৩. খগ্গৰিসাণসুত্তং

৩৫. সব্বেসু ভূতেসু নিধায দণ্ডং, অৰিহেঠযং অঞ্ঞতরম্পি তেসং;

ন পুত্তমিচ্ছেয্য কুতো সহাযং, একো চরে খগ্গৰিসাণকপ্পো.

৩৬. সংসগ্গজাতস্স ভৰন্তি স্নেহা, স্নেহন্ৰযং দুক্খমিদং পহোতি;

আদীনৰং স্নেহজং পেক্খমানো, একো চরে খগ্গৰিসাণকপ্পো.

৩৭. মিত্তে সুহজ্জে অনুকম্পমানো, হাপেতি অত্থং পটিবদ্ধচিত্তো;

এতং ভযং সন্থৰে [সন্ধৰে (ক.)] পেক্খমানো, একো চরে খগ্গৰিসাণকপ্পো.

৩৮. ৰংসো ৰিসালোৰ যথা ৰিসত্তো, পুত্তেসু দারেসু চ যা অপেক্খা;

ৰংসক্কল়ীরোৰ [ৰংসকল়ীরোৰ (সী.), ৰংসাকল়ীরোৰ (স্যা. কং. পী.), ৰংসেকল়ীরোৰ (নিদ্দেস)] অসজ্জমানো, একো চরে খগ্গৰিসাণকপ্পো.

৩৯. মিগো অরঞ্ঞম্হি যথা অবদ্ধো [অবন্ধো (স্যা. কং.)], যেনিচ্ছকং গচ্ছতি গোচরায;

ৰিঞ্ঞূ নরো সেরিতং পেক্খমানো, একো চরে খগ্গৰিসাণকপ্পো.

৪০. আমন্তনা হোতি সহাযমজ্ঝে, ৰাসে ঠানে গমনে চারিকায;

অনভিজ্ঝিতং সেরিতং পেক্খমানো, একো চরে খগ্গৰিসাণকপ্পো.

৪১. খিড্ডা রতী হোতি সহাযমজ্ঝে, পুত্তেসু চ ৰিপুলং হোতি পেমং;

পিযৰিপ্পযোগং ৰিজিগুচ্ছমানো, একো চরে খগ্গৰিসাণকপ্পো.

৪২. চাতুদ্দিসো অপ্পটিঘো চ হোতি, সন্তুস্সমানো ইতরীতরেন;

পরিস্সযানং সহিতা অছম্ভী, একো চরে খগ্গৰিসাণকপ্পো.

৪৩. দুস্সঙ্গহা পব্বজিতাপি একে, অথো গহট্ঠা ঘরমাৰসন্তা;

অপ্পোস্সুক্কো পরপুত্তেসু হুত্ৰা, একো চরে খগ্গৰিসাণকপ্পো.

৪৪. ওরোপযিত্ৰা গিহিব্যঞ্জনানি [গিহিৰ্যঞ্জনানি (স্যা. কং. পী.)], সঞ্ছিন্নপত্তো [সংসীনপত্তো (সী.)] যথা কোৰিল়ারো;

ছেত্ৰান ৰীরো গিহিবন্ধনানি, একো চরে খগ্গৰিসাণকপ্পো.

৪৫. সচে লভেথ নিপকং সহাযং, সদ্ধিং চরং সাধুৰিহারিধীরং;

অভিভুয্য সব্বানি পরিস্সযানি, চরেয্য তেনত্তমনো সতীমা.

৪৬. নো চে লভেথ নিপকং সহাযং, সদ্ধিং চরং সাধুৰিহারিধীরং;

রাজাৰ রট্ঠং ৰিজিতং পহায, একো চরে মাতঙ্গরঞ্ঞেৰ নাগো.

৪৭. অদ্ধা পসংসাম সহাযসম্পদং, সেট্ঠা সমা সেৰিতব্বা সহাযা;

এতে অলদ্ধা অনৰজ্জভোজী, একো চরে খগ্গৰিসাণকপ্পো.

৪৮. দিস্ৰা সুৰণ্ণস্স পভস্সরানি, কম্মারপুত্তেন সুনিট্ঠিতানি;

সঙ্ঘট্টমানানি দুৰে ভুজস্মিং, একো চরে খগ্গৰিসাণকপ্পো.

৪৯. এৰং দুতিযেন [দুতিযেন (সব্বত্থ)] সহা মমস্স, ৰাচাভিলাপো অভিসজ্জনা ৰা;

এতং ভযং আযতিং পেক্খমানো, একো চরে খগ্গৰিসাণকপ্পো.

৫০. কামা হি চিত্রা মধুরা মনোরমা, ৰিরূপরূপেন মথেন্তি চিত্তং;

আদীনৰং কামগুণেসু দিস্ৰা, একো চরে খগ্গৰিসাণকপ্পো.

৫১. ঈতী চ গণ্ডো চ উপদ্দৰো চ, রোগো চ সল্লঞ্চ ভযঞ্চ মেতং;

এতং ভযং কামগুণেসু দিস্ৰা, একো চরে খগ্গৰিসাণকপ্পো.

৫২. সীতঞ্চ উণ্হঞ্চ খুদং পিপাসং, ৰাতাতপে ডংসসরীসপে [ডংসসিরিংসপে (সী. স্যা. কং. পী.)] চ;

সব্বানিপেতানি অভিসম্ভৰিত্ৰা, একো চরে খগ্গৰিসাণকপ্পো.

৫৩. নাগোৰ যূথানি ৰিৰজ্জযিত্ৰা, সঞ্জাতখন্ধো পদুমী উল়ারো;

যথাভিরন্তং ৰিহরং [ৰিহরে (সী. পী. নিদ্দেস)] অরঞ্ঞে, একো চরে খগ্গৰিসাণকপ্পো.

৫৪. অট্ঠানতং সঙ্গণিকারতস্স, যং ফস্সযে [ফুস্সযে (স্যা.)] সামযিকং ৰিমুত্তিং;

আদিচ্চবন্ধুস্স ৰচো নিসম্ম, একো চরে খগ্গৰিসাণকপ্পো.

৫৫. দিট্ঠীৰিসূকানি উপাতিৰত্তো, পত্তো নিযামং পটিলদ্ধমগ্গো;

উপ্পন্নঞাণোম্হি অনঞ্ঞনেয্যো, একো চরে খগ্গৰিসাণকপ্পো.

৫৬. নিল্লোলুপো নিক্কুহো নিপ্পিপাসো, নিম্মক্খো নিদ্ধন্তকসাৰমোহো;

নিরাসযো [নিরাসাসো (ক.)] সব্বলোকে ভৰিত্ৰা, একো চরে খগ্গৰিসাণকপ্পো.

৫৭. পাপং সহাযং পরিৰজ্জযেথ, অনত্থদস্সিং ৰিসমে নিৰিট্ঠং;

সযং ন সেৰে পসুতং পমত্তং, একো চরে খগ্গৰিসাণকপ্পো.

৫৮. বহুস্সুতং ধম্মধরং ভজেথ, মিত্তং উল়ারং পটিভানৰন্তং;

অঞ্ঞায অত্থানি ৰিনেয্য কঙ্খং, একো চরে খগ্গৰিসাণকপ্পো.

৫৯. খিড্ডং রতিং কামসুখঞ্চ লোকে, অনলঙ্করিত্ৰা অনপেক্খমানো;

ৰিভূসনট্ঠানা ৰিরতো সচ্চৰাদী, একো চরে খগ্গৰিসাণকপ্পো.

৬০. পুত্তঞ্চ দারং পিতরঞ্চ মাতরং, ধনানি ধঞ্ঞানি চ বন্ধৰানি [বন্ধৰানি চ (পী.)];

হিত্ৰান কামানি যথোধিকানি, একো চরে খগ্গৰিসাণকপ্পো.

৬১. সঙ্গো এসো পরিত্তমেত্থ সোখ্যং, অপ্পস্সাদো দুক্খমেত্থ ভিয্যো;

গল়ো এসো ইতি ঞত্ৰা মুতীমা [মতীমা (স্যা. ক.)], একো চরে খগ্গৰিসাণকপ্পো.

৬২. সন্দালযিত্ৰান [পদালযিত্ৰান (ক.)] সংযোজনানি, জালংৰ ভেত্ৰা সলিলম্বুচারী;

অগ্গীৰ দড্ঢং অনিৰত্তমানো, একো চরে খগ্গৰিসাণকপ্পো.

৬৩. ওক্খিত্তচক্খূ ন চ পাদলোলো, গুত্তিন্দ্রিযো রক্খিতমানসানো;

অনৰস্সুতো অপরিডয্হমানো, একো চরে খগ্গৰিসাণকপ্পো.

৬৪. ওহারযিত্ৰা গিহিব্যঞ্জনানি, সঞ্ছন্নপত্তো [সঞ্ছিন্নপত্তো (স্যা. পী.), পচ্ছিন্নপত্তো (ক.)] যথা পারিছত্তো;

কাসাযৰত্থো অভিনিক্খমিত্ৰা, একো চরে খগ্গৰিসাণকপ্পো.

৬৫. রসেসু গেধং অকরং অলোলো, অনঞ্ঞপোসী সপদানচারী;

কুলে কুলে অপ্পটিবদ্ধচিত্তো [অপ্পটিবন্ধচিত্তো (ক.)], একো চরে খগ্গৰিসাণকপ্পো.

৬৬. পহায পঞ্চাৰরণানি চেতসো, উপক্কিলেসে ব্যপনুজ্জ সব্বে;

অনিস্সিতো ছেত্ৰ [ছেত্ৰা (স্যা. পী. ক.)] সিনেহদোসং [স্নেহদোসং (ক.)], একো চরে খগ্গৰিসাণকপ্পো.

৬৭. ৰিপিট্ঠিকত্ৰান সুখং দুখঞ্চ, পুব্বেৰ চ সোমনস্সদোমনস্সং;

লদ্ধানুপেক্খং সমথং ৰিসুদ্ধং, একো চরে খগ্গৰিসাণকপ্পো.

৬৮. আরদ্ধৰীরিযো পরমত্থপত্তিযা, অলীনচিত্তো অকুসীতৰুত্তি;

দল়্হনিক্কমো থামবলূপপন্নো, একো চরে খগ্গৰিসাণকপ্পো.

৬৯. পটিসল্লানং ঝানমরিঞ্চমানো, ধম্মেসু নিচ্চং অনুধম্মচারী;

আদীনৰং সম্মসিতা ভৰেসু, একো চরে খগ্গৰিসাণকপ্পো.

৭০. তণ্হক্খযং পত্থযমপ্পমত্তো, অনেল়মূগো [অনেলমূগো (স্যা. পী. ক.)] সুতৰা সতীমা;

সঙ্খাতধম্মো নিযতো পধানৰা, একো চরে খগ্গৰিসাণকপ্পো.

৭১. সীহোৰ সদ্দেসু অসন্তসন্তো, ৰাতোৰ জালম্হি অসজ্জমানো;

পদুমংৰ তোযেন অলিপ্পমানো [অলিম্পমানো (সী. স্যা. ক.)], একো চরে খগ্গৰিসাণকপ্পো.

৭২. সীহো যথা দাঠবলী পসয্হ, রাজা মিগানং অভিভুয্য চারী;

সেৰেথ পন্তানি সেনাসনানি, একো চরে খগ্গৰিসাণকপ্পো.

৭৩. মেত্তং উপেক্খং করুণং ৰিমুত্তিং, আসেৰমানো মুদিতঞ্চ কালে;

সব্বেন লোকেন অৰিরুজ্ঝমানো, একো চরে খগ্গৰিসাণকপ্পো.

৭৪. রাগঞ্চ দোসঞ্চ পহায মোহং, সন্দালযিত্ৰান সংযোজনানি;

অসন্তসং জীৰিতসঙ্খযম্হি, একো চরে খগ্গৰিসাণকপ্পো.

৭৫. ভজন্তি সেৰন্তি চ কারণত্থা, নিক্কারণা দুল্লভা অজ্জ মিত্তা;

অত্তট্ঠপঞ্ঞা অসুচী মনুস্সা, একো চরে খগ্গৰিসাণকপ্পো.

খগ্গৰিসাণসুত্তং ততিযং নিট্ঠিতং.