৬. কণ্হপেতৰত্থু

২০৭. ‘‘উট্ঠেহি কণ্হ কিং সেসি, কো অত্থো সুপনেন তে;

যো চ তুয্হং সকো ভাতা, হদযং চক্খু চ [চক্খুংৰ (অট্ঠ.)] দক্খিণং;

তস্স ৰাতা বলীযন্তি, সসং জপ্পতি [ঘটো জপ্পতি (ক.)] কেসৰা’’তি.

২০৮. ‘‘তস্স তং ৰচনং সুত্ৰা, রোহিণেয্যস্স কেসৰো;

তরমানরূপো ৰুট্ঠাসি, ভাতুসোকেন অট্টিতো.

২০৯. ‘‘কিং নু উম্মত্তরূপোৰ, কেৰলং দ্ৰারকং ইমং;

সসো সসোতি লপসি, কীদিসং সসমিচ্ছসি.

২১০. ‘‘সোৰণ্ণমযং মণিমযং, লোহমযং অথ রূপিযমযং;

সঙ্খসিলাপৰাল়মযং, কারযিস্সামি তে সসং.

২১১. ‘‘সন্তি অঞ্ঞেপি সসকা, অরঞ্ঞৰনগোচরা;

তেপি তে আনযিস্সামি, কীদিসং সসমিচ্ছসী’’তি.

২১২. ‘‘নাহমেতে সসে ইচ্ছে, যে সসা পথৰিস্সিতা;

চন্দতো সসমিচ্ছামি, তং মে ওহর কেসৰা’’তি.

২১৩. ‘‘সো নূন মধুরং ঞাতি, জীৰিতং ৰিজহিস্সসি;

অপত্থিযং পত্থযসি, চন্দতো সসমিচ্ছসী’’তি.

২১৪. ‘‘এৰং চে কণ্হ জানাসি, যথঞ্ঞমনুসাসসি;

কস্মা পুরে মতং পুত্তং, অজ্জাপি মনুসোচসি.

২১৫. ‘‘ন যং লব্ভা মনুস্সেন, অমনুস্সেন ৰা পন;

জাতো মে মা মরি পুত্তো, কুতো লব্ভা অলব্ভিযং.

২১৬. ‘‘ন মন্তা মূলভেসজ্জা, ওসধেহি ধনেন ৰা;

সক্কা আনযিতুং কণ্হ, যং পেতমনুসোচসি.

২১৭. ‘‘মহদ্ধনা মহাভোগা, রট্ঠৰন্তোপি খত্তিযা;

পহূতধনধঞ্ঞাসে, তেপি নো [নত্থেত্থপাঠভেদো] অজরামরা.

২১৮. ‘‘খত্তিযা ব্রাহ্মণা ৰেস্সা, সুদ্দা চণ্ডালপুক্কুসা;

এতে চঞ্ঞে চ জাতিযা, তেপি নো অজরামরা.

২১৯. ‘‘যে মন্তং পরিৰত্তেন্তি, ছল়ঙ্গং ব্রহ্মচিন্তিতং;

এতে চঞ্ঞে চ ৰিজ্জায, তেপি নো অজরামরা.

২২০. ‘‘ইসযো ৰাপি [ইসযো চাপি (ৰিমানৰত্থু ৯৯)] যে সন্তা, সঞ্ঞতত্তা তপস্সিনো;

সরীরং তেপি কালেন, ৰিজহন্তি তপস্সিনো.

২২১. ‘‘ভাৰিতত্তা অরহন্তো, কতকিচ্চা অনাসৰা;

নিক্খিপন্তি ইমং দেহং, পুঞ্ঞপাপপরিক্খযা’’তি.

২২২. ‘‘আদিত্তং ৰত মং সন্তং, ঘতসিত্তংৰ পাৰকং;

ৰারিনা ৰিয ওসিঞ্চং, সব্বং নিব্বাপযে দরং.

২২৩. ‘‘অব্বহী ৰত মে সল্লং, সোকং হদযনিস্সিতং;

যো মে সোকপরেতস্স, পুত্তসোকং অপানুদি.

২২৪. ‘‘স্ৰাহং অব্বূল়্হসল্লোস্মি, সীতিভূতোস্মি নিব্বুতো;

ন সোচামি ন রোদামি, তৰ সুত্ৰান ভাতিক’’ [ভাসিতং (স্যা.)].

২২৫. এৰং করোন্তি সপ্পঞ্ঞা, যে হোন্তি অনুকম্পকা;

নিৰত্তযন্তি সোকম্হা, ঘটো জেট্ঠংৰ ভাতরং.

২২৬. যস্স এতাদিসা হোন্তি, অমচ্চা পরিচারকা;

সুভাসিতেন অন্ৰেন্তি, ঘটো জেট্ঠংৰ ভাতরন্তি.

কণ্হপেতৰত্থু ছট্ঠং.