১. অস্সাদদিট্ঠিনিদ্দেসো

১২৮. অস্সাদদিট্ঠিযা কতমেহি পঞ্চতিংসায আকারেহি অভিনিৰেসো হোতি? যং রূপং পটিচ্চ উপ্পজ্জতি সুখং সোমনস্সং, অযং রূপস্স অস্সাদোতি – অভিনিৰেসপরামাসো দিট্ঠি. দিট্ঠি ন অস্সাদো, অস্সাদো ন দিট্ঠি. অঞ্ঞা দিট্ঠি, অঞ্ঞো অস্সাদো. যা চ দিট্ঠি যো চ অস্সাদো – অযং ৰুচ্চতি অস্সাদদিট্ঠি.

অস্সাদদিট্ঠি মিচ্ছাদিট্ঠি দিট্ঠিৰিপত্তি. তায দিট্ঠিৰিপত্তিযা সমন্নাগতো পুগ্গলো দিট্ঠিৰিপন্নো. দিট্ঠিৰিপন্নো পুগ্গলো ন সেৰিতব্বো ন ভজিতব্বো ন পযিরুপাসিতব্বো. তং কিস্স হেতু? দিট্ঠি হিস্স পাপিকা. যো দিট্ঠিযা রাগো [যা দিট্ঠি যো রাগো (স্যা.)], সো ন দিট্ঠি. দিট্ঠি ন রাগো. অঞ্ঞা দিট্ঠি, অঞ্ঞো রাগো. যা চ দিট্ঠি যো চ রাগো – অযং ৰুচ্চতি দিট্ঠিরাগো. তায চ দিট্ঠিযা তেন চ রাগেন সমন্নাগতো পুগ্গলো দিট্ঠিরাগরত্তো. দিট্ঠিরাগরত্তে পুগ্গলে দিন্নং দানং ন মহপ্ফলং হোতি ন মহানিসংসং. তং কিস্স হেতু? দিট্ঠি হিস্স পাপিকা অস্সাদদিট্ঠি মিচ্ছাদিট্ঠি.

মিচ্ছাদিট্ঠিকস্স পুরিসপুগ্গলস্স দ্ৰেৰ গতিযো – নিরযো ৰা তিরচ্ছানযোনি ৰা. মিচ্ছাদিট্ঠিকস্স পুরিসপুগ্গলস্স যঞ্চেৰ কাযকম্মং যথাদিট্ঠি সমত্তং সমাদিন্নং, যঞ্চ ৰচীকম্মং…পে… যঞ্চ মনোকম্মং যথাদিট্ঠি সমত্তং সমাদিন্নং, যা চ চেতনা যা চ পত্থনা যো চ পণিধি যে চ সঙ্খারা, সব্বে তে ধম্মা অনিট্ঠায অকন্তায অমনাপায অহিতায দুক্খায সংৰত্তন্তি. তং কিস্স হেতু? দিট্ঠি হিস্স পাপিকা. সেয্যথাপি নিম্ববীজং ৰা কোসাতকীবীজং ৰা তিত্তকালাবুবীজং ৰা অল্লায পথৰিযা নিক্খিত্তং যং চেৰ পথৰিরসং উপাদিযতি, যঞ্চ আপোরসং উপাদিযতি, সব্বং তং তিত্তকত্তায কটুকত্তায অসাতত্তায [অসারতায (স্যা.)] সংৰত্ততি. তং কিস্স হেতু? বীজং হিস্স পাপিকং. এৰমেৰং মিচ্ছাদিট্ঠিকস্স পুরিসপুগ্গলস্স যঞ্চেৰ কাযকম্মং যথাদিট্ঠি সমত্তং সমাদিন্নং, যঞ্চ ৰচীকম্মং…পে… যঞ্চ মনোকম্মং যথাদিট্ঠি সমত্তং সমাদিন্নং, যা চ চেতনা যা চ পত্থনা যো চ পণিধি যে চ সঙ্খারা, সব্বে তে ধম্মা অনিট্ঠায অকন্তায অমনাপায অহিতায দুক্খায সংৰত্তন্তি. তং কিস্স হেতু? দিট্ঠি হিস্স পাপিকা অস্সাদদিট্ঠি মিচ্ছাদিট্ঠি.

মিচ্ছাদিট্ঠি দিট্ঠিগতং, দিট্ঠিগহনং, দিট্ঠিকন্তারং, দিট্ঠিৰিসূকং, দিট্ঠিৰিপ্ফন্দিতং, দিট্ঠিসঞ্ঞোজনং, দিট্ঠিসল্লং, দিট্ঠিসম্বাধো, দিট্ঠিপলিবোধো, দিট্ঠিবন্ধনং, দিট্ঠিপপাতো, দিট্ঠানুসযো, দিট্ঠিসন্তাপো, দিট্ঠিপরিল়াহো, দিট্ঠিগন্থো, দিট্ঠুপাদানং, দিট্ঠাভিনিৰেসো, দিট্ঠিপরামাসো – ইমেহি অট্ঠারসহি আকারেহি পরিযুট্ঠিতচিত্তস্স সঞ্ঞোগো.

১২৯. অত্থি সঞ্ঞোজনানি চেৰ দিট্ঠিযো চ, অত্থি সঞ্ঞোজনানি ন চ দিট্ঠিযো. কতমানি সঞ্ঞোজনানি চেৰ দিট্ঠিযো চ? সক্কাযদিট্ঠি, সীলব্বতপরামাসো – ইমানি সঞ্ঞোজনানি চেৰ দিট্ঠিযো চ. কতমানি সঞ্ঞোজনানি, ন চ দিট্ঠিযো? কামরাগসঞ্ঞোজনং, পটিঘসঞ্ঞোজনং, মানসঞ্ঞোজনং, ৰিচিকিচ্ছাসঞ্ঞোজনং, ভৰরাগসঞ্ঞোজনং, ইস্সাসঞ্ঞোজনং, মচ্ছরিযসঞ্ঞোজনং, অনুনযসঞ্ঞোজনং, অৰিজ্জাসঞ্ঞোজনং – ইমানি সঞ্ঞোজনানি, ন চ দিট্ঠিযো.

যং ৰেদনং পটিচ্চ…পে… যং সঞ্ঞং পটিচ্চ…পে… যং সঙ্খারে [যে সঙ্খারে (ক.) সং. নি. ৩.২৮ পস্সিতব্বা] পটিচ্চ…পে… যং ৰিঞ্ঞাণং পটিচ্চ… যং চক্খুং পটিচ্চ… যং সোতং পটিচ্চ… যং ঘানং পটিচ্চ… যং জিৰ্হং পটিচ্চ… যং কাযং পটিচ্চ… যং মনং পটিচ্চ… যং রূপে পটিচ্চ… যং সদ্দে পটিচ্চ… যং গন্ধে পটিচ্চ … যং রসে পটিচ্চ… যং ফোট্ঠব্বে পটিচ্চ… যং ধম্মে পটিচ্চ… যং চক্খুৰিঞ্ঞাণং পটিচ্চ… যং সোতৰিঞ্ঞাণং পটিচ্চ… যং ঘানৰিঞ্ঞাণং পটিচ্চ… যং জিৰ্হাৰিঞ্ঞাণং পটিচ্চ… যং কাযৰিঞ্ঞাণং পটিচ্চ… যং মনোৰিঞ্ঞাণং পটিচ্চ … যং চক্খুসম্ফস্সং পটিচ্চ… যং সোতসম্ফস্সং পটিচ্চ… যং ঘানসম্ফস্সং পটিচ্চ… যং জিৰ্হাসম্ফস্সং পটিচ্চ… যং কাযসম্ফস্সং পটিচ্চ… যং মনোসম্ফস্সং পটিচ্চ… যং চক্খুসম্ফস্সজং ৰেদনং পটিচ্চ… যং সোতসম্ফস্সজং ৰেদনং পটিচ্চ… যং ঘানসম্ফস্সজং ৰেদনং পটিচ্চ… যং জিৰ্হাসম্ফস্সজং ৰেদনং পটিচ্চ… যং কাযসম্ফস্সজং ৰেদনং পটিচ্চ… যং মনোসম্ফস্সজং ৰেদনং পটিচ্চ উপ্পজ্জতি সুখং সোমনস্সং, অযং মনোসম্ফস্সজায ৰেদনায অস্সাদোতি – অভিনিৰেসপরামাসো দিট্ঠি. দিট্ঠি ন অস্সাদো, অস্সাদো ন দিট্ঠি. অঞ্ঞা দিট্ঠি, অঞ্ঞো অস্সাদো. যা চ দিট্ঠি যো চ অস্সাদো – অযং ৰুচ্চতি অস্সাদদিট্ঠি.

অস্সাদদিট্ঠি মিচ্ছাদিট্ঠি দিট্ঠিৰিপত্তি. তায দিট্ঠিৰিপত্তিযা সমন্নাগতো পুগ্গলো দিট্ঠিৰিপন্নো. দিট্ঠিৰিপন্নো পুগ্গলো ন সেৰিতব্বো ন ভজিতব্বো ন পযিরুপাসিতব্বো. তং কিস্স হেতু? দিট্ঠি হিস্স পাপিকা. যো দিট্ঠিযা রাগো, সো ন দিট্ঠি. দিট্ঠি ন রাগো. অঞ্ঞা দিট্ঠি, অঞ্ঞো রাগো. যা চ দিট্ঠি যো চ রাগো, অযং ৰুচ্চতি দিট্ঠিরাগো. তায চ দিট্ঠিযা তেন চ রাগেন সমন্নাগতো পুগ্গলো দিট্ঠিরাগরত্তো. দিট্ঠিরাগরত্তে পুগ্গলে দিন্নং দানং ন মহপ্ফলং হোতি ন মহানিসংসং. তং কিস্স হেতু? দিট্ঠি হিস্স পাপিকা অস্সাদদিট্ঠি মিচ্ছাদিট্ঠি.

মিচ্ছাদিট্ঠিকস্স পুরিসপুগ্গলস্স দ্ৰেৰ গতিযো – নিরযো ৰা তিরচ্ছানযোনি ৰা. মিচ্ছাদিট্ঠিকস্স পুরিসপুগ্গলস্স যঞ্চেৰ কাযকম্মং যথাদিট্ঠি সমত্তং সমাদিন্নং, যঞ্চ ৰচীকম্মং…পে… যঞ্চ মনোকম্মং যথাদিট্ঠি সমত্তং সমাদিন্নং, যা চ চেতনা যা চ পত্থনা যো চ পণিধি যে চ সঙ্খারা, সব্বে তে ধম্মা অনিট্ঠায অকন্তায অমনাপায অহিতায দুক্খায সংৰত্তন্তি. তং কিস্স হেতু? দিট্ঠি হিস্স পাপিকা. সেয্যথাপি নিম্ববীজং ৰা কোসাতকীবীজং ৰা তিত্তকালাবুবীজং ৰা অল্লায পথৰিযা নিক্খিত্তং যঞ্চেৰ পথৰিরসং উপাদিযতি যঞ্চ আপোরসং উপাদিযতি, সব্বং তং তিত্তকত্তায কটুকত্তায অসাতত্তায সংৰত্ততি. তং কিস্স হেতু? বীজং হিস্স পাপিকং. এৰমেৰং মিচ্ছাদিট্ঠিকস্স পুরিসপুগ্গলস্স যঞ্চেৰ কাযকম্মং যথাদিট্ঠি সমত্তং সমাদিন্নং যঞ্চ ৰচীকম্মং…পে… যঞ্চ মনোকম্মং যথাদিট্ঠি সমত্তং সমাদিন্নং, যা চ চেতনা যা চ পত্থনা যো চ পণিধি যে চ সঙ্খারা, সব্বে তে ধম্মা অনিট্ঠায অকন্তায অমনাপায অহিতায দুক্খায সংৰত্তন্তি. তং কিস্স হেতু? দিট্ঠি হিস্স পাপিকা অস্সাদদিট্ঠি মিচ্ছাদিট্ঠি.

মিচ্ছাদিট্ঠি দিট্ঠিগতং দিট্ঠিগহনং…পে… দিট্ঠাভিনিৰেসো দিট্ঠিপরামাসো – ইমেহি অট্ঠারসহি আকারেহি পরিযুট্ঠিতচিত্তস্স সঞ্ঞোগো.

অত্থি সঞ্ঞোজনানি চেৰ দিট্ঠিযো চ, অত্থি সঞ্ঞোজনানি ন চ দিট্ঠিযো. কতমানি সঞ্ঞোজনানি চেৰ দিট্ঠিযো চ? সক্কাযদিট্ঠি, সীলব্বতপরামাসো – ইমানি সঞ্ঞোজনানি চেৰ দিট্ঠিযো চ. কতমানি সঞ্ঞোজনানি, ন চ দিট্ঠিযো? কামরাগসঞ্ঞোজনং, পটিঘসঞ্ঞোজনং, মানসঞ্ঞোজনং, ৰিচিকিচ্ছাসঞ্ঞোজনং, ভৰরাগসঞ্ঞোজনং, ইস্সাসঞ্ঞোজনং, মচ্ছরিযসঞ্ঞোজনং, অনুনযসঞ্ঞোজনং, অৰিজ্জাসঞ্ঞোজনং – ইমানি সঞ্ঞোজনানি, ন চ দিট্ঠিযো. অস্সাদদিট্ঠিযা ইমেহি পঞ্চতিংসায আকারেহি অভিনিৰেসো হোতি.

অস্সাদদিট্ঠিনিদ্দেসো পঠমো.