৮. মেত্তসুত্তং

১৪৩. করণীযমত্থকুসলেন, যন্ত সন্তং পদং অভিসমেচ্চ;

সক্কো উজূ চ সুহুজূ [সূজূ (সী.)] চ, সূৰচো চস্স মুদু অনতিমানী.

১৪৪. সন্তুস্সকো চ সুভরো চ, অপ্পকিচ্চো চ সল্লহুকৰুত্তি;

সন্তিন্দ্রিযো চ নিপকো চ, অপ্পগব্ভো কুলেস্ৰননুগিদ্ধো.

১৪৫. ন চ খুদ্দমাচরে কিঞ্চি, যেন ৰিঞ্ঞূ পরে উপৰদেয্যুং;

সুখিনো ৰ খেমিনো হোন্তু, সব্বসত্তা [সব্বে সত্তা (সী. স্যা.)] ভৰন্তু সুখিতত্তা.

১৪৬. যে কেচি পাণভূতত্থি, তসা ৰা থাৰরা ৰনৰসেসা;

দীঘা ৰা যে ৰ মহন্তা [মহন্ত (?)], মজ্ঝিমা রস্সকা অণুকথূলা.

১৪৭. দিট্ঠা ৰা যে ৰ অদিট্ঠা [অদিট্ঠ (?)], যে ৰ [যে চ (সী. স্যা. কং. পী.)] দূরে ৰসন্তি অৰিদূরে;

ভূতা ৰ সম্ভৰেসী ৰ [ভূতা ৰা সম্ভৰেসী ৰা (স্যা. কং. পী. ক.)], সব্বসত্তা ভৰন্তু সুখিতত্তা.

১৪৮. ন পরো পরং নিকুব্বেথ, নাতিমঞ্ঞেথ কত্থচি ন কঞ্চি [নং কঞ্চি (সী. পী.), নং কিঞ্চি (স্যা.), ন কিঞ্চি (ক.)];

ব্যারোসনা পটিঘসঞ্ঞা, নাঞ্ঞমঞ্ঞস্স দুক্খমিচ্ছেয্য.

১৪৯. মাতা যথা নিযং পুত্তমাযুসা একপুত্তমনুরক্খে;

এৰম্পি সব্বভূতেসু, মানসং ভাৰযে অপরিমাণং.

১৫০. মেত্তঞ্চ সব্বলোকস্মি, মানসং ভাৰযে অপরিমাণং;

উদ্ধং অধো চ তিরিযঞ্চ, অসম্বাধং অৰেরমসপত্তং.

১৫১. তিট্ঠং চরং নিসিন্নো ৰ [ৰা (সী. স্যা. কং. পী.)], সযানো যাৰতাস্স ৰিতমিদ্ধো [ৰিগতমিদ্ধো (বহূসু)];

এতং সতিং অধিট্ঠেয্য, ব্রহ্মমেতং ৰিহারমিধমাহু.

১৫২. দিট্ঠিঞ্চ অনুপগ্গম্ম, সীলৰা দস্সনেন সম্পন্নো;

কামেসু ৰিনয [ৰিনেয্য (সী. স্যা. পী.)] গেধং, ন হি জাতুগ্গব্ভসেয্য পুনরেতীতি.

মেত্তসুত্তং অট্ঠমং নিট্ঠিতং.