২. যুগনদ্ধৰগ্গো

১. যুগনদ্ধকথা

১. এৰং মে সুতং – একং সমযং আযস্মা আনন্দো কোসম্বিযং ৰিহরতি ঘোসিতারামে. তত্র খো আযস্মা আনন্দো ভিক্খূ আমন্তেসি – ‘‘আৰুসো ভিক্খৰো’’তি. ‘‘আৰুসো’’তি খো তে ভিক্খূ আযস্মতো আনন্দস্স পচ্চস্সোসুং. আযস্মা আনন্দো এতদৰোচ –

‘‘যো হি কোচি, আৰুসো, ভিক্খু ৰা ভিক্খুনী ৰা মম সন্তিকে অরহত্তপত্তং [অরহত্তং (স্যা.), অরহত্তপত্তিং অ. নি. ৪.১৭০] ব্যাকরোতি, সব্বসো চতূহি মগ্গেহি এতেসং ৰা অঞ্ঞতরেন. কতমেহি চতূহি?

‘‘ইধাৰুসো, ভিক্খু সমথপুব্বঙ্গমং ৰিপস্সনং ভাৰেতি. তস্স সমথপুব্বঙ্গমং ৰিপস্সনং ভাৰযতো মগ্গো সঞ্জাযতি. সো তং মগ্গং আসেৰতি ভাৰেতি বহুলীকরোতি [বহুলিং করোতি (ক.) অ. নি. ৪.১৭০ পস্সিতব্বা]. তস্স তং মগ্গং আসেৰতো ভাৰযতো বহুলীকরোতো সঞ্ঞোজনানি পহীযন্তি, অনুসযা ব্যন্তীহোন্তি.

‘‘পুন চপরং, আৰুসো, ভিক্খু ৰিপস্সনাপুব্বঙ্গমং সমথং ভাৰেতি. তস্স ৰিপস্সনাপুব্বঙ্গমং সমথং ভাৰযতো মগ্গো সঞ্জাযতি. সো তং মগ্গং আসেৰতি ভাৰেতি বহুলীকরোতি. তস্স তং মগ্গং আসেৰতো ভাৰযতো বহুলীকরোতো সঞ্ঞোজনানি পহীযন্তি, অনুসযা ব্যন্তীহোন্তি.

‘‘পুন চপরং, আৰুসো, ভিক্খু সমথৰিপস্সনং যুগনদ্ধং [যুগনন্ধং (ক. সী. অট্ঠ.)] ভাৰেতি. তস্স সমথৰিপস্সনং যুগনদ্ধং ভাৰযতো মগ্গো সঞ্জাযতি. সো তং মগ্গং আসেৰতি ভাৰেতি বহুলীকরোতি. তস্স তং মগ্গং আসেৰতো ভাৰযতো বহুলীকরোতো সঞ্ঞোজনানি পহীযন্তি, অনুসযা ব্যন্তীহোন্তি.

‘‘পুন চপরং, আৰুসো, ভিক্খুনো ধম্মুদ্ধচ্চৰিগ্গহিতং মানসং হোতি. সো, আৰুসো, সমযো যং তং চিত্তং অজ্ঝত্তমেৰ [অজ্ঝত্তঞ্ঞেৰ (স্যা. ক.)] সন্তিট্ঠতি সন্নিসীদতি একোদি হোতি সমাধিযতি. তস্স মগ্গো সঞ্জাযতি. সো তং মগ্গং আসেৰতি ভাৰেতি বহুলীকরোতি. তস্স তং মগ্গং আসেৰতো ভাৰযতো বহুলীকরোতো সঞ্ঞোজনানি পহীযন্তি, অনুসযা ব্যন্তীহোন্তি.

‘‘যো হি কোচি, আৰুসো, ভিক্খু ৰা ভিক্খুনী ৰা মম সন্তিকে অরহত্তপত্তং ব্যাকরোতি, সব্বসো ইমেহি চতূহি মগ্গেহি, এতেসং ৰা অঞ্ঞতরেনা’’তি.

১. সুত্তন্তনিদ্দেসো

২. কথং সমথপুব্বঙ্গমং ৰিপস্সনং ভাৰেতি? নেক্খম্মৰসেন চিত্তস্স একগ্গতা অৰিক্খেপো সমাধি. তত্থ জাতে ধম্মে অনিচ্চতো অনুপস্সনট্ঠেন ৰিপস্সনা, দুক্খতো অনুপস্সনট্ঠেন ৰিপস্সনা, অনত্ততো অনুপস্সনট্ঠেন ৰিপস্সনা. ইতি পঠমং সমথো, পচ্ছা ৰিপস্সনা. তেন ৰুচ্চতি – ‘‘সমথপুব্বঙ্গমং ৰিপস্সনং ভাৰেতী’’তি. ভাৰেতীতি চতস্সো ভাৰনা – তত্থ জাতানং ধম্মানং অনতিৰত্তনট্ঠেন ভাৰনা, ইন্দ্রিযানং একরসট্ঠেন ভাৰনা, তদুপগৰীরিযৰাহনট্ঠেন ভাৰনা, আসেৰনট্ঠেন ভাৰনা.

মগ্গো সঞ্জাযতীতি কথং মগ্গো সঞ্জাযতি? দস্সনট্ঠেন সম্মাদিট্ঠি মগ্গো সঞ্জাযতি, অভিনিরোপনট্ঠেন সম্মাসঙ্কপ্পো মগ্গো সঞ্জাযতি, পরিগ্গহট্ঠেন সম্মাৰাচা মগ্গো সঞ্জাযতি, সমুট্ঠানট্ঠেন সম্মাকম্মন্তো মগ্গো সঞ্জাযতি, ৰোদানট্ঠেন সম্মাআজীৰো মগ্গো সঞ্জাযতি, পগ্গহট্ঠেন সম্মাৰাযামো মগ্গো সঞ্জাযতি, উপট্ঠানট্ঠেন সম্মাসতি মগ্গো সঞ্জাযতি, অৰিক্খেপট্ঠেন সম্মাসমাধি মগ্গো সঞ্জাযতি – এৰং মগ্গো সঞ্জাযতি.

সো তং মগ্গং আসেৰতি ভাৰেতি বহুলীকরোতি আসেৰতীতি কথং আসেৰতি? আৰজ্জন্তো আসেৰতি, জানন্তো আসেৰতি, পস্সন্তো আসেৰতি, পচ্চৰেক্খন্তো আসেৰতি, চিত্তং অধিট্ঠহন্তো আসেৰতি, সদ্ধায অধিমুচ্চন্তো আসেৰতি, ৰীরিযং পগ্গণ্হন্তো আসেৰতি, সতিং উপট্ঠাপেন্তো আসেৰতি, চিত্তং সমাদহন্তো আসেৰতি, পঞ্ঞায পজানন্তো আসেৰতি, অভিঞ্ঞেয্যং অভিজানন্তো আসেৰতি, পরিঞ্ঞেয্যং পরিজানন্তো আসেৰতি, পহাতব্বং পজহন্তো আসেৰতি, ভাৰেতব্বং ভাৰেন্তো আসেৰতি, সচ্ছিকাতব্বং সচ্ছিকরোন্তো আসেৰতি – এৰং আসেৰতি.

ভাৰেতীতি কথং ভাৰেতি? আৰজ্জন্তো ভাৰেতি, জানন্তো ভাৰেতি, পস্সন্তো ভাৰেতি, পচ্চৰেক্খন্তো ভাৰেতি, চিত্তং অধিট্ঠহন্তো ভাৰেতি, সদ্ধায অধিমুচ্চন্তো ভাৰেতি, ৰীরিযং পগ্গণ্হন্তো ভাৰেতি, সতিং উপট্ঠাপেন্তো ভাৰেতি, চিত্তং সমাদহন্তো ভাৰেতি, পঞ্ঞায পজানন্তো ভাৰেতি, অভিঞ্ঞেয্যং অভিজানন্তো ভাৰেতি, পরিঞ্ঞেয্যং পরিজানন্তো ভাৰেতি, পহাতব্বং পজহন্তো ভাৰেতি, ভাৰেতব্বং ভাৰেন্তো ভাৰেতি, সচ্ছিকাতব্বং সচ্ছিকরোন্তো ভাৰেতি – এৰং ভাৰেতি.

বহুলীকরোতীতি কথং বহুলীকরোতি? আৰজ্জন্তো বহুলীকরোতি, জানন্তো বহুলীকরোতি, পস্সন্তো বহুলীকরোতি, পচ্চৰেক্খন্তো বহুলীকরোতি, চিত্তং অধিট্ঠহন্তো বহুলীকরোতি, সদ্ধায অধিমুচ্চন্তো বহুলীকরোতি, ৰীরিযং পগ্গণ্হন্তো বহুলীকরোতি, সতিং উপট্ঠাপেন্তো বহুলীকরোতি, চিত্তং সমাদহন্তো বহুলীকরোতি, পঞ্ঞায পজানন্তো বহুলীকরোতি, অভিঞ্ঞেয্যং অভিজানন্তো বহুলীকরোতি, পরিঞ্ঞেয্যং পরিজানন্তো বহুলীকরোতি, পহাতব্বং পজহন্তো বহুলীকরোতি, ভাৰেতব্বং ভাৰেন্তো বহুলীকরোতি, সচ্ছিকাতব্বং সচ্ছিকরোন্তো বহুলীকরোতি – এৰং বহুলীকরোতি.

তস্স তং মগ্গং আসেৰতো ভাৰযতো বহুলীকরোতো সঞ্ঞোজনানি পহীযন্তি অনুসযা ব্যন্তীহোন্তীতি কথং সঞ্ঞোজনানি পহীযন্তি, অনুসযা ব্যন্তীহোন্তি? সোতাপত্তিমগ্গেন, সক্কাযদিট্ঠি, ৰিচিকিচ্ছা, সীলব্বতপরামাসো – ইমানি তীণি সঞ্ঞোজনানি পহীযন্তি; দিট্ঠানুসযো, ৰিচিকিচ্ছানুসযো – ইমে দ্ৰে অনুসযা ব্যন্তীহোন্তি. সকদাগামিমগ্গেন ওল়ারিকং কামরাগসঞ্ঞোজনং, পটিঘসঞ্ঞোজনং – ইমানি দ্ৰে সঞ্ঞোজনানি পহীযন্তি; ওল়ারিকো কামরাগানুসযো, পটিঘানুসযো – ইমে দ্ৰে অনুসযা ব্যন্তীহোন্তি. অনাগামিমগ্গেন অনুসহগতং কামরাগসঞ্ঞোজনং, পটিঘসঞ্ঞোজনং – ইমানি দ্ৰে সঞ্ঞোজনানি পহীযন্তি; অনুসহগতো কামরাগানুসযো, পটিঘানুসযো – ইমে দ্ৰে অনুসযা ব্যন্তীহোন্তি. অরহত্তমগ্গেন রূপরাগো, অরূপরাগো, মানো, উদ্ধচ্চং, অৰিজ্জা – ইমানি পঞ্চ সঞ্ঞোজনানি পহীযন্তি; মানানুসযো, ভৰরাগানুসযো, অৰিজ্জানুসযো – ইমে তযো অনুসযা ব্যন্তীহোন্তি. এৰং সঞ্ঞোজনানি পহীযন্তি, অনুসযা ব্যন্তীহোন্তি.

৩. অব্যাপাদৰসেন চিত্তস্স একগ্গতা অৰিক্খেপো সমাধি…পে… আলোকসঞ্ঞাৰসেন চিত্তস্স একগ্গতা অৰিক্খেপো সমাধি…পে… পটিনিস্সগ্গানুপস্সী অস্সাসৰসেন পটিনিস্সগ্গানুপস্সী পস্সাসৰসেন চিত্তস্স একগ্গতা অৰিক্খেপো সমাধি. তত্থ জাতে ধম্মে অনিচ্চতো অনুপস্সনট্ঠেন ৰিপস্সনা, দুক্খতো অনুপস্সনট্ঠেন ৰিপস্সনা, অনত্ততো অনুপস্সনট্ঠেন ৰিপস্সনা. ইতি পঠমং সমথো, পচ্ছা ৰিপস্সনা. তেন ৰুচ্চতি – ‘‘সমথপুব্বঙ্গমং ৰিপস্সনং ভাৰেতী’’তি. ভাৰেতীতি চতস্সো ভাৰনা – তত্থ জাতানং ধম্মানং অনতিৰত্তনট্ঠেন ভাৰনা, ইন্দ্রিযানং একরসট্ঠেন ভাৰনা, তদুপগৰীরিযৰাহনট্ঠেন ভাৰনা, আসেৰনট্ঠেন ভাৰনা.

মগ্গো সঞ্জাযতীতি কথং মগ্গো সঞ্জাযতি? দস্সনট্ঠেন সম্মাদিট্ঠি মগ্গো সঞ্জাযতি, অভিনিরোপনট্ঠেন সম্মাসঙ্কপ্পো মগ্গো সঞ্জাযতি…পে… অৰিক্খেপট্ঠেন সম্মাসমাধি মগ্গো সঞ্জাযতি. এৰং মগ্গো সঞ্জাযতি.

সো তং মগ্গং আসেৰতি ভাৰেতি বহুলীকরোতি আসেৰতীতি কথং আসেৰতি? আৰজ্জন্তো আসেৰতি…পে… সচ্ছিকাতব্বং সচ্ছিকরোন্তো আসেৰতি, এৰং আসেৰতি. ভাৰেতীতি কথং ভাৰেতি? আৰজ্জন্তো ভাৰেতি, জানন্তো ভাৰেতি…পে… সচ্ছিকাতব্বং সচ্ছিকরোন্তো ভাৰেতি, এৰং ভাৰেতি. বহুলীকরোতীতি কথং বহুলীকরোতি? আৰজ্জন্তো বহুলীকরোতি, জানন্তো বহুলীকরোতি…পে… সচ্ছিকাতব্বং সচ্ছিকরোন্তো বহুলীকরোতি, এৰং বহুলীকরোতি.

তস্স তং মগ্গং আসেৰতো ভাৰযতো বহুলীকরোতো সঞ্ঞোজনানি পহীযন্তি, অনুসযা ব্যন্তীহোন্তীতি কথং সঞ্ঞোজনা পহীযন্তি, অনুসযা ব্যন্তীহোন্তি? সোতাপত্তিমগ্গেন সক্কাযদিট্ঠি ৰিচিকিচ্ছা সীলব্বতপরামাসো – ইমানি তীণি সঞ্ঞোজনানি পহীযন্তি; দিট্ঠানুসযো, ৰিচিকিচ্ছানুসযো – ইমে দ্ৰে অনুসযা ব্যন্তীহোন্তি. সকদাগামিমগ্গেন ওল়ারিকং কামরাগসঞ্ঞোজনং, পটিঘসঞ্ঞোজনং – ইমানি দ্ৰে সঞ্ঞোজনানি পহীযন্তি; ওল়ারিকো কামরাগানুসযো পটিঘানুসযো – ইমে দ্ৰে অনুসযা ব্যন্তীহোন্তি. অনাগামিমগ্গেন অনুসহগতং কামরাগসঞ্ঞোজনং, পটিঘসঞ্ঞোজনং – ইমানি দ্ৰে সঞ্ঞোজনানি পহীযন্তি; অনুসহগতো কামরাগানুসযো, পটিঘানুসযো – ইমে দ্ৰে অনুসযা ব্যন্তীহোন্তি. অরহত্তমগ্গেন রূপরাগো, অরূপরাগো, মানো, উদ্ধচ্চং, অৰিজ্জা – ইমানি পঞ্চ সঞ্ঞোজনানি পহীযন্তি; মানানুসযো, ভৰরাগানুসযো, অৰিজ্জানুসযো – ইমে তযো অনুসযা ব্যন্তীহোন্তি. এৰং সঞ্ঞোজনানি পহীযন্তি, অনুসযা ব্যন্তীহোন্তি. এৰং সমথপুব্বঙ্গমং ৰিপস্সনং ভাৰেতি.

৪. কথং ৰিপস্সনাপুব্বঙ্গমং সমথং ভাৰেতি? অনিচ্চতো অনুপস্সনট্ঠেন ৰিপস্সনা, দুক্খতো অনুপস্সনট্ঠেন ৰিপস্সনা, অনত্ততো অনুপস্সনট্ঠেন ৰিপস্সনা. তত্থ জাতানং ধম্মানঞ্চ ৰোসগ্গারম্মণতা [ৰোস্সগ্গারম্মণতা (স্যা. ক.)] চিত্তস্স একগ্গতা অৰিক্খেপো. সমাধি ইতি পঠমং ৰিপস্সনা, পচ্ছা সমথো. তেন ৰুচ্চতি – ‘‘ৰিপস্সনাপুব্বঙ্গমং সমথং ভাৰেতী’’তি. ভাৰেতীতি চতস্সো ভাৰনা – আসেৰনট্ঠেন ভাৰনা…পে… মগ্গো সঞ্জাযতীতি কথং মগ্গো সঞ্জাযতি…পে… এৰং মগ্গো সঞ্জাযতি. এৰং সঞ্ঞোজনানি পহীযন্তি, অনুসযা ব্যন্তীহোন্তি.

রূপং অনিচ্চতো অনুপস্সনট্ঠেন ৰিপস্সনা, রূপং দুক্খতো অনুপস্সনট্ঠেন ৰিপস্সনা, রূপং অনত্ততো অনুপস্সনট্ঠেন ৰিপস্সনা. তত্থ জাতানং ধম্মানঞ্চ ৰোসগ্গারম্মণতা চিত্তস্স একগ্গতা অৰিক্খেপো সমাধি. ইতি পঠমং ৰিপস্সনা, পচ্ছা সমথো. তেন ৰুচ্চতি – ‘‘ৰিপস্সনাপুব্বঙ্গমং সমথং ভাৰেতী’’তি. ভাৰেতীতি চতস্সো ভাৰনা – আসেৰনট্ঠেন ভাৰনা…পে… মগ্গো সঞ্জাযতীতি কথং মগ্গো সঞ্জাযতি…পে… এৰং মগ্গো সঞ্জাযতি. এৰং সঞ্ঞোজনানি পহীযন্তি, অনুসযা ব্যন্তীহোন্তি.

ৰেদনং…পে… সঞ্ঞং … সঙ্খারে… ৰিঞ্ঞাণং… চক্খুং…পে… জরামরণং অনিচ্চতো অনুপস্সনট্ঠেন ৰিপস্সনা, জরামরণং দুক্খতো…পে… অনত্ততো অনুপস্সনট্ঠেন ৰিপস্সনা. তত্থ জাতানং ধম্মানঞ্চ ৰোসগ্গারম্মণতা চিত্তস্স একগ্গতা অৰিক্খেপো সমাধি. ইতি পঠমং ৰিপস্সনা, পচ্ছা সমথো. তেন ৰুচ্চতি – ‘‘ৰিপস্সনাপুব্বঙ্গমং সমথং ভাৰেতী’’তি. ভাৰেতীতি চতস্সো ভাৰনা – আসেৰনট্ঠেন ভাৰনা…পে… মগ্গো সঞ্জাযতীতি কথং মগ্গো সঞ্জাযতি…পে… এৰং মগ্গো সঞ্জাযতি. এৰং সঞ্ঞোজনানি পহীযন্তি, অনুসযা ব্যন্তীহোন্তি. এৰং ৰিপস্সনাপুব্বঙ্গমং সমথং ভাৰেতি.

৫. কথং সমথৰিপস্সনং যুগনদ্ধং ভাৰেতি? সোল়সহি আকারেহি সমথৰিপস্সনং যুগনদ্ধং ভাৰেতি. আরম্মণট্ঠেন গোচরট্ঠেন পহানট্ঠেন পরিচ্চাগট্ঠেন ৰুট্ঠানট্ঠেন ৰিৰট্টনট্ঠেন সন্তট্ঠেন পণীতট্ঠেন ৰিমুত্তট্ঠেন অনাসৰট্ঠেন তরণট্ঠেন অনিমিত্তট্ঠেন অপ্পণিহিতট্ঠেন সুঞ্ঞতট্ঠেন একরসট্ঠেন অনতিৰত্তনট্ঠেন যুগনদ্ধট্ঠেন.

কথং আরম্মণট্ঠেন সমথৰিপস্সনং যুগনদ্ধং ভাৰেতি? উদ্ধচ্চং পজহতো চিত্তস্স একগ্গতা অৰিক্খেপো সমাধি নিরোধারম্মণো, অৰিজ্জং পজহতো অনুপস্সনট্ঠেন ৰিপস্সনা নিরোধারম্মণা. ইতি আরম্মণট্ঠেন সমথৰিপস্সনা একরসা হোন্তি, যুগনদ্ধা হোন্তি, অঞ্ঞমঞ্ঞং নাতিৰত্তন্তীতি. তেন ৰুচ্চতি – ‘‘আরম্মণট্ঠেন সমথৰিপস্সনং যুগনদ্ধং ভাৰেতী’’তি. ভাৰেতীতি চতস্সো ভাৰনা – আসেৰনট্ঠেন ভাৰনা…পে… মগ্গো সঞ্জাযতীতি কথং মগ্গো সঞ্জাযতি…পে… এৰং মগ্গো সঞ্জাযতি. এৰং সঞ্ঞোজনানি পহীযন্তি, অনুসযা ব্যন্তীহোন্তি. এৰং আরম্মণট্ঠেন সমথৰিপস্সনং যুগনদ্ধং ভাৰেতি.

কথং গোচরট্ঠেন সমথৰিপস্সনং যুগনদ্ধং ভাৰেতি? উদ্ধচ্চং পজহতো চিত্তস্স একগ্গতা অৰিক্খেপো সমাধি নিরোধগোচরো, অৰিজ্জং পজহতো অনুপস্সনট্ঠেন ৰিপস্সনা নিরোধগোচরা. ইতি গোচরট্ঠেন সমথৰিপস্সনা একরসা হোন্তি, যুগনদ্ধা হোন্তি, অঞ্ঞমঞ্ঞং নাতিৰত্তন্তীতি. তেন ৰুচ্চতি – ‘‘গোচরট্ঠেন সমথৰিপস্সনং যুগনদ্ধং ভাৰেতী’’তি.

কথং পহানট্ঠেন সমথৰিপস্সনং যুগনদ্ধং ভাৰেতি? উদ্ধচ্চসহগতকিলেসে চ খন্ধে চ পজহতো চিত্তস্স একগ্গতা অৰিক্খেপো সমাধি নিরোধগোচরো, অৰিজ্জাসহগতকিলেসে চ খন্ধে চ পজহতো অনুপস্সনট্ঠেন ৰিপস্সনা নিরোধগোচরা. ইতি পহানট্ঠেন সমথৰিপস্সনা একরসা হোন্তি, যুগনদ্ধা হোন্তি, অঞ্ঞমঞ্ঞং নাতিৰত্তন্তীতি. তেন ৰুচ্চতি – ‘‘পহানট্ঠেন সমথৰিপস্সনং যুগনদ্ধং ভাৰেতী’’তি.

কথং পরিচ্চাগট্ঠেন সমথৰিপস্সনং যুগনদ্ধং ভাৰেতি? উদ্ধচ্চসহগতকিলেসে চ খন্ধে চ পরিচ্চজতো চিত্তস্স একগ্গতা অৰিক্খেপো সমাধি নিরোধগোচরো, অৰিজ্জাসহগতকিলেসে চ খন্ধে চ পরিচ্চজতো অনুপস্সনট্ঠেন ৰিপস্সনা নিরোধগোচরা. ইতি পরিচ্চাগট্ঠেন সমথৰিপস্সনা একরসা হোন্তি, যুগনদ্ধা হোন্তি, অঞ্ঞমঞ্ঞং নাতিৰত্তন্তীতি. তেন ৰুচ্চতি – ‘‘পরিচ্চাগট্ঠেন সমথৰিপস্সনং যুগনদ্ধং ভাৰেতী’’তি.

কথং ৰুট্ঠানট্ঠেন সমথৰিপস্সনং যুগনদ্ধং ভাৰেতি? উদ্ধচ্চসহগতকিলেসেহি চ খন্ধেহি চ ৰুট্ঠহতো চিত্তস্স একগ্গতা অৰিক্খেপো সমাধি নিরোধগোচরো, অৰিজ্জাসহগতকিলেসেহি চ খন্ধেহি চ ৰুট্ঠহতো অনুপস্সনট্ঠেন ৰিপস্সনা নিরোধগোচরা. ইতি ৰুট্ঠানট্ঠেন সমথৰিপস্সনা একরসা হোন্তি, যুগনদ্ধা হোন্তি, অঞ্ঞমঞ্ঞং নাতিৰত্তন্তীতি. তেন ৰুচ্চতি – ‘‘ৰুট্ঠানট্ঠেন সমথৰিপস্সনং যুগনদ্ধং ভাৰেতী’’তি.

কথং ৰিৰট্টনট্ঠেন সমথৰিপস্সনং যুগনদ্ধং ভাৰেতি? উদ্ধচ্চসহগতকিলেসেহি চ খন্ধেহি চ ৰিৰট্টতো চিত্তস্স একগ্গতা অৰিক্খেপো সমাধি নিরোধগোচরো, অৰিজ্জাসহগতকিলেসেহি চ খন্ধেহি চ ৰিৰট্টতো অনুপস্সনট্ঠেন ৰিপস্সনা নিরোধগোচরা. ইতি ৰিৰট্টনট্ঠেন সমথৰিপস্সনা একরসা হোন্তি, যুগনদ্ধা হোন্তি, অঞ্ঞমঞ্ঞং নাতিৰত্তন্তীতি. তেন ৰুচ্চতি – ‘‘ৰিৰট্টনট্ঠেন সমথৰিপস্সনং যুগনদ্ধং ভাৰেতী’’তি.

কথং সন্তট্ঠেন সমথৰিপস্সনং যুগনদ্ধং ভাৰেতি? উদ্ধচ্চং পজহতো চিত্তস্স একগ্গতা অৰিক্খেপো সমাধি সন্তো হোন্তি নিরোধগোচরো, অৰিজ্জং পজহতো অনুপস্সনট্ঠেন ৰিপস্সনা সন্তা হোতি নিরোধগোচরা. ইতি সন্তট্ঠেন সমথৰিপস্সনা একরসা হোন্তি, যুগনদ্ধা হোন্তি, অঞ্ঞমঞ্ঞং নাতিৰত্তন্তীতি. তেন ৰুচ্চতি – ‘‘সন্তট্ঠেন সমথৰিপস্সনং যুগনদ্ধং ভাৰেতী’’তি.

কথং পণীতট্ঠেন সমথৰিপস্সনং যুগনদ্ধং ভাৰেতি? উদ্ধচ্চং পজহতো চিত্তস্স একগ্গতা অৰিক্খেপো সমাধি পণীতো হোতি নিরোধগোচরো, অৰিজ্জং পজহতো অনুপস্সনট্ঠেন ৰিপস্সনা পণীতা হোতি নিরোধগোচরা. ইতি পণীতট্ঠেন সমথৰিপস্সনা একরসা হোন্তি, যুগনদ্ধা হোন্তি, অঞ্ঞমঞ্ঞং নাতিৰত্তন্তীতি. তেন ৰুচ্চতি – ‘‘পণীতট্ঠেন সমথৰিপস্সনং যুগনদ্ধং ভাৰেতী’’তি.

কথং ৰিমুত্তট্ঠেন সমথৰিপস্সনং যুগনদ্ধং ভাৰেতি? উদ্ধচ্চং পজহতো চিত্তস্স একগ্গতা অৰিক্খেপো সমাধি কামাসৰা ৰিমুত্তো হোতি নিরোধগোচরো, অৰিজ্জং পজহতো অনুপস্সনট্ঠেন ৰিপস্সনা অৰিজ্জাসৰা ৰিমুত্তা হোতি নিরোধগোচরা. ইতি রাগৰিরাগা চেতোৰিমুত্তি অৰিজ্জাৰিরাগা পঞ্ঞা ৰিমুত্তট্ঠেন সমথৰিপস্সনা একরসা হোন্তি, যুগনদ্ধা হোন্তি, অঞ্ঞমঞ্ঞং নাতিৰত্তন্তীতি. তেন ৰুচ্চতি – ‘‘ৰিমুত্তট্ঠেন সমথৰিপস্সনং যুগনদ্ধং ভাৰেতী’’তি.

কথং অনাসৰট্ঠেন সমথৰিপস্সনং যুগনদ্ধং ভাৰেতি? উদ্ধচ্চং পজহতো চিত্তস্স একগ্গতা অৰিক্খেপো সমাধি কামাসৰেন অনাসৰো হোতি নিরোধগোচরো, অৰিজ্জং পজহতো অনুপস্সনট্ঠেন ৰিপস্সনা অৰিজ্জাসৰেন অনাসৰা হোতি নিরোধগোচরা. ইতি অনাসৰট্ঠেন সমথৰিপস্সনা একরসা হোন্তি, যুগনদ্ধা হোন্তি, অঞ্ঞমঞ্ঞং নাতিৰত্তন্তীতি. তেন ৰুচ্চতি – ‘‘অনাসৰট্ঠেন সমথৰিপস্সনং যুগনদ্ধং ভাৰেতী’’তি.

কথং তরণট্ঠেন সমথৰিপস্সনং যুগনদ্ধং ভাৰেতি? উদ্ধচ্চসহগতকিলেসে চ খন্ধে চ তরতো চিত্তস্স একগ্গতা অৰিক্খেপো সমাধি নিরোধগোচরো, অৰিজ্জাসহগতকিলেসে চ খন্ধে চ তরতো অনুপস্সনট্ঠেন ৰিপস্সনা নিরোধগোচরা. ইতি তরণট্ঠেন সমথৰিপস্সনা একরসা হোন্তি, যুগনদ্ধা হোন্তি, অঞ্ঞমঞ্ঞং নাতিৰত্তন্তীতি. তেন ৰুচ্চতি – ‘‘তরণট্ঠেন সমথৰিপস্সনং যুগনদ্ধং ভাৰেতী’’তি.

কথং অনিমিত্তট্ঠেন সমথৰিপস্সনং যুগনদ্ধং ভাৰেতি? উদ্ধচ্চং পজহতো চিত্তস্স একগ্গতা অৰিক্খেপো সমাধি সব্বনিমিত্তেহি অনিমিত্তো হোতি নিরোধগোচরো, অৰিজ্জং পজহতো অনুপস্সনট্ঠেন ৰিপস্সনা সব্বনিমিত্তেহি অনিমিত্তা হোতি নিরোধগোচরা. ইতি অনিমিত্তট্ঠেন সমথৰিপস্সনা একরসা হোন্তি, যুগনদ্ধা হোন্তি, অঞ্ঞমঞ্ঞং নাতিৰত্তন্তীতি. তেন ৰুচ্চতি – ‘‘অনিমিত্তট্ঠেন সমথৰিপস্সনং যুগনদ্ধং ভাৰেতী’’তি.

কথং অপ্পণিহিতট্ঠেন সমথৰিপস্সনং যুগনদ্ধং ভাৰেতি? উদ্ধচ্চং পজহতো চিত্তস্স একগ্গতা অৰিক্খেপো সমাধি সব্বপণিধীহি অপ্পণিহিতো হোতি নিরোধগোচরো, অৰিজ্জং পজহতো অনুপস্সনট্ঠেন ৰিপস্সনা সব্বপণিধীহি অপ্পণিহিতা হোতি নিরোধগোচরা. ইতি অপ্পণিহিতট্ঠেন সমথৰিপস্সনা একরসা হোন্তি, যুগনদ্ধা হোন্তি, অঞ্ঞমঞ্ঞং নাতিৰত্তন্তীতি. তেন ৰুচ্চতি – ‘‘অপ্পণিহিতট্ঠেন সমথৰিপস্সনং যুগনদ্ধং ভাৰেতী’’তি.

কথং সুঞ্ঞতট্ঠেন সমথৰিপস্সনং যুগনদ্ধং ভাৰেতি? উদ্ধচ্চং পজহতো চিত্তস্স একগ্গতা অৰিক্খেপো সমাধি সব্বাভিনিৰেসেহি সুঞ্ঞো হোতি নিরোধগোচরো, অৰিজ্জং পজহতো অনুপস্সনট্ঠেন ৰিপস্সনা সব্বাভিনিৰেসেহি সুঞ্ঞা হোতি নিরোধগোচরা. ইতি সুঞ্ঞতট্ঠেন সমথৰিপস্সনা একরসা হোন্তি, যুগনদ্ধা হোন্তি, অঞ্ঞমঞ্ঞং নাতিৰত্তন্তীতি. তেন ৰুচ্চতি – ‘‘সুঞ্ঞতট্ঠেন সমথৰিপস্সনং যুগনদ্ধং ভাৰেতী’’তি. ভাৰেতীতি চতস্সো ভাৰনা – আসেৰনট্ঠেন ভাৰনা…পে… মগ্গো সঞ্জাযতীতি কথং মগ্গো সঞ্জাযতি…পে… এৰং মগ্গো সঞ্জাযতি. এৰং সঞ্ঞোজনানি পহীযন্তি, অনুসযা ব্যন্তীহোন্তি. এৰং সুঞ্ঞতট্ঠেন সমথৰিপস্সনং যুগনদ্ধং ভাৰেতি. ইমেহি সোল়সহি আকারেহি সমথৰিপস্সনং যুগনদ্ধং ভাৰেতি, এৰং সমথৰিপস্সনং যুগনদ্ধং ভাৰেতি.

সুত্তন্তনিদ্দেসো.

২. ধম্মুদ্ধচ্চৰারনিদ্দেসো

৬. কথং ধম্মুদ্ধচ্চৰিগ্গহিতং মানসং হোতি? অনিচ্চতো মনসিকরোতো ওভাসো উপ্পজ্জতি, ওভাসো ধম্মোতি ওভাসং আৰজ্জতি, ততো ৰিক্খেপো উদ্ধচ্চং. তেন উদ্ধচ্চেন ৰিগ্গহিতমানসো অনিচ্চতো উপট্ঠানং যথাভূতং নপ্পজানাতি, দুক্খতো উপট্ঠানং যথাভূতং নপ্পজানাতি, অনত্ততো উপট্ঠানং যথাভূতং নপ্পজানাতি. তেন ৰুচ্চতি – ‘‘ধম্মুদ্ধচ্চৰিগ্গহিতমানসো হোতি সো সমযো, যং তং চিত্তং অজ্ঝত্তমেৰ সন্তিট্ঠতি সন্নিসীদতি একোদি হোতি সমাধিযতি. তস্স মগ্গো সঞ্জাযতী’’তি কথং মগ্গো সঞ্জাযতি…পে… এৰং মগ্গো সঞ্জাযতি, এৰং সঞ্ঞোজনানি পহীযন্তি, অনুসযা ব্যন্তীহোন্তি.

অনিচ্চতো মনসিকরোতো ঞাণং উপ্পজ্জতি, পীতি উপ্পজ্জতি, পস্সদ্ধি উপ্পজ্জতি, সুখং উপ্পজ্জতি, অধিমোক্খো উপ্পজ্জতি, পগ্গহো উপ্পজ্জতি, উপট্ঠানং উপ্পজ্জতি, উপেক্খা উপ্পজ্জতি, নিকন্তি উপ্পজ্জতি, ‘নিকন্তি ধম্মো’তি নিকন্তিং আৰজ্জতি. ততো ৰিক্খেপো উদ্ধচ্চং. তেন উদ্ধচ্চেন ৰিগ্গহিতমানসো অনিচ্চতো উপট্ঠানং যথাভূতং নপ্পজানাতি, দুক্খতো উপট্ঠানং যথাভূতং নপ্পজানাতি, অনত্ততো উপট্ঠানং যথাভূতং নপ্পজানাতি. তেন ৰুচ্চতি – ‘‘ধম্মুদ্ধচ্চৰিগ্গহিতমানসো হোতি সো সমযো, যং তং চিত্তং অজ্ঝত্তমেৰ সন্তিট্ঠতি সন্নিসীদতি একোদি হোতি সমাধিযতি. তস্স মগ্গো সঞ্জাযতী’’তি. কথং মগ্গো সঞ্জাযতি…পে… এৰং মগ্গো সঞ্জাযতি, এৰং সঞ্ঞোজনানি পহীযন্তি, অনুসযা ব্যন্তীহোন্তি.

দুক্খতো মনসিকরোতো…পে… অনত্ততো মনসিকরোতো ওভাসো উপ্পজ্জতি…পে… ঞাণং উপ্পজ্জতি, পীতি উপ্পজ্জতি, পস্সদ্ধি উপ্পজ্জতি, সুখং উপ্পজ্জতি, অধিমোক্খো উপ্পজ্জতি, পগ্গহো উপ্পজ্জতি, উপট্ঠানং উপ্পজ্জতি, উপেক্খা উপ্পজ্জতি, নিকন্তি উপ্পজ্জতি, ‘নিকন্তি ধম্মো’তি নিকন্তিং আৰজ্জতি. ততো ৰিক্খেপো উদ্ধচ্চং. তেন উদ্ধচ্চেন ৰিগ্গহিতমানসো অনত্ততো উপট্ঠানং, অনিচ্চতো উপট্ঠানং, দুক্খতো উপট্ঠানং যথাভূতং নপ্পজানাতি. তেন ৰুচ্চতি – ‘‘ধম্মুদ্ধচ্চৰিগ্গহিতমানসো…পে… এৰং সঞ্ঞোজনানি পহীযন্তি, অনুসযা ব্যন্তীহোন্তি’’.

রূপং অনিচ্চতো মনসিকরোতো…পে… রূপং দুক্খতো মনসিকরোতো… রূপং অনত্ততো মনসিকরোতো… ৰেদনং…পে… সঞ্ঞং… সঙ্খারে… ৰিঞ্ঞাণং… চক্খুং…পে… জরামরণং অনিচ্চতো মনসিকরোতো…পে… জরামরণং দুক্খতো মনসিকরোতো, জরামরণং অনত্ততো মনসিকরোতো ওভাসো উপ্পজ্জতি…পে… ঞাণং উপ্পজ্জতি, পীতি উপ্পজ্জতি, পস্সদ্ধি উপ্পজ্জতি, সুখং উপ্পজ্জতি, অধিমোক্খো উপ্পজ্জতি, পগ্গহো উপ্পজ্জতি, উপট্ঠানং উপ্পজ্জতি, উপেক্খা উপ্পজ্জতি, নিকন্তি উপ্পজ্জতি, ‘নিকন্তি ধম্মো’তি নিকন্তিং আৰজ্জতি. ততো ৰিক্খেপো উদ্ধচ্চং. তেন উদ্ধচ্চেন ৰিগ্গহিতমানসো. জরামরণং অনত্ততো উপট্ঠানং যথাভূতং নপ্পজানাতি. জরামরণং অনিচ্চতো উপট্ঠানং যথাভূতং নপ্পজানাতি, জরামরণং দুক্খতো উপট্ঠানং যথাভূতং নপ্পজানাতি. তেন ৰুচ্চতি – ‘‘ধম্মুদ্ধচ্চৰিগ্গহিতমানসো হোতি. সো সমযো, যং তং চিত্তং অজ্ঝত্তমেৰ সন্তিট্ঠতি সন্নিসীদতি একোদি হোতি সমাধিযতি. তস্স মগ্গো সঞ্জাযতী’’তি. কথং মগ্গো সঞ্জাযতি…পে… এৰং মগ্গো সঞ্জাযতি. এৰং সঞ্ঞোজনানি পহীযন্তি, অনুসযা ব্যন্তীহোন্তি. এৰং ধম্মুদ্ধচ্চৰিগ্গহিতং মানসং হোতি.

৭. ওভাসে চেৰ ঞাণে চ, পীতিযা চ ৰিকম্পতি;

পস্সদ্ধিযা সুখে চেৰ, যেহি চিত্তং পৰেধতি.

অধিমোক্খে চ পগ্গাহে, উপট্ঠানে চ কম্পতি;

উপেক্খাৰজ্জনায চেৰ, উপেক্খায চ নিকন্তিযা.

ইমানি দস ঠানানি, পঞ্ঞা যস্স পরিচ্চিতা;

ধম্মুদ্ধচ্চকুসলো হোতি, ন চ সম্মোহ গচ্ছতি.

ৰিক্খিপতি চেৰ কিলিস্সতি চ, চৰতি চিত্তভাৰনা;

ৰিক্খিপতি ন কিলিস্সতি, ভাৰনা পরিহাযতি.

ৰিক্খিপতি ন কিলিস্সতি, ভাৰনা ন পরিহাযতি;

ন চ ৰিক্খিপতে চিত্তং ন কিলিস্সতি, ন চৰতি চিত্তভাৰনা.

ইমেহি চতূহি ঠানেহি চিত্তস্স সঙ্খেপৰিক্খেপৰিগ্গহিতং [সঙ্খেপং ৰিক্খেপং ৰিগ্গহিতং (স্যা.)] দস ঠানে সম্পজানাতীতি.

যুগনদ্ধকথা নিট্ঠিতা.

২. সচ্চকথা

৮. পুরিমনিদানং. ‘‘চত্তারিমানি, ভিক্খৰে [সং. নি. ৫.১০৯০], তথানি অৰিতথানি অনঞ্ঞথানি. কতমানি চত্তারি? ‘ইদং দুক্খ’ন্তি, ভিক্খৰে, তথমেতং অৰিতথমেতং অনঞ্ঞথমেতং; ‘অযং দুক্খসমুদযো’তি তথমেতং অৰিতথমেতং অনঞ্ঞথমেতং, ‘অযং দুক্খনিরোধো’তি তথমেতং অৰিতথমেতং অনঞ্ঞথমেতং, ‘অযং দুক্খনিরোধগামিনী পটিপদা’তি তথমেতং অৰিতথমেতং অনঞ্ঞথমেতং. ইমানি খো, ভিক্খৰে, চত্তারি তথানি অৰিতথানি অনঞ্ঞথানি’’.

১. পঠমসুত্তন্তনিদ্দেসো

কথং দুক্খং তথট্ঠেন সচ্চং? চত্তারো দুক্খস্স দুক্খট্ঠা তথা অৰিতথা অনঞ্ঞথা. দুক্খস্স পীল়নট্ঠো, সঙ্খতট্ঠো, সন্তাপট্ঠো, ৰিপরিণামট্ঠো – ইমে চত্তারো দুক্খস্স দুক্খট্ঠা তথা অৰিতথা অনঞ্ঞথা. এৰং দুক্খং তথট্ঠেন সচ্চং.

কথং সমুদযো তথট্ঠেন সচ্চং? চত্তারো সমুদযস্স সমুদযট্ঠা তথা অৰিতথা অনঞ্ঞথা. সমুদযস্স আযূহনট্ঠো, নিদানট্ঠো, সংযোগট্ঠো পলিবোধট্ঠো – ইমে চত্তারো সমুদযস্স সমুদযট্ঠা তথা অৰিতথা অনঞ্ঞথা. এৰং সমুদযো তথট্ঠেন সচ্চং.

কথং নিরোধো তথট্ঠেন সচ্চং? চত্তারো নিরোধস্স নিরোধট্ঠা তথা অৰিতথা অনঞ্ঞথা. নিরোধস্স নিস্সরণট্ঠো, ৰিৰেকট্ঠো, অসঙ্খতট্ঠো, অমতট্ঠো – ইমে চত্তারো নিরোধস্স নিরোধট্ঠা তথা অৰিতথা অনঞ্ঞথা. এৰং নিরোধো তথট্ঠেন সচ্চং.

কথং মগ্গো তথট্ঠেন সচ্চং? চত্তারো মগ্গস্স মগ্গট্ঠা তথা অৰিতথা অনঞ্ঞথা. মগ্গস্স নিয্যানট্ঠো, হেতুট্ঠো, দস্সনট্ঠো, আধিপতেয্যট্ঠো – ইমে চত্তারো মগ্গস্স মগ্গট্ঠা তথা অৰিতথা অনঞ্ঞথা. এৰং মগ্গো তথট্ঠেন সচ্চং.

৯. কতিহাকারেহি চত্তারি সচ্চানি একপ্পটিৰেধানি? চতূহাকারেহি চত্তারি সচ্চানি একপ্পটিৰেধানি. তথট্ঠেন, অনত্তট্ঠেন, সচ্চট্ঠেন, পটিৰেধট্ঠেন – ইমেহি চতূহাকারেহি চত্তারি সচ্চানি একসঙ্গহিতানি. যং একসঙ্গহিতং তং একত্তং. একত্তং একেন ঞাণেন পটিৰিজ্ঝতীতি – চত্তারি সচ্চানি একপ্পটিৰেধানি.

কথং তথট্ঠেন চত্তারি সচ্চানি একপ্পটিৰেধানি? চতূহাকারেহি তথট্ঠেন চত্তারি সচ্চানি একপ্পটিৰেধানি. দুক্খস্স দুক্খট্ঠো তথট্ঠো, সমুদযস্স সমুদযট্ঠো তথট্ঠো, নিরোধস্স নিরোধট্ঠো তথট্ঠো, মগ্গস্স মগ্গট্ঠো তথট্ঠো – ইমেহি চতূহাকারেহি তথট্ঠেন চত্তারি সচ্চানি একসঙ্গহিতানি. যং একসঙ্গহিতং তং একত্তং. একত্তং একেন ঞাণেন পটিৰিজ্ঝতীতি – চত্তারি সচ্চানি একপ্পটিৰেধানি.

কথং অনত্তট্ঠেন চত্তারি সচ্চানি একপ্পটিৰেধানি? চতূহাকারেহি অনত্তট্ঠেন চত্তারি সচ্চানি একপ্পটিৰেধানি. দুক্খস্স দুক্খট্ঠো অনত্তট্ঠো, সমুদযস্স সমুদযট্ঠো অনত্তট্ঠো, নিরোধস্স নিরোধট্ঠো অনত্তট্ঠো, মগ্গস্স মগ্গট্ঠো অনত্তট্ঠো – ইমেহি চতূহাকারেহি অনত্তট্ঠেন চত্তারি সচ্চানি একসঙ্গহিতানি. যং একসঙ্গহিতং তং একত্তং. একত্তং একেন ঞাণেন পটিৰিজ্ঝতীতি – চত্তারি সচ্চানি একপ্পটিৰেধানি.

কথং সচ্চট্ঠেন চত্তারি সচ্চানি একপ্পটিৰেধানি? চতূহাকারেহি সচ্চট্ঠেন চত্তারি সচ্চানি একপ্পটিৰেধানি. দুক্খস্স দুক্খট্ঠো সচ্চট্ঠো, সমুদযস্স সমুদযট্ঠো সচ্চট্ঠো, নিরোধস্স নিরোধট্ঠো সচ্চট্ঠো, মগ্গস্স মগ্গট্ঠো সচ্চট্ঠো – ইমেহি চতূহাকারেহি সচ্চট্ঠেন চত্তারি সচ্চানি একসঙ্গহিতানি. যং একসঙ্গহিতং তং একত্তং. একত্তং একেন ঞাণেন পটিৰিজ্ঝতীতি – চত্তারি সচ্চানি একপ্পটিৰেধানি.

কথং পটিৰেধট্ঠেন চত্তারি সচ্চানি একপ্পটিৰেধানি? চতূহাকারেহি পটিৰেধট্ঠেন চত্তারি সচ্চানি একপ্পটিৰেধানি. দুক্খস্স দুক্খট্ঠো পটিৰেধট্ঠো, সমুদযস্স সমুদযট্ঠো পটিৰেধট্ঠো নিরোধস্স নিরোধট্ঠো পটিৰেধট্ঠো, মগ্গস্স মগ্গট্ঠো পটিৰেধট্ঠো – ইমেহি চতূহাকারেহি পটিৰেধট্ঠেন চত্তারি সচ্চানি একসঙ্গহিতানি যং একসঙ্গহিতং তং একত্তং. একত্তং একেন ঞাণেন পটিৰিজ্ঝতীতি – চত্তারি সচ্চানি একপ্পটিৰেধানি.

১০. কতিহাকারেহি চত্তারি সচ্চানি একপ্পটিৰেধানি? যং অনিচ্চং তং দুক্খং, যং দুক্খং তং অনিচ্চং, যং অনিচ্চঞ্চ দুক্খঞ্চ তং অনত্তা. যং অনিচ্চঞ্চ দুক্খঞ্চ অনত্তা চ তং তথং. যং অনিচ্চং চ দুক্খঞ্চ অনত্তা চ তথঞ্চ তং সচ্চং. যং অনিচ্চঞ্চ দুক্খঞ্চ অনত্তা চ তথঞ্চ সচ্চঞ্চ তং একসঙ্গহিতং. যং একসঙ্গহিতং তং একত্তং. একত্তং একেন ঞাণেন পটিৰিজ্ঝতীতি – চত্তারি সচ্চানি একপ্পটিৰেধানি.

কতিহাকারেহি চত্তারি সচ্চানি একপ্পটিৰেধানি? নৰহাকারেহি চত্তারি সচ্চানি একপ্পটিৰেধানি. তথট্ঠেন, অনত্তট্ঠেন, সচ্চট্ঠেন, পটিৰেধট্ঠেন, অভিঞ্ঞট্ঠেন, পরিঞ্ঞট্ঠেন, পহানট্ঠেন, ভাৰনট্ঠেন, সচ্ছিকিরিযট্ঠেন – ইমেহি নৰহাকারেহি চত্তারি সচ্চানি একসঙ্গহিতানি. যং একসঙ্গহিতং তং একত্তং. একত্তং একেন ঞাণেন পটিৰিজ্ঝতীতি – চত্তারি সচ্চানি একপ্পটিৰেধানি.

কথং তথট্ঠেন চত্তারি সচ্চানি একপ্পটিৰেধানি? নৰহাকারেহি তথট্ঠেন চত্তারি সচ্চানি একপ্পটিৰেধানি. দুক্খস্স দুক্খট্ঠো তথট্ঠো, সমুদযস্স সমুদযট্ঠো তথট্ঠো, নিরোধস্স নিরোধট্ঠো তথট্ঠো, মগ্গস্স মগ্গট্ঠো তথট্ঠো, অভিঞ্ঞায অভিঞ্ঞট্ঠো তথট্ঠো, পরিঞ্ঞায পরিঞ্ঞট্ঠো তথট্ঠো, পহানস্স পহানট্ঠো তথট্ঠো, ভাৰনায ভাৰনট্ঠো তথট্ঠো, সচ্ছিকিরিযায সচ্ছিকিরিযট্ঠো তথট্ঠো – ইমেহি নৰহাকারেহি তথট্ঠেন চত্তারি সচ্চানি একসঙ্গহিতানি. যং একসঙ্গহিতং তং একত্তং. একত্তং একেন ঞাণেন পটিৰিজ্ঝতীতি – চত্তারি সচ্চানি একপ্পটিৰেধানি.

কথং অনত্তট্ঠেন… সচ্চট্ঠেন… পটিৰেধট্ঠেন চত্তারি সচ্চানি একপ্পটিৰেধানি? নৰহাকারেহি পটিৰেধট্ঠেন চত্তারি সচ্চানি একপ্পটিৰেধানি. দুক্খস্স দুক্খট্ঠো পটিৰেধট্ঠো, সমুদযস্স সমুদযট্ঠো পটিৰেধট্ঠো, নিরোধস্স নিরোধট্ঠো পটিৰেধট্ঠো, মগ্গস্স মগ্গট্ঠো পটিৰেধট্ঠো, অভিঞ্ঞায অভিঞ্ঞট্ঠো পটিৰেধট্ঠো, পরিঞ্ঞায পরিঞ্ঞট্ঠো পটিৰেধট্ঠো, পহানস্স পহানট্ঠো পটিৰেধট্ঠো, ভাৰনায ভাৰনট্ঠো পটিৰেধট্ঠো, সচ্ছিকিরিযায সচ্ছিকিরিযট্ঠো পটিৰেধট্ঠো – ইমেহি নৰহাকারেহি পটিৰেধট্ঠেন চত্তারি সচ্চানি একসঙ্গহিতানি. যং একসঙ্গহিতং তং একত্তং. একত্তং একেন ঞাণেন পটিৰিজ্ঝতীতি – চত্তারি সচ্চানি একপ্পটিৰেধানি.

১১. কতিহাকারেহি চত্তারি সচ্চানি একপ্পটিৰেধানি? দ্ৰাদসহি আকারেহি চত্তারি সচ্চানি একপ্পটিৰেধানি. তথট্ঠেন, অনত্তট্ঠেন, সচ্চট্ঠেন, পটিৰেধট্ঠেন, অভিজাননট্ঠেন, পরিজাননট্ঠেন, ধম্মট্ঠেন, তথট্ঠেন, ঞাতট্ঠেন, সচ্ছিকিরিযট্ঠেন, ফস্সনট্ঠেন, অভিসমযট্ঠেন – ইমেহি দ্ৰাদসহি আকারেহি চত্তারি সচ্চানি একসঙ্গহিতানি. যং একসঙ্গহিতং তং একত্তং. একত্তং একেন ঞাণেন পটিৰিজ্ঝতীতি – চত্তারি সচ্চানি একপ্পটিৰেধানি.

কথং তথট্ঠেন চত্তারি সচ্চানি একপ্পটিৰেধানি? সোল়সহি আকারেহি তথট্ঠেন চত্তারি সচ্চানি একপ্পটিৰেধানি. দুক্খস্স পীল়নট্ঠো, সঙ্খতট্ঠো, সন্তাপট্ঠো, ৰিপরিণামট্ঠো, তথট্ঠো; সমুদযস্স আযূহনট্ঠো, নিদানট্ঠো, সংযোগট্ঠো, পলিবোধট্ঠো তথট্ঠো; নিরোধস্স নিস্সরণট্ঠো, ৰিৰেকট্ঠো, অসঙ্খতট্ঠো, অমতট্ঠো তথট্ঠো; মগ্গস্স নিয্যানট্ঠো, হেতুট্ঠো, দস্সনট্ঠো, আধিপতেয্যট্ঠো তথট্ঠো – ইমেহি সোল়সহি আকারেহি তথট্ঠেন চত্তারি সচ্চানি একসঙ্গহিতানি. যং একসঙ্গহিতং তং একত্তং. একত্তং একেন ঞাণেন পটিৰিজ্ঝতীতি – চত্তারি সচ্চানি একপ্পটিৰেধানি.

কথং অনত্তট্ঠেন…পে… সচ্চট্ঠেন… পটিৰেধট্ঠেন… অভিজাননট্ঠেন… পরিজাননট্ঠেন… ধম্মট্ঠেন… তথট্ঠেন… ঞাতট্ঠেন… সচ্ছিকিরিযট্ঠেন… ফস্সনট্ঠেন… অভিসমযট্ঠেন চত্তারি সচ্চানি একপ্পটিৰেধানি? সোল়সহি আকারেহি অভিসমযট্ঠেন চত্তারি সচ্চানি একপ্পটিৰেধানি. দুক্খস্স পীল়নট্ঠো, সঙ্খতট্ঠো, সন্তাপট্ঠো, ৰিপরিণামট্ঠো, অভিসমযট্ঠো; সমুদযস্স আযূহনট্ঠো, নিদানট্ঠো, সংযোগট্ঠো, পলিবোধট্ঠো, অভিসমযট্ঠো; নিরোধস্স নিস্সরণট্ঠো, ৰিৰেকট্ঠো, অসঙ্খতট্ঠো, অমতট্ঠো, অভিসমযট্ঠো; মগ্গস্স নিয্যানট্ঠো, হেতুট্ঠো, দস্সনট্ঠো, আধিপতেয্যট্ঠো, অভিসমযট্ঠো – ইমেহি সোল়সহি আকারেহি অভিসমযট্ঠেন চত্তারি সচ্চানি একসঙ্গহিতানি. যং একসঙ্গহিতং তং একত্তং. একত্তং একেন ঞাণেন পটিৰিজ্ঝতীতি – চত্তারি সচ্চানি একপ্পটিৰেধানি.

১২. সচ্চানং কতি লক্খণানি? সচ্চানং দ্ৰে লক্খণানি. সঙ্খতলক্খণঞ্চ, অসঙ্খতলক্খণঞ্চ – সচ্চানং ইমানি দ্ৰে লক্খণানি.

সচ্চানং কতি লক্খণানি? সচ্চানং ছ লক্খণানি. সঙ্খতানং সচ্চানং উপ্পাদো পঞ্ঞাযতি, ৰযো পঞ্ঞাযতি, ঠিতানং অঞ্ঞথত্তং পঞ্ঞাযতি অসঙ্খতস্স সচ্চস্স ন উপ্পাদো পঞ্ঞাযতি, ন ৰযো পঞ্ঞাযতি, ন ঠিতস্স অঞ্ঞথত্তং পঞ্ঞাযতি – সচ্চানং ইমানি ছ লক্খণানি.

সচ্চানং কতি লক্খণানি? সচ্চানং দ্ৰাদস লক্খণানি. দুক্খসচ্চস্স উপ্পাদো পঞ্ঞাযতি, ৰযো পঞ্ঞাযতি, ঠিতস্স অঞ্ঞথত্তং পঞ্ঞাযতি; সমুদযসচ্চস্স উপ্পাদো পঞ্ঞাযতি, ৰযো পঞ্ঞাযতি, ঠিতস্স অঞ্ঞথত্তং পঞ্ঞাযতি; মগ্গসচ্চস্স উপ্পাদো পঞ্ঞাযতি, ৰযো পঞ্ঞাযতি, ঠিতস্স অঞ্ঞথত্তং পঞ্ঞাযতি; নিরোধসচ্চস্স ন উপ্পাদো পঞ্ঞাযতি, ন ৰযো পঞ্ঞাযতি, ন ঠিতস্স অঞ্ঞথত্তং পঞ্ঞাযতি – সচ্চানং ইমানি দ্ৰাদস লক্খণানি.

চতুন্নং সচ্চানং কতি কুসলা, কতি অকুসলা, কতি অব্যাকতা? সমুদযসচ্চং অকুসলং, মগ্গসচ্চং কুসলং, নিরোধসচ্চং অব্যাকতং. দুক্খসচ্চং সিযা কুসলং, সিযা অকুসলং, সিযা অব্যাকতং.

সিযা তীণি সচ্চানি একসচ্চেন সঙ্গহিতানি, একসচ্চং তীহি সচ্চেহি সঙ্গহিতং? ৰত্থুৰসেন পরিযাযেন সিযাতি. কথঞ্চ সিযা? যং দুক্খসচ্চং অকুসলং, সমুদযসচ্চং অকুসলং – এৰং অকুসলট্ঠেন দ্ৰে সচ্চানি একসচ্চেন সঙ্গহিতানি, একসচ্চং দ্ৰীহি সচ্চেহি সঙ্গহিতং. যং দুক্খসচ্চং কুসলং, মগ্গসচ্চং কুসলং – এৰং কুসলট্ঠেন দ্ৰে সচ্চানি একসচ্চেন সঙ্গহিতানি, একসচ্চং দ্ৰীহি সচ্চেহি সঙ্গহিতং. যং দুক্খসচ্চং অব্যাকতং, নিরোধসচ্চং অব্যাকতং – এৰং অব্যাকতট্ঠেন দ্ৰে সচ্চানি একসচ্চেন সঙ্গহিতানি, একসচ্চং দ্ৰীহি সচ্চেহি সঙ্গহিতং. এৰং সিযা তীণি সচ্চানি একসচ্চেন সঙ্গহিতানি, একসচ্চং তীহি সচ্চেহি সঙ্গহিতং ৰত্থুৰসেন পরিযাযেনাতি.

২. দুতিযসুত্তন্তপাল়ি

১৩. ‘‘পুব্বে মে, ভিক্খৰে [সং. নি. ৩.২৬], সম্বোধা অনভিসম্বুদ্ধস্স বোধিসত্তস্সেৰ সতো এতদহোসি – ‘কো নু খো রূপস্স অস্সাদো, কো আদীনৰো, কিং নিস্সরণং; কো ৰেদনায অস্সাদো, কো আদীনৰো, কিং নিস্সরণং; কো সঞ্ঞায অস্সাদো, কো আদীনৰো, কিং নিস্সরণং; কো সঙ্খারানং অস্সাদো, কো আদীনৰো, কিং নিস্সরণং; কো ৰিঞ্ঞাণস্স অস্সাদো, কো আদীনৰো, কিং নিস্সরণ’ন্তি? তস্স ময্হং, ভিক্খৰে, এতদহোসি – ‘যং খো রূপং পটিচ্চ উপ্পজ্জতি সুখং সোমনস্সং – অযং রূপস্স অস্সাদো. যং রূপং অনিচ্চং, তং দুক্খং ৰিপরিণামধম্মং – অযং রূপস্স আদীনৰো. যো রূপস্মিং ছন্দরাগৰিনযো ছন্দরাগপ্পহানং – ইদং রূপস্স নিস্সরণং. যং ৰেদনং পটিচ্চ…পে… যং সঞ্ঞং পটিচ্চ… যং সঙ্খারে পটিচ্চ… যং ৰিঞ্ঞাণং পটিচ্চ উপ্পজ্জতি সুখং সোমনস্সং – অযং ৰিঞ্ঞাণস্স অস্সাদো. যং ৰিঞ্ঞাণং অনিচ্চং তং দুক্খং ৰিপরিণামধম্মং – অযং ৰিঞ্ঞাণস্স আদীনৰো. যো ৰিঞ্ঞাণস্মিং ছন্দরাগৰিনযো ছন্দরাগপ্পহানং – ইদং ৰিঞ্ঞাণস্স নিস্সরণং’’.

‘‘যাৰকীৰঞ্চাহং, ভিক্খৰে, ইমেসং পঞ্চন্নং উপাদানক্খন্ধানং এৰং অস্সাদঞ্চ অস্সাদতো আদীনৰঞ্চ আদীনৰতো নিস্সরণঞ্চ নিস্সরণতো যথাভূতং নাব্ভঞ্ঞাসিং, নেৰ তাৰাহং, ভিক্খৰে, সদেৰকে লোকে সমারকে সব্রহ্মকে সস্সমণব্রাহ্মণিযা পজায সদেৰমনুস্সায ‘অনুত্তরং সম্মাসম্বোধিং অভিসম্বুদ্ধো’তি পচ্চঞ্ঞাসিং [অভিসম্বুদ্ধো পচ্চঞ্ঞাসিং (স্যা.) সং. নি. ৩.২৬ পস্সিতব্বা] যতো চ খ্ৰাহং, ভিক্খৰে, ইমেসং পঞ্চন্নং উপাদানক্খন্ধানং এৰং অস্সাদঞ্চ অস্সাদতো আদীনৰঞ্চ আদীনৰতো নিস্সরণঞ্চ নিস্সরণতো যথাভূতং অব্ভঞ্ঞাসিং, অথাহং, ভিক্খৰে, ‘সদেৰকে লোকে সমারকে সব্রহ্মকে সস্সমণব্রাহ্মণিযা পজায সদেৰমনুস্সায অনুত্তরং সম্মাসম্বোধিং অভিসম্বুদ্ধো’তি পচ্চঞ্ঞাসিং. ঞাণঞ্চ পন মে দস্সনং উদপাদি – ‘অকুপ্পা মে ৰিমুত্তি [চেতোৰিমুত্তি (স্যা. ক.) সং. নি. ৩.২৭ পস্সিতব্বা]. অযমন্তিমা জাতি, নত্থি দানি পুনব্ভৰো’’’তি.

৩. দুতিযসুত্তন্তনিদ্দেসো

১৪. যং রূপং পটিচ্চ উপ্পজ্জতি সুখং সোমনস্সং, অযং রূপস্স অস্সাদোতি – পহানপ্পটিৰেধো সমুদযসচ্চং. যং রূপং অনিচ্চং তং দুক্খং ৰিপরিণামধম্মং, অযং রূপস্স আদীনৰোতি – পরিঞ্ঞাপটিৰেধো দুক্খসচ্চং. যো রূপস্মিং ছন্দরাগৰিনযো ছন্দরাগপ্পহানং, ইদং রূপস্স নিস্সরণন্তি – সচ্ছিকিরিযাপটিৰেধো নিরোধসচ্চং. যা ইমেসু তীসু ঠানেসু দিট্ঠি সঙ্কপ্পো ৰাচা কম্মন্তো আজীৰো ৰাযামো সতি সমাধি – ভাৰনাপটিৰেধো মগ্গসচ্চং.

যং ৰেদনং পটিচ্চ…পে… যং সঞ্ঞং পটিচ্চ… যং সঙ্খারে পটিচ্চ… যং ৰিঞ্ঞাণং পটিচ্চ উপ্পজ্জতি সুখং সোমনস্সং, অযং ৰিঞ্ঞাণস্স অস্সাদোতি – পহানপ্পটিৰেধো সমুদযসচ্চং. যং ৰিঞ্ঞাণং অনিচ্চং তং দুক্খং ৰিপরিণামধম্মং, অযং ৰিঞ্ঞাণস্স আদীনৰোতি – পরিঞ্ঞাপটিৰেধো দুক্খসচ্চং. যো ৰিঞ্ঞাণস্মিং ছন্দরাগৰিনযো ছন্দরাগপ্পহানং, ইদং ৰিঞ্ঞাণস্স নিস্সরণন্তি – সচ্ছিকিরিযাপটিৰেধো নিরোধসচ্চং. যা ইমেসু তীসু ঠানেসু দিট্ঠি সঙ্কপ্পো ৰাচা কম্মন্তো আজীৰো ৰাযামো সতি সমাধি – ভাৰনাপটিৰেধো মগ্গসচ্চং.

১৫. সচ্চন্তি কতিহাকারেহি সচ্চং? এসনট্ঠেন, পরিগ্গহট্ঠেন, পটিৰেধট্ঠেন. কথং এসনট্ঠেন সচ্চং? জরামরণং কিংনিদানং, কিংসমুদযং, কিংজাতিকং, কিংপভৰন্তি – এৰং এসনট্ঠেন সচ্চং. জরামরণং জাতিনিদানং, জাতিসমুদযং, জাতিজাতিকং, জাতিপ্পভৰন্তি – এৰং পরিগ্গহট্ঠেন সচ্চং. জরামরণঞ্চ পজানাতি, জরামরণসমুদযঞ্চ পজানাতি, জরামরণনিরোধঞ্চ পজানাতি, জরামরণনিরোধগামিনিং পটিপদঞ্চ পজানাতি – এৰং পটিৰেধট্ঠেন সচ্চং.

জাতি কিংনিদানা, কিংসমুদযা, কিংজাতিকা, কিংপভৰাতি – এৰং এসনট্ঠেন সচ্চং. জাতি ভৰনিদানা, ভৰসমুদযা, ভৰজাতিকা, ভৰপ্পভৰাতি – এৰং পরিগ্গহট্ঠেন সচ্চং. জাতিঞ্চ পজানাতি, জাতিসমুদযঞ্চ পজানাতি, জাতিনিরোধঞ্চ পজানাতি, জাতিনিরোধগামিনিং পটিপদঞ্চ পজানাতি – এৰং পটিৰেধট্ঠেন সচ্চং.

ভৰো কিংনিদানো, কিংসমুদযো, কিংজাতিকো, কিংপভৰোতি – এৰং এসনট্ঠেন সচ্চং. ভৰো উপাদাননিদানো, উপাদানসমুদযো, উপাদানজাতিকো, উপাদানপ্পভৰোতি – এৰং পরিগ্গহট্ঠেন সচ্চং. ভৰং চ পজানাতি, ভৰসমুদযঞ্চ পজানাতি, ভৰনিরোধঞ্চ পজানাতি, ভৰনিরোধগামিনিং পটিপদঞ্চ পজানাতি – এৰং পটিৰেধট্ঠেন সচ্চং.

উপাদানং কিংনিদানং, কিংসমুদযং, কিংজাতিকং, কিংপভৰন্তি – এৰং এসনট্ঠেন সচ্চং. উপাদানং তণ্হানিদানং, তণ্হাসমুদযং, তণ্হাজাতিকং, তণ্হাপভৰন্তি – এৰং পরিগ্গহট্ঠেন সচ্চং. উপাদানঞ্চ পজানাতি, উপাদানসমুদযঞ্চ পজানাতি, উপাদাননিরোধঞ্চ পজানাতি উপাদাননিরোধগামিনিং পটিপদঞ্চ পজানাতি – এৰং পটিৰেধট্ঠেন সচ্চং.

তণ্হা কিংনিদানা, কিংসমুদযা, কিংজাতিকা, কিংপভৰাতি – এৰং এসনট্ঠেন সচ্চং. তণ্হা ৰেদনানিদানা, ৰেদনাসমুদযা, ৰেদনাজাতিকা, ৰেদনাপভৰাতি – এৰং পরিগ্গহট্ঠেন সচ্চং. তণ্হঞ্চ পজানাতি, তণ্হাসমুদযঞ্চ পজানাতি, তণ্হানিরোধঞ্চ পজানাতি, তণ্হানিরোধগামিনিং পটিপদঞ্চ পজানাতি – এৰং পটিৰেধট্ঠেন সচ্চং.

ৰেদনা কিংনিদানা, কিংসমুদযা, কিংজাতিকা, কিংপভৰাতি – এৰং এসনট্ঠেন সচ্চং. ৰেদনা ফস্সনিদানা, ফস্সসমুদযা, ফস্সজাতিকা, ফস্সপ্পভৰাতি – এৰং পরিগ্গহট্ঠেন সচ্চং. ৰেদনঞ্চ পজানাতি, ৰেদনাসমুদযঞ্চ পজানাতি, ৰেদনানিরোধঞ্চ পজানাতি, ৰেদনানিরোধগামিনিং পটিপদঞ্চ পজানাতি – এৰং পটিৰেধট্ঠেন সচ্চং.

ফস্সো কিংনিদানো, কিংসমুদযো, কিংজাতিকো, কিংপভৰোতি – এৰং এসনট্ঠেন সচ্চং. ফস্সো সল়াযতননিদানো, সল়াযতনসমুদযো, সল়াযতনজাতিকো, সল়াযতনপ্পভৰোতি – এৰং পরিগ্গহট্ঠেন সচ্চং. ফস্সঞ্চ পজানাতি, ফস্সসমুদযঞ্চ পজানাতি, ফস্সনিরোধঞ্চ পজানাতি, ফস্সনিরোধগামিনিং পটিপদঞ্চ পজানাতি – এৰং পটিৰেধট্ঠেন সচ্চং.

সল়াযতনং কিংনিদানং, কিংসমুদযং, কিংজাতিকং, কিংপভৰন্তি – এৰং এসনট্ঠেন সচ্চং. সল়াযতনং নামরূপনিদানং, নামরূপসমুদযং, নামরূপজাতিকং, নামরূপপ্পভৰন্তি – এৰং পরিগ্গহট্ঠেন সচ্চং. সল়াযতনঞ্চ পজানাতি, সল়াযতনসমুদযঞ্চ পজানাতি, সল়াযতননিরোধঞ্চ পজানাতি, সল়াযতননিরোধগামিনিং পটিপদঞ্চ পজানাতি – এৰং পটিৰেধট্ঠেন সচ্চং.

নামরূপং কিংনিদানং, কিংসমুদযং, কিংজাতিকং, কিংপভৰন্তি – এৰং এসনট্ঠেন সচ্চং. নামরূপং ৰিঞ্ঞাণনিদানং, ৰিঞ্ঞাণসমুদযং, ৰিঞ্ঞাণজাতিকং, ৰিঞ্ঞাণপ্পভৰন্তি – এৰং পরিগ্গহট্ঠেন সচ্চং. নামরূপঞ্চ পজানাতি, নামরূপসমুদযঞ্চ পজানাতি, নামরূপনিরোধঞ্চ পজানাতি, নামরূপনিরোধগামিনিং পটিপদঞ্চ পজানাতি – এৰং পটিৰেধট্ঠেন সচ্চং.

ৰিঞ্ঞাণং কিংনিদানং, কিংসমুদযং, কিংজাতিকং, কিংপভৰন্তি – এৰং এসনট্ঠেন সচ্চং. ৰিঞ্ঞাণং সঙ্খারনিদানং, সঙ্খারসমুদযং, সঙ্খারজাতিকং, সঙ্খারপ্পভৰন্তি – এৰং পরিগ্গহট্ঠেন সচ্চং. ৰিঞ্ঞাণঞ্চ পজানাতি, ৰিঞ্ঞাণসমুদযঞ্চ পজানাতি, ৰিঞ্ঞাণনিরোধঞ্চ পজানাতি, ৰিঞ্ঞাণনিরোধগামিনিং পটিপদঞ্চ পজানাতি – এৰং পটিৰেধট্ঠেন সচ্চং.

সঙ্খারা কিংনিদানা, কিংসমুদযা, কিংজাতিকা, কিংপভৰাতি – এৰং এসনট্ঠেন সচ্চং. সঙ্খারা অৰিজ্জানিদানা, অৰিজ্জাসমুদযা, অৰিজ্জাজাতিকা, অৰিজ্জাপভৰাতি – এৰং পরিগ্গহট্ঠেন সচ্চং. সঙ্খারে চ পজানাতি, সঙ্খারসমুদযঞ্চ পজানাতি, সঙ্খারনিরোধঞ্চ পজানাতি, সঙ্খারনিরোধগামিনিং পটিপদঞ্চ পজানাতি – এৰং পটিৰেধট্ঠেন সচ্চং.

১৬. জরামরণং দুক্খসচ্চং, জাতি সমুদযসচ্চং, উভিন্নম্পি নিস্সরণং নিরোধসচ্চং, নিরোধপ্পজাননা মগ্গসচ্চং. জাতি দুক্খসচ্চং, ভৰো সমুদযসচ্চং, উভিন্নম্পি নিস্সরণং নিরোধসচ্চং, নিরোধপ্পজাননা মগ্গসচ্চং. ভৰো দুক্খসচ্চং, উপাদানং সমুদযসচ্চং, উভিন্নম্পি নিস্সরণং নিরোধসচ্চং, নিরোধপ্পজাননা মগ্গসচ্চং. উপাদানং দুক্খসচ্চং, তণ্হা সমুদযসচ্চং, উভিন্নম্পি নিস্সরণং নিরোধসচ্চং, নিরোধপ্পজাননা মগ্গসচ্চং. তণ্হা দুক্খসচ্চং, ৰেদনা সমুদযসচ্চং, উভিন্নম্পি নিস্সরণং নিরোধসচ্চং, নিরোধপ্পজাননা মগ্গসচ্চং. ৰেদনা দুক্খসচ্চং, ফস্সো সমুদযসচ্চং, উভিন্নম্পি নিস্সরণং নিরোধসচ্চং, নিরোধপ্পজাননা মগ্গসচ্চং. ফস্সো দুক্খসচ্চং, সল়াযতনং সমুদযসচ্চং, উভিন্নম্পি নিস্সরণং নিরোধসচ্চং, নিরোধপ্পজাননা মগ্গসচ্চং. সল়াযতনং দুক্খসচ্চং, নামরূপং সমুদযসচ্চং, উভিন্নম্পি নিস্সরণং নিরোধসচ্চং, নিরোধপ্পজাননা মগ্গসচ্চং. নামরূপং দুক্খসচ্চং, ৰিঞ্ঞাণং সমুদযসচ্চং, উভিন্নম্পি নিস্সরণং নিরোধসচ্চং, নিরোধপ্পজাননা মগ্গসচ্চং. ৰিঞ্ঞাণং দুক্খসচ্চং, সঙ্খারা সমুদযসচ্চং, উভিন্নম্পি নিস্সরণং নিরোধসচ্চং, নিরোধপ্পজাননা মগ্গসচ্চং. সঙ্খারা দুক্খসচ্চং, অৰিজ্জা সমুদযসচ্চং, উভিন্নম্পি নিস্সরণং নিরোধসচ্চং, নিরোধপ্পজাননা মগ্গসচ্চং.

জরামরণং সিযা দুক্খসচ্চং, সিযা সমুদযসচ্চং, উভিন্নম্পি নিস্সরণং নিরোধসচ্চং, নিরোধপ্পজাননা মগ্গসচ্চং. জাতি সিযা দুক্খসচ্চং, সিযা সমুদযসচ্চং…পে… ভৰো সিযা দুক্খসচ্চং, সিযা সমুদযসচ্চং, উভিন্নম্পি নিস্সরণং নিরোধসচ্চং, নিরোধপ্পজাননা মগ্গসচ্চন্তি.

ভাণৰারো.

সচ্চকথা নিট্ঠিতা.

৩. বোজ্ঝঙ্গকথা

১৭. সাৰত্থিনিদানং. ‘‘সত্তিমে, ভিক্খৰে [সং. নি. ৫.২০০], বোজ্ঝঙ্গা. কতমে সত্ত? সতিসম্বোজ্ঝঙ্গো, ধম্মৰিচযসম্বোজ্ঝঙ্গো, ৰীরিযসম্বোজ্ঝঙ্গো, পীতিসম্বোজ্ঝঙ্গো, পস্সদ্ধিসম্বোজ্ঝঙ্গো, সমাধিসম্বোজ্ঝঙ্গো, উপেক্খাসম্বোজ্ঝঙ্গো – ইমে খো, ভিক্খৰে, সত্ত বোজ্ঝঙ্গা’’.

বোজ্ঝঙ্গাতি কেনট্ঠেন বোজ্ঝঙ্গা? বোধায সংৰত্তন্তীতি – বোজ্ঝঙ্গা. বুজ্ঝন্তীতি – বোজ্ঝঙ্গা. অনুবুজ্ঝন্তীতি – বোজ্ঝঙ্গা. পটিবুজ্ঝন্তীতি – বোজ্ঝঙ্গা. সম্বুজ্ঝন্তীতি – বোজ্ঝঙ্গা.

বুজ্ঝনট্ঠেন বোজ্ঝঙ্গা, অনুবুজ্ঝনট্ঠেন বোজ্ঝঙ্গা, পটিবুজ্ঝনট্ঠেন বোজ্ঝঙ্গা, সম্বুজ্ঝনট্ঠেন বোজ্ঝঙ্গা.

বোধেন্তীতি – বোজ্ঝঙ্গা. অনুবোধেন্তীতি – বোজ্ঝঙ্গা. পটিবোধেন্তীতি – বোজ্ঝঙ্গা. সম্বোধেন্তীতি – বোজ্ঝঙ্গা.

বোধনট্ঠেন বোজ্ঝঙ্গা, অনুবোধনট্ঠেন বোজ্ঝঙ্গা, পটিবোধনট্ঠেন বোজ্ঝঙ্গা, সম্বোধনট্ঠেন বোজ্ঝঙ্গা.

বোধিপক্খিযট্ঠেন বোজ্ঝঙ্গা, অনুবোধিপক্খিযট্ঠেন বোজ্ঝঙ্গা, পটিবোধিপক্খিযট্ঠেন বোজ্ঝঙ্গা, সম্বোধিপক্খিযট্ঠেন বোজ্ঝঙ্গা.

বুদ্ধিলভনট্ঠেন বোজ্ঝঙ্গা, বুদ্ধিপটিলভনট্ঠেন বোজ্ঝঙ্গা, বুদ্ধিরোপনট্ঠেন বোজ্ঝঙ্গা, বুদ্ধিঅভিরোপনট্ঠেন বোজ্ঝঙ্গা, বুদ্ধিপাপনট্ঠেন বোজ্ঝঙ্গা, বুদ্ধিসম্পাপনট্ঠেন বোজ্ঝঙ্গা.

মূলমূলকাদিদসকং

১৮. মূলট্ঠেন বোজ্ঝঙ্গা, মূলচরিযট্ঠেন বোজ্ঝঙ্গা, মূলপরিগ্গহট্ঠেন বোজ্ঝঙ্গা, মূলপরিৰারট্ঠেন বোজ্ঝঙ্গা, মূলপরিপূরণট্ঠেন [মূলপরিপূরট্ঠেন (স্যা. ক.) এৰমুপরিপি] বোজ্ঝঙ্গা, মূলপরিপাকট্ঠেন বোজ্ঝঙ্গা, মূলপটিসম্ভিদট্ঠেন বোজ্ঝঙ্গা, মূলপটিসম্ভিদাপাপনট্ঠেন বোজ্ঝঙ্গা, মূলপটিসম্ভিদায ৰসীভাৰট্ঠেন বোজ্ঝঙ্গা, মূলপটিসম্ভিদায ৰসীভাৰপ্পত্তানম্পি বোজ্ঝঙ্গা.

হেতুট্ঠেন বোজ্ঝঙ্গা, হেতুচরিযট্ঠেন বোজ্ঝঙ্গা, হেতুপরিগ্গহট্ঠেন বোজ্ঝঙ্গা, হেতুপরিৰারট্ঠেন বোজ্ঝঙ্গা, হেতুপরিপূরণট্ঠেন বোজ্ঝঙ্গা, হেতুপরিপাকট্ঠেন বোজ্ঝঙ্গা, হেতুপটিসম্ভিদট্ঠেন বোজ্ঝঙ্গা, হেতুপটিসম্ভিদাপাপনট্ঠেন বোজ্ঝঙ্গা, হেতুপটিসম্ভিদায ৰসীভাৰট্ঠেন বোজ্ঝঙ্গা, হেতুপটিসম্ভিদায ৰসীভাৰপ্পত্তানম্পি বোজ্ঝঙ্গা.

পচ্চযট্ঠেন বোজ্ঝঙ্গা, পচ্চযচরিযট্ঠেন বোজ্ঝঙ্গা, পচ্চযপরিগ্গহট্ঠেন বোজ্ঝঙ্গা, পচ্চযপরিৰারট্ঠেন বোজ্ঝঙ্গা, পচ্চযপরিপূরণট্ঠেন বোজ্ঝঙ্গা, পচ্চযপরিপাকট্ঠেন বোজ্ঝঙ্গা, পচ্চযপটিসম্ভিদট্ঠেন বোজ্ঝঙ্গা, পচ্চযপটিসম্ভিদাপাপনট্ঠেন বোজ্ঝঙ্গা, পচ্চযপটিসম্ভিদায ৰসীভাৰট্ঠেন বোজ্ঝঙ্গা, পচ্চযপটিসম্ভিদায ৰসীভাৰপ্পত্তানম্পি বোজ্ঝঙ্গা.

ৰিসুদ্ধট্ঠেন বোজ্ঝঙ্গা, ৰিসুদ্ধিচরিযট্ঠেন বোজ্ঝঙ্গা, ৰিসুদ্ধিপরিগ্গহট্ঠেন বোজ্ঝঙ্গা, ৰিসুদ্ধিপরিৰারট্ঠেন বোজ্ঝঙ্গা, ৰিসুদ্ধিপরিপূরণট্ঠেন বোজ্ঝঙ্গা, ৰিসুদ্ধিপরিপাকট্ঠেন বোজ্ঝঙ্গা, ৰিসুদ্ধিপটিসম্ভিদট্ঠেন বোজ্ঝঙ্গা, ৰিসুদ্ধিপটিসম্ভিদাপাপনট্ঠেন বোজ্ঝঙ্গা, ৰিসুদ্ধিপটিসম্ভিদায ৰসীভাৰট্ঠেন বোজ্ঝঙ্গা, ৰিসুদ্ধিপটিসম্ভিদায ৰসীভাৰপ্পত্তানম্পি বোজ্ঝঙ্গা.

অনৰজ্জট্ঠেন বোজ্ঝঙ্গা, অনৰজ্জচরিযট্ঠেন বোজ্ঝঙ্গা, অনৰজ্জপরিগ্গহট্ঠেন বোজ্ঝঙ্গা, অনৰজ্জপরিৰারট্ঠেন বোজ্ঝঙ্গা, অনৰজ্জপরিপূরণট্ঠেন বোজ্ঝঙ্গা, অনৰজ্জপরিপাকট্ঠেন বোজ্ঝঙ্গা, অনৰজ্জপটিসম্ভিদট্ঠেন বোজ্ঝঙ্গা, অনৰজ্জপটিসম্ভিদাপাপনট্ঠেন বোজ্ঝঙ্গা, অনৰজ্জপটিসম্ভিদায ৰসীভাৰট্ঠেন বোজ্ঝঙ্গা, অনৰজ্জপটিসম্ভিদায ৰসীভাৰপ্পত্তানম্পি বোজ্ঝঙ্গা.

নেক্খম্মট্ঠেন বোজ্ঝঙ্গা, নেক্খম্মচরিযট্ঠেন বোজ্ঝঙ্গা, নেক্খম্মপরিগ্গহট্ঠেন বোজ্ঝঙ্গা, নেক্খম্মপরিৰারট্ঠেন বোজ্ঝঙ্গা, নেক্খম্মপরিপূরণট্ঠেন বোজ্ঝঙ্গা, নেক্খম্মপরিপাকট্ঠেন বোজ্ঝঙ্গা, নেক্খম্মপটিসম্ভিদট্ঠেন বোজ্ঝঙ্গা, নেক্খম্মপটিসম্ভিদাপাপনট্ঠেন বোজ্ঝঙ্গা, নেক্খম্মপটিসম্ভিদায ৰসীভাৰট্ঠেন বোজ্ঝঙ্গা, নেক্খম্মপটিসম্ভিদায ৰসীভাৰপ্পত্তানম্পি বোজ্ঝঙ্গা.

ৰিমুত্তট্ঠেন বোজ্ঝঙ্গা, ৰিমুত্তিচরিযট্ঠেন বোজ্ঝঙ্গা, ৰিমুত্তিপরিগ্গহট্ঠেন বোজ্ঝঙ্গা, ৰিমুত্তিপরিৰারট্ঠেন বোজ্ঝঙ্গা, ৰিমুত্তিপরিপূরণট্ঠেন বোজ্ঝঙ্গা, ৰিমুত্তিপরিপাকট্ঠেন বোজ্ঝঙ্গা, ৰিমুত্তিপটিসম্ভিদট্ঠেন বোজ্ঝঙ্গা, ৰিমুত্তিপটিসম্ভিদাপাপনট্ঠেন বোজ্ঝঙ্গা, ৰিমুত্তিপটিসম্ভিদায ৰসীভাৰট্ঠেন বোজ্ঝঙ্গা, ৰিমুত্তিপটিসম্ভিদায ৰসীভাৰপ্পত্তানম্পি বোজ্ঝঙ্গা.

অনাসৰট্ঠেন বোজ্ঝঙ্গা, অনাসৰচরিযট্ঠেন বোজ্ঝঙ্গা, অনাসৰপরিগ্গহট্ঠেন বোজ্ঝঙ্গা, অনাসৰপরিৰারট্ঠেন বোজ্ঝঙ্গা, অনাসৰপরিপূরণট্ঠেন বোজ্ঝঙ্গা, অনাসৰপরিপাকট্ঠেন বোজ্ঝঙ্গা, অনাসৰপটিসম্ভিদট্ঠেন বোজ্ঝঙ্গা, অনাসৰপটিসম্ভিদাপাপনট্ঠেন বোজ্ঝঙ্গা, অনাসৰপটিসম্ভিদায ৰসীভাৰট্ঠেন বোজ্ঝঙ্গা, অনাসৰপটিসম্ভিদায ৰসীভাৰপ্পত্তানম্পি বোজ্ঝঙ্গা.

ৰিৰেকট্ঠেন বোজ্ঝঙ্গা, ৰিৰেকচরিযট্ঠেন বোজ্ঝঙ্গা, ৰিৰেকপরিগ্গহট্ঠেন বোজ্ঝঙ্গা, ৰিৰেকপরিৰারট্ঠেন বোজ্ঝঙ্গা, ৰিৰেকপরিপূরণট্ঠেন বোজ্ঝঙ্গা, ৰিৰেকপরিপাকট্ঠেন বোজ্ঝঙ্গা, ৰিৰেকপটিসম্ভিদট্ঠেন বোজ্ঝঙ্গা, ৰিৰেকপটিসম্ভিদাপাপনট্ঠেন বোজ্ঝঙ্গা, ৰিৰেকপটিসম্ভিদায ৰসীভাৰট্ঠেন বোজ্ঝঙ্গা, ৰিৰেকপটিসম্ভিদায ৰসীভাৰপ্পত্তানম্পি বোজ্ঝঙ্গা.

ৰোসগ্গট্ঠেন বোজ্ঝঙ্গা, ৰোসগ্গচরিযট্ঠেন বোজ্ঝঙ্গা, ৰোসগ্গপরিগ্গহট্ঠেন বোজ্ঝঙ্গা, ৰোসগ্গপরিৰারট্ঠেন বোজ্ঝঙ্গা, ৰোসগ্গপরিপূরণট্ঠেন বোজ্ঝঙ্গা, ৰোসগ্গপরিপাকট্ঠেন বোজ্ঝঙ্গা, ৰোসগ্গপটিসম্ভিদট্ঠেন বোজ্ঝঙ্গা, ৰোসগ্গপটিসম্ভিদাপাপনট্ঠেন বোজ্ঝঙ্গা, ৰোসগ্গপটিসম্ভিদায ৰসীভাৰট্ঠেন বোজ্ঝঙ্গা, ৰোসগ্গপটিসম্ভিদায ৰসীভাৰপ্পত্তানম্পি বোজ্ঝঙ্গা.

১৯. মূলট্ঠং বুজ্ঝন্তীতি – বোজ্ঝঙ্গা. হেতুট্ঠং বুজ্ঝন্তীতি – বোজ্ঝঙ্গা. পচ্চযট্ঠং বুজ্ঝন্তীতি – বোজ্ঝঙ্গা. ৰিসুদ্ধট্ঠং বুজ্ঝন্তীতি – বোজ্ঝঙ্গা. অনৰজ্জট্ঠং বুজ্ঝন্তীতি – বোজ্ঝঙ্গা. নেক্খম্মট্ঠং বুজ্ঝন্তীতি – বোজ্ঝঙ্গা. ৰিমুত্তট্ঠং বুজ্ঝন্তীতি – বোজ্ঝঙ্গা. অনাসৰট্ঠং বুজ্ঝন্তীতি – বোজ্ঝঙ্গা. ৰিৰেকট্ঠং বুজ্ঝন্তীতি – বোজ্ঝঙ্গা. ৰোসগ্গট্ঠং বুজ্ঝন্তীতি – বোজ্ঝঙ্গা.

মূলচরিযট্ঠং বুজ্ঝন্তীতি – বোজ্ঝঙ্গা. হেতুচরিযট্ঠং বুজ্ঝন্তীতি – বোজ্ঝঙ্গা. পচ্চযচরিযট্ঠং বুজ্ঝন্তীতি – বোজ্ঝঙ্গা. ৰিসুদ্ধিচরিযট্ঠং বুজ্ঝন্তীতি – বোজ্ঝঙ্গা. অনৰজ্জচরিযট্ঠং বুজ্ঝন্তীতি – বোজ্ঝঙ্গা. নেক্খম্মচরিযট্ঠং বুজ্ঝন্তীতি – বোজ্ঝঙ্গা. ৰিমুত্তিচরিযট্ঠং বুজ্ঝন্তীতি – বোজ্ঝঙ্গা. অনাসৰচরিযট্ঠং বুজ্ঝন্তীতি – বোজ্ঝঙ্গা. ৰিৰেকচরিযট্ঠং বুজ্ঝন্তীতি – বোজ্ঝঙ্গা. ৰোসগ্গচরিযট্ঠং বুজ্ঝন্তীতি – বোজ্ঝঙ্গা.

মূলপরিগ্গহট্ঠং বুজ্ঝন্তীতি – বোজ্ঝঙ্গা…পে… ৰোসগ্গপরিগ্গহট্ঠং বুজ্ঝন্তীতি – বোজ্ঝঙ্গা. মূলপরিৰারট্ঠং বুজ্ঝন্তীতি – বোজ্ঝঙ্গা…পে… ৰোসগ্গপরিৰারট্ঠং বুজ্ঝন্তীতি – বোজ্ঝঙ্গা. মূলপরিপূরণট্ঠং বুজ্ঝন্তীতি – বোজ্ঝঙ্গা…পে… ৰোসগ্গপরিপূরট্ঠং বুজ্ঝন্তীতি – বোজ্ঝঙ্গা. মূলপরিপাকট্ঠং বুজ্ঝন্তীতি – বোজ্ঝঙ্গা…পে… ৰোসগ্গপরিপাকট্ঠং বুজ্ঝন্তীতি – বোজ্ঝঙ্গা. মূলপটিসম্ভিদট্ঠং বুজ্ঝন্তীতি – বোজ্ঝঙ্গা…পে… ৰোসগ্গপটিসম্ভিদট্ঠং বুজ্ঝন্তীতি – বোজ্ঝঙ্গা. মূলপটিসম্ভিদাপাপনট্ঠং বুজ্ঝন্তীতি – বোজ্ঝঙ্গা…পে… ৰোসগ্গপটিসম্ভিদাপাপনট্ঠং বুজ্ঝন্তীতি – বোজ্ঝঙ্গা. মূলপটিসম্ভিদায ৰসীভাৰট্ঠং বুজ্ঝন্তীতি – বোজ্ঝঙ্গা…পে… ৰোসগ্গপটিসম্ভিদায ৰসীভাৰট্ঠং বুজ্ঝন্তীতি – বোজ্ঝঙ্গা…পে….

পরিগ্গহট্ঠং বুজ্ঝন্তীতি – বোজ্ঝঙ্গা. পরিৰারট্ঠং বুজ্ঝন্তীতি – বোজ্ঝঙ্গা. পরিপূরণট্ঠং বুজ্ঝন্তীতি – বোজ্ঝঙ্গা. একগ্গট্ঠং বুজ্ঝন্তীতি – বোজ্ঝঙ্গা. অৰিক্খেপট্ঠং বুজ্ঝন্তীতি – বোজ্ঝঙ্গা. পগ্গহট্ঠং বুজ্ঝন্তীতি – বোজ্ঝঙ্গা. অৰিসারট্ঠং বুজ্ঝন্তীতি – বোজ্ঝঙ্গা. অনাৰিলট্ঠং বুজ্ঝন্তীতি – বোজ্ঝঙ্গা. অনিঞ্জনট্ঠং বুজ্ঝন্তীতি – বোজ্ঝঙ্গা. একত্তুপট্ঠানৰসেন চিত্তস্স ঠিতট্ঠং বুজ্ঝন্তীতি – বোজ্ঝঙ্গা. আরম্মণট্ঠং বুজ্ঝন্তীতি – বোজ্ঝঙ্গা. গোচরট্ঠং বুজ্ঝন্তীতি – বোজ্ঝঙ্গা. পহানট্ঠং বুজ্ঝন্তীতি – বোজ্ঝঙ্গা. পরিচ্চাগট্ঠং বুজ্ঝন্তীতি – বোজ্ঝঙ্গা. ৰুট্ঠানট্ঠং বুজ্ঝন্তীতি – বোজ্ঝঙ্গা. ৰিৰট্টনট্ঠং বুজ্ঝন্তীতি – বোজ্ঝঙ্গা. সন্তট্ঠং বুজ্ঝন্তীতি – বোজ্ঝঙ্গা. পণীতট্ঠং বুজ্ঝন্তীতি – বোজ্ঝঙ্গা. ৰিমুত্তট্ঠং বুজ্ঝন্তীতি – বোজ্ঝঙ্গা. অনাসৰট্ঠং বুজ্ঝন্তীতি – বোজ্ঝঙ্গা. তরণট্ঠং বুজ্ঝন্তীতি – বোজ্ঝঙ্গা. অনিমিত্তট্ঠং বুজ্ঝন্তীতি – বোজ্ঝঙ্গা. অপ্পণিহিতট্ঠং বুজ্ঝন্তীতি – বোজ্ঝঙ্গা. সুঞ্ঞতট্ঠং বুজ্ঝন্তীতি – বোজ্ঝঙ্গা. একরসট্ঠং বুজ্ঝন্তীতি – বোজ্ঝঙ্গা. অনতিৰত্তনট্ঠং বুজ্ঝন্তীতি – বোজ্ঝঙ্গা. যুগনদ্ধট্ঠং বুজ্ঝন্তীতি – বোজ্ঝঙ্গা. নিয্যানট্ঠং বুজ্ঝন্তীতি – বোজ্ঝঙ্গা. হেতুট্ঠং বুজ্ঝন্তীতি – বোজ্ঝঙ্গা. দস্সনট্ঠং বুজ্ঝন্তীতি – বোজ্ঝঙ্গা. আধিপতেয্যট্ঠং বুজ্ঝন্তীতি – বোজ্ঝঙ্গা.

সমথস্স অৰিক্খেপট্ঠং বুজ্ঝন্তীতি – বোজ্ঝঙ্গা. ৰিপস্সনায অনুপস্সনট্ঠং বুজ্ঝন্তীতি – বোজ্ঝঙ্গা. সমথৰিপস্সনানং একরসট্ঠং বুজ্ঝন্তীতি – বোজ্ঝঙ্গা. যুগনদ্ধস্স অনতিৰত্তনট্ঠং বুজ্ঝন্তীতি – বোজ্ঝঙ্গা. সিক্খায সমাদানট্ঠং বুজ্ঝন্তীতি – বোজ্ঝঙ্গা. আরম্মণস্স গোচরট্ঠং বুজ্ঝন্তীতি – বোজ্ঝঙ্গা. লীনস্স চিত্তস্স পগ্গহট্ঠং বুজ্ঝন্তীতি – বোজ্ঝঙ্গা. উদ্ধতস্স চিত্তস্স নিগ্গহট্ঠং বুজ্ঝন্তীতি – বোজ্ঝঙ্গা. উভোৰিসুদ্ধানং অজ্ঝুপেক্খনট্ঠং বুজ্ঝন্তীতি – বোজ্ঝঙ্গা. ৰিসেসাধিগমট্ঠং বুজ্ঝন্তীতি – বোজ্ঝঙ্গা. উত্তরি পটিৰেধট্ঠং বুজ্ঝন্তীতি – বোজ্ঝঙ্গা. সচ্চাভিসমযট্ঠং বুজ্ঝন্তীতি – বোজ্ঝঙ্গা. নিরোধে পতিট্ঠাপকট্ঠং বুজ্ঝন্তীতি – বোজ্ঝঙ্গা.

সদ্ধিন্দ্রিযস্স অধিমোক্খট্ঠং বুজ্ঝন্তীতি – বোজ্ঝঙ্গা…পে… পঞ্ঞিন্দ্রিযস্স দস্সনট্ঠং বুজ্ঝন্তীতি – বোজ্ঝঙ্গা. সদ্ধাবলস্স অস্সদ্ধিযে অকম্পিযট্ঠং বুজ্ঝন্তীতি – বোজ্ঝঙ্গা…পে… পঞ্ঞাবলস্স অৰিজ্জায অকম্পিযট্ঠং বুজ্ঝন্তীতি – বোজ্ঝঙ্গা. সতিসম্বোজ্ঝঙ্গস্স উপট্ঠানট্ঠং বুজ্ঝন্তীতি – বোজ্ঝঙ্গা…পে… উপেক্খাসম্বোজ্ঝঙ্গস্স পটিসঙ্খানট্ঠং বুজ্ঝন্তীতি – বোজ্ঝঙ্গা. সম্মাদিট্ঠিযা দস্সনট্ঠং বুজ্ঝন্তীতি – বোজ্ঝঙ্গা…পে… সম্মাসমাধিস্স অৰিক্খেপট্ঠং বুজ্ঝন্তীতি – বোজ্ঝঙ্গা.

ইন্দ্রিযানং আধিপতেয্যট্ঠং বুজ্ঝন্তীতি – বোজ্ঝঙ্গা. বলানং অকম্পিযট্ঠং বুজ্ঝন্তীতি – বোজ্ঝঙ্গা. নিয্যানট্ঠং বুজ্ঝন্তীতি – বোজ্ঝঙ্গা. মগ্গস্স হেতুট্ঠং বুজ্ঝন্তীতি – বোজ্ঝঙ্গা. সতিপট্ঠানানং উপট্ঠানট্ঠং বুজ্ঝন্তীতি – বোজ্ঝঙ্গা. সম্মপ্পধানানং পদহনট্ঠং বুজ্ঝন্তীতি – বোজ্ঝঙ্গা. ইদ্ধিপাদানং ইজ্ঝনট্ঠং বুজ্ঝন্তীতি – বোজ্ঝঙ্গা. সচ্চানং তথট্ঠং বুজ্ঝন্তীতি – বোজ্ঝঙ্গা. পযোগানং পটিপ্পস্সদ্ধট্ঠং বুজ্ঝন্তীতি – বোজ্ঝঙ্গা. ফলানং সচ্ছিকিরিযট্ঠং বুজ্ঝন্তীতি – বোজ্ঝঙ্গা.

ৰিতক্কস্স অভিনিরোপনট্ঠং বুজ্ঝন্তীতি – বোজ্ঝঙ্গা. ৰিচারস্স উপৰিচারট্ঠং বুজ্ঝন্তীতি – বোজ্ঝঙ্গা. পীতিযা ফরণট্ঠং বুজ্ঝন্তীতি – বোজ্ঝঙ্গা. সুখস্স অভিসন্দনট্ঠং বুজ্ঝন্তীতি – বোজ্ঝঙ্গা. চিত্তস্স একগ্গট্ঠং বুজ্ঝন্তীতি – বোজ্ঝঙ্গা.

আৰজ্জনট্ঠং বুজ্ঝন্তীতি – বোজ্ঝঙ্গা. ৰিজাননট্ঠং বুজ্ঝন্তীতি – বোজ্ঝঙ্গা. পজাননট্ঠং বুজ্ঝন্তীতি – বোজ্ঝঙ্গা. সঞ্জাননট্ঠং বুজ্ঝন্তীতি – বোজ্ঝঙ্গা. একোদট্ঠং বুজ্ঝন্তীতি – বোজ্ঝঙ্গা. অভিঞ্ঞায ঞাতট্ঠং [অভিঞ্ঞেয্যত্থং (স্যা.)] বুজ্ঝন্তীতি – বোজ্ঝঙ্গা. পরিঞ্ঞায তীরণট্ঠং বুজ্ঝন্তীতি – বোজ্ঝঙ্গা. পহানস্স পরিচ্চাগট্ঠং বুজ্ঝন্তীতি – বোজ্ঝঙ্গা. ভাৰনায একরসট্ঠং বুজ্ঝন্তীতি – বোজ্ঝঙ্গা. সচ্ছিকিরিযায ফস্সনট্ঠং বুজ্ঝন্তীতি – বোজ্ঝঙ্গা. খন্ধানং খন্ধট্ঠং বুজ্ঝন্তীতি – বোজ্ঝঙ্গা. ধাতূনং ধাতুট্ঠং বুজ্ঝন্তীতি – বোজ্ঝঙ্গা. আযতনানং আযতনট্ঠং বুজ্ঝন্তীতি – বোজ্ঝঙ্গা. সঙ্খতানং সঙ্খতট্ঠং বুজ্ঝন্তীতি – বোজ্ঝঙ্গা. অসঙ্খতস্স অসঙ্খতট্ঠং বুজ্ঝন্তীতি – বোজ্ঝঙ্গা.

চিত্তট্ঠং বুজ্ঝন্তীতি – বোজ্ঝঙ্গা. চিত্তানন্তরিযট্ঠং বুজ্ঝন্তীতি – বোজ্ঝঙ্গা. চিত্তস্স ৰুট্ঠানট্ঠং বুজ্ঝন্তীতি – বোজ্ঝঙ্গা. চিত্তস্স ৰিৰট্টনট্ঠং [ৰিৰজ্জনট্ঠং (স্যা.)] বুজ্ঝন্তীতি – বোজ্ঝঙ্গা. চিত্তস্স হেতুট্ঠং বুজ্ঝন্তীতি – বোজ্ঝঙ্গা. চিত্তস্স পচ্চযট্ঠং বুজ্ঝন্তীতি – বোজ্ঝঙ্গা. চিত্তস্স ৰত্থুট্ঠং বুজ্ঝন্তীতি – বোজ্ঝঙ্গা. চিত্তস্স ভূমট্ঠং [ভুম্মট্ঠং (স্যা.) পটি. ম. ১.১৪ পস্সিতব্বা] বুজ্ঝন্তীতি – বোজ্ঝঙ্গা. চিত্তস্স আরম্মণট্ঠং বুজ্ঝন্তীতি – বোজ্ঝঙ্গা. চিত্তস্স গোচরট্ঠং বুজ্ঝন্তীতি – বোজ্ঝঙ্গা. চিত্তস্স চরিযট্ঠং বুজ্ঝন্তীতি – বোজ্ঝঙ্গা. চিত্তস্স গতট্ঠং বুজ্ঝন্তীতি – বোজ্ঝঙ্গা. চিত্তস্স অভিনীহারট্ঠং বুজ্ঝন্তীতি – বোজ্ঝঙ্গা. চিত্তস্স নিয্যানট্ঠং বুজ্ঝন্তীতি – বোজ্ঝঙ্গা. চিত্তস্স নিস্সরণট্ঠং বুজ্ঝন্তীতি – বোজ্ঝঙ্গা.

একত্তে আৰজ্জনট্ঠং বুজ্ঝন্তীতি – বোজ্ঝঙ্গা. একত্তে ৰিজাননট্ঠং বুজ্ঝন্তীতি – বোজ্ঝঙ্গা. একত্তে পজাননট্ঠং বুজ্ঝন্তীতি – বোজ্ঝঙ্গা. একত্তে সঞ্জাননট্ঠং বুজ্ঝন্তীতি – বোজ্ঝঙ্গা. একত্তে একোদট্ঠং বুজ্ঝন্তীতি – বোজ্ঝঙ্গা. ( ) [(একত্তে উপনিবন্ধনট্ঠং বুজ্ঝন্তীতি – বোজ্ঝঙ্গা) (সব্বত্থ)]. একত্তে পক্খন্দনট্ঠং বুজ্ঝন্তীতি – বোজ্ঝঙ্গা. একত্তে পসীদনট্ঠং বুজ্ঝন্তীতি – বোজ্ঝঙ্গা. একত্তে সন্তিট্ঠনট্ঠং বুজ্ঝন্তীতি – বোজ্ঝঙ্গা. একত্তে ৰিমুচ্চনট্ঠং বুজ্ঝন্তীতি – বোজ্ঝঙ্গা. একত্তে এতং সন্তন্তি পস্সনট্ঠং বুজ্ঝন্তীতি – বোজ্ঝঙ্গা. একত্তে যানীকতট্ঠং বুজ্ঝন্তীতি – বোজ্ঝঙ্গা. একত্তে ৰত্থুকতট্ঠং বুজ্ঝন্তীতি – বোজ্ঝঙ্গা. একত্তে অনুট্ঠিতট্ঠং বুজ্ঝন্তীতি – বোজ্ঝঙ্গা. একত্তে পরিচিতট্ঠং বুজ্ঝন্তীতি – বোজ্ঝঙ্গা. একত্তে সুসমারদ্ধট্ঠং বুজ্ঝন্তীতি – বোজ্ঝঙ্গা. একত্তে পরিগ্গহট্ঠং বুজ্ঝন্তীতি – বোজ্ঝঙ্গা. একত্তে পরিৰারট্ঠং বুজ্ঝন্তীতি – বোজ্ঝঙ্গা. একত্তে পরিপূরণট্ঠং বুজ্ঝন্তীতি – বোজ্ঝঙ্গা. একত্তে সমোধানট্ঠং বুজ্ঝন্তীতি – বোজ্ঝঙ্গা. একত্তে অধিট্ঠানট্ঠং বুজ্ঝন্তীতি – বোজ্ঝঙ্গা. একত্তে আসেৰনট্ঠং বুজ্ঝন্তীতি – বোজ্ঝঙ্গা. একত্তে ভাৰনট্ঠং বুজ্ঝন্তীতি – বোজ্ঝঙ্গা. একত্তে বহুলীকম্মট্ঠং বুজ্ঝন্তীতি – বোজ্ঝঙ্গা. একত্তে সুসমুগ্গতট্ঠং বুজ্ঝন্তীতি – বোজ্ঝঙ্গা. একত্তে সুৰিমুত্তট্ঠং বুজ্ঝন্তীতি – বোজ্ঝঙ্গা. একত্তে বুজ্ঝনট্ঠং বুজ্ঝন্তীতি – বোজ্ঝঙ্গা. একত্তে অনুবুজ্ঝনট্ঠং বুজ্ঝন্তীতি – বোজ্ঝঙ্গা. একত্তে পটিবুজ্ঝনট্ঠং বুজ্ঝন্তীতি – বোজ্ঝঙ্গা. একত্তে সম্বুজ্ঝনট্ঠং বুজ্ঝন্তীতি – বোজ্ঝঙ্গা. একত্তে বোধনট্ঠং বুজ্ঝন্তীতি – বোজ্ঝঙ্গা. একত্তে অনুবোধনট্ঠং বুজ্ঝন্তীতি – বোজ্ঝঙ্গা. একত্তে পটিবোধনট্ঠং বুজ্ঝন্তীতি – বোজ্ঝঙ্গা. একত্তে সম্বুজ্ঝনট্ঠং বুজ্ঝন্তীতি – বোজ্ঝঙ্গা. একত্তে বোধিপক্খিযট্ঠং বুজ্ঝন্তীতি – বোজ্ঝঙ্গা. একত্তে অনুবোধিপক্খিযট্ঠং বুজ্ঝন্তীতি – বোজ্ঝঙ্গা. একত্তে পটিবোধিপক্খিযট্ঠং বুজ্ঝন্তীতি – বোজ্ঝঙ্গা. একত্তে সম্বোধিপক্খিযট্ঠং বুজ্ঝন্তীতি – বোজ্ঝঙ্গা. একত্তে জোতনট্ঠং বুজ্ঝন্তীতি – বোজ্ঝঙ্গা. একত্তে উজ্জোতনট্ঠং বুজ্ঝন্তীতি – বোজ্ঝঙ্গা. একত্তে অনুজোতনট্ঠং বুজ্ঝন্তীতি – বোজ্ঝঙ্গা. একত্তে পটিজোতনট্ঠং বুজ্ঝন্তীতি – বোজ্ঝঙ্গা. একত্তে সঞ্জোতনট্ঠং বুজ্ঝন্তীতি – বোজ্ঝঙ্গা.

পতাপনট্ঠং বুজ্ঝন্তীতি – বোজ্ঝঙ্গা. ৰিরোচনট্ঠং বুজ্ঝন্তীতি – বোজ্ঝঙ্গা. কিলেসানং সন্তাপনট্ঠং বুজ্ঝন্তীতি – বোজ্ঝঙ্গা. অমলট্ঠং বুজ্ঝন্তীতি – বোজ্ঝঙ্গা. ৰিমলট্ঠং বুজ্ঝন্তীতি – বোজ্ঝঙ্গা. নিম্মলট্ঠং বুজ্ঝন্তীতি – বোজ্ঝঙ্গা. সমট্ঠং বুজ্ঝন্তীতি – বোজ্ঝঙ্গা. সমযট্ঠং বুজ্ঝন্তীতি – বোজ্ঝঙ্গা. ৰিৰেকট্ঠং বুজ্ঝন্তীতি – বোজ্ঝঙ্গা. ৰিৰেকচরিযট্ঠং বুজ্ঝন্তীতি – বোজ্ঝঙ্গা. ৰিরাগট্ঠং বুজ্ঝন্তীতি – বোজ্ঝঙ্গা. ৰিরাগচরিযট্ঠং বুজ্ঝন্তীতি – বোজ্ঝঙ্গা. নিরোধট্ঠং বুজ্ঝন্তীতি – বোজ্ঝঙ্গা. নিরোধচরিযট্ঠং বুজ্ঝন্তীতি – বোজ্ঝঙ্গা. ৰোসগ্গট্ঠং বুজ্ঝন্তীতি – বোজ্ঝঙ্গা. ৰোসগ্গচরিযট্ঠং বুজ্ঝন্তীতি – বোজ্ঝঙ্গা. ৰিমুত্তট্ঠং বুজ্ঝন্তীতি – বোজ্ঝঙ্গা. ৰিমুত্তিচরিযট্ঠং বুজ্ঝন্তীতি – বোজ্ঝঙ্গা.

ছন্দট্ঠং বুজ্ঝন্তীতি – বোজ্ঝঙ্গা. ছন্দস্স মূলট্ঠং বুজ্ঝন্তীতি – বোজ্ঝঙ্গা. ছন্দস্স পাদট্ঠং বুজ্ঝন্তীতি – বোজ্ঝঙ্গা. ছন্দস্স পধানট্ঠং বুজ্ঝন্তীতি – বোজ্ঝঙ্গা. ছন্দস্স ইজ্ঝনট্ঠং বুজ্ঝন্তীতি – বোজ্ঝঙ্গা. ছন্দস্স অধিমোক্খট্ঠং বুজ্ঝন্তীতি – বোজ্ঝঙ্গা. ছন্দস্স পগ্গহট্ঠং বুজ্ঝন্তীতি – বোজ্ঝঙ্গা. ছন্দস্স উপট্ঠানট্ঠং বুজ্ঝন্তীতি – বোজ্ঝঙ্গা. ছন্দস্স অৰিক্খেপট্ঠং বুজ্ঝন্তীতি – বোজ্ঝঙ্গা. ছন্দস্স দস্সনট্ঠং বুজ্ঝন্তীতি – বোজ্ঝঙ্গা.

ৰীরিযট্ঠং বুজ্ঝন্তীতি – বোজ্ঝঙ্গা…পে… চিত্তট্ঠং বুজ্ঝন্তীতি – বোজ্ঝঙ্গা…পে… ৰীমংসট্ঠং বুজ্ঝন্তীতি – বোজ্ঝঙ্গা. ৰীমংসায মূলট্ঠং বুজ্ঝন্তীতি – বোজ্ঝঙ্গা. ৰীমংসায পাদট্ঠং বুজ্ঝন্তীতি – বোজ্ঝঙ্গা. ৰীমংসায পধানট্ঠং বুজ্ঝন্তীতি – বোজ্ঝঙ্গা. ৰীমংসায ইজ্ঝনট্ঠং বুজ্ঝন্তীতি – বোজ্ঝঙ্গা. ৰীমংসায অধিমোক্খট্ঠং বুজ্ঝন্তীতি – বোজ্ঝঙ্গা. ৰীমংসায পগ্গহট্ঠং বুজ্ঝন্তীতি – বোজ্ঝঙ্গা. ৰীমংসায উপট্ঠানট্ঠং বুজ্ঝন্তীতি – বোজ্ঝঙ্গা. ৰীমংসায অৰিক্খেপট্ঠং বুজ্ঝন্তীতি – বোজ্ঝঙ্গা. ৰীমংসায দস্সনট্ঠং বুজ্ঝন্তীতি – বোজ্ঝঙ্গা.

দুক্খট্ঠং বুজ্ঝন্তীতি – বোজ্ঝঙ্গা. দুক্খস্স পীল়নট্ঠং বুজ্ঝন্তীতি – বোজ্ঝঙ্গা. দুক্খস্স সঙ্খতট্ঠং বুজ্ঝন্তীতি – বোজ্ঝঙ্গা. দুক্খস্স সন্তাপট্ঠং বুজ্ঝন্তীতি – বোজ্ঝঙ্গা. দুক্খস্স ৰিপরিণামট্ঠং বুজ্ঝন্তীতি – বোজ্ঝঙ্গা. সমুদযট্ঠং বুজ্ঝন্তীতি – বোজ্ঝঙ্গা. সমুদযস্স আযূহনট্ঠং নিদানট্ঠং সঞ্ঞোগট্ঠং পলিবোধট্ঠং বুজ্ঝন্তীতি – বোজ্ঝঙ্গা. নিরোধট্ঠং বুজ্ঝন্তীতি – বোজ্ঝঙ্গা. নিরোধস্স নিস্সরণট্ঠং ৰিৰেকট্ঠং অসঙ্খতট্ঠং অমতট্ঠং বুজ্ঝন্তীতি – বোজ্ঝঙ্গা. মগ্গট্ঠং বুজ্ঝন্তীতি – বোজ্ঝঙ্গা. মগ্গস্স নিয্যানট্ঠং হেতুট্ঠং দস্সনট্ঠং আধিপতেয্যট্ঠং বুজ্ঝন্তীতি – বোজ্ঝঙ্গা.

তথট্ঠং বুজ্ঝন্তীতি – বোজ্ঝঙ্গা. অনত্তট্ঠং বুজ্ঝন্তীতি – বোজ্ঝঙ্গা. সচ্চট্ঠং বুজ্ঝন্তীতি – বোজ্ঝঙ্গা. পটিৰেধট্ঠং বুজ্ঝন্তীতি – বোজ্ঝঙ্গা. অভিজাননট্ঠং বুজ্ঝন্তীতি – বোজ্ঝঙ্গা. পরিজাননট্ঠং বুজ্ঝন্তীতি – বোজ্ঝঙ্গা. ধম্মট্ঠং বুজ্ঝন্তীতি – বোজ্ঝঙ্গা. ধাতুট্ঠং বুজ্ঝন্তীতি – বোজ্ঝঙ্গা. ঞাতট্ঠং বুজ্ঝন্তীতি – বোজ্ঝঙ্গা. সচ্ছিকিরিযট্ঠং বুজ্ঝন্তীতি – বোজ্ঝঙ্গা. ফস্সনট্ঠং বুজ্ঝন্তীতি – বোজ্ঝঙ্গা. অভিসমযট্ঠং বুজ্ঝন্তীতি – বোজ্ঝঙ্গা.

নেক্খম্মং বুজ্ঝন্তীতি – বোজ্ঝঙ্গা. অব্যাপাদং বুজ্ঝন্তীতি – বোজ্ঝঙ্গা. আলোকসঞ্ঞং বুজ্ঝন্তীতি – বোজ্ঝঙ্গা. অৰিক্খেপং বুজ্ঝন্তীতি – বোজ্ঝঙ্গা. ধম্মৰৰত্থানং বুজ্ঝন্তীতি – বোজ্ঝঙ্গা. ঞাণং বুজ্ঝন্তীতি – বোজ্ঝঙ্গা. পামোজ্জং বুজ্ঝন্তীতি – বোজ্ঝঙ্গা. পঠমং ঝানং বুজ্ঝন্তীতি – বোজ্ঝঙ্গা…পে… অরহত্তমগ্গং বুজ্ঝন্তীতি – বোজ্ঝঙ্গা. অরহত্তফলসমাপত্তিং বুজ্ঝন্তীতি – বোজ্ঝঙ্গা.

অধিমোক্খট্ঠেন সদ্ধিন্দ্রিযং বুজ্ঝন্তীতি – বোজ্ঝঙ্গা…পে… দস্সনট্ঠেন পঞ্ঞিন্দ্রিযং বুজ্ঝন্তীতি – বোজ্ঝঙ্গা. অস্সদ্ধিযে অকম্পিযট্ঠেন সদ্ধাবলং বুজ্ঝন্তীতি – বোজ্ঝঙ্গা…পে… অৰিজ্জায অকম্পিযট্ঠেন পঞ্ঞাবলং বুজ্ঝন্তীতি – বোজ্ঝঙ্গা. উপট্ঠানট্ঠেন সতিসম্বোজ্ঝঙ্গং বুজ্ঝন্তীতি – বোজ্ঝঙ্গা…পে… পটিসঙ্খানট্ঠেন উপেক্খাসম্বোজ্ঝঙ্গং বুজ্ঝন্তীতি – বোজ্ঝঙ্গা.

দস্সনট্ঠেন সম্মাদিট্ঠিং বুজ্ঝন্তীতি – বোজ্ঝঙ্গা…পে… অৰিক্খেপট্ঠেন সম্মাসমাধিং বুজ্ঝন্তীতি – বোজ্ঝঙ্গা. আধিপতেয্যট্ঠেন ইন্দ্রিযং বুজ্ঝন্তীতি – বোজ্ঝঙ্গা. অকম্পিযট্ঠেন বলং বুজ্ঝন্তীতি – বোজ্ঝঙ্গা. নিয্যানট্ঠং বুজ্ঝন্তীতি – বোজ্ঝঙ্গা. হেতুট্ঠেন মগ্গং বুজ্ঝন্তীতি – বোজ্ঝঙ্গা. উপট্ঠানট্ঠেন সতিপট্ঠানং বুজ্ঝন্তীতি – বোজ্ঝঙ্গা. পদহনট্ঠেন সম্মপ্পধানং বুজ্ঝন্তীতি – বোজ্ঝঙ্গা. ইজ্ঝনট্ঠেন ইদ্ধিপাদং বুজ্ঝন্তীতি – বোজ্ঝঙ্গা. তথট্ঠেন সচ্চং বুজ্ঝন্তীতি – বোজ্ঝঙ্গা. অৰিক্খেপট্ঠেন সমথং বুজ্ঝন্তীতি – বোজ্ঝঙ্গা. অনুপস্সনট্ঠে ৰিপস্সনং …পে… একরসট্ঠেন সমথৰিপস্সনং বুজ্ঝন্তীতি – বোজ্ঝঙ্গা. অনতিৰত্তনট্ঠেন যুগনদ্ধং বুজ্ঝন্তীতি – বোজ্ঝঙ্গা. সংৰরট্ঠেন সীলৰিসুদ্ধিং বুজ্ঝন্তীতি – বোজ্ঝঙ্গা. অৰিক্খেপট্ঠেন চিত্তৰিসুদ্ধিং বুজ্ঝন্তীতি – বোজ্ঝঙ্গা. দস্সনট্ঠেন দিট্ঠিৰিসুদ্ধিং বুজ্ঝন্তীতি – বোজ্ঝঙ্গা. মুত্তট্ঠেন ৰিমোক্খং বুজ্ঝন্তীতি – বোজ্ঝঙ্গা. পটিৰেধট্ঠেন ৰিজ্জং বুজ্ঝন্তীতি – বোজ্ঝঙ্গা. পরিচ্চাগট্ঠেন ৰিমুত্তিং বুজ্ঝন্তীতি – বোজ্ঝঙ্গা. সমুচ্ছেদট্ঠেন খযে ঞাণং বুজ্ঝন্তীতি – বোজ্ঝঙ্গা. পটিপ্পস্সদ্ধট্ঠেন অনুপ্পাদে ঞাণং বুজ্ঝন্তীতি – বোজ্ঝঙ্গা.

ছন্দং মূলট্ঠেন বুজ্ঝন্তীতি – বোজ্ঝঙ্গা. মনসিকারং সমুট্ঠানট্ঠেন বুজ্ঝন্তীতি – বোজ্ঝঙ্গা. ফস্সং সমোধানট্ঠেন বুজ্ঝন্তীতি – বোজ্ঝঙ্গা. ৰেদনং সমোসরণট্ঠেন বুজ্ঝন্তীতি – বোজ্ঝঙ্গা. সমাধিং পমুখট্ঠেন বুজ্ঝন্তীতি – বোজ্ঝঙ্গা. সতিং আধিপতেয্যট্ঠেন বুজ্ঝন্তীতি – বোজ্ঝঙ্গা. পঞ্ঞং ততুত্তরট্ঠেন বুজ্ঝন্তীতি – বোজ্ঝঙ্গা. ৰিমুত্তিং সারট্ঠেন বুজ্ঝন্তীতি – বোজ্ঝঙ্গা. অমতোগধং নিব্বানং পরিযোসানট্ঠেন বুজ্ঝন্তীতি – বোজ্ঝঙ্গা.

২০. সাৰত্থিনিদানং. তত্র খো আযস্মা সারিপুত্তো ভিক্খূ আমন্তেসি – ‘‘আৰুসো ভিক্খৰো’’তি [আৰুসোতি (স্যা.) সং. নি. ৫.১৮৫ পস্সিতব্বা]. ‘‘আৰুসো’’তি খো তে ভিক্খূ আযস্মতো সারিপুত্তস্স পচ্চস্সোসুং. আযস্মা সারিপুত্তো এতদৰোচ –

‘‘সত্তিমে, আৰুসো, বোজ্ঝঙ্গা. কতমে সত্ত? সতিসম্বোজ্ঝঙ্গো, ধম্মৰিচযসম্বোজ্ঝঙ্গো…পে… উপেক্খাসম্বোজ্ঝঙ্গো – ইমে খো, আৰুসো, সত্ত বোজ্ঝঙ্গা. ইমেসং খ্ৰাহং, আৰুসো, সত্তন্নং বোজ্ঝঙ্গানং যেন যেন বোজ্ঝঙ্গেন আকঙ্খামি পুব্বণ্হসমযং ৰিহরিতুং, তেন তেন বোজ্ঝঙ্গেন পুব্বণ্হসমযং ৰিহরামি. যেন যেন বোজ্ঝঙ্গেন আকঙ্খামি মজ্ঝন্হিকসমযং…পে… সাযন্হসমযং ৰিহরিতুং, তেন তেন বোজ্ঝঙ্গেন সাযন্হসমযং ৰিহরামি. সতিসম্বোজ্ঝঙ্গো ইতি চে মে, ‘আৰুসো, হোতি, অপ্পমাণো’তি মে হোতি, ‘সুসমারদ্ধো’তি মে হোতি. তিট্ঠন্তঞ্চ নং [তিট্ঠন্তং চরং (স্যা.) সং. নি. ৫.১৮৫ পস্সিতব্বা] ‘তিট্ঠতী’তি পজানামি. সচেপি মে চৰতি, ‘ইদপ্পচ্চযা মে চৰতী’তি পজানামি. ধম্মৰিচযসম্বোজ্ঝঙ্গো…পে… উপেক্খাসম্বোজ্ঝঙ্গো ইতি চে মে, আৰুসো, হোতি, ‘অপ্পমাণো’তি মে হোতি, ‘সুসমারদ্ধো’তি মে হোতি. তিট্ঠন্তঞ্চ নং ‘তিট্ঠতী’তি পজানামি. সচেপি মে চৰতি, ‘ইদপ্পচ্চযা মে চৰতী’তি পজানামি.

‘‘সেয্যথাপি, আৰুসো, রঞ্ঞো ৰা রাজমহামত্তস্স ৰা নানারত্তানং দুস্সানং দুস্সকরণ্ডকো পূরো অস্স. সো যঞ্ঞদেৰ দুস্সযুগং আকঙ্খেয্য পুব্বণ্হসমযং পারুপিতুং, তং তদেৰ দুস্সযুগং পুব্বণ্হসমযং পারুপেয্য. যঞ্ঞদেৰ দুস্সযুগং আকঙ্খেয্য মজ্ঝন্হিকসমযং…পে… সাযন্হসমযং পারুপিতুং, তং তদেৰ দুস্সযুগং সাযন্হসমযং পারুপেয্য. এৰমেৰ খ্ৰাহং, আৰুসো, ইমেসং সত্তন্নং বোজ্ঝঙ্গানং যেন যেন বোজ্ঝঙ্গেন আকঙ্খামি পুব্বণ্হসমযং ৰিহরিতুং, তেন তেন বোজ্ঝঙ্গেন পুব্বণ্হসমযং ৰিহরামি. যেন যেন বোজ্ঝঙ্গেন আকঙ্খামি মজ্ঝন্হিকসমযং…পে… সাযন্হসমযং ৰিহরিতুং, তেন তেন বোজ্ঝঙ্গেন সাযন্হসমযং ৰিহরামি. সতিসম্বোজ্ঝঙ্গো ইতি চে মে, আৰুসো, হোতি, ‘অপ্পমাণো’তি মে হোতি, ‘সুসমারদ্ধো’তি মে হোতি. তিট্ঠন্তঞ্চ নং ‘তিট্ঠতী’তি পজানামি. সচেপি মে চৰতি, ‘ইদপ্পচ্চযা মে চৰতী’তি পজানামি…পে… উপেক্খাসম্বোজ্ঝঙ্গো ইতি চে মে, আৰুসো, হোতি, ‘অপ্পমাণো’তি মে হোতি, ‘সুসমারদ্ধো’তি মে হোতি. তিট্ঠন্তঞ্চ নং ‘তিট্ঠতী’তি পজানামি. সচেপি মে চৰতি, ‘ইদপ্পচ্চযা মে চৰতী’তি পজানামি’’.

সুত্তন্তনিদ্দেসো

২১. কথং সতিসম্বোজ্ঝঙ্গো ইতি চে মে হোতীতি বোজ্ঝঙ্গো? যাৰতা নিরোধূপট্ঠাতি তাৰতা সতিসম্বোজ্ঝঙ্গো. ইতি চে মে হোতীতি বোজ্ঝঙ্গো. সেয্যথাপি তেলপ্পদীপস্স ঝাযতো যাৰতা অচ্চি তাৰতা ৰণ্ণো, যাৰতা ৰণ্ণো তাৰতা অচ্চি. এৰমেৰ যাৰতা নিরোধূপট্ঠাতি তাৰতা সতিসম্বোজ্ঝঙ্গো. ইতি চে মে হোতীতি বোজ্ঝঙ্গো.

কথং অপ্পমাণো ইতি চে মে হোতীতি বোজ্ঝঙ্গো? পমাণবদ্ধা [পমাণৰন্তা (স্যা.), অট্ঠকথা ওলোকেতব্বা] কিলেসা, সব্বে চ পরিযুট্ঠানা, যে চ সঙ্খারা পোনোভৰিকা অপ্পমাণো নিরোধো অচলট্ঠেন অসঙ্খতট্ঠেন. যাৰতা নিরোধূপট্ঠাতি তাৰতা অপ্পমাণো. ইতি চে মে হোতীতি বোজ্ঝঙ্গো.

কথং সুসমারদ্ধো ইতি চে মে হোতীতি – বোজ্ঝঙ্গো? ৰিসমা কিলেসা, সব্বে চ পরিযুট্ঠানা, যে চ সঙ্খারা পোনোভৰিকা, সমধম্মো নিরোধো সন্তট্ঠেন পণীতট্ঠেন. যাৰতা নিরোধূপট্ঠাতি তাৰতা সুসমারদ্ধো ইতি চে মে হোতীতি বোজ্ঝঙ্গো.

কথং ‘‘তিট্ঠন্তঞ্চ নং তিট্ঠতী’’তি পজানামি; সচেপি চৰতি ‘‘ইদপ্পচ্চযা চৰতী’’তি পজানামি? কতিহাকারেহি সতিসম্বোজ্ঝঙ্গো তিট্ঠতি? কতিহাকারেহি সতিসম্বোজ্ঝঙ্গো চৰতি? অট্ঠহাকারেহি সতিসম্বোজ্ঝঙ্গো তিট্ঠতি. অট্ঠহাকারেহি সতিসম্বোজ্ঝঙ্গো চৰতি.

কতমেহি অট্ঠহাকারেহি সতিসম্বোজ্ঝঙ্গো তিট্ঠতি? অনুপ্পাদং আৰজ্জিতত্তা সতিসম্বোজ্ঝঙ্গো তিট্ঠতি, উপ্পাদং অনাৰজ্জিতত্তা সতিসম্বোজ্ঝঙ্গো তিট্ঠতি, অপ্পৰত্তং আৰজ্জিতত্তা সতিসম্বোজ্ঝঙ্গো তিট্ঠতি, পৰত্তং অনাৰজ্জিতত্তা সতিসম্বোজ্ঝঙ্গো তিট্ঠতি, অনিমিত্তং আৰজ্জিতত্তা সতিসম্বোজ্ঝঙ্গো তিট্ঠতি, নিমিত্তং অনাৰজ্জিতত্তা সতিসম্বোজ্ঝঙ্গো তিট্ঠতি, নিরোধং আৰজ্জিতত্তা সতিসম্বোজ্ঝঙ্গো তিট্ঠতি, সঙ্খারে অনাৰজ্জিতত্তা সতিসম্বোজ্ঝঙ্গো তিট্ঠতি – ইমেহি অট্ঠহাকারেহি সতিসম্বোজ্ঝঙ্গো তিট্ঠতি.

কতমেহি অট্ঠহাকারেহি সতিসম্বোজ্ঝঙ্গো চৰতি? উপ্পাদং আৰজ্জিতত্তা সতিসম্বোজ্ঝঙ্গো চৰতি, অনুপ্পাদং অনাৰজ্জিতত্তা সতিসম্বোজ্ঝঙ্গো চৰতি, পৰত্তং আৰজ্জিতত্তা সতিসম্বোজ্ঝঙ্গো চৰতি, অপ্পৰত্তং অনাৰজ্জিতত্তা সতিসম্বোজ্ঝঙ্গো চৰতি, নিমিত্তং আৰজ্জিতত্তা সতিসম্বোজ্ঝঙ্গো চৰতি, অনিমিত্তং অনাৰজ্জিতত্তা সতিসম্বোজ্ঝঙ্গো চৰতি, সঙ্খারে আৰজ্জিতত্তা সতিসম্বোজ্ঝঙ্গো চৰতি, নিরোধং অনাৰজ্জিতত্তা সতিসম্বোজ্ঝঙ্গো চৰতি – ইমেহি অট্ঠহাকারেহি সতিসম্বোজ্ঝঙ্গো চৰতি. এৰং ‘‘তিট্ঠন্তঞ্চ নং তিট্ঠতী’’তি পজানামি. সচেপি চৰতি, ‘‘ইদপ্পচ্চযা মে চৰতী’’তি পজানামি…পে….