১৩. সোধনহারৰিভঙ্গো

৪৫. তত্থ কতমো সোধনো হারো? ‘‘ৰিস্সজ্জিতম্হি পঞ্হে’’তিগাথা. যথা আযস্মা অজিতো পারাযনে ভগৰন্তং পঞ্হং পুচ্ছতি –

‘‘কেনস্সু নিৰুতো লোকো, কেনস্সু নপ্পকাসতি;

কিস্সাভিলেপনং ব্রূসি, কিংসু তস্স মহব্ভয’’ন্তি.

‘‘অৰিজ্জায নিৰুতো লোকো, [অজিতাতি ভগৰা]

ৰিৰিচ্ছা পমাদা নপ্পকাসতি;

জপ্পাভিলেপনং ব্রূমি, দুক্খমস্স মহব্ভয’’ন্তি.

‘‘কেনস্সু নিৰুতো লোকো’’তি পঞ্হে ‘‘অৰিজ্জায নিৰুতো লোকো’’তি ভগৰা পদং সোধেতি, নো চ আরম্ভং. ‘‘কেনস্সু নপ্পকাসতী’’তি পঞ্হে ‘‘ৰিৰিচ্ছা পমাদা নপ্পকাসতী’’তি ভগৰা পদং সোধেতি, নো চ আরম্ভং. ‘‘কিস্সাভিলেপনং ব্রূসী’’তি পঞ্হে ‘‘জপ্পাভিলেপনং ব্রূমী’’তি ভগৰা পদং সোধেতি, নো চ আরম্ভং. ‘‘কিংসু তস্স মহব্ভয’’ন্তি পঞ্হে ‘‘দুক্খমস্স মহব্ভয’’ন্তি সুদ্ধো আরম্ভো. তেনাহ ভগৰা ‘‘অৰিজ্জায নিৰুতো লোকো’’তি.

‘‘সৰন্তি সব্বধি সোতা, [ইচ্চাযস্মা অজিতো]

সোতানং কিং নিৰারণং;

সোতানং সংৰরং ব্রূহি, কেন সোতা পিধীযরে’’তি.

‘‘যানি সোতানি লোকস্মিং, [অজিতাতি ভগৰা]

সতি তেসং নিৰারণং;

সোতানং সংৰরং ব্রূমি, পঞ্ঞাযেতে পিধীযরে’’তি.

‘‘সৰন্তি সব্বধি সোতা, সোতানং কিং নিৰারণ’’ন্তি পঞ্হে ‘‘যানি সোতানি লোকস্মিং, সতি তেসং নিৰারণ’’ন্তি ভগৰা পদং সোধেতি, নো চ আরম্ভং. ‘‘সোতানং সংৰরং ব্রূহি, কেন সোতা পিধীযরে’’তি পঞ্হে ‘‘সোতানং সংৰরং ব্রূমি, পঞ্ঞাযেতে পিধীযরে’’তি সুদ্ধো আরম্ভো. তেনাহ ভগৰা ‘‘যানি সোতানি লোকস্মি’’ন্তি.

‘‘পঞ্ঞা চেৰ সতি চ, [ইচ্চাযস্মা অজিতো]

নামরূপঞ্চ [নামং রূপঞ্চ (ক.) পস্স সু. নি. ১০৪২] মারিস;

এতং মে পুট্ঠো পব্রূহি, কত্থেতং উপরুজ্ঝতী’’তি.

পঞ্হে –

‘‘যমেতং পঞ্হং অপুচ্ছি, অজিত তং ৰদামি তে;

যত্থ নামঞ্চ রূপঞ্চ, অসেসং উপরুজ্ঝতি;

ৰিঞ্ঞাণস্স নিরোধেন, এত্থেতং উপরুজ্ঝতী’’তি.

সুদ্ধো আরম্ভো. তেনাহ ভগৰা ‘‘যমেতং পঞ্হং অপুচ্ছী’’তি. যত্থ এৰং সুদ্ধো আরম্ভো, সো পঞ্হো ৰিসজ্জিতো ভৰতি. যত্থ পন আরম্ভো অসুদ্ধো, ন তাৰ সো পঞ্হো ৰিসজ্জিতো ভৰতি. তেনাহ আযস্মা মহাকচ্চাযনো ‘‘ৰিস্সজ্জিতম্হি পঞ্হে’’তি.

নিযুত্তো সোধনো হারো.