৫. চুন্দসুত্তং

৮৩. ‘‘পুচ্ছামি মুনিং পহূতপঞ্ঞং, (ইতি চুন্দো কম্মারপুত্তো)

বুদ্ধং ধম্মস্সামিং ৰীততণ্হং;

দ্ৰিপদুত্তমং [দিপদুত্তমং (সী. স্যা. কং. পী.)] সারথীনং পৰরং, কতি লোকে সমণা তদিঙ্ঘ ব্রূহি’’.

৮৪. ‘‘চতুরো সমণা ন পঞ্চমত্থি, (চুন্দাতি ভগৰা)

তে তে আৰিকরোমি সক্খিপুট্ঠো;

মগ্গজিনো মগ্গদেসকো চ, মগ্গে জীৰতি যো চ মগ্গদূসী’’.

৮৫. ‘‘কং মগ্গজিনং ৰদন্তি বুদ্ধা, (ইতি চুন্দো কম্মারপুত্তো)

মগ্গক্খাযী কথং অতুল্যো হোতি;

মগ্গে জীৰতি মে ব্রূহি পুট্ঠো, অথ মে আৰিকরোহি মগ্গদূসিং’’ [মগ্গদূসী (ক.)].

৮৬. ‘‘যো তিণ্ণকথংকথো ৰিসল্লো, নিব্বানাভিরতো অনানুগিদ্ধো;

লোকস্স সদেৰকস্স নেতা, তাদিং মগ্গজিনং ৰদন্তি বুদ্ধা.

৮৭. ‘‘পরমং পরমন্তি যোধ ঞত্ৰা, অক্খাতি ৰিভজতে ইধেৰ ধম্মং;

তং কঙ্খছিদং মুনিং অনেজং, দুতিযং ভিক্খুনমাহু মগ্গদেসিং.

৮৮. ‘‘যো ধম্মপদে সুদেসিতে, মগ্গে জীৰতি সঞ্ঞতো সতীমা;

অনৰজ্জপদানি সেৰমানো, ততিযং ভিক্খুনমাহু মগ্গজীৰিং.

৮৯. ‘‘ছদনং কত্ৰান সুব্বতানং, পক্খন্দী কুলদূসকো পগব্ভো;

মাযাৰী অসঞ্ঞতো পলাপো, পতিরূপেন চরং স মগ্গদূসী.

৯০. ‘‘এতে চ পটিৰিজ্ঝি যো গহট্ঠো, সুতৰা অরিযসাৰকো সপঞ্ঞো;

সব্বে নেতাদিসাতি [সব্বে নে তাদিসাতি (সী. স্যা. পী.)] ঞত্ৰা, ইতি দিস্ৰা ন হাপেতি তস্স সদ্ধা;

কথং হি দুট্ঠেন অসম্পদুট্ঠং, সুদ্ধং অসুদ্ধেন সমং করেয্যা’’তি.

চুন্দসুত্তং পঞ্চমং নিট্ঠিতং.