৪. নন্দাপেতিৰত্থু

১৬৮. ‘‘কাল়ী দুব্বণ্ণরূপাসি, ফরুসা ভীরুদস্সনা;

পিঙ্গলাসি কল়ারাসি, ন তং মঞ্ঞামি মানুসি’’ন্তি.

১৬৯. ‘‘অহং নন্দা নন্দিসেন, ভরিযা তে পুরে অহুং;

পাপকম্মং করিত্ৰান, পেতলোকং ইতো গতা’’তি.

১৭০. ‘‘কিং নু কাযেন ৰাচায, মনসা দুক্কটং কতং;

কিস্স কম্মৰিপাকেন, পেতলোকং ইতো গতা’’তি.

১৭১. ‘‘চণ্ডী চ ফরুসা চাসিং [চণ্ডী ফরুসৰাচা চ (সী.)], তযি চাপি অগারৰা;

তাহং দুরুত্তং ৰত্ৰান, পেতলোকং ইতো গতা’’তি.

১৭২. ‘‘হন্দুত্তরীযং দদামি তে, ইমং [ইদং (সী. অট্ঠ.)] দুস্সং নিৰাসয;

ইমং দুস্সং নিৰাসেত্ৰা, এহি নেস্সামি তং ঘরং.

১৭৩. ‘‘ৰত্থঞ্চ অন্নপানঞ্চ, লচ্ছসি ত্ৰং ঘরং গতা;

পুত্তে চ তে পস্সিস্সসি, সুণিসাযো চ দক্খসী’’তি.

১৭৪. ‘‘হত্থেন হত্থে তে দিন্নং, ন ময্হং উপকপ্পতি;

ভিক্খূ চ সীলসম্পন্নে, ৰীতরাগে বহুস্সুতে.

১৭৫. ‘‘তপ্পেহি অন্নপানেন, মম দক্খিণমাদিস;

তদাহং সুখিতা হেস্সং, সব্বকামসমিদ্ধিনী’’তি.

১৭৬. সাধূতি সো পটিস্সুত্ৰা, দানং ৰিপুলমাকিরি;

অন্নং পানং খাদনীযং, ৰত্থসেনাসনানি চ;

ছত্তং গন্ধঞ্চ মালঞ্চ, ৰিৰিধা চ উপাহনা.

১৭৭. ভিক্খূ চ সীলসম্পন্নে, ৰীতরাগে বহুস্সুতে;

তপ্পেত্ৰা অন্নপানেন, তস্সা দক্খিণমাদিসী.

১৭৮. সমনন্তরানুদ্দিট্ঠে, ৰিপাকো উদপজ্জথ;

ভোজনচ্ছাদনপানীযং, দক্খিণায ইদং ফলং.

১৭৯. ততো সুদ্ধা সুচিৰসনা, কাসিকুত্তমধারিনী;

ৰিচিত্তৰত্থাভরণা, সামিকং উপসঙ্কমি.

১৮০. ‘‘অভিক্কন্তেন ৰণ্ণেন, যা ত্ৰং তিট্ঠসি দেৰতে;

ওভাসেন্তী দিসা সব্বা, ওসধী ৰিয তারকা.

১৮১. ‘‘কেন তেতাদিসো ৰণ্ণো, কেন তে ইধ মিজ্ঝতি;

উপ্পজ্জন্তি চ তে ভোগা, যে কেচি মনসো পিযা.

১৮২. ‘‘পুচ্ছামি তং দেৰি মহানুভাৰে, মনুস্সভূতা কিমকাসি পুঞ্ঞং;

কেনাসি এৰং জলিতানুভাৰা, ৰণ্ণো চ তে সব্বদিসা পভাসতী’’তি.

১৮৩. ‘‘অহং নন্দা নন্দিসেন, ভরিযা তে পুরে অহুং;

পাপকম্মং করিত্ৰান, পেতলোকং ইতো গতা.

১৮৪. ‘‘তৰ দিন্নেন দানেন, মোদামি অকুতোভযা;

চিরং জীৰ গহপতি, সহ সব্বেহি ঞাতিভি;

অসোকং ৰিরজং খেমং, আৰাসং ৰসৰত্তিনং.

১৮৫. ‘‘ইধ ধম্মং চরিত্ৰান, দানং দত্ৰা গহপতি;

ৰিনেয্য মচ্ছেরমলং সমূলং, অনিন্দিতো সগ্গমুপেহি ঠান’’ন্তি.

নন্দাপেতিৰত্থু চতুত্থং.