১০. মাতিকাকথা

৪০. নিচ্ছাতো [নিচ্ছাতো মুচ্চতীতি (স্যা.)], মোক্খো ৰিমোক্খো, ৰিজ্জাৰিমুত্তি, অধিসীলং, অধিচিত্তং, অধিপঞ্ঞা, পস্সদ্ধি, ঞাণং, দস্সনং ৰিসুদ্ধি [সুদ্ধি (স্যা.)] নেক্খম্মং, নিস্সরণং পৰিৰেকো, ৰোস্সগ্গো, চরিযা, ঝানৰিমোক্খো, ভাৰনা, অধিট্ঠানং, জীৰিতং.

৪১. নিচ্ছাতোতি নেক্খম্মেন কামচ্ছন্দতো নিচ্ছাতো, অব্যাপাদেন ব্যাপাদতো নিচ্ছাতো…পে… পঠমেন ঝানেন নীৰরণেহি নিচ্ছাতো…পে… অরহত্তমগ্গেন সব্বকিলেসেহি নিচ্ছাতো.

মোক্খো ৰিমোক্খোতি নেক্খম্মেন কামচ্ছন্দতো মুচ্চতীতি – মোক্খো ৰিমোক্খো. অব্যাপাদেন ব্যাপাদতো মুচ্চতীতি – মোক্খো ৰিমোক্খো…পে… পঠমেন ঝানেন নীৰরণেহি মুচ্চতীতি – মোক্খো ৰিমোক্খো…পে… অরহত্তমগ্গেন সব্বকিলেসেহি মুচ্চতীতি – মোক্খো ৰিমোক্খো.

ৰিজ্জাৰিমুত্তীতি নেক্খম্মং ৰিজ্জতীতি ৰিজ্জা, কামচ্ছন্দতো মুচ্চতীতি ৰিমুত্তি. ৰিজ্জন্তো মুচ্চতি, মুচ্চন্তো ৰিজ্জতীতি – ৰিজ্জাৰিমুত্তি. অব্যাপাদো [অব্যাপাদং (স্যা.)] ৰিজ্জতীতি ৰিজ্জা, ব্যাপাদতো ৰিমুচ্চতীতি ৰিমুত্তি. ৰিজ্জন্তো মুচ্চতি, মুচ্চন্তো ৰিজ্জতীতি – ৰিজ্জাৰিমুত্তি…পে… অরহত্তমগ্গো ৰিজ্জতীতি ৰিজ্জা, সব্বকিলেসেহি মুচ্চতীতি ৰিমুত্তি. ৰিজ্জন্তো মুচ্চতি, মুচ্চন্তো ৰিজ্জতীতি – ৰিজ্জাৰিমুত্তি.

অধিসীলং অধিচিত্তং অধিপঞ্ঞাতি নেক্খম্মেন কামচ্ছন্দং, সংৰরট্ঠেন সীলৰিসুদ্ধি, অৰিক্খেপট্ঠেন চিত্তৰিসুদ্ধি, দস্সনট্ঠেন দিট্ঠিৰিসুদ্ধি. যো তত্থ সংৰরট্ঠো, অযং অধিসীলসিক্খা. যো তত্থ অৰিক্খেপট্ঠো, অযং অধিচিত্তসিক্খা. যো তত্থ দস্সনট্ঠো, অযং অধিপঞ্ঞাসিক্খা. অব্যাপাদেন ব্যাপাদং সংৰরট্ঠেন সীলৰিসুদ্ধি…পে… অরহত্তমগ্গেন সব্বকিলেসে সংৰরট্ঠেন সীলৰিসুদ্ধি, অৰিক্খেপট্ঠেন চিত্তৰিসুদ্ধি. দস্সনট্ঠেন দিট্ঠিৰিসুদ্ধি. যো তত্থ সংৰরট্ঠো, অযং অধিসীলসিক্খা. যো তত্থ অৰিক্খেপট্ঠো, অযং অধিচিত্তসিক্খা. যো তত্থ দস্সনট্ঠো, অযং অধিপঞ্ঞাসিক্খা.

পস্সদ্ধীতি নেক্খম্মেন কামচ্ছন্দং পটিপ্পস্সম্ভেতি, অব্যাপাদেন ব্যাপাদং পটিপ্পস্সম্ভেতি…পে… অরহত্তমগ্গেন সব্বকিলেসে পটিপ্পস্সম্ভেতি.

ঞাণন্তি কামচ্ছন্দস্স পহীনত্তা নেক্খম্মং ঞাতট্ঠেন ঞাণং; ব্যাপাদস্স পহীনত্তা অব্যাপাদো ঞাতট্ঠেন ঞাণং…পে… সব্বকিলেসানং পহীনত্তা অরহত্তমগ্গো ঞাতট্ঠেন ঞাণং.

দস্সনন্তি কামচ্ছন্দস্স পহীনত্তা নেক্খম্মং দিট্ঠত্তা দস্সনং. ব্যাপাদস্স পহীনত্তা অব্যাপাদো দিট্ঠত্তা দস্সনং…পে… সব্বকিলেসানং পহীনত্তা অরহত্তমগ্গো দিট্ঠত্তা দস্সনং.

ৰিসুদ্ধীতি কামচ্ছন্দং পজহন্তো নেক্খম্মেন ৰিসুজ্ঝতি. ব্যাপাদং পজহন্তো অব্যাপাদেন ৰিসুজ্ঝতি…পে… সব্বকিলেসে পজহন্তো অরহত্তমগ্গেন ৰিসুজ্ঝতি.

নেক্খম্মন্তি কামানমেতং নিস্সরণং, যদিদং নেক্খম্মং. রূপানমেতং নিস্সরণং, যদিদং আরুপ্পং. যং খো পন কিঞ্চি ভূতং সঙ্খতং পটিচ্চসমুপ্পন্নং, নিরোধো তস্স নেক্খম্মং. ব্যাপাদস্স অব্যাপাদো নেক্খম্মং. থিনমিদ্ধস্স আলোকসঞ্ঞা নেক্খম্মং…পে… সব্বকিলেসানং অরহত্তমগ্গো নেক্খম্মং.

নিস্সরণন্তি কামানমেতং নিস্সরণং, যদিদং নেক্খম্মং. রূপানমেতং নিস্সরণং, যদিদং আরুপ্পং. যং খো পন কিঞ্চি ভূতং সঙ্খতং পটিচ্চসমুপ্পন্নং, নিরোধো তস্স নিস্সরণং. কামচ্ছন্দস্স নেক্খম্মং নিস্সরণং. ব্যাপাদস্স অব্যাপাদো নিস্সরণং…পে… সব্বকিলেসানং অরহত্তমগ্গো নিস্সরণং.

পৰিৰেকোতি কামচ্ছন্দস্স নেক্খম্মং পৰিৰেকো …পে… সব্বকিলেসানং অরহত্তমগ্গো পৰিৰেকো.

ৰোস্সগ্গোতি নেক্খম্মেন কামচ্ছন্দং ৰোস্সজ্জতীতি – ৰোস্সগ্গো. অব্যাপাদেন ব্যাপাদং ৰোস্সজ্জতীতি – ৰোস্সগ্গো…পে… অরহত্তমগ্গেন সব্বকিলেসে ৰোস্সজ্জতীতি – ৰোস্সগ্গো.

চরিযাতি কামচ্ছন্দং পজহন্তো নেক্খম্মেন চরতি. ব্যাপাদং পজহন্তো অব্যাপাদেন চরতি…পে… সব্বকিলেসে পজহন্তো অরহত্তমগ্গেন চরতি.

ঝানৰিমোক্খোতি নেক্খম্মং ঝাযতীতি – ঝানং. কামচ্ছন্দং ঝাপেতীতি – ঝানং. ঝাযন্তো মুচ্চতীতি – ঝানৰিমোক্খো. ঝাপেন্তো মুচ্চতীতি – ঝানৰিমোক্খো. ঝাযন্তীতি ধম্মা. ঝাপেন্তীতি কিলেসে. ঝাতে চ ঝাপে চ জানাতীতি – ঝানঝাযী [ঝানৰিমোক্খো (স্যা.) অট্ঠকথা ওলোকেতব্বা]. অব্যাপাদো ঝাযতীতি ঝানং. ব্যাপাদং ঝাপেতীতি – ঝানং…পে… আলোকসঞ্ঞা ঝাযতীতি – ঝানং. থিনমিদ্ধং ঝাপেতীতি – ঝানং…পে… অরহত্তমগ্গো ঝাযতীতি – ঝানং. সব্বকিলেসে ঝাপেতীতি – ঝানং. ঝাযন্তো মুচ্চতীতি – ঝানৰিমোক্খো. ঝাপেন্তো মুচ্চতীতি – ঝানৰিমোক্খো. ঝাযন্তীতি – ধম্মা. ঝাপেন্তীতি – কিলেসে. ঝাতে চ ঝাপে চ জানাতীতি – ঝানঝাযী.

৪২. ভাৰনা অধিট্ঠানং জীৰিতন্তি কামচ্ছন্দং পজহন্তো নেক্খম্মং ভাৰেতীতি – ভাৰনাসম্পন্নো. নেক্খম্মৰসেন চিত্তং অধিট্ঠাতীতি – অধিট্ঠানসম্পন্নো. স্ৰাযং এৰং ভাৰনাসম্পন্নো অধিট্ঠানসম্পন্নো সমং জীৰতি, নো ৰিসমং; সম্মা জীৰতি, নো মিচ্ছা; ৰিসুদ্ধং জীৰতি, নো কিলিট্ঠন্তি – আজীৰসম্পন্নো. স্ৰাযং এৰং ভাৰনাসম্পন্নো অধিট্ঠানসম্পন্নো আজীৰসম্পন্নো যঞ্ঞদেৰ পরিসং উপসঙ্কমতি – যদি খত্তিযপরিসং যদি ব্রাহ্মণপরিসং যদি গহপতিপরিসং যদি সমণপরিসং – ৰিসারদো উপসঙ্কমতি অমঙ্কুভূতো. তং কিস্স হেতু? তথা হি সো ভাৰনাসম্পন্নো অধিট্ঠানসম্পন্নো আজীৰসম্পন্নো.

ব্যাপাদং পজহন্তো অব্যাপাদং ভাৰেতীতি – ভাৰনাসম্পন্নো…পে… থিনমিদ্ধং পজহন্তো আলোকসঞ্ঞং ভাৰেতীতি – ভাৰনাসম্পন্নো…পে… উদ্ধচ্চং পজহন্তো অৰিক্খেপং ভাৰেতীতি – ভাৰনাসম্পন্নো…পে… ৰিচিকিচ্ছং পজহন্তো ধম্মৰৰত্থানং ভাৰেতীতি – ভাৰনাসম্পন্নো…পে… অৰিজ্জং পজহন্তো ৰিজ্জং ভাৰেতীতি – ভাৰনাসম্পন্নো…পে… অরতিং পজহন্তো পামোজ্জং ভাৰেতীতি – ভাৰনাসম্পন্নো…পে… নীৰরণে পজহন্তো পঠমং ঝানং ভাৰেতীতি – ভাৰনাসম্পন্নো…পে… সব্বকিলেসে পজহন্তো অরহত্তমগ্গং ভাৰেতীতি – ভাৰনাসম্পন্নো. অরহত্তমগ্গৰসেন চিত্তং অধিট্ঠাতীতি – অধিট্ঠানসম্পন্নো. স্ৰাযং এৰং ভাৰনাসম্পন্নো অধিট্ঠানসম্পন্নো সমং জীৰতি, নো ৰিসমং; সম্মা জীৰতি, নো মিচ্ছা; ৰিসুদ্ধং জীৰতি, নো কিলিট্ঠন্তি – আজীৰসম্পন্নো. স্ৰাযং এৰং ভাৰনাসম্পন্নো অধিট্ঠানসম্পন্নো আজীৰসম্পন্নো যঞ্ঞদেৰ পরিসং উপসঙ্কমতি – যদি খত্তিযপরিসং যদি ব্রাহ্মণপরিসং যদি গহপতিপরিসং যদি সমণপরিসং – ৰিসারদো উপসঙ্কমতি অমঙ্কুভূতো. তং কিস্স হেতু? তথা হি সো ভাৰনাসম্পন্নো অধিট্ঠানসম্পন্নো আজীৰসম্পন্নোতি.

মাতিকাকথা নিট্ঠিতা.

পঞ্ঞাৰগ্গো ততিযো.