৪. মগ্গঙ্গৰারো

২৬. সব্বে সত্তা অৰেরিনো হোন্তু, খেমিনো হোন্তু, সুখিনো হোন্তূতি – সম্মা পস্সতি. সম্মাদিট্ঠিপরিভাৰিতা হোতি মেত্তাচেতোৰিমুত্তি.

সব্বে সত্তা অৰেরিনো হোন্তু, খেমিনো হোন্তু, সুখিনো হোন্তূতি – সম্মা অভিনিরোপেতি. সম্মাসঙ্কপ্পপরিভাৰিতা হোতি মেত্তাচেতোৰিমুত্তি.

সব্বে সত্তা অৰেরিনো হোন্তু, খেমিনো হোন্তু, সুখিনো হোন্তূতি – সম্মা পরিগ্গণ্হাতি. সম্মাৰাচাপরিভাৰিতা হোতি মেত্তাচেতোৰিমুত্তি.

সব্বে সত্তা অৰেরিনো হোন্তু, খেমিনো হোন্তু, সুখিনো হোন্তূতি – সম্মা সমুট্ঠাপেতি. সম্মাকম্মন্তপরিভাৰিতা হোতি মেত্তাচেতোৰিমুত্তি.

সব্বে সত্তা অৰেরিনো হোন্তু, খেমিনো হোন্তু, সুখিনো হোন্তূতি – সম্মা ৰোদাপেতি. সম্মাআজীৰপরিভাৰিতা হোতি মেত্তাচেতোৰিমুত্তি.

সব্বে সত্তা অৰেরিনো হোন্তু, খেমিনো হোন্তু, সুখিনো হোন্তূতি – সম্মা পগ্গণ্হাতি. সম্মাৰাযামপরিভাৰিতা হোতি মেত্তাচেতোৰিমুত্তি.

সব্বে সত্তা অৰেরিনো হোন্তু, খেমিনো হোন্তু, সুখিনো হোন্তূতি – সম্মা উপট্ঠাপেতি. সম্মাসতিপরিভাৰিতা হোতি মেত্তাচেতোৰিমুত্তি.

সব্বে সত্তা অৰেরিনো হোন্তু, খেমিনো হোন্তু, সুখিনো হোন্তূতি – সম্মা সমাদহতি. সম্মাসমাধিপরিভাৰিতা হোতি মেত্তাচেতোৰিমুত্তি.

ইমে অট্ঠ মগ্গঙ্গা মেত্তায চেতোৰিমুত্তিযা আসেৰনা হোন্তি. ইমেহি অট্ঠহি মগ্গঙ্গেহি মেত্তাচেতোৰিমুত্তি আসেৰীযতি. ইমে অট্ঠ মগ্গঙ্গা মেত্তায চেতোৰিমুত্তিযা ভাৰনা হোন্তি. ইমেহি অট্ঠহি মগ্গঙ্গেহি মেত্তাচেতোৰিমুত্তি ভাৰীযতি. ইমে অট্ঠ মগ্গঙ্গা মেত্তায চেতোৰিমুত্তিযা বহুলীকতা হোন্তি. ইমেহি অট্ঠহি মগ্গঙ্গেহি মেত্তাচেতোৰিমুত্তি বহুলীকরীযতি. ইমে অট্ঠ মগ্গঙ্গা মেত্তায চেতোৰিমুত্তিযা অলঙ্কারা হোন্তি. ইমেহি অট্ঠহি মগ্গঙ্গেহি মেত্তাচেতোৰিমুত্তি স্ৰালঙ্কতা হোন্তি. ইমে অট্ঠ মগ্গঙ্গা মেত্তায চেতোৰিমুত্তিযা পরিক্খারা হোন্তি. ইমেহি অট্ঠহি মগ্গঙ্গেহি মেত্তাচেতোৰিমুত্তি সুপরিক্খতা হোতি. ইমে অট্ঠ মগ্গঙ্গা মেত্তায চেতোৰিমুত্তিযা পরিৰারা হোন্তি. ইমেহি অট্ঠহি মগ্গঙ্গেহি মেত্তাচেতোৰিমুত্তি সুপরিৰুতা হোতি. ইমে অট্ঠ মগ্গঙ্গা মেত্তায চেতোৰিমুত্তিযা আসেৰনা হোন্তি, ভাৰনা হোন্তি, বহুলীকতা হোন্তি, অলঙ্কারা হোন্তি, পরিক্খারা হোন্তি, পরিৰারা হোন্তি, পারিপূরী হোন্তি, সহগতা হোন্তি, সহজাতা হোন্তি, সংসট্ঠা হোন্তি, সম্পযুত্তা হোন্তি, পক্খন্দনা হোন্তি, পসীদনা হোন্তি, সন্তিট্ঠনা হোন্তি, ৰিমুচ্চনা হোন্তি, ‘‘এতং সন্ত’’ন্তি ফস্সনা হোন্তি, যানীকতা হোন্তি, ৰত্থুকতা হোন্তি, অনুট্ঠিতা হোন্তি, পরিচিতা হোন্তি, সুসমারদ্ধা হোন্তি, সুভাৰিতা হোন্তি, স্ৰাধিট্ঠিতা হোন্তি, সুসমুগ্গতা হোন্তি, সুৰিমুত্তা হোন্তি নিব্বত্তেন্তি জোতেন্তি পতাপেন্তি.

২৭. সব্বেসং পাণানং…পে… সব্বেসং ভূতানং… সব্বেসং পুগ্গলানং… সব্বেসং অত্তভাৰপরিযাপন্নানং… সব্বাসং ইত্থীনং… সব্বেসং পুরিসানং… সব্বেসং অরিযানং… সব্বেসং অনরিযানং… সব্বেসং দেৰানং… সব্বেসং মনুস্সানং… সব্বেসং ৰিনিপাতিকানং পীল়নং ৰজ্জেত্ৰা অপীল়নায, উপঘাতং ৰজ্জেত্ৰা অনুপঘাতেন, সন্তাপং ৰজ্জেত্ৰা অসন্তাপেন, পরিযাদানং ৰজ্জেত্ৰা অপরিযাদানেন, ৰিহেসং ৰজ্জেত্ৰা অৰিহেসায, সব্বে ৰিনিপাতিকা অৰেরিনো হোন্তু মা ৰেরিনো, সুখিনো হোন্তু মা দুক্খিনো, সুখিতত্তা হোন্তু মা দুক্খিতত্তাতি – ইমেহি অট্ঠহাকারেহি সব্বে ৰিনিপাতিকে মেত্তাযতীতি – মেত্তা. তং ধম্মং চেতযতীতি – চেতো. সব্বব্যাপাদপরিযুট্ঠানেহি ৰিমুচ্চতীতি – ৰিমুত্তি. মেত্তা চ চেতো চ ৰিমুত্তি চাতি – মেত্তাচেতোৰিমুত্তি.

সব্বে ৰিনিপাতিকা অৰেরিনো হোন্তু, খেমিনো হোন্তু, সুখিনো হোন্তূতি – সদ্ধায অধিমুচ্চতি. সদ্ধিন্দ্রিযপরিভাৰিতা হোতি মেত্তাচেতোৰিমুত্তি…পে… নিব্বত্তেন্তি জোতেন্তি পতাপেন্তি.

সব্বেসং পুরত্থিমায দিসায সত্তানং…পে… সব্বেসং পচ্ছিমায দিসায সত্তানং… সব্বেসং উত্তরায দিসায সত্তানং… সব্বেসং দক্খিণায দিসায সত্তানং… সব্বেসং পুরত্থিমায অনুদিসায সত্তানং… সব্বেসং পচ্ছিমায অনুদিসায সত্তানং… সব্বেসং উত্তরায অনুদিসায সত্তানং… সব্বেসং দক্খিণায অনুদিসায সত্তানং… সব্বেসং হেট্ঠিমায দিসায সত্তানং… সব্বেসং উপরিমায দিসায সত্তানং পীল়নং ৰজ্জেত্ৰা অপীল়নায, উপঘাতং ৰজ্জেত্ৰা অনুপঘাতেন, সন্তাপং ৰজ্জেত্ৰা অসন্তাপেন, পরিযাদানং ৰজ্জেত্ৰা অপরিযাদানেন, ৰিহেসং ৰজ্জেত্ৰা অৰিহেসায, সব্বে উপরিমায দিসায সত্তা অৰেরিনো হোন্তু মা ৰেরিনো, সুখিনো হোন্তু মা দুক্খিনো, সুখিতত্তা হোন্তু মা দুক্খিতত্তাতি – ইমেহি অট্ঠহাকারেহি সব্বে উপরিমায দিসায সত্তে মেত্তাযতীতি – মেত্তা. তং ধম্মং চেতযতীতি – চেতো. সব্বব্যাপাদপরিযুট্ঠানেহি ৰিমুচ্চতীতি – ৰিমুত্তি. মেত্তা চ চেতো চ ৰিমুত্তি চাতি – মেত্তাচেতোৰিমুত্তি.

সব্বে উপরিমায দিসায সত্তা অৰেরিনো হোন্তু, খেমিনো হোন্তু, সুখিনো হোন্তূতি – সদ্ধায অধিমুচ্চতি. সদ্ধিন্দ্রিযপরিভাৰিতা হোতি মেত্তাচেতোৰিমুত্তি…পে… নিব্বত্তেন্তি জোতেন্তি পতাপেন্তি.

সব্বেসং পুরত্থিমায দিসায পাণানং…পে… ভূতানং… পুগ্গলানং অত্তভাৰপরিযাপন্নানং… সব্বাসং ইত্থীনং… সব্বেসং পুরিসানং… সব্বেসং অরিযানং… সব্বেসং অনরিযানং… সব্বেসং দেৰানং… সব্বেসং মনুস্সানং… সব্বেসং ৰিনিপাতিকানং… সব্বেসং পচ্ছিমায দিসায ৰিনিপাতিকানং… সব্বেসং উত্তরায দিসায ৰিনিপাতিকানং… সব্বেসং দক্খিণায দিসায ৰিনিপাতিকানং… সব্বেসং পুরত্থিমায অনুদিসায ৰিনিপাতিকানং… সব্বেসং পচ্ছিমায অনুদিসায ৰিনিপাতিকানং… সব্বেসং উত্তরায অনুদিসায ৰিনিপাতিকানং… সব্বেসং দক্খিণায অনুদিসায ৰিনিপাতিকানং… সব্বেসং হেট্ঠিমায দিসায ৰিনিপাতিকানং… সব্বেসং উপরিমায দিসায ৰিনিপাতিকানং পীল়নং ৰজ্জেত্ৰা অপীল়নায, উপঘাতং ৰজ্জেত্ৰা অনুপঘাতেন, সন্তাপং ৰজ্জেত্ৰা অসন্তাপেন, পরিযাদানং ৰজ্জেত্ৰা অপরিযাদানেন, ৰিহেসং ৰজ্জেত্ৰা অৰিহেসায, সব্বে উপরিমায দিসায ৰিনিপাতিকা অৰেরিনো হোন্তু মা ৰেরিনো, সুখিনো হোন্তু মা দুক্খিনো, সুখিতত্তা হোন্তু মা দুক্খিতত্তাতি – ইমেহি অট্ঠহাকারেহি সব্বে উপরিমায দিসায ৰিনিপাতিকে মেত্তাযতীতি – মেত্তা. তং ধম্মং চেতযতীতি – চেতো. সব্বব্যাপাদপরিযুট্ঠানেহি ৰিমুচ্চতীতি – ৰিমুত্তি. মেত্তা চ চেতো চ ৰিমুত্তি চাতি – মেত্তাচেতোৰিমুত্তি.

সব্বে উপরিমায দিসায ৰিনিপাতিকা অৰেরিনো হোন্তু, খেমিনো হোন্তু, সুখিনো হোন্তূতি – সদ্ধায অধিমুচ্চতি. সদ্ধিন্দ্রিযপরিভাৰিতা হোতি মেত্তাচেতোৰিমুত্তি.

সব্বে উপরিমায দিসায ৰিনিপাতিকা অৰেরিনো হোন্তু, খেমিনো হোন্তু, সুখিনো হোন্তূতি – ৰীরিযং পগ্গণ্হাতি. ৰীরিযিন্দ্রিযপরিভাৰিতা হোতি মেত্তাচেতোৰিমুত্তি.

সতিং উপট্ঠাপেতি. সতিন্দ্রিযপরিভাৰিতা হোতি মেত্তাচেতোৰিমুত্তি. চিত্তং সমাদহতি. সমাধিন্দ্রিযপরিভাৰিতা হোতি মেত্তাচেতোৰিমুত্তি. পঞ্ঞায পজানাতি. পঞ্ঞিন্দ্রিযপরিভাৰিতা হোতি মেত্তাচেতোৰিমুত্তি.

ইমানি পঞ্চিন্দ্রিযানি মেত্তায চেতোৰিমুত্তিযা আসেৰনা হোন্তি. ইমেহি পঞ্চহি ইন্দ্রিযেহি মেত্তাচেতোৰিমুত্তি আসেৰীযতি…পে… নিব্বত্তেন্তি জোতেন্তি পতাপেন্তি.

সব্বে উপরিমায দিসায ৰিনিপাতিকা অৰেরিনো হোন্তু, খেমিনো হোন্তু, সুখিনো হোন্তূতি – অস্সদ্ধিযে ন কম্পতি. সদ্ধাবলপরিভাৰিতা হোতি মেত্তাচেতোৰিমুত্তি. কোসজ্জে ন কম্পতি. ৰীরিযবলপরিভাৰিতা হোতি মেত্তাচেতোৰিমুত্তি. পমাদে ন কম্পতি. সতিবলপরিভাৰিতা হোতি মেত্তাচেতোৰিমুত্তি. উদ্ধচ্চে ন কম্পতি. সমাধিবলপরিভাৰিতা হোতি মেত্তাচেতোৰিমুত্তি. অৰিজ্জায ন কম্পতি. পঞ্ঞাবলপরিভাৰিতা হোতি মেত্তাচেতোৰিমুত্তি.

ইমানি পঞ্চ বলানি মেত্তায চেতোৰিমুত্তিযা আসেৰনা হোন্তি. ইমেহি পঞ্চহি বলেহি মেত্তাচেতোৰিমুত্তি আসেৰীযতি…পে… নিব্বত্তেন্তি জোতেন্তি পতাপেন্তি.

সব্বে উপরিমায দিসায ৰিনিপাতিকা অৰেরিনো হোন্তু, খেমিনো হোন্তু, সুখিনো হোন্তূতি – সতিং উপট্ঠাপেতি. সতিসম্বোজ্ঝঙ্গপরিভাৰিতা হোতি মেত্তাচেতোৰিমুত্তি.

পঞ্ঞায পৰিচিনাতি. ধম্মৰিচযসম্বোজ্ঝঙ্গপরিভাৰিতা হোতি মেত্তাচেতোৰিমুত্তি. ৰীরিযং পগ্গণ্হাতি. ৰীরিযসম্বোজ্ঝঙ্গপরিভাৰিতা হোতি মেত্তাচেতোৰিমুত্তি. পরিল়াহং পটিপ্পস্সম্ভেতি. পীতিসম্বোজ্ঝঙ্গপরিভাৰিতা হোতি মেত্তাচেতোৰিমুত্তি. দুট্ঠুল্লং পটিপ্পস্সম্ভেতি. পস্সদ্ধিসম্বোজ্ঝঙ্গপরিভাৰিতা হোতি মেত্তাচেতোৰিমুত্তি. চিত্তং সমাদহতি. সমাধিসম্বোজ্ঝঙ্গপরিভাৰিতা হোতি মেত্তাচেতোৰিমুত্তি. ঞাণেন কিলেসে পটিসঙ্খাতি. উপেক্খাসম্বোজ্ঝঙ্গপরিভাৰিতা হোতি মেত্তাচেতোৰিমুত্তি.

ইমে সত্ত বোজ্ঝঙ্গা মেত্তায চেতোৰিমুত্তিযা আসেৰনা হোন্তি. ইমেহি সত্তহি বোজ্ঝঙ্গেহি মেত্তাচেতোৰিমুত্তি আসেৰীযতি…পে… নিব্বত্তেন্তি জোতেন্তি পতাপেন্তি.

সব্বে উপরিমায দিসায ৰিনিপাতিকা অৰেরিনো হোন্তু, খেমিনো হোন্তু, সুখিনো হোন্তূতি – সম্মা পস্সতি. সম্মাদিট্ঠি পরিভাৰিতা হোতি মেত্তাচেতোৰিমুত্তি. সম্মা অভিনিরোপেতি. সম্মাসঙ্কপ্পপরিভাৰিতা হোতি মেত্তাচেতোৰিমুত্তি. সম্মা পরিগ্গণ্হাতি. সম্মাৰাচাপরিভাৰিতা হোতি মেত্তাচেতোৰিমুত্তি. সম্মা সমুট্ঠাপেতি. সম্মাকম্মন্তপরিভাৰিতা হোতি মেত্তাচেতোৰিমুত্তি. সম্মা ৰোদাপেতি. সম্মা আজীৰপরিভাৰিতা হোতি মেত্তাচেতোৰিমুত্তি. সম্মা পগ্গণ্হাতি. সম্মাৰাযামপরিভাৰিতা হোতি মেত্তাচেতোৰিমুত্তি. সম্মা উপট্ঠাতি. সম্মাসতিপরিভাৰিতা হোতি মেত্তাচেতোৰিমুত্তি. সম্মা সমাদহতি. সম্মাসমাধিপরিভাৰিতা হোতি মেত্তাচেতোৰিমুত্তি.

ইমে অট্ঠ মগ্গঙ্গা মেত্তায চেতোৰিমুত্তিযা আসেৰনা হোন্তি. ইমেহি অট্ঠহি মগ্গঙ্গেহি মেত্তাচেতোৰিমুত্তি আসেৰীযতি…পে… ইমে অট্ঠ মগ্গঙ্গা মেত্তায চেতোৰিমুত্তিযা পরিভাৰিতা হোন্তি. ইমেহি অট্ঠহি মগ্গঙ্গেহি মেত্তাচেতোৰিমুত্তি সুপরিৰুতা হোতি. ইমে অট্ঠ মগ্গঙ্গা মেত্তায চেতোৰিমুত্তিযা আসেৰনা হোন্তি, ভাৰনা হোন্তি, বহুলীকতা হোন্তি, অলঙ্কারা হোন্তি, পরিক্খারা হোন্তি, পরিৰারা হোন্তি, পারিপূরী হোন্তি, সহগতা হোন্তি, সহজাতা হোন্তি, সংসট্ঠা হোন্তি, সম্পযুত্তা হোন্তি, পক্খন্দনা হোন্তি, পসীদনা হোন্তি, সন্তিট্ঠনা হোন্তি, ৰিমুচ্চনা হোন্তি, ‘‘এতং সন্ত’’ন্তি ফস্সনা হোন্তি, যানীকতা হোন্তি, ৰত্থুকতা হোন্তি, অনুট্ঠিতা হোন্তি, পরিচিতা হোন্তি, সুসমারদ্ধা হোন্তি, সুভাৰিতা হোন্তি, স্ৰাধিট্ঠিতা হোন্তি, সুসমুগ্গতা হোন্তি, সুৰিমুত্তা হোন্তি নিব্বত্তেন্তি জোতেন্তি পতাপেন্তীতি.

মেত্তাকথা নিট্ঠিতা.