২. বলৰারো

২৪. সব্বে সত্তা অৰেরিনো হোন্তু, খেমিনো হোন্তু, সুখিনো হোন্তূতি – অস্সদ্ধিযে ন কম্পতি. সদ্ধাবলপরিভাৰিতা হোতি মেত্তাচেতোৰিমুত্তি.

সব্বে সত্তা অৰেরিনো হোন্তু, খেমিনো হোন্তু, সুখিনো হোন্তূতি – কোসজ্জে ন কম্পতি. ৰীরিযবলপরিভাৰিতা হোতি মেত্তাচেতোৰিমুত্তি.

সব্বে সত্তা অৰেরিনো হোন্তু, খেমিনো হোন্তু, সুখিনো হোন্তূতি – পমাদে ন কম্পতি. সতিবলপরিভাৰিতা হোতি মেত্তাচেতোৰিমুত্তি.

সব্বে সত্তা অৰেরিনো হোন্তু, খেমিনো হোন্তু, সুখিনো হোন্তূতি – উদ্ধচ্চে ন কম্পতি. সমাধিবলপরিভাৰিতা হোতি মেত্তাচেতোৰিমুত্তি.

সব্বে সত্তা অৰেরিনো হোন্তু, খেমিনো হোন্তু, সুখিনো হোন্তূতি – অৰিজ্জায ন কম্পতি. পঞ্ঞাবলপরিভাৰিতা হোতি মেত্তাচেতোৰিমুত্তি.

ইমানি পঞ্চ বলানি মেত্তায চেতোৰিমুত্তিযা আসেৰনা হোন্তি. ইমেহি পঞ্চহি বলেহি মেত্তাচেতোৰিমুত্তি আসেৰীযতি. ইমানি পঞ্চ বলানি মেত্তায চেতোৰিমুত্তিযা ভাৰনা হোন্তি. ইমেহি পঞ্চহি বলেহি মেত্তাচেতোৰিমুত্তি ভাৰীযতি. ইমানি পঞ্চ বলানি মেত্তায চেতোৰিমুত্তিযা বহুলীকতা হোন্তি. ইমেহি পঞ্চহি বলেহি মেত্তাচেতোৰিমুত্তি বহুলীকরীযতি. ইমানি পঞ্চ বলানি মেত্তায চেতোৰিমুত্তিযা অলঙ্কারা হোন্তি. ইমেহি পঞ্চহি বলেহি মেত্তাচেতোৰিমুত্তি স্ৰালঙ্কতা হোতি. ইমানি পঞ্চ বলানি মেত্তায চেতোৰিমুত্তিযা পরিক্খারা হোন্তি. ইমেহি পঞ্চহি বলেহি মেত্তাচেতোৰিমুত্তি সুপরিক্খতা হোতি. ইমানি পঞ্চ বলানি মেত্তায চেতোৰিমুত্তিযা পরিৰারা হোন্তি. ইমেহি পঞ্চহি বলেহি মেত্তাচেতোৰিমুত্তি সুপরিৰুতা হোতি. ইমানি পঞ্চ বলানি মেত্তায চেতোৰিমুত্তিযা আসেৰনা হোন্তি, ভাৰনা হোন্তি, বহুলীকতা হোন্তি, অলঙ্কারা হোন্তি, পরিক্খারা হোন্তি, পরিৰারা হোন্তি, পারিপূরী হোন্তি, সহগতা হোন্তি, সহজাতা হোন্তি, সংসট্ঠা হোন্তি, সম্পযুত্তা হোন্তি, পক্খন্দনা হোন্তি, পসীদনা হোন্তি, সন্তিট্ঠনা হোন্তি, ৰিমুচ্চনা হোন্তি, ‘‘এতং সন্ত’’ন্তি ফস্সনা হোন্তি, যানীকতা হোন্তি, ৰত্থুকতা হোন্তি, অনুট্ঠিতা হোন্তি, পরিচিতা হোন্তি, সুসমারদ্ধা হোন্তি, সুভাৰিতা হোন্তি, স্ৰাধিট্ঠিতা হোন্তি, সুসমুগ্গতা হোন্তি, সুৰিমুত্তা হোন্তি নিব্বত্তেন্তি জোতেন্তি পতাপেন্তি.