১২. ওতরণহারৰিভঙ্গো

৪২. তত্থ কতমো ওতরণো হারো? ‘‘যো চ পটিচ্চুপ্পাদো’’তি.

‘‘উদ্ধং অধো সব্বধি ৰিপ্পমুত্তো, অযং অহস্মীতি [অযমহমস্মীতি (সী.) পস্স উদা. ৬১] অনানুপস্সী;

এৰং ৰিমুত্তো উদতারি ওঘং, অতিণ্ণপুব্বং অপুনব্ভৰাযা’’তি.

‘‘উদ্ধ’’ন্তি রূপধাতু চ অরূপধাতু চ. ‘‘অধো’’তি কামধাতু. ‘‘সব্বধি ৰিপ্পমুত্তো’’তি তেধাতুকে অযং অসেক্খাৰিমুত্তি. তানিযেৰ অসেক্খানি পঞ্চিন্দ্রিযানি, অযং ইন্দ্রিযেহি ওতরণা.

তানিযেৰ অসেক্খানি পঞ্চিন্দ্রিযানি ৰিজ্জা, ৰিজ্জুপ্পাদা অৰিজ্জানিরোধো, অৰিজ্জানিরোধা সঙ্খারনিরোধো, সঙ্খারনিরোধা ৰিঞ্ঞাণনিরোধো, ৰিঞ্ঞাণনিরোধা নামরূপনিরোধো, নামরূপনিরোধা সল়াযতননিরোধো, সল়াযতননিরোধা ফস্সনিরোধো, ফস্সনিরোধা ৰেদনানিরোধো, ৰেদনানিরোধা তণ্হানিরোধো, তণ্হানিরোধা উপাদাননিরোধো, উপাদাননিরোধা ভৰনিরোধো, ভৰনিরোধা জাতিনিরোধো, জাতিনিরোধা জরামরণং সোকপরিদেৰদুক্খদোমনস্সুপাযাসা নিরুজ্ঝন্তি. এৰমেতস্স কেৰলস্স দুক্খক্খন্ধস্স নিরোধো হোতি. অযং পটিচ্চসমুপ্পাদেহি ওতরণা.

তানিযেৰ অসেক্খানি পঞ্চিন্দ্রিযানি তীহি খন্ধেহি সঙ্গহিতানি – সীলক্খন্ধেন সমাধিক্খন্ধেন পঞ্ঞাক্খন্ধেন, অযং খন্ধেহি ওতরণা.

তানিযেৰ অসেক্খানি পঞ্চিন্দ্রিযানি সঙ্খারপরিযাপন্নানি যে সঙ্খারা অনাসৰা, নো চ ভৰঙ্গা, তে সঙ্খারা ধম্মধাতুসঙ্গহিতা. অযং ধাতূহি ওতরণা.

সা ধম্মধাতু ধম্মাযতনপরিযাপন্না, যং আযতনং অনাসৰং, নো চ ভৰঙ্গং. অযং আযতনেহি ওতরণা.

‘‘অযং অহস্মীতি অনানুপস্সী’’তি অযং সক্কাযদিট্ঠিযা সমুগ্ঘাতো, সা সেক্খাৰিমুত্তি, তানিযেৰ সেক্খানি পঞ্চিন্দ্রিযানি. অযং ইন্দ্রিযেহি ওতরণা.

তানিযেৰ সেক্খানি পঞ্চিন্দ্রিযানি ৰিজ্জা, ৰিজ্জুপ্পাদা অৰিজ্জানিরোধো, অৰিজ্জানিরোধা সঙ্খারনিরোধো, এৰং সব্বো পটিচ্চসমুপ্পাদো. অযং পটিচ্চসমুপ্পাদেহি ওতরণা.

সাযেৰ ৰিজ্জা পঞ্ঞাক্খন্ধো. অযং খন্ধেহি ওতরণা.

সাযেৰ ৰিজ্জা সঙ্খারপরিযাপন্না, যে সঙ্খারা অনাসৰা, নো চ ভৰঙ্গা, তে সঙ্খারা ধম্মধাতুসঙ্গহিতা, অযং ধাতূহি ওতরণা.

সা ধম্মধাতু ধম্মাযতনপরিযাপন্না, যং আযতনং অনাসৰং, নো চ ভৰঙ্গং, অযং আযতনেহি ওতরণা.

সেক্খায চ ৰিমুত্তিযা অসেক্খায চ ৰিমুত্তিযা ৰিমুত্তো উদতারি ওঘং অতিণ্ণপুব্বং অপুনব্ভৰায. তেনাহ ভগৰা ‘‘উদ্ধং অধো’’তি.

৪৩. ‘‘নিস্সিতস্স [পস্স উদা. ৭৪] চলিতং, অনিস্সিতস্স চলিতং নত্থি, চলিতে অসতি পস্সদ্ধি, পস্সদ্ধিযা সতি নতি ন হোতি, নতিযা অসতি আগতিগতি ন হোতি, আগতিগতিযা অসতি চুতূপপাতো ন হোতি, চুতূপপাতে অসতি নেৰিধ ন হুরং ন উভযমন্তরেন এসেৰন্তো দুক্খস্সা’’তি.

‘‘নিস্সিতস্স চলিত’’ন্তি নিস্সযো নাম দুৰিধো তণ্হানিস্সযো চ দিট্ঠিনিস্সযো চ. তত্থ যা রত্তস্স চেতনা, অযং তণ্হানিস্সযো; যা মূল়্হস্স চেতনা, অযং দিট্ঠিনিস্সযো. চেতনা পন সঙ্খারা, সঙ্খারপচ্চযা ৰিঞ্ঞাণং, ৰিঞ্ঞাণপচ্চযা নামরূপং, এৰং সব্বো পটিচ্চসমুপ্পাদো. অযং পটিচ্চসমুপ্পাদেহি ওতরণা.

তত্থ যা রত্তস্স ৰেদনা, অযং সুখা ৰেদনা. যা সম্মূল়্হস্স ৰেদনা, অযং অদুক্খমসুখা ৰেদনা, ইমা দ্ৰে ৰেদনা ৰেদনাক্খন্ধো. অযং খন্ধেহি ওতরণা.

তত্থ সুখা ৰেদনা দ্ৰে ইন্দ্রিযানি সুখিন্দ্রিযং সোমনস্সিন্দ্রিযঞ্চ, অদুক্খমসুখা ৰেদনা উপেক্খিন্দ্রিযং. অযং ইন্দ্রিযেহি ওতরণা.

তানিযেৰ ইন্দ্রিযানি সঙ্খারপরিযাপন্নানি, যে সঙ্খারা সাসৰা ভৰঙ্গা, তে সঙ্খারা ধম্মধাতুসঙ্গহিতা. অযং ধাতূহি ওতরণা.

সা ধম্মধাতু ধম্মাযতনপরিযাপন্না, যং আযতনং সাসৰং ভৰঙ্গং, অযং আযতনেহি ওতরণা.

‘‘অনিস্সিতস্স চলিতং নত্থী’’তি সমথৰসেন ৰা তণ্হায অনিস্সিতো ৰিপস্সনাৰসে ৰা দিট্ঠিযা অনিস্সিতো. যা ৰিপস্সনা অযং ৰিজ্জা, ৰিজ্জুপ্পাদা অৰিজ্জানিরোধো, অৰিজ্জানিরোধা সঙ্খারনিরোধো, সঙ্খারনিরোধা ৰিঞ্ঞাণনিরোধো, এৰং সব্বো পটিচ্চসমুপ্পাদো. অযং পটিচ্চসমুপ্পাদেহি ওতরণা.

সাযেৰ ৰিপস্সনা পঞ্ঞাক্খন্ধো. অযং খন্ধেহি ওতরণা.

সাযেৰ ৰিপস্সনা দ্ৰে ইন্দ্রিযানি – ৰীরিযিন্দ্রিযঞ্চ পঞ্ঞিন্দ্রিযঞ্চ. অযং ইন্দ্রিযেহি ওতরণা.

সাযেৰ ৰিপস্সনা সঙ্খারপরিযাপন্না, যে সঙ্খারা অনাসৰা, নো চ ভৰঙ্গা, তে সঙ্খারা ধম্মধাতুসঙ্গহিতা. অযং ধাতূহি ওতরণা.

সা ধম্মধাতু ধম্মাযতনপরিযাপন্না, যং আযতনং অনাসৰং, নো চ ভৰঙ্গং. অযং আযতনেহি ওতরণা.

‘‘পস্সদ্ধিযা সতী’’তি দুৰিধা পস্সদ্ধি কাযিকা চ চেতসিকা চ. যং কাযিকং সুখং, অযং কাযপস্সদ্ধি. যং চেতসিকং সুখং, অযং চেতসিকা পস্সদ্ধি. পস্সদ্ধকাযো সুখং ৰেদিযতি [ৰেদযতি (ক.)], সুখিনো চিত্তং সমাধিযতি, সমাহিতো যথাভূতং পজানাতি, যথাভূতং পজানন্তো নিব্বিন্দতি, নিব্বিন্দন্তো ৰিরজ্জতি, ৰিরাগা ৰিমুচ্চতি, ৰিমুত্তস্মিং ‘‘ৰিমুত্ত’’মিতি [ৰিমুত্তম্হীতি (সী. ক.)] ঞাণং হোতি, ‘‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’’তি পজানাতি. সো ন নমতি রূপেসু, ন সদ্দেসু, ন গন্ধেসু, ন রসেসু, ন ফোট্ঠব্বেসু, ন ধম্মেসু খযা রাগস্স খযা দোসস্স খযা মোহস্স যেন রূপেন তথাগতং তিট্ঠন্তং চরন্তং পঞ্ঞাপযমানো পঞ্ঞাপেয্য, তস্স রূপস্স খযা ৰিরাগা নিরোধা চাগা পটিনিস্সগ্গা রূপসঙ্খযে ৰিমুত্তো, তথাগতো অত্থীতিপি ন উপেতি, নত্থীতিপি ন উপেতি, অত্থি নত্থীতিপি ন উপেতি, নেৰত্থি নো নত্থীতিপি ন উপেতি. অথ খো গম্ভীরো অপ্পমেয্যো অসঙ্খেয্যো নিব্বুতোতিযেৰ সঙ্খং গচ্ছতি খযা রাগস্স, খযা দোসস্স, খযা মোহস্স.

যায ৰেদনায…পে… যায সঞ্ঞায. যেহি সঙ্খারেহি. যেন ৰিঞ্ঞাণেন তথাগতং তিট্ঠন্তং চরন্তং পঞ্ঞাপযমানো পঞ্ঞাপেয্য, তস্স ৰিঞ্ঞাণস্স খযা ৰিরাগা নিরোধা চাগা পটিনিস্সগ্গা ৰিঞ্ঞাণসঙ্খযে ৰিমুত্তো, তথাগতো অত্থীতিপি ন উপেতি, নত্থীতিপি ন উপেতি, অত্থি নত্থীতিপি ন উপেতি, নেৰত্থি নো নত্থীতিপি ন উপেতি. অথ খো গম্ভীরো অপ্পমেয্যো অসঙ্খেয্যো নিব্বুতোতিযেৰ সঙ্খং গচ্ছতি খযা রাগস্স, খযা দোসস্স, খযা মোহস্স. ‘‘আগতী’’তি ইধাগতি. ‘‘গতী’’তি পেচ্চভৰো. আগতিগতীপি ন ভৰন্তি, ‘‘নেৰিধা’’তি ছসু অজ্ঝত্তিকেসু আযতনেসু. ‘‘ন হুর’’ন্তি ছসু বাহিরেসু আযতনেসু. ‘‘ন উভযমন্তরেনা’’তি ফস্সসমুদিতেসু ধম্মেসু অত্তানং ন পস্সতি. ‘‘এসেৰন্তো দুক্খস্সা’’তি পটিচ্চসমুপ্পাদো. সো দুৰিধো লোকিযো চ লোকুত্তরো চ. তত্থ লোকিযো অৰিজ্জাপচ্চযা সঙ্খারা, যাৰ জরামরণা. লোকুত্তরো সীলৰতো অৰিপ্পটিসারো জাযতি, যাৰ নাপরং ইত্থত্তাযাতি পজানাতি. তেনাহ ভগৰা ‘‘নিস্সিতস্স চলিতং অনিস্সিতস্স চলিতং নত্থি…পে… এসেৰন্তো দুক্খস্সা’’তি.

৪৪. ‘‘যে কেচি সোকা পরিদেৰিতা ৰা, দুক্খা [দুক্খং (সী. ক.) পস্স উদা. ৭৮] চ লোকস্মিমনেকরূপা;

পিযং পটিচ্চপ্পভৰন্তি এতে, পিযে অসন্তে ন ভৰন্তি এতে.

তস্মা হি তে সুখিনো ৰীতসোকা, যেসং পিযং নত্থি কুহিঞ্চি লোকে;

তস্মা অসোকং ৰিরজং পত্থযানো, পিযং ন কযিরাথ কুহিঞ্চি লোকে’’তি.

‘‘যে কেচি সোকা পরিদেৰিতা ৰা, দুক্খা চ লোকস্মিমনেকরূপা পিযং পটিচ্চপ্পভৰন্তি এতে’’তি – অযং দুক্খা ৰেদনা. ‘‘পিযে অসন্তে ন ভৰন্তি এতে’’তি – অযং সুখা ৰেদনা. ৰেদনা ৰেদনাক্খন্ধো. অযং খন্ধেহি ওতরণা.

ৰেদনাপচ্চযা তণ্হা, তণ্হাপচ্চযা উপাদানং, উপাদানপচ্চযা ভৰো, ভৰপচ্চযা জাতি, জাতিপচ্চযা জরামরণং, এৰং সব্বং. অযং পটিচ্চসমুপ্পাদেহি ওতরণা.

তত্থ সুখা ৰেদনা দ্ৰে ইন্দ্রিযানি – সুখিন্দ্রিযং সোমনস্সিন্দ্রিযঞ্চ. দুক্খা ৰেদনা দ্ৰে ইন্দ্রিযানি – দুক্খিন্দ্রিযং দোমনস্সিন্দ্রিযঞ্চ. অযং ইন্দ্রিযেহি ওতরণা.

তানিযেৰ ইন্দ্রিযানি সঙ্খারপরিযাপন্নানি, যে সঙ্খারা সাসৰা ভৰঙ্গা, তে সঙ্খারা ধম্মধাতুসঙ্গহিতা. অযং ধাতূহি ওতরণা.

সা ধম্মধাতু ধম্মাযতনপরিযাপন্না, যং আযতনং সাসৰং ভৰঙ্গং. অযং আযতনেহি ওতরণা.

তস্মা হি তে সুখিনো ৰীতসোকা, যেসং পিযং নত্থি কুহিঞ্চি লোকে;

তস্মা অসোকং ৰিরজং পত্থযানো, পিযং ন কযিরাথ কুহিঞ্চি লোকেতি.

ইদং তণ্হাপহানং. তণ্হানিরোধা উপাদাননিরোধো, উপাদাননিরোধা ভৰনিরোধো, এৰং সব্বং. অযং পটিচ্চসমুপ্পাদেহি ওতরণা.

তংযেৰ তণ্হাপহানং সমথো. সো সমথো দ্ৰে ইন্দ্রিযানি সতিন্দ্রিযং সমাধিন্দ্রিযঞ্চ. অযং ইন্দ্রিযেহি ওতরণা.

সোযেৰ সমথো সমাধিক্খন্ধো. অযং খন্ধেহি ওতরণা.

সোযেৰ সমথো সঙ্খারপরিযাপন্নো, যে সঙ্খারা অনাসৰা, নো চ ভৰঙ্গা, তে সঙ্খারা ধম্মধাতুসঙ্গহিতা. অযং ধাতূহি ওতরণা.

সা ধম্মধাতু ধম্মাযতনপরিযাপন্না, যং আযতনং অনাসৰং, নো চ ভৰঙ্গং. অযং আযতনেহি ওতরণা. তেনাহ ভগৰা ‘‘যে কেচি সোকা’’তি.

কামং কামযমানস্স, তস্স চে তং সমিজ্ঝতি;

অদ্ধা পীতিমনো হোতি, লদ্ধা মচ্চো যদিচ্ছতি.

তস্স চে কামযানস্স, ছন্দজাতস্স জন্তুনো;

তে কামা পরিহাযন্তি, সল্লৰিদ্ধোৰ রুপ্পতি.

যো কামে পরিৰজ্জেতি, সপ্পস্সেৰ [সব্বস্সেৰ (ক.) পস্স সু. নি. ৭৭৪] পদা সিরো;

সোমং ৰিসত্তিকং লোকে, সতো সমতিৰত্ততীতি.

তত্থ যা পীতিমনতা, অযং অনুনযো. যদাহ সল্লৰিদ্ধোৰ রুপ্পতীতি, ইদং পটিঘং. অনুনযং পটিঘঞ্চ পন তণ্হাপক্খো, তণ্হায চ পন দসরূপীনি আযতনানি পদট্ঠানং. অযং আযতনেহি ওতরণা.

তানিযেৰ দস রূপীনি রূপকাযো নামসম্পযুত্তো, তদুভযং নামরূপং, নামরূপপচ্চযা সল়াযতনং, সল়াযতনপচ্চযা ফস্সো, ফস্সপচ্চযা ৰেদনা, ৰেদনাপচ্চযা তণ্হা, এৰং সব্বং. অযং পটিচ্চসমুপ্পাদেহি ওতরণা.

তদেৰ নামরূপং পঞ্চক্খন্ধো; অযং খন্ধেহি ওতরণা;

তদেৰ নামরূপং অট্ঠারস ধাতুযো; অযং ধাতূহি ওতরণা;

তত্থ যো রূপকাযো ইমানি পঞ্চ রূপীনি ইন্দ্রিযানি, যো নামকাযো ইমানি পঞ্চ অরূপীনি ইন্দ্রিযানি, ইমানি দস ইন্দ্রিযানি. অযং ইন্দ্রিযেহি ওতরণা.

তত্থ যদাহ –

‘‘যো কামে পরিৰজ্জেতি, সপ্পস্সেৰ পদা সিরো;

সোমং ৰিসত্তিকং লোকে, সতো সমতিৰত্ততী’’তি.

অযং সউপাদিসেসা নিব্বানধাতু, অযং ধাতূহি ওতরণা.

সাযেৰ সউপাদিসেসা নিব্বানধাতু ৰিজ্জা, ৰিজ্জুপ্পাদা অৰিজ্জানিরোধো, অৰিজ্জানিরোধা সঙ্খারনিরোধো, এৰং সব্বং. অযং পটিচ্চসমুপ্পাদেহি ওতরণা.

সাযেৰ ৰিজ্জা পঞ্ঞাক্খন্ধো. অযং খন্ধেহি ওতরণা.

সাযেৰ ৰিজ্জা দ্ৰে ইন্দ্রিযানি – ৰীরিযিন্দ্রিযং পঞ্ঞিন্দ্রিযঞ্চ. অযং ইন্দ্রিযেহি ওতরণা.

সাযেৰ ৰিজ্জা সঙ্খারপরিযাপন্না, যে সঙ্খারা অনাসৰা, নো চ ভৰঙ্গা, তে সঙ্খারা ধম্মধাতুসঙ্গহিতা. অযং ধাতূহি ওতরণা.

সা ধম্মধাতু ধম্মাযতনপরিযাপন্না, যং আযতনং অনাসৰং, নো চ ভৰঙ্গং. অযং আযতনেহি ওতরণা. তেনাহ ভগৰা ‘‘কামং কামযমানস্সা’’তি.

এত্তাৰতা পটিচ্চ ইন্দ্রিযখন্ধধাতুআযতনানি সমোসরণোতরণানি ভৰন্তি. এৰং পটিচ্চ ইন্দ্রিযখন্ধধাতুআযতনানি ওতারেতব্বানি. তেনাহ আযস্মা মহাকচ্চাযনো ‘‘যো চ পটিচ্চুপ্পাদো’’তি.

নিযুত্তো ওতরণো হারো.