৯. পরিৰত্তনহারৰিভঙ্গো

৩৫. তত্থ কতমো পরিৰত্তনো হারো? ‘‘কুসলাকুসলে ধম্মে’’তি. সম্মাদিট্ঠিস্স পুরিসপুগ্গলস্স মিচ্ছাদিট্ঠি নিজ্জিণ্ণা ভৰতি. যে চস্স মিচ্ছাদিট্ঠিপচ্চযা উপ্পজ্জেয্যুং অনেকে [অনেকা (ক.)] পাপকা অকুসলা ধম্মা, তে চস্স নিজ্জিণ্ণা হোন্তি. সম্মাদিট্ঠিপচ্চযা চস্স অনেকে কুসলা ধম্মা সম্ভৰন্তি, তে চস্স ভাৰনাপারিপূরিং গচ্ছন্তি. সম্মাসঙ্কপ্পস্স পুরিসপুগ্গলস্স মিচ্ছাসঙ্কপ্পো নিজ্জিণ্ণো ভৰতি. যে চস্স মিচ্ছাসঙ্কপ্পপচ্চযা উপ্পজ্জেয্যুং অনেকে পাপকা অকুসলা ধম্মা, তে চস্স নিজ্জিণ্ণা হোন্তি. সম্মাসঙ্কপ্পপচ্চযা চস্স অনেকে কুসলা ধম্মা সম্ভৰন্তি. তে চস্স ভাৰনাপারিপূরিং গচ্ছন্তি. এৰং সম্মাৰাচস্স সম্মাকম্মন্তস্স সম্মাআজীৰস্স সম্মাৰাযামস্স সম্মাসতিস্স সম্মাসমাধিস্স সম্মাৰিমুত্তস্স সম্মাৰিমুত্তিঞাণদস্সনস্স পুরিসপুগ্গলস্স মিচ্ছাৰিমুত্তিঞাণদস্সনং নিজ্জিণ্ণং ভৰতি. যে চস্স মিচ্ছাৰিমুত্তিঞাণদস্সনপচ্চযা উপ্পজ্জেয্যুং অনেকে পাপকা অকুসলা ধম্মা, তে চস্স নিজ্জিণ্ণা হোন্তি. সম্মাৰিমুত্তিঞাণদস্সনপচ্চযা চস্স অনেকে কুসলা ধম্মা সম্ভৰন্তি, তে চস্স ভাৰনাপারিপূরিং গচ্ছন্তি.

৩৬. যস্স ৰা পাণাতিপাতা পটিৰিরতস্স পাণাতিপাতো পহীনো হোতি. অদিন্নাদানা পটিৰিরতস্স অদিন্নাদানং পহীনং হোতি. ব্রহ্মচারিস্স অব্রহ্মচরিযং পহীনং হোতি. সচ্চৰাদিস্স মুসাৰাদো পহীনো হোতি. অপিসুণৰাচস্স পিসুণা ৰাচা পহীনা হোতি. সণ্হৰাচস্স ফরুসা ৰাচা পহীনা হোতি. কালৰাদিস্স সম্ফপ্পলাপো পহীনো হোতি. অনভিজ্ঝালুস্স [অনভিজ্ঝামনস্স (ক.)] অভিজ্ঝা পহীনা হোতি. অব্যাপন্নচিত্তস্স ব্যাপাদো পহীনো হোতি. সম্মাদিট্ঠিস্স মিচ্ছাদিট্ঠি পহীনা হোতি.

যে চ খো কেচি অরিযং অট্ঠঙ্গিকং মগ্গং গরহন্তি, নেসং সন্দিট্ঠিকা সহধম্মিকা গারয্হা ৰাদানুৰাদা আগচ্ছন্তি. সম্মাদিট্ঠিঞ্চ তে ভৰন্তো ধম্মং গরহন্তি. তেন হি যে মিচ্ছাদিট্ঠিকা, তেসং ভৰন্তানং পুজ্জা চ পাসংসা চ. এৰং সম্মাসঙ্কপ্পং সম্মাৰাচং সম্মাকম্মন্তং সম্মাআজীৰং সম্মাৰাযামং সম্মাসতিং সম্মাসমাধিং সম্মাৰিমুত্তিং সম্মাৰিমুত্তিঞাণদস্সনঞ্চ তে ভৰন্তো ধম্মং গরহন্তি. তেন হি যে মিচ্ছাৰিমুত্তিঞাণদস্সনা, তেসং ভৰন্তানং পুজ্জা চ পাসংসা চ.

যে চ খো কেচি এৰমাহংসু ‘‘ভুঞ্জিতব্বা কামা, পরিভুঞ্জিতব্বা কামা, আসেৰিতব্বা কামা, নিসেৰিতব্বা কামা, ভাৰযিতব্বা কামা, বহুলীকাতব্বা কামা’’তি. কামেহি ৰেরমণী তেসং অধম্মো.

যে ৰা পন কেচি এৰমাহংসু ‘‘অত্তকিলমথানুযোগো ধম্মো’’তি. নিয্যানিকো তেসং ধম্মো অধম্মো. যে চ খো কেচি এৰমাহংসু ‘‘দুক্খো ধম্মো’’তি. সুখো তেসং ধম্মো অধম্মো. যথা ৰা পন ভিক্খুনো সব্বসঙ্খারেসু অসুভানুপস্সিনো ৰিহরতো সুভসঞ্ঞা পহীযন্তি. দুক্খানুপস্সিনো ৰিহরতো সুখসঞ্ঞা পহীযন্তি. অনিচ্চানুপস্সিনো ৰিহরতো নিচ্চসঞ্ঞা পহীযন্তি. অনত্তানুপস্সিনো ৰিহরতো অত্তসঞ্ঞা পহীযন্তি. যং যং ৰা পন ধম্মং রোচযতি ৰা উপগচ্ছতি ৰা, তস্স তস্স ধম্মস্স যো পটিপক্খো, স্ৰস্স অনিট্ঠতো অজ্ঝাপন্নো ভৰতি. তেনাহ আযস্মা মহাকচ্চাযনো ‘‘কুসলাকুসলধম্মে’’তি.

নিযুত্তো পরিৰত্তনো হারো.