১. ইন্দ্রিযৰারো

২৩. সব্বেসং সত্তানং পীল়নং ৰজ্জেত্ৰা অপীল়নায, উপঘাতং ৰজ্জেত্ৰা অনুপঘাতেন, সন্তাপং ৰজ্জেত্ৰা অসন্তাপেন, পরিযাদানং ৰজ্জেত্ৰা অপরিযাদানেন, ৰিহেসং ৰজ্জেত্ৰা অৰিহেসায, সব্বে সত্তা অৰেরিনো হোন্তু মা ৰেরিনো, সুখিনো হোন্তু মা দুক্খিনো, সুখিতত্তা হোন্তু মা দুক্খিতত্তাতি – ইমেহি অট্ঠহাকারেহি সব্বে সত্তে মেত্তাযতীতি – মেত্তা. তং ধম্মং চেতযতীতি – চেতো. সব্বব্যাপাদপরিযুট্ঠানেহি ৰিমুচ্চতীতি – ৰিমুত্তি. মেত্তা চ চেতো চ ৰিমুত্তি চাতি – মেত্তাচেতোৰিমুত্তি.

সব্বে সত্তা অৰেরিনো হোন্তু, খেমিনো হোন্তু, সুখিনো হোন্তূতি – সদ্ধায অধিমুচ্চতি. সদ্ধিন্দ্রিযপরিভাৰিতা হোতি মেত্তাচেতোৰিমুত্তি.

সব্বে সত্তা অৰেরিনো হোন্তু, খেমিনো হোন্তু, সুখিনো হোন্তূতি – ৰীরিযং পগ্গণ্হাতি. ৰীরিযিন্দ্রিযপরিভাৰিতা হোতি মেত্তাচেতোৰিমুত্তি.

সব্বে সত্তা অৰেরিনো হোন্তু, খেমিনো হোন্তু, সুখিনো হোন্তূতি – সতিং উপট্ঠাপেতি. সতিন্দ্রিযপরিভাৰিতা হোতি মেত্তাচেতোৰিমুত্তি.

সব্বে সত্তা অৰেরিনো হোন্তু, খেমিনো হোন্তু, সুখিনো হোন্তূতি – চিত্তং সমাদহতি. সমাধিন্দ্রিযপরিভাৰিতা হোতি মেত্তাচেতোৰিমুত্তি.

সব্বে সত্তা অৰেরিনো হোন্তু, খেমিনো হোন্তু, সুখিনো হোন্তূতি – পঞ্ঞায পজানাতি. পঞ্ঞিন্দ্রিযপরিভাৰিতা হোতি মেত্তাচেতোৰিমুত্তি.

ইমানি পঞ্চিন্দ্রিযানি মেত্তায চেতোৰিমুত্তিযা আসেৰনা হোন্তি. ইমেহি পঞ্চহি ইন্দ্রিযেহি মেত্তাচেতোৰিমুত্তি আসেৰীযতি. ইমানি পঞ্চিন্দ্রিযানি মেত্তায চেতোৰিমুত্তিযা ভাৰনা হোন্তি. ইমেহি পঞ্চহি ইন্দ্রিযেহি মেত্তাচেতোৰিমুত্তি ভাৰীযতি. ইমানি পঞ্চিন্দ্রিযানি মেত্তায চেতোৰিমুত্তিযা বহুলীকতা হোন্তি. ইমেহি পঞ্চহি ইন্দ্রিযেহি মেত্তাচেতোৰিমুত্তি বহুলীকরীযতি. ইমানি পঞ্চিন্দ্রিযানি মেত্তায চেতোৰিমুত্তিযা অলঙ্কারা হোন্তি. ইমেহি পঞ্চহি ইন্দ্রিযেহি মেত্তাচেতোৰিমুত্তি স্ৰালঙ্কতা হোতি. ইমানি পঞ্চিন্দ্রিযানি মেত্তায চেতোৰিমুত্তিযা পরিক্খারা হোন্তি. ইমেহি পঞ্চহি ইন্দ্রিযেহি মেত্তাচেতোৰিমুত্তি সুপরিক্খতা হোতি. ইমানি পঞ্চিন্দ্রিযানি মেত্তায চেতোৰিমুত্তিযা পরিৰারা হোন্তি. ইমেহি পঞ্চহি ইন্দ্রিযেহি মেত্তাচেতোৰিমুত্তি সুপরিৰুতা হোতি. ইমানি পঞ্চিন্দ্রিযানি মেত্তায চেতোৰিমুত্তিযা আসেৰনা হোন্তি, ভাৰনা হোন্তি, বহুলীকতা হোন্তি, অলঙ্কারা হোন্তি, পরিক্খারা হোন্তি, পরিৰারা হোন্তি, পারিপূরী হোন্তি, সহগতা হোন্তি, সহজাতা হোন্তি, সংসট্ঠা হোন্তি, সম্পযুত্তা হোন্তি, পক্খন্দনা হোন্তি, পসীদনা [সংসীদনা (ক. সী. অট্ঠ.)] হোন্তি, সন্তিট্ঠনা হোন্তি, ৰিমুচ্চনা হোন্তি, ‘‘এতং সন্ত’’ন্তি ফস্সনা হোন্তি, যানীকতা হোন্তি, ৰত্থুকতা হোন্তি, অনুট্ঠিতা হোন্তি, পরিচিতা হোন্তি, সুসমারদ্ধা হোন্তি, সুভাৰিতা হোন্তি, স্ৰাধিট্ঠিতা হোন্তি, সুসমুগ্গতা হোন্তি, সুৰিমুত্তা হোন্তি, নিব্বত্তেন্তি জোতেন্তি পতাপেন্তি.