূসা (সী. পী.)] লভতে পঞ্ঞং, অপ্পমত্তো ৰিচক্খণো.

১৮৯. ‘‘পতিরূপকারী ধুরৰা, উট্ঠাতা ৰিন্দতে ধনং;

সচ্চেন কিত্তিং পপ্পোতি, দদং মিত্তানি গন্থতি.

১৯০. ‘‘যস্সেতে চতুরো ধম্মা, সদ্ধস্স ঘরমেসিনো;

সচ্চং ধম্মো [দমো (?)] ধিতি চাগো, স ৰে পেচ্চ ন সোচতি.

১৯১. ‘‘ইঙ্ঘ অঞ্ঞেপি পুচ্ছস্সু, পুথূ সমণব্রাহ্মণে;

যদি সচ্চা দমা চাগা, খন্ত্যা ভিয্যোধ ৰিজ্জতি’’.

১৯২. ‘‘কথং নু দানি পুচ্ছেয্যং, পুথূ সমণব্রাহ্মণে;

যোহং [সোহং (সী. পী.)] অজ্জ পজানামি, যো অত্থো সম্পরাযিকো.

১৯৩. ‘‘অত্থায ৰত মে বুদ্ধো, ৰাসাযাল়ৰিমাগমা;

যোহং [অট্ঠিন্হারূহি সংযুত্তো (স্যা. ক.)] অজ্জ পজানামি, যত্থ দিন্নং মহপ্ফলং.

১৯৪. ‘‘সো অহং ৰিচরিস্সামি, গামা গামং পুরা পুরং;

নমস্সমানো সম্বুদ্ধং, ধম্মস্স চ সুধম্মত’’ন্তি.

আল়ৰকসুত্তং দসমং নিট্ঠিতং.