৬. পরাভৰসুত্তং

এৰং মে সুতং – একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. অথ খো অঞ্ঞতরা দেৰতা অভিক্কন্তায রত্তিযা অভিক্কন্তৰণ্ণা কেৰলকপ্পং জেতৰনং ওভাসেত্ৰা যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং অট্ঠাসি. একমন্তং ঠিতা খো সা দেৰতা ভগৰন্তং গাথায অজ্ঝভাসি –

৯১. ‘‘পরাভৰন্তং পুরিসং, মযং পুচ্ছাম গোতম [গোতমং (সী. স্যা.)];

ভগৰন্তং [ভৰন্তং (স্যা. ক.)] পুট্ঠুমাগম্ম, কিং পরাভৰতো মুখং’’.

৯২. ‘‘সুৰিজানো ভৰং হোতি, সুৰিজানো [দুৰিজানো (স্যা. ক.)] পরাভৰো;

ধম্মকামো ভৰং হোতি, ধম্মদেস্সী পরাভৰো’’.

৯৩. ‘‘ইতি হেতং ৰিজানাম, পঠমো সো পরাভৰো;

দুতিযং ভগৰা ব্রূহি, কিং পরাভৰতো মুখং’’.

৯৪. ‘‘অসন্তস্স পিযা হোন্তি, সন্তে ন কুরুতে পিযং;

অসতং ধম্মং রোচেতি, তং পরাভৰতো মুখং’’.

৯৫. ‘‘ইতি হেতং ৰিজানাম, দুতিযো সো পরাভৰো;

ততিযং ভগৰা ব্রূহি, কিং পরাভৰতো মুখং’’.

৯৬. ‘‘নিদ্দাসীলী সভাসীলী, অনুট্ঠাতা চ যো নরো;

অলসো কোধপঞ্ঞাণো, তং পরাভৰতো মুখং’’.

৯৭. ‘‘ইতি হেতং ৰিজানাম, ততিযো সো পরাভৰো;

চতুত্থং ভগৰা ব্রূহি, কিং পরাভৰতো মুখং’’.

৯৮. ‘‘যো মাতরং [যো মাতরং ৰা (সী. স্যা. কং. পী.)] পিতরং ৰা, জিণ্ণকং গতযোব্বনং;

পহু সন্তো ন ভরতি, তং পরাভৰতো মুখং’’.

৯৯. ‘‘ইতি হেতং ৰিজানাম, চতুত্থো সো পরাভৰো;

পঞ্চমং ভগৰা ব্রূহি, কিং পরাভৰতো মুখং’’.

১০০. ‘‘যো ব্রাহ্মণং [যো ব্রাহ্মণং ৰা (সী. স্যা. কং. পী.)] সমণং ৰা, অঞ্ঞং ৰাপি ৰনিব্বকং;

মুসাৰাদেন ৰঞ্চেতি, তং পরাভৰতো মুখং’’.

১০১. ‘‘ইতি হেতং ৰিজানাম, পঞ্চমো সো পরাভৰো;

ছট্ঠমং ভগৰা ব্রূহি, কিং পরাভৰতো মুখং’’.

১০২. ‘‘পহূতৰিত্তো পুরিসো, সহিরঞ্ঞো সভোজনো;

একো ভুঞ্জতি সাদূনি, তং পরাভৰতো মুখং’’.

১০৩. ‘‘ইতি হেতং ৰিজানাম, ছট্ঠমো সো পরাভৰো;

সত্তমং ভগৰা ব্রূহি, কিং পরাভৰতো মুখং’’.

১০৪. ‘‘জাতিত্থদ্ধো ধনত্থদ্ধো, গোত্তত্থদ্ধো চ যো নরো;

সঞ্ঞাতিং অতিমঞ্ঞেতি, তং পরাভৰতো মুখং’’.

১০৫. ‘‘ইতি হেতং ৰিজানাম, সত্তমো সো পরাভৰো;

অট্ঠমং ভগৰা ব্রূহি, কিং পরাভৰতো মুখং’’.

১০৬. ‘‘ইত্থিধুত্তো সুরাধুত্তো, অক্খধুত্তো চ যো নরো;

লদ্ধং লদ্ধং ৰিনাসেতি, তং পরাভৰতো মুখং’’.

১০৭. ‘‘ইতি হেতং ৰিজানাম, অট্ঠমো সো পরাভৰো;

নৰমং ভগৰা ব্রূহি, কিং পরাভৰতো মুখং’’.

১০৮. ‘‘সেহি দারেহি অসন্তুট্ঠো [দারেহ্যসন্তুট্ঠো (ক.)], ৰেসিযাসু পদুস্সতি [পদিস্সতি (সী.)];

দুস্সতি [দিস্সতি (সী. পী.)] পরদারেসু, তং পরাভৰতো মুখং’’.

১০৯. ‘‘ইতি হেতং ৰিজানাম, নৰমো সো পরাভৰো;

দসমং ভগৰা ব্রূহি, কিং পরাভৰতো মুখং’’.

১১০. ‘‘অতীতযোব্বনো পোসো, আনেতি তিম্বরুত্থনিং;

তস্সা ইস্সা ন সুপতি, তং পরাভৰতো মুখং’’.

১১১. ‘‘ইতি হেতং ৰিজানাম, দসমো সো পরাভৰো;

একাদসমং ভগৰা ব্রূহি, কিং পরাভৰতো মুখং’’.

১১২. ‘‘ইত্থিং সোণ্ডিং ৰিকিরণিং, পুরিসং ৰাপি তাদিসং;

ইস্সরিযস্মিং ঠপেতি [ঠাপেতি (সী. পী.), থপেতি (ক.)], তং পরাভৰতো মুখং’’.

১১৩. ‘‘ইতি হেতং ৰিজানাম, একাদসমো সো পরাভৰো;

দ্ৰাদসমং ভগৰা ব্রূহি, কিং পরাভৰতো মুখং’’.

১১৪. ‘‘অপ্পভোগো মহাতণ্হো, খত্তিযে জাযতে কুলে;

সো চ রজ্জং পত্থযতি, তং পরাভৰতো মুখং’’.

১১৫. ‘‘এতে পরাভৰে লোকে, পণ্ডিতো সমৰেক্খিয;

অরিযো দস্সনসম্পন্নো, স লোকং ভজতে সিৰ’’ন্তি.

পরাভৰসুত্তং ছট্ঠং নিট্ঠিতং.