৫. লক্খণহারৰিভঙ্গো

২৩. তত্থ কতমো লক্খণো হারো? ‘‘ৰুত্তম্হি একধম্মে’’তি, অযং লক্খণো হারো. কিং লক্খযতি? যে ধম্মা একলক্খণা, তেসং ধম্মানং একস্মিং ধম্মে ৰুত্তে অৰসিট্ঠা ধম্মা ৰুত্তা ভৰন্তি. যথা কিং ভৰে? যথাহ ভগৰা –

‘‘চক্খুং, ভিক্খৰে, অনৰট্ঠিতং ইত্তরং পরিত্তং পভঙ্গু পরতো দুক্খং ব্যসনং চলনং [চলং (সী.)] কুক্কুল়ং সঙ্খারং [সসঙ্খারং (ক.)] ৰধকং অমিত্তমজ্ঝে. ইমস্মিং চক্খুস্মিং ৰুত্তে অৰসিট্ঠানি অজ্ঝত্তিকানি আযতনানি ৰুত্তানি ভৰন্তি. কেন কারণেন? সব্বানি হি ছ অজ্ঝত্তিকানি আযতনানি ৰধকট্ঠেন একলক্খণানি. যথা চাহ ভগৰা –

‘‘অতীতে, রাধ, রূপে অনপেক্খো হোহি, অনাগতং রূপং মা অভিনন্দি [অভিনন্দ (ক.)], পচ্চুপ্পন্নস্স রূপস্স নিব্বিদায ৰিরাগায নিরোধায চাগায পটিনিস্সগ্গায পটিপজ্জ. ইমস্মিং রূপক্খন্ধে ৰুত্তে অৰসিট্ঠা খন্ধা ৰুত্তা ভৰন্তি. কেন কারণেন? সব্বে হি পঞ্চক্খন্ধা যমকোৰাদসুত্তে [পস্স সং. নি. ৩.৮৪] ৰধকট্ঠেন একলক্খণা ৰুত্তা. যথা চাহ ভগৰা –

‘‘যেসঞ্চ [পস্স ধ. প. ২৯৩] সুসমারদ্ধা, নিচ্চং কাযগতাসতি;

অকিচ্চং তে ন সেৰন্তি, কিচ্চে সাতচ্চকারিনো’’.

ইতি কাযগতায সতিযা ৰুত্তায ৰুত্তা ভৰন্তি ৰেদনাগতা সতি চিত্তগতা ধম্মগতা চ. তথা যং কিঞ্চি দিট্ঠং ৰা সুতং ৰা মুতং ৰাতি ৰুত্তে ৰুত্তং ভৰতি ৰিঞ্ঞাতং. যথা চাহ ভগৰা –

তস্মাতিহ ত্ৰং ভিক্খু কাযে কাযানুপস্সী ৰিহরাহি আতাপী সম্পজানো সতিমা ৰিনেয্য লোকে অভিজ্ঝাদোমনস্সং. ‘‘আতাপী’’তি ৰীরিযিন্দ্রিযং, ‘‘সম্পজানো’’তি পঞ্ঞিন্দ্রিযং, ‘‘সতিমা’’তি সতিন্দ্রিযং, ‘‘ৰিনেয্য লোকে অভিজ্ঝাদোমনস্স’’ন্তি সমাধিন্দ্রিযং, এৰং কাযে কাযানুপস্সিনো ৰিহরতো চত্তারো সতিপট্ঠানা ভাৰনাপারিপূরিং গচ্ছন্তি. কেন কারণেন, একলক্খণত্তা চতুন্নং ইন্দ্রিযানং.

২৪. চতূসু সতিপট্ঠানেসু ভাৰিযমানেসু চত্তারো সম্মপ্পধানা ভাৰনাপারিপূরিং গচ্ছন্তি, চতূসু সম্মপ্পধানেসু ভাৰিযমানেসু চত্তারো ইদ্ধিপাদা ভাৰিযমানেসু পঞ্চিন্দ্রিযানি ভাৰনাপারিপূরিং গচ্ছন্তি, চতূসু ইদ্ধিপাদেসু ভাৰনাপারিপূরিং গচ্ছন্তি, পঞ্চসু ইন্দ্রিযেসু ভাৰিযমানেসু পঞ্চ বলানি ভাৰনাপারিপূরিং গচ্ছন্তি, পঞ্চসু বলেসু ভাৰিযমানেসু সত্ত বোজ্ঝঙ্গা ভাৰনাপারিপূরিং গচ্ছন্তি, সত্তসু বোজ্ঝঙ্গেসু ভাৰিযমানেসু অরিযো অট্ঠঙ্গিকো মগ্গো ভাৰনাপারিপূরিং গচ্ছতি, সব্বেৰ [সব্বে চ (সী. ক.)] বোধঙ্গমা ধম্মা বোধিপক্খিযা ভাৰনাপারিপূরিং গচ্ছন্তি. কেন কারণেন, সব্বে হি বোধঙ্গমা বোধিপক্খিযা নেয্যানিকলক্খণেন একলক্খণা, তে একলক্খণত্তা ভাৰনাপারিপূরিং গচ্ছন্তি.

এৰং অকুসলাপি ধম্মা একলক্খণত্তা পহানং অব্ভত্থং গচ্ছন্তি. চতূসু সতিপট্ঠানেসু ভাৰিযমানেসু ৰিপল্লাসা পহীযন্তি, আহারা চস্স পরিঞ্ঞং গচ্ছন্তি, উপাদানেহি অনুপাদানো ভৰতি, যোগেহি চ ৰিসংযুত্তো ভৰতি, গন্থেহি চ ৰিপ্পযুত্তো ভৰতি, আসৰেহি চ অনাসৰো ভৰতি, ওঘেহি চ নিত্থিণ্ণো ভৰতি, সল্লেহি চ ৰিসল্লো ভৰতি, ৰিঞ্ঞাণট্ঠিতিযো চস্স পরিঞ্ঞং গচ্ছন্তি, অগতিগমনেহি ন অগতিং গচ্ছতি, এৰং অকুসলাপি ধম্মা একলক্খণত্তা পহানং অব্ভত্থং গচ্ছন্তি.

যত্থ ৰা পন রূপিন্দ্রিযং দেসিতং, দেসিতা তত্থেৰ রূপধাতু রূপক্খন্ধো রূপঞ্চাযতনং. যত্থ ৰা পন সুখা ৰেদনা দেসিতা, দেসিতং তত্থ সুখিন্দ্রিযং সোমনস্সিন্দ্রিযং দুক্খসমুদযো চ অরিযসচ্চং. যত্থ ৰা পন দুক্খা ৰেদনা দেসিতা, দেসিতং তত্থ দুক্খিন্দ্রিযং দোমনস্সিন্দ্রিযং দুক্খঞ্চ অরিযসচ্চং. যত্থ ৰা পন অদুক্খমসুখা ৰেদনা দেসিতা, দেসিতং তত্থ উপেক্খিন্দ্রিযং সব্বো চ পটিচ্চসমুপ্পাদো. কেন কারণেন, অদুক্খমসুখায হি ৰেদনায অৰিজ্জা অনুসেতি. অৰিজ্জাপচ্চযা সঙ্খারা, সঙ্খারপচ্চযা ৰিঞ্ঞাণং, ৰিঞ্ঞাণপচ্চযা নামরূপং, নামরূপপচ্চযা সল়াযতনং, সল়াযতনপচ্চযা ফস্সো, ফস্সপচ্চযা ৰেদনা, ৰেদনাপচ্চযা তণ্হা, তণ্হাপচ্চযা উপাদানং, উপাদানপচ্চযা ভৰো, ভৰপচ্চযা জাতি, জাতিপচ্চযা জরামরণং সোকপরিদেৰদুক্খদোমনস্সুপাযাসা সম্ভৰন্তি, এৰমেতস্স কেৰলস্স দুক্খক্খন্ধস্স সমুদযো হোতি. সো চ সরাগসদোসসমোহসংকিলেসপক্খেন হাতব্বো, ৰীতরাগৰীতদোসৰীতমোহঅরিযধম্মেহি হাতব্বো.

এৰং যে ধম্মা একলক্খণা কিচ্চতো চ লক্খণতো চ সামঞ্ঞতো চ চুতূপপাততো চ, তেসং ধম্মানং একস্মিং ধম্মে ৰুত্তে অৰসিট্ঠা ধম্মা ৰুত্তা ভৰন্তি. তেনাহ আযস্মা মহাকচ্চাযনো ‘‘ৰুত্তম্হি একধম্মে’’তি.

নিযুত্তো লক্খণো হারো.