২. ধনিযসুত্তং

১৮. ‘‘পক্কোদনো দুদ্ধখীরোহমস্মি, (ইতি ধনিযো গোপো)

অনুতীরে মহিযা সমানৰাসো;

ছন্না কুটি আহিতো গিনি, অথ চে পত্থযসী পৰস্স দেৰ’’.

১৯. ‘‘অক্কোধনো ৰিগতখিলোহমস্মি [ৰিগতখীলোহমস্মি (সী. পী.)], (ইতি ভগৰা)

অনুতীরে মহিযেকরত্তিৰাসো;

ৰিৰটা কুটি নিব্বুতো গিনি, অথ চে পত্থযসী পৰস্স দেৰ’’.

২০. ‘‘অন্ধকমকসা ন ৰিজ্জরে, (ইতি ধনিযো গোপো)

কচ্ছে রূল়্হতিণে চরন্তি গাৰো;

ৰুট্ঠিম্পি সহেয্যুমাগতং, অথ চে পত্থযসী পৰস্স দেৰ’’.

২১. ‘‘বদ্ধাসি ভিসী সুসঙ্খতা, (ইতি ভগৰা)

তিণ্ণো পারগতো ৰিনেয্য ওঘং;

অত্থো ভিসিযা ন ৰিজ্জতি, অথ চে পত্থযসী পৰস্স দেৰ’’.

২২. ‘‘গোপী মম অস্সৰা অলোলা, (ইতি ধনিযো গোপো)

দীঘরত্তং [দীঘরত্ত (ক.)] সংৰাসিযা মনাপা;

তস্সা ন সুণামি কিঞ্চি পাপং, অথ চে পত্থযসী পৰস্স দেৰ’’.

২৩. ‘‘চিত্তং মম অস্সৰং ৰিমুত্তং, (ইতি ভগৰা)

দীঘরত্তং পরিভাৰিতং সুদন্তং;

পাপং পন মে ন ৰিজ্জতি, অথ চে পত্থযসী পৰস্স দেৰ’’.

২৪. ‘‘অত্তৰেতনভতোহমস্মি, (ইতি ধনিযো গোপো)

পুত্তা চ মে সমানিযা অরোগা;

তেসং ন সুণামি কিঞ্চি পাপং, অথ চে পত্থযসী পৰস্স দেৰ’’.

২৫. ‘‘নাহং ভতকোস্মি কস্সচি, (ইতি ভগৰা)

নিব্বিট্ঠেন চরামি সব্বলোকে;

অত্থো ভতিযা ন ৰিজ্জতি, অথ চে পত্থযসী পৰস্স দেৰ’’.

২৬. ‘‘অত্থি ৰসা অত্থি ধেনুপা, (ইতি ধনিযো গোপো)

গোধরণিযো পৰেণিযোপি অত্থি;

উসভোপি গৰম্পতীধ অত্থি, অথ চে পত্থযসী পৰস্স দেৰ’’.

২৭. ‘‘নত্থি ৰসা নত্থি ধেনুপা, (ইতি ভগৰা)

গোধরণিযো পৰেণিযোপি নত্থি;

উসভোপি গৰম্পতীধ নত্থি, অথ চে পত্থযসী পৰস্স দেৰ’’.

২৮. ‘‘খিলা নিখাতা অসম্পৰেধী, (ইতি ধনিযো গোপো)

দামা মুঞ্জমযা নৰা সুসণ্ঠানা;

ন হি সক্খিন্তি ধেনুপাপি ছেত্তুং [ছেতুং (ক.)], অথ চে পত্থযসী পৰস্স দেৰ’’.

২৯. ‘‘উসভোরিৰ ছেত্ৰ [ছেত্ৰা (স্যা. ক.)] বন্ধনানি, (ইতি ভগৰা)

নাগো পূতিলতংৰ দালযিত্ৰা [পূতিলতং পদালযিত্ৰা (স্যা. ক.)];

নাহং পুনুপেস্সং [পুন উপেস্সং (সী. স্যা. কং. পী.), পুনুপেয্য (ক.)] গব্ভসেয্যং, অথ চে পত্থযসী পৰস্স দেৰ’’.

৩০. ‘‘নিন্নঞ্চ থলঞ্চ পূরযন্তো, মহামেঘো পৰস্সি তাৰদেৰ;

সুত্ৰা দেৰস্স ৰস্সতো, ইমমত্থং ধনিযো অভাসথ.

৩১. ‘‘লাভা ৰত নো অনপ্পকা, যে মযং ভগৰন্তং অদ্দসাম;

সরণং তং উপেম চক্খুম, সত্থা নো হোহি তুৰং মহামুনি.

৩২. ‘‘গোপী চ অহঞ্চ অস্সৰা, ব্রহ্মচরিযং [ব্রহ্মচরিয (ক.)] সুগতে চরামসে;

জাতিমরণস্স পারগূ [পারগা (সী. স্যা. কং. পী.)], দুক্খস্সন্তকরা ভৰামসে’’.

৩৩. ‘‘নন্দতি পুত্তেহি পুত্তিমা, (ইতি মারো পাপিমা)

গোমা [গোমিকো (সী. পী.), গোপিকো (স্যা. কং.), গোপিযো (ক.)] গোহি তথেৰ নন্দতি;

উপধী হি নরস্স নন্দনা, ন হি সো নন্দতি যো নিরূপধি’’.

৩৪. ‘‘সোচতি পুত্তেহি পুত্তিমা, (ইতি ভগৰা)

গোপিযো গোহি তথেৰ সোচতি;

উপধী হি নরস্স সোচনা, ন হি সো সোচতি যো নিরূপধী’’তি.

ধনিযসুত্তং দুতিযং নিট্ঠিতং.