৯. অঙ্কুরপেতৰত্থু

২৫৭. ‘‘যস্স অত্থায গচ্ছাম, কম্বোজং ধনহারকা;

অযং কামদদো যক্খো, ইমং যক্খং নযামসে.

২৫৮. ‘‘ইমং যক্খং গহেত্ৰান, সাধুকেন পসয্হ ৰা;

যানং আরোপযিত্ৰান, খিপ্পং গচ্ছাম দ্ৰারক’’ন্তি.

২৫৯. [জা. ১.১০.১৫১; ১.১৪.১৯৬; ২.১৮.১৫৩; ২.২২.১০] ‘‘যস্স রুক্খস্স ছাযায, নিসীদেয্য সযেয্য ৰা;

ন তস্স সাখং ভঞ্জেয্য, মিত্তদুব্ভো হি পাপকো’’তি.

২৬০. ‘‘যস্স রুক্খস্স ছাযায, নিসীদেয্য সযেয্য ৰা;

খন্ধম্পি তস্স ছিন্দেয্য, অত্থো চে তাদিসো সিযা’’তি.

২৬১. ‘‘যস্স রুক্খস্স ছাযায, নিসীদেয্য সযেয্য ৰা;

ন তস্স পত্তং ভিন্দেয্য [হিংসেয্য (ক.)], মিত্তদুব্ভো হি পাপকো’’তি.

২৬২. ‘‘যস্স রুক্খস্স ছাযায, নিসীদেয্য সযেয্য ৰা;

সমূলম্পি তং অব্বুহে [উব্বহে (?)], অত্থো চে তাদিসো সিযা’’তি.

২৬৩. ‘‘যস্সেকরত্তিম্পি ঘরে ৰসেয্য, যত্থন্নপানং পুরিসো লভেথ;

ন তস্স পাপং মনসাপি চিন্তযে, কতঞ্ঞুতা সপ্পুরিসেহি ৰণ্ণিতা.

২৬৪. ‘‘যস্সেকরত্তিম্পি ঘরে ৰসেয্য, অন্নেন পানেন উপট্ঠিতো সিযা;

ন তস্স পাপং মনসাপি চিন্তযে, অদুব্ভপাণী দহতে মিত্তদুব্ভিং.

২৬৫. ‘‘যো পুব্বে কতকল্যাণো, পচ্ছা পাপেন হিংসতি;

অল্লপাণিহতো [অদুব্ভিপাণীহতো (ক)] পোসো, ন সো ভদ্রানি পস্সতী’’তি.

২৬৬. ‘‘নাহং দেৰেন ৰা মনুস্সেন ৰা, ইস্সরিযেন ৰাহং সুপ্পসয্হো;

যক্খোহমস্মি পরমিদ্ধিপত্তো, দূরঙ্গমো ৰণ্ণবলূপপন্নো’’তি.

২৬৭. ‘‘পাণি তে সব্বসো ৰণ্ণো, পঞ্চধারো মধুস্সৰো;

নানারসা পগ্ঘরন্তি, মঞ্ঞেহং তং পুরিন্দদ’’ন্তি.

২৬৮. ‘‘নাম্হি দেৰো ন গন্ধব্বো, নাপি সক্কো পুরিন্দদো;

পেতং মং অঙ্কুর জানাহি, রোরুৰম্হা [হেরুৰম্হা (সী.)] ইধাগত’’ন্তি.

২৬৯. ‘‘কিংসীলো কিংসমাচারো, রোরুৰস্মিং পুরে তুৰং;

কেন তে ব্রহ্মচরিযেন, পুঞ্ঞং পাণিম্হি ইজ্ঝতী’’তি.

২৭০. ‘‘তুন্নৰাযো পুরে আসিং, রোরুৰস্মিং তদা অহং;

সুকিচ্ছৰুত্তি কপণো, ন মে ৰিজ্জতি দাতৰে.

২৭১. ‘‘নিৰেসনঞ্চ [আৰেসনঞ্চ (সী.)] মে আসি, অসয্হস্স উপন্তিকে;

সদ্ধস্স দানপতিনো, কতপুঞ্ঞস্স লজ্জিনো.

২৭২. ‘‘তত্থ যাচনকা যন্তি, নানাগোত্তা ৰনিব্বকা;

তে চ মং তত্থ পুচ্ছন্তি, অসয্হস্স নিৰেসনং.

২৭৩. ‘‘কত্থ গচ্ছাম ভদ্দং ৰো, কত্থ দানং পদীযতি;

তেসাহং পুট্ঠো অক্খামি, অসয্হস্স নিৰেসনং.

২৭৪. ‘‘পগ্গয্হ দক্খিণং বাহুং, এত্থ গচ্ছথ ভদ্দং ৰো;

এত্থ দানং পদীযতি, অসয্হস্স নিৰেসনে.

২৭৫. ‘‘তেন পাণি কামদদো, তেন পাণি মধুস্সৰো;

তেন মে ব্রহ্মচরিযেন, পুঞ্ঞং পাণিম্হি ইজ্ঝতী’’তি.

২৭৬. ‘‘ন কির ত্ৰং অদা দানং, সকপাণীহি কস্সচি;

পরস্স দানং অনুমোদমানো, পাণিং পগ্গয্হ পাৰদি.

২৭৭. ‘‘তেন পাণি কামদদো, তেন পাণি মধুস্সৰো;

তেন তে ব্রহ্মচরিযেন, পুঞ্ঞং পাণিম্হি ইজ্ঝতি.

২৭৮. ‘‘যো সো দানমদা ভন্তে, পসন্নো সকপাণিভি;

সো হিত্ৰা মানুসং দেহং, কিং নু সো দিসতং গতো’’তি.

২৭৯. ‘‘নাহং পজানামি অসয্হসাহিনো, অঙ্গীরসস্স গতিং আগতিং ৰা;

সুতঞ্চ মে ৰেস্সৰণস্স সন্তিকে, সক্কস্স সহব্যতং গতো অসয্হো’’তি.

২৮০. ‘‘অলমেৰ কাতুং কল্যাণং, দানং দাতুং যথারহং;

পাণিং কামদদং দিস্ৰা, কো পুঞ্ঞং ন করিস্সতি.

২৮১. ‘‘সো হি নূন ইতো গন্ত্ৰা, অনুপ্পত্ৰান দ্ৰারকং;

দানং পট্ঠপযিস্সামি, যং মমস্স সুখাৰহং.

২৮২. ‘‘দস্সামন্নঞ্চ পানঞ্চ, ৰত্থসেনাসনানি চ;

পপঞ্চ উদপানঞ্চ, দুগ্গে সঙ্কমনানি চা’’তি.

২৮৩. ‘‘কেন তে অঙ্গুলী কুণা [কুণ্ঠা (সী. স্যা.)], মুখঞ্চ কুণলীকতং [কুণ্ডলীকতং (সী. স্যা. ক.)];

অক্খীনি চ পগ্ঘরন্তি, কিং পাপং পকতং তযা’’তি.

২৮৪. ‘‘অঙ্গীরসস্স গহপতিনো, সদ্ধস্স ঘরমেসিনো;

তস্সাহং দানৰিস্সগ্গে, দানে অধিকতো অহুং.

২৮৫. ‘‘তত্থ যাচনকে দিস্ৰা, আগতে ভোজনত্থিকে;

একমন্তং অপক্কম্ম, অকাসিং কুণলিং মুখং.

২৮৬. ‘‘তেন মে অঙ্গুলী কুণা, মুখঞ্চ কুণলীকতং;

অক্খীনি মে পগ্ঘরন্তি, তং পাপং পকতং মযা’’তি.

২৮৭. ‘‘ধম্মেন তে কাপুরিস, মুখঞ্চ কুণলীকতং;

অক্খীনি চ পগ্ঘরন্তি, যং তং পরস্স দানস্স;

অকাসি কুণলিং মুখং.

২৮৮. ‘‘কথং হি দানং দদমানো, করেয্য পরপত্তিযং;

অন্নং পানং খাদনীযং, ৰত্থসেনাসনানি চ.

২৮৯. ‘‘সো হি নূন ইতো গন্ত্ৰা, অনুপ্পত্ৰান দ্ৰারকং;

দানং পট্ঠপযিস্সামি, যং মমস্স সুখাৰহং.

২৯০. ‘‘দস্সামন্নঞ্চ পানঞ্চ, ৰত্থসেনাসনানি চ;

পপঞ্চ উদপানঞ্চ, দুগ্গে সঙ্কমনানি চা’’তি.

২৯১. ততো হি সো নিৰত্তিত্ৰা, অনুপ্পত্ৰান দ্ৰারকং;

দানং পট্ঠপযি অঙ্কুরো, যংতুমস্স [যং তং অস্স (স্যা.), যন্তমস্স (ক.)] সুখাৰহং.

২৯২. অদা অন্নঞ্চ পানঞ্চ, ৰত্থসেনাসনানি চ;

পপঞ্চ উদপানঞ্চ, ৰিপ্পসন্নেন চেতসা.

২৯৩. ‘‘কো ছাতো কো চ তসিতো, কো ৰত্থং পরিদহিস্সতি;

কস্স সন্তানি যোগ্গানি, ইতো যোজেন্তু ৰাহনং.

২৯৪. ‘‘কো ছত্তিচ্ছতি গন্ধঞ্চ, কো মালং কো উপাহনং;

ইতিস্সু তত্থ ঘোসেন্তি, কপ্পকা সূদমাগধা [পাটৰা (ক.)];

সদা সাযঞ্চ পাতো চ, অঙ্কুরস্স নিৰেসনে.

২৯৫. ‘‘‘সুখং সুপতি অঙ্কুরো’, ইতি জানাতি মং জনো;

দুক্খং সুপামি সিন্ধক [সন্দুক, সিন্ধুক (ক.)], যং ন পস্সামি যাচকে.

২৯৬. ‘‘‘সুখং সুপতি অঙ্কুরো’, ইতি জানাতি মং জনো;

দুক্খং সিন্ধক সুপামি, অপ্পকে সু ৰনিব্বকে’’তি.

২৯৭. ‘‘সক্কো চে তে ৰরং দজ্জা, তাৰতিংসানমিস্সরো;

কিস্স সব্বস্স লোকস্স, ৰরমানো ৰরং ৰরে’’তি.

২৯৮. ‘‘সক্কো চে মে ৰরং দজ্জা, তাৰতিংসানমিস্সরো;

কালুট্ঠিতস্স মে সতো, সুরিযুগ্গমনং পতি;

দিব্বা ভক্খা পাতুভৰেয্যুং, সীলৰন্তো চ যাচকা.

২৯৯. ‘‘দদতো মে ন খীযেথ, দত্ৰা নানুতপেয্যহং;

দদং চিত্তং পসাদেয্যং, এতং সক্কং ৰরং ৰরে’’তি.

৩০০. ‘‘ন সব্বৰিত্তানি পরে পৰেচ্ছে, দদেয্য দানঞ্চ ধনঞ্চ রক্খে;

তস্মা হি দানা ধনমেৰ সেয্যো, অতিপ্পদানেন কুলা ন হোন্তি.

৩০১. ‘‘অদানমতিদানঞ্চ, নপ্পসংসন্তি পণ্ডিতা;

তস্মা হি দানা ধনমেৰ সেয্যো, সমেন ৰত্তেয্য স ধীরধম্মো’’তি.

৩০২. ‘‘অহো ৰত রে অহমেৰ দজ্জং, সন্তো চ মং সপ্পুরিসা ভজেয্যুং;

মেঘোৰ নিন্নানি পরিপূরযন্তো [ভিপূরযন্তো (সী.), হি পূরযন্তো (স্যা.)], সন্তপ্পযে সব্বৰনিব্বকানং.

৩০৩. ‘‘যস্স যাচনকে দিস্ৰা, মুখৰণ্ণো পসীদতি;

দত্ৰা অত্তমনো হোতি, তং ঘরং ৰসতো সুখং.

৩০৪. ‘‘যস্স যাচনকে দিস্ৰা, মুখৰণ্ণো পসীদতি;

দত্ৰা অত্তমনো হোতি, এসা যঞ্ঞস্স [পুঞ্ঞস্স (সী.)] সম্পদা.

৩০৫. [অ. নি. ৬.৩৭] ‘‘পুব্বেৰ দানা সুমনো, দদং চিত্তং পসাদযে;

দত্ৰা অত্তমনো হোতি, এসা যঞ্ঞস্স [পুঞ্ঞস্স (সী.)] সম্পদা’’তি.

৩০৬. সট্ঠি ৰাহসহস্সানি, অঙ্কুরস্স নিৰেসনে;

ভোজনং দীযতে নিচ্চং, পুঞ্ঞপেক্খস্স জন্তুনো.

৩০৭. তিসহস্সানি সূদানি হি [সূদানি (স্যা. ক.)], আমুত্তমণিকুণ্ডলা;

অঙ্কুরং উপজীৰন্তি, দানে যঞ্ঞস্স ৰাৰটা [ব্যাৰটা (সী.), পাৰটা (স্যা.)].

৩০৮. সট্ঠি পুরিসসহস্সানি, আমুত্তমণিকুণ্ডলা;

অঙ্কুরস্স মহাদানে, কট্ঠং ফালেন্তি মাণৰা.

৩০৯. সোল়সিত্থিসহস্সানি, সব্বালঙ্কারভূসিতা;

অঙ্কুরস্স মহাদানে, ৰিধা পিণ্ডেন্তি নারিযো.

৩১০. সোল়সিত্থিসহস্সানি, সব্বালঙ্কারভূসিতা;

অঙ্কুরস্স মহাদানে, দব্বিগাহা উপট্ঠিতা.

৩১১. বহুং বহূনং পাদাসি, চিরং পাদাসি খত্তিযো;

সক্কচ্চঞ্চ সহত্থা চ, চিত্তীকত্ৰা পুনপ্পুনং.

৩১২. বহূ মাসে চ পক্খে চ, উতুসংৰচ্ছরানি চ;

মহাদানং পৰত্তেসি, অঙ্কুরো দীঘমন্তরং.

৩১৩. এৰং দত্ৰা যজিত্ৰা চ, অঙ্কুরো দীঘমন্তরং;

সো হিত্ৰা মানুসং দেহং, তাৰতিংসূপগো অহু.

৩১৪. কটচ্ছুভিক্খং দত্ৰান, অনুরুদ্ধস্স ইন্দকো;

সো হিত্ৰা মানুসং দেহং, তাৰতিংসূপগো অহু.

৩১৫. দসহি ঠানেহি অঙ্কুরং, ইন্দকো অতিরোচতি;

রূপে সদ্দে রসে গন্ধে, ফোট্ঠব্বে চ মনোরমে.

৩১৬. আযুনা যসসা চেৰ, ৰণ্ণেন চ সুখেন চ;

আধিপচ্চেন অঙ্কুরং, ইন্দকো অতিরোচতি.

৩১৭. তাৰতিংসে যদা বুদ্ধো, সিলাযং পণ্ডুকম্বলে;

পারিচ্ছত্তকমূলম্হি, ৰিহাসি পুরিসুত্তমো.

৩১৮. দসসু লোকধাতূসু, সন্নিপতিত্ৰান দেৰতা;

পযিরুপাসন্তি সম্বুদ্ধং, ৰসন্তং নগমুদ্ধনি.

৩১৯. ন কোচি দেৰো ৰণ্ণেন, সম্বুদ্ধং অতিরোচতি;

সব্বে দেৰে অতিক্কম্ম [অধিগয্হ (সী.), অতিগ্গয্হ (ক)], সম্বুদ্ধোৰ ৰিরোচতি.

৩২০. যোজনানি দস দ্ৰে চ, অঙ্কুরোযং তদা অহু;

অৰিদূরেৰ বুদ্ধস্স [অৰিদূরে সম্বুদ্ধস্স (ক.)], ইন্দকো অতিরোচতি.

৩২১. ওলোকেত্ৰান সম্বুদ্ধো, অঙ্কুরঞ্চাপি ইন্দকং;

দক্খিণেয্যং সম্ভাৰেন্তো [পভাৰেন্তো (সী.)], ইদং ৰচনমব্রৰি.

৩২২. ‘‘মহাদানং তযা দিন্নং, অঙ্কুর দীঘমন্তরং;

অতিদূরে [সুৰিদূরে (ক.)] নিসিন্নোসি, আগচ্ছ মম সন্তিকে’’তি.

৩২৩. চোদিতো ভাৰিতত্তেন, অঙ্কুরো ইদমব্রৰি;

‘‘কিং ময্হং তেন দানেন, দক্খিণেয্যেন সুঞ্ঞতং.

৩২৪. ‘‘অযং সো ইন্দকো যক্খো, দজ্জা দানং পরিত্তকং;

অতিরোচতি অম্হেহি, চন্দো তারগণে যথা’’তি.

৩২৫. ‘‘উজ্জঙ্গলে যথা খেত্তে, বীজং বহুম্পি রোপিতং;

ন ৰিপুলফলং হোতি, নপি তোসেতি কস্সকং.

৩২৬. ‘‘তথেৰ দানং বহুকং, দুস্সীলেসু পতিট্ঠিতং;

ন ৰিপুলফলং হোতি, নপি তোসেতি দাযকং.

৩২৭. ‘‘যথাপি ভদ্দকে খেত্তে, বীজং অপ্পম্পি রোপিতং;

সম্মা ধারং পৰেচ্ছন্তে, ফলং তোসেতি কস্সকং.

৩২৮. ‘‘তথেৰ সীলৰন্তেসু, গুণৰন্তেসু তাদিসু;

অপ্পকম্পি কতং কারং, পুঞ্ঞং হোতি মহপ্ফল’’ন্তি.

৩২৯. ৰিচেয্য দানং দাতব্বং, যত্থ দিন্নং মহপ্ফলং;

ৰিচেয্য দানং দত্ৰান, সগ্গং গচ্ছন্তি দাযকা.