১০. ৰেৰচনহারৰিভঙ্গো

৩৭. তত্থ কতমো ৰেৰচনো হারো? ‘‘ৰেৰচনানি বহূনী’’তি. যথা একং ভগৰা ধম্মং অঞ্ঞমঞ্ঞেহি ৰেৰচনেহি নিদ্দিসতি. যথাহ ভগৰা –

‘‘আসা চ পিহা অভিনন্দনা চ, অনেকধাতূসু সরা পতিট্ঠিতা;

অঞ্ঞাণমূলপ্পভৰা পজপ্পিতা, সব্বা মযা ব্যন্তিকতা সমূলিকা’’তি.

আসা নাম ৰুচ্চতি যা ভৰিস্সস্স অত্থস্স আসীসনা [আসিংসনা (সী.)] অৰস্সং আগমিস্সতীতি আসাস্স উপ্পজ্জতি. পিহা নাম যা ৰত্তমানস্স [ৰত্তমানকস্স (সী.)] অত্থস্স পত্থনা, সেয্যতরং ৰা দিস্ৰা ‘‘এদিসো ভৰেয্য’’ন্তি পিহাস্স উপ্পজ্জতি. অত্থনিপ্ফত্তিপটিপালনা অভিনন্দনা নাম, পিযং ৰা ঞাতিং অভিনন্দতি, পিযং ৰা ধম্মং অভিনন্দতি, অপ্পটিকূলতো ৰা অভিনন্দতি.

অনেকধাতূতি চক্খুধাতু রূপধাতু চক্খুৰিঞ্ঞাণধাতু, সোতধাতু সদ্দধাতু সোতৰিঞ্ঞাণধাতু, ঘানধাতু গন্ধধাতু ঘানৰিঞ্ঞাণধাতু, জিৰ্হাধাতু রসধাতু জিৰ্হাৰিঞ্ঞাণধাতু, কাযধাতু ফোট্ঠব্বধাতু কাযৰিঞ্ঞাণধাতু, মনোধাতু ধম্মধাতু মনোৰিঞ্ঞাণধাতু.

সরাতি কেচি রূপাধিমুত্তা কেচি সদ্দাধিমুত্তা কেচি গন্ধাধিমুত্তা কেচি রসাধিমুত্তা কেচি ফোট্ঠব্বাধিমুত্তা কেচি ধম্মাধিমুত্তা. তত্থ যানি ছ গেহসিতানি দোমনস্সানি যানি চ ছ গেহসিতানি সোমনস্সানি যানি চ ছ নেক্খম্মসিতানি দোমনস্সানি যানি চ ছ নেক্খম্মসিতানি সোমনস্সানি, ইমানি চতুৰীসপদানি তণ্হাপক্খো, তণ্হায এতং ৰেৰচনং. যা ছ উপেক্খা গেহসিতা, অযং দিট্ঠিপক্খো.

৩৮. সাযেৰ পত্থনাকারেন ধম্মনন্দী ধম্মপেমং ধম্মজ্ঝোসানন্তি তণ্হায এতং ৰেৰচনং. চিত্তং মনো ৰিঞ্ঞাণন্তি চিত্তস্স এতং ৰেৰচনং. মনিন্দ্রিযং মনোধাতু মনাযতনং ৰিজাননাতি মনস্সেতং ৰেৰচনং. পঞ্ঞিন্দ্রিযং পঞ্ঞাবলং অধিপঞ্ঞা সিক্খা পঞ্ঞা পঞ্ঞাক্খন্ধো ধম্মৰিচযসম্বোজ্ঝঙ্গো ঞাণং সম্মাদিট্ঠি তীরণা ৰিপস্সনা ধম্মে ঞাণং অত্থে ঞাণং অন্ৰযে ঞাণং খযে ঞাণং অনুপ্পাদে ঞাণং অনঞ্ঞাতঞ্ঞস্সামীতিন্দ্রিযং অঞ্ঞিন্দ্রিযং অঞ্ঞাতাৰিন্দ্রিযং চক্খু ৰিজ্জা বুদ্ধি ভূরি মেধা আলোকো, যং ৰা পন যং কিঞ্চি অঞ্ঞংপি এৰং জাতিযং, পঞ্ঞায এতং ৰেৰচনং. পঞ্চিন্দ্রিযানি লোকুত্তরানি, সব্বা পঞ্ঞা. অপি চ আধিপতেয্যট্ঠেন সদ্ধা, আরম্ভট্ঠেন ৰীরিযং, অপিলাপনট্ঠেন সতি, অৰিক্খেপট্ঠেন সমাধি, পজাননট্ঠেন পঞ্ঞা.

যথা চ বুদ্ধানুস্সতিযং ৰুত্তং ইতিপি সো ভগৰা অরহং সম্মাসম্বুদ্ধো ৰিজ্জাচরণসম্পন্নো সুগতো লোকৰিদূ অনুত্তরো পুরিসদম্মসারথি সত্থা দেৰমনুস্সানং বুদ্ধো ভগৰা. বলনিপ্ফত্তিগতো ৰেসারজ্জপ্পত্তো অধিগতপ্পটিসম্ভিদো চতুযোগৰিপ্পহীনো অগতিগমনৰীতিৰত্তো উদ্ধটসল্লো নিরূল়্হৰণো মদ্দিতকণ্ডকো নিব্বাপিতপরিযুট্ঠানো [নিব্বাহিত … (ক.)] বন্ধনাতীতো গন্থৰিনিৰেঠনো অজ্ঝাসযৰীতিৰত্তো ভিন্নন্ধকারো চক্খুমা লোকধম্মসমতিক্কন্তো অনুরোধৰিরোধৰিপ্পযুত্তো ইট্ঠানিট্ঠেসু ধম্মেসু অসঙ্খেপগতো বন্ধনাতিৰত্তো ঠপিতসঙ্গামো অভিক্কন্ততরো উক্কাধরো আলোককরো পজ্জোতকরো তমোনুদো রণঞ্জহো অপরিমাণৰণ্ণো অপ্পমেয্যৰণ্ণো অসঙ্খেয্যৰণ্ণো আভংকরো পভংকরো ধম্মোভাসপজ্জোতকরোতি চ বুদ্ধা ভগৰন্তোতি চ বুদ্ধানুস্সতিযা এতং ৰেৰচনং.

যথা চ ধম্মানুস্সতিযং ৰুত্তং স্ৰাক্খাতো ভগৰতা ধম্মো সন্দিট্ঠিকো অকালিকো এহিপস্সিকো ওপনেয্যিকো [ওপনযিকো (সী.)] পচ্চত্তং ৰেদিতব্বো ৰিঞ্ঞূহি. যদিদং মদনিম্মদনো পিপাসৰিনযো আলযসমুগ্ঘাটো ৰট্টূপচ্ছেদো সুঞ্ঞতো অতিদুল্লভো তণ্হক্খযো ৰিরাগো নিরোধো নিব্বানং.

‘‘অসঙ্খতং অনতং [অসঙ্খতং নন্ত … (সী.) পস্স সং. নি. ৪.৪০৯] অনাসৰঞ্চ, সচ্চঞ্চ পারং নিপুণং সুদুদ্দসং;

অজজ্জরং ধুৰং অপলোকিতং [অপলোকিযং (সী. ক.)], অনিদস্সনং নিপ্পপঞ্চ সন্তং.

‘‘অমতং পণীতঞ্চ সিৰঞ্চ খেমং, তণ্হাক্খযো অচ্ছরিযঞ্চ অব্ভুতং;

অনীতিকং অনীতিকধম্মং [নীতিকধম্মমেৰ ৰা (সী. ক.) পস্স সং. নি. ৪.৪০৯], নিব্বানমেতং সুগতেন দেসিতং.

‘‘অজাতং অভূতং অনুপদ্দৰঞ্চ, অকতং অসোকঞ্চ অথো ৰিসোকং;

অনূপসগ্গংনুপসগ্গধম্মং, নিব্বানমেতং সুগতেন দেসিতং.

‘‘গম্ভীরঞ্চেৰ দুপ্পস্সং, উত্তরঞ্চ অনুত্তরং;

অসমং অপ্পটিসমং, জেট্ঠং সেট্ঠন্তি ৰুচ্চতি.

‘‘লেণঞ্চ তাণং অরণং অনঙ্গণং, অকাচ মেতং ৰিমলন্তি ৰুচ্চতি;

দীপো সুখং অপ্পমাণং পতিট্ঠা, অকিঞ্চনং অপ্পপঞ্চন্তি ৰুত্ত’’ন্তি.

ধম্মানুস্সতিযা এতং ৰেৰচনং.

যথা চ সঙ্ঘানুস্সতিযং ৰুত্তং সুপ্পটিপন্নো উজুপ্পটিপন্নো ঞাযপ্পটিপন্নো সামীচিপ্পটিপন্নো যদিদং চত্তারি পুরিসযুগানি অট্ঠ পুরিসপুগ্গলা এস ভগৰতো সাৰকসঙ্ঘো আহুনেয্যো পাহুনেয্যো দক্খিণেয্যো অঞ্জলিকরণীযো অনুত্তরং পুঞ্ঞক্খেত্তং লোকস্স, সীলসম্পন্নো সমাধিসম্পন্নো পঞ্ঞাসম্পন্নো ৰিমুত্তিসম্পন্নো ৰিমুত্তিঞাণদস্সনসম্পন্নো সত্তানং সারো সত্তানং মণ্ডো সত্তানং উদ্ধারো সত্তানং এসিকা [এসিকো (ক.)] সত্তানং সুরভিপসূনং পুজ্জো দেৰানঞ্চ মনুস্সানঞ্চাতি সঙ্ঘানুস্সতিযা এতং ৰেৰচনং.

যথা চ সীলানুস্সতিযং ৰুত্তং যানি তানি সীলানি অখণ্ডানি অচ্ছিদ্দানি অসবলানি অকম্মাসানি অরিযানি অরিযকন্তানি ভুজিস্সানি ৰিঞ্ঞুপ্পসত্থানি অপরামট্ঠানি সমাধিসংৰত্তনিকানি, অলঙ্কারো চ সীলং উত্তমঙ্গোপসোভণতায, নিধানঞ্চ সীলং সব্বদোভগ্গসমতিক্কমনট্ঠেন, সিপ্পঞ্চ সীলং অক্খণৰেধিতায, ৰেলা চ সীলং অনতিক্কমনট্ঠেন, ধঞ্ঞঞ্চ সীলং দলিদ্দোপচ্ছেদনট্ঠেন [দল়িদ্দো… (সী.)], আদাসো চ সীলং ধম্মৰোলোকনতায, পাসাদো চ সীলং ৰোলোকনট্ঠেন, সব্বভূমানুপরিৰত্তি চ সীলং অমতপরিযোসানন্তি সীলানুস্সতিযা এতং ৰেৰচনং.

যথা চ চাগানুস্সতিযং ৰুত্তং যস্মিং সমযে অরিযসাৰকো অগারং অজ্ঝাৰসতি মুত্তচাগো পযতপাণি ৰোস্সগ্গরতো যাচযোগো দানসংৰিভাগরতোতি চাগানুস্সতিযা এতং ৰেৰচনং. তেনাহ আযস্মা মহাকচ্চাযনো ‘‘ৰেৰচনানি বহূনী’’তি.

নিযুত্তো ৰেৰচনো হারো.