৪. পদট্ঠানহারৰিভঙ্গো

২২. তত্থ কতমো পদট্ঠানো হারো? ‘‘ধম্মং দেসেতি জিনো’’তি, অযং পদট্ঠানো হারো. কিং দেসেতি? সব্বধম্মযাথাৰঅসম্পটিৰেধলক্খণা অৰিজ্জা, তস্সা ৰিপল্লাসা পদট্ঠানং. অজ্ঝোসানলক্খণা তণ্হা, তস্সা পিযরূপং সাতরূপং পদট্ঠানং. পত্থনলক্খণো লোভো, তস্স অদিন্নাদানং পদট্ঠানং. ৰণ্ণসণ্ঠানব্যঞ্জনগ্গহণলক্খণা সুভসঞ্ঞা, তস্সা ইন্দ্রিযা সংৰরো পদট্ঠানং. সাসৰফস্সউপগমনলক্খণা সুখসঞ্ঞা, তস্সা অস্সাদো পদট্ঠানং. সঙ্খতলক্খণানং ধম্মানং অসমনুপস্সনলক্খণা নিচ্চসঞ্ঞা, তস্সা ৰিঞ্ঞাণং পদট্ঠানং. অনিচ্চসঞ্ঞাদুক্খসঞ্ঞাঅসমনুপস্সনলক্খণা অত্তসঞ্ঞা, তস্সা নামকাযো পদট্ঠানং. সব্বধম্মসম্পটিৰেধলক্খণা ৰিজ্জা, তস্সা সব্বং নেয্যং পদট্ঠানং. চিত্তৰিক্খেপপটিসংহরণলক্খণো সমথো, তস্স অসুভা পদট্ঠানং. ইচ্ছাৰচরপটিসংহরণলক্খণো অলোভো, তস্স অদিন্নাদানা ৰেরমণী [ৰেরমণি (ক.)] পদট্ঠানং. অব্যাপজ্জলক্খণো অদোসো, তস্স পাণাতিপাতা ৰেরমণী পদট্ঠানং. ৰত্থুঅৰিপ্পটিপত্তিলক্খণো [ৰত্থুঅৰিপ্পটিপাদানলক্খণো (সী. ক.)] অমোহো, তস্স সম্মাপটিপত্তি পদট্ঠানং. ৰিনীলকৰিপুব্বকগহণলক্খণা অসুভসঞ্ঞা, তস্সা নিব্বিদা পদট্ঠানং. সাসৰফস্সপরিজাননলক্খণা দুক্খসঞ্ঞা, তস্সা ৰেদনা পদট্ঠানং. সঙ্খতলক্খণানং ধম্মানং সমনুপস্সনলক্খণা অনিচ্চসঞ্ঞা, তস্সা উপ্পাদৰযা পদট্ঠানং. সব্বধম্মঅভিনিৰেসলক্খণা অনত্তসঞ্ঞা, তস্সা ধম্মসঞ্ঞা পদট্ঠানং.

পঞ্চ কামগুণা কামরাগস্স পদট্ঠানং, পঞ্চিন্দ্রিযানি রূপীনি রূপরাগস্স পদট্ঠানং, ছট্ঠাযতনং ভৰরাগস্স পদট্ঠানং, নিব্বত্তভৰানুপস্সিতা পঞ্চন্নং উপাদানক্খন্ধানং পদট্ঠানং, পুব্বেনিৰাসানুস্সতিঞাণদস্সনস্স পদট্ঠানং. ওকপ্পনলক্খণা সদ্ধা অধিমুত্তিপচ্চুপট্ঠানা চ, অনাৰিললক্খণো পসাদো সম্পসীদনপচ্চুপট্ঠানো চ. অভিপত্থিযনলক্খণা সদ্ধা, তস্সা অৰেচ্চপসাদো পদট্ঠানং. অনাৰিললক্খণো পসাদো, তস্স সদ্ধা পদট্ঠানং. আরম্ভলক্খণং ৰীরিযং, তস্স সম্মপ্পধানং পদট্ঠানং. অপিলাপনলক্খণা সতি, তস্সা সতিপট্ঠানং পদট্ঠানং. একগ্গলক্খণো সমাধি, তস্স ঝানানি পদট্ঠানং. পজাননলক্খণা পঞ্ঞা, তস্সা সচ্চানি পদট্ঠানং.

অপরো নযো, অস্সাদমনসিকারলক্খণো অযোনিসোমনসিকারো, তস্স অৰিজ্জা পদট্ঠানং. সচ্চসম্মোহনলক্খণা অৰিজ্জা, সা সঙ্খারানং পদট্ঠানং. পুনব্ভৰৰিরোহণলক্খণা সঙ্খারা, তে [তং (ক.)] ৰিঞ্ঞাণস্স পদট্ঠানং. ওপপচ্চযিকনিব্বত্তিলক্খণং ৰিঞ্ঞাণং, তং নামরূপস্স পদট্ঠানং. নামকাযরূপকাযসঙ্ঘাতলক্খণং নামরূপং, তং ছল়াযতনস্স পদট্ঠানং. ইন্দ্রিযৰৰত্থানলক্খণং ছল়াযতনং, তং ফস্সস্স পদট্ঠানং. চক্খুরূপৰিঞ্ঞাণসন্নিপাতলক্খণো ফস্সো, সো ৰেদনায পদট্ঠানং. ইট্ঠানিট্ঠঅনুভৰনলক্খণা ৰেদনা, সা তণ্হায পদট্ঠানং. অজ্ঝোসানলক্খণা তণ্হা, সা উপাদানস্স পদট্ঠানং. ওপপচ্চযিকং উপাদানং, তং ভৰস্স পদট্ঠানং. নামকাযরূপকাযসম্ভৰনলক্খণো ভৰো, সো জাতিযা পদট্ঠানং. খন্ধপাতুভৰনলক্খণা জাতি, সা জরায পদট্ঠানং. উপধিপরিপাকলক্খণা জরা, সা মরণস্স পদট্ঠানং. জীৰিতিন্দ্রিযুপচ্ছেদলক্খণং মরণং, তং সোকস্স পদট্ঠানং. উস্সুক্ককারকো সোকো, সো পরিদেৰস্স পদট্ঠানং. লালপ্পকারকো পরিদেৰো, সো দুক্খস্স পদট্ঠানং. কাযসংপীল়নং দুক্খং, তং দোমনস্সস্স পদট্ঠানং. চিত্তসংপীল়নং দোমনস্সং, তং উপাযাসস্স পদট্ঠানং. ওদহনকারকো উপাযাসো, সো ভৰস্স পদট্ঠানং. ইমানি ভৰঙ্গানি যদা সমগ্গানি নিব্বত্তানি ভৰন্তি সো ভৰো, তং সংসারস্স পদট্ঠানং. নিয্যানিকলক্খণো মগ্গো, সো নিরোধস্স পদট্ঠানং.

তিত্থঞ্ঞুতা পীতঞ্ঞুতায পদট্ঠানং, পীতঞ্ঞুতা পত্তঞ্ঞুতায [মত্তঞ্ঞুতায (সী. ক.)] পদট্ঠানং, পত্তঞ্ঞুতা অত্তঞ্ঞুতায পদট্ঠানং, অত্তঞ্ঞুতা পুব্বেকতপুঞ্ঞতায পদট্ঠানং, পুব্বেকতপুঞ্ঞতা পতিরূপদেসৰাসস্স পদট্ঠানং, পতিরূপদেসৰাসো সপ্পুরিসূপনিস্সযস্স পদট্ঠানং, সপ্পুরিসূপনিস্সযো অত্তসম্মাপণিধানস্স পদট্ঠানং, অত্তসম্মাপণিধানং সীলানং পদট্ঠানং, সীলানি অৰিপ্পটিসারস্স পদট্ঠানং, অৰিপ্পটিসারো পামোজ্জস্স পদট্ঠানং, পামোজ্জং পীতিযা পদট্ঠানং, পীতি পস্সদ্ধিযা পদট্ঠানং, পস্সদ্ধি সুখস্স পদট্ঠানং, সুখং সমাধিস্স পদট্ঠানং, সমাধি যথাভূতঞাণদস্সনস্স পদট্ঠানং, যথাভূতঞাণদস্সনং নিব্বিদায পদট্ঠানং, নিব্বিদা ৰিরাগস্স পদট্ঠানং, ৰিরাগো ৰিমুত্তিযা পদট্ঠানং. ৰিমুত্তি ৰিমুত্তিঞাণদস্সনস্স পদট্ঠানং. এৰং যো কোচি উপনিস্সযো যো কোচি পচ্চযো, সব্বো সো পদট্ঠানং. তেনাহ আযস্মা মহাকচ্চাযনো ‘‘ধম্মং দেসেতি জিনো’’তি.

নিযুত্তো পদট্ঠানো হারো.