৯. তোদেয্যমাণৰপুচ্ছানিদ্দেসো

৫৭. যস্মিং কামা ন ৰসন্তি, [ইচ্চাযস্মা তোদেয্যো]

তণ্হা যস্স ন ৰিজ্জতি;

কথংকথা চ যো তিণ্ণো, ৰিমোক্খো তস্স কীদিসো.

যস্মিং কামা ন ৰসন্তীতি যস্মিং কামা ন ৰসন্তি ন সংৰসন্তি ন আৰসন্তি ন পরিৰসন্তীতি – যস্মিং কামা ন ৰসন্তি. ইচ্চাযস্মা তোদেয্যোতি. ইচ্চাতি পদসন্ধি…পে… পদানুপুব্বতাপেতং – ইচ্চাতি. আযস্মাতি পিযৰচনং…পে…. তোদেয্যোতি তস্স ব্রাহ্মণস্স নামং…পে… অভিলাপোতি – ইচ্চাযস্মা তোদেয্যো.

তণ্হা যস্স ন ৰিজ্জতীতি তণ্হা যস্স নত্থি ন সতি ন সংৰিজ্জতি নুপলব্ভতি ঞাণগ্গিনা দড্ঢাতি – তণ্হা যস্স ন ৰিজ্জতি.

কথংকথা চ যো তিণ্ণোতি কথংকথা চ যো তিণ্ণো উত্তিণ্ণো নিত্থিণ্ণো অতিক্কন্তো সমতিক্কন্তো ৰীতিৰত্তোতি – কথংকথা চ যো তিণ্ণো.

ৰিমোক্খো তস্স কীদিসোতি ৰিমোক্খো তস্স কীদিসো কিংসণ্ঠিতো কিংপকারো কিংপটিভাগো ইচ্ছিতব্বোতি ৰিমোক্খং পুচ্ছতীতি – ৰিমোক্খো তস্স কীদিসো. তেনাহ সো ব্রাহ্মণো –

‘‘যস্মিং কামা ন ৰসন্তি, [ইচ্চাযস্মা তোদেয্যো]

তণ্হা যস্স ন ৰিজ্জতি;

কথংকথা চ যো তিণ্ণো, ৰিমোক্খো তস্স কীদিসো’’তি.

৫৮. যস্মিং কামা ন ৰসন্তি, [তোদেয্যাতি ভগৰা]

তণ্হা যস্স ন ৰিজ্জতি;

কথংকথা চ যো তিণ্ণো, ৰিমোক্খো তস্স নাপরো.

যস্মিং কামা ন ৰসন্তীতি. যস্মিন্তি যস্মিং পুগ্গলে অরহন্তে খীণাসৰে. কামাতি উদ্দানতো দ্ৰে কামা – ৰত্থুকামা চ কিলেসকামা চ…পে… ইমে ৰুচ্চন্তি ৰত্থুকামা…পে… ইমে ৰুচ্চন্তি কিলেসকামা. যস্মিং কামা ন ৰসন্তীতি যস্মিং কামা ন ৰসন্তি ন সংৰসন্তি ন আৰসন্তি ন পরিৰসন্তীতি – যস্মিং কামা ন ৰসন্তি.

তোদেয্যাতি ভগৰাতি. তোদেয্যাতি ভগৰা তং ব্রাহ্মণং নামেন আলপতি. ভগৰাতি গারৰাধিৰচনমেতং…পে… সচ্ছিকা পঞ্ঞত্তি, যদিদং ভগৰাতি – তোদেয্যাতি ভগৰা.

তণ্হা যস্স ন ৰিজ্জতীতি. তণ্হাতি রূপতণ্হা সদ্দতণ্হা গন্ধতণ্হা রসতণ্হা ফোট্ঠব্বতণ্হা ধম্মতণ্হা. যস্সাতি অরহতো খীণাসৰস্স. তণ্হা যস্স ন ৰিজ্জতীতি তণ্হা যস্স নত্থি ন সতি ন সংৰিজ্জতি নুপলব্ভতি, পহীনা সমুচ্ছিন্না ৰূপসন্তা পটিপ্পস্সদ্ধা অভব্বুপ্পত্তিকা ঞাণগ্গিনা দড্ঢাতি – তণ্হা যস্স ন ৰিজ্জতি.

কথংকথা চ যো তিণ্ণোতি কথংকথা ৰুচ্চতি ৰিচিকিচ্ছা. দুক্খে কঙ্খা…পে… ছম্ভিতত্তং চিত্তস্স মনোৰিলেখো. যোতি যো সো অরহং খীণাসৰো. কথংকথা চ যো তিণ্ণোতি কথংকথা চ যো তিণ্ণো উত্তিণ্ণো নিত্থিণ্ণো অতিক্কন্তো সমতিক্কন্তো ৰীতিৰত্তোতি – কথংকথা চ যো তিণ্ণো.

ৰিমোক্খো তস্স নাপরোতি নত্থি তস্স অপরো ৰিমোক্খো. যেন ৰিমোক্খেন ৰিমুচ্চেয্য ৰিমুত্তো সো. কতং তস্স ৰিমোক্খেন করণীযন্তি – ৰিমোক্খো তস্স নাপরো. তেনাহ ভগৰা –

‘‘যস্মিং কামা ন ৰসন্তি, [তোদেয্যাতি ভগৰা]

তণ্হা যস্স ন ৰিজ্জতি;

কথংকথা চ যো তিণ্ণো, ৰিমোক্খো তস্স নাপরো’’তি.

৫৯. নিরাসসো সো উদ আসসানো, পঞ্ঞাণৰা সো উদ পঞ্ঞকপ্পী;

মুনিং অহং সক্ক যথা ৰিজঞ্ঞং, তং মে ৰিযাচিক্খ সমন্তচক্খু.

নিরাসসো সো উদ আসসানোতি নিত্তণ্হো সো, উদাহু সতণ্হো রূপে আসীসতি [আসিংসতি (স্যা.)], সদ্দে…পে… গন্ধে… রসে… ফোট্ঠব্বে… কুলং… গণং… আৰাসং… লাভং… যসং… পসংসং… সুখং… চীৰরং… পিণ্ডপাতং… সেনাসনং… গিলানপচ্চযভেসজ্জপরিক্খারং… কামধাতুং … রূপধাতুং… অরূপধাতুং… কামভৰং… রূপভৰং… অরূপভৰং… সঞ্ঞাভৰং… অসঞ্ঞাভৰং… নেৰসঞ্ঞানাসঞ্ঞাভৰং… একৰোকারভৰং… চতুৰোকারভৰং… পঞ্চৰোকারভৰং… অতীতং… অনাগতং… পচ্চুপ্পন্নং… দিট্ঠসুতমুতৰিঞ্ঞাতব্বে ধম্মে আসীসতি সাদিযতি পত্থেতি পিহেতি অভিজপ্পতীতি – নিরাসসো সো উদ আসসানো.

পঞ্ঞাণৰা সো উদ পঞ্ঞকপ্পীতি. পঞ্ঞাণৰা সোতি পণ্ডিতো পঞ্ঞৰা বুদ্ধিমা ঞাণী ৰিভাৰী মেধাৰী. উদ পঞ্ঞকপ্পীতি উদাহু অট্ঠসমাপত্তিঞাণেন ৰা পঞ্চাভিঞ্ঞাঞাণেন ৰা মিচ্ছাঞাণেন ৰা তণ্হাকপ্পং ৰা দিট্ঠিকপ্পং ৰা কপ্পেতি জনেতি সঞ্জনেতি নিব্বত্তেতি অভিনিব্বত্তেতীতি – পঞ্ঞাণৰা সো উদ পঞ্ঞকপ্পী.

মুনিং অহং সক্ক যথা ৰিজঞ্ঞন্তি. সক্কাতি সক্কো ভগৰা. সক্যকুলা পব্বজিতোতিপি সক্কো. অথ ৰা, অড্ঢো মহদ্ধনো ধনৰাতিপি সক্কো. তস্সিমানি ধনানি, সেয্যথিদং – সদ্ধাধনং সীলধনং হিরিধনং ওত্তপ্পধনং সুতধনং চাগধনং পঞ্ঞাধনং সতিপট্ঠানধনং সম্মপ্পধানধনং ইদ্ধিপাদধনং ইন্দ্রিযধনং বলধনং বোজ্ঝঙ্গধনং মগ্গধনং ফলধনং নিব্বানধনন্তি. তেহি অনেকৰিধেহি ধনরতনেহি অড্ঢো মহদ্ধনো ধনৰাতিপি সক্কো. অথ ৰা, পহু ৰিসৰী অলমত্তো সূরো ৰীরো ৰিক্কন্তো অভীরূ অচ্ছম্ভী অনুত্রাসী অপলাযী পহীনভযভেরৰো ৰিগতলোমহংসোতিপি সক্কো. মুনিং অহং সক্ক যথা ৰিজঞ্ঞন্তি সক্ক যথাহং মুনিং জানেয্যং আজানেয্যং ৰিজানেয্যং পটিৰিজানেয্যং পটিৰিজ্ঝেয্যন্তি – মুনিং অহং সক্ক যথা ৰিজঞ্ঞং.

তং মে ৰিযাচিক্খ সমন্তচক্খূতি. তন্তি যং পুচ্ছামি যং যাচামি যং অজ্ঝেসামি যং পসাদেমি. ৰিযাচিক্খাতি আচিক্খাহি দেসেহি পঞ্ঞপেহি পট্ঠপেহি ৰিৰরাহি ৰিভজাহি উত্তানীকরোহি পকাসেহি. সমন্তচক্খূতি সমন্তচক্খু ৰুচ্চতি সব্বঞ্ঞুতঞাণং…পে… তথাগতো তেন সমন্তচক্খূতি – তং মে ৰিযাচিক্খ সমন্তচক্খু. তেনাহ সো ব্রাহ্মণো –

‘‘নিরাসসো সো উদ আসসানো, পঞ্ঞাণৰা সো উদ পঞ্ঞকপ্পী;

মুনিং অহং সক্ক যথা ৰিজঞ্ঞং, তং মে ৰিযাচিক্খ সমন্তচক্খূ’’তি.

৬০. নিরাসসো সো ন চ আসসানো, পঞ্ঞাণৰা সো ন চ পঞ্ঞকপ্পী;

এৰম্পি তোদেয্য মুনিং ৰিজান, অকিঞ্চনং কামভৰে অসত্তং.

নিরাসসো সো ন চ আসসানোতি নিত্তণ্হো সো. ন সো সতণ্হো রূপে নাসীসতি. সদ্দে…পে… গন্ধে… দিট্ঠসুতমুতৰিঞ্ঞাতব্বে ধম্মে নাসীসতি ন ইচ্ছতি ন সাদিযতি ন পত্থেতি ন পিহেতি নাভিজপ্পতীতি – নিরাসসো সো ন চ আসসানো.

পঞ্ঞাণৰা সো ন চ পঞ্ঞকপ্পীতি. পঞ্ঞাণৰাতি পণ্ডিতো পঞ্ঞৰা বুদ্ধিমা ঞাণী ৰিভাৰী মেধাৰী. ন চ পঞ্ঞকপ্পীতি অট্ঠসমাপত্তিঞাণেন ৰা পঞ্চাভিঞ্ঞাঞাণেন ৰা মিচ্ছাঞাণেন ৰা তণ্হাকপ্পং ৰা ন কপ্পেতি দিট্ঠিকপ্পং ৰা ন কপ্পেতি ন জনেতি ন সঞ্জনেতি ন নিব্বত্তেতি নাভিনিব্বত্তেতীতি – পঞ্ঞাণৰা সো ন চ পঞ্ঞকপ্পী.

এৰম্পি তোদেয্য মুনিং ৰিজানাতি. মুনীতি মোনং ৰুচ্চতি ঞাণং…পে… সঙ্গজালমতিচ্চ সো মুনি. এৰম্পি তোদেয্য মুনিং ৰিজানাতি তোদেয্য, এৰং মুনিং জান পটিজান পটিৰিজান পটিৰিজ্ঝাতি – এৰম্পি তোদেয্য মুনিং ৰিজান.

অকিঞ্চনং কামভৰে অসত্তন্তি. অকিঞ্চনন্তি রাগকিঞ্চনং দোসকিঞ্চনং মোহকিঞ্চনং মানকিঞ্চনং দিট্ঠিকিঞ্চনং কিলেসকিঞ্চনং দুচ্চরিতকিঞ্চনং. যস্সেতানি [যস্সেতে (স্যা.)] কিঞ্চনানি [কিঞ্চনা (স্যা.)] পহীনানি সমুচ্ছিন্নানি ৰূপসন্তানি পটিপ্পস্সদ্ধানি অভব্বুপ্পত্তিকানি ঞাণগ্গিনা দড্ঢানি, সো ৰুচ্চতি অকিঞ্চনো. কামাতি উদ্দানতো দ্ৰে কামা – ৰত্থুকামা চ কিলেসকামা চ…পে… ইমে ৰুচ্চন্তি ৰত্থুকামা…পে… ইমে ৰুচ্চন্তি কিলেসকামা. ভৰাতি দ্ৰে ভৰা – কম্মভৰো চ পটিসন্ধিকো চ পুনব্ভৰো…পে… অযং পটিসন্ধিকো পুনব্ভৰো.

অকিঞ্চনং কামভৰে অসত্তন্তি অকিঞ্চনং পুগ্গলং কামে চ ভৰে চ অসত্তং অলগ্গং অলগ্গিতং অপলিবুদ্ধং নিক্খন্তং নিস্সটং ৰিপ্পমুত্তং ৰিসঞ্ঞুত্তং ৰিমরিযাদিকতেন চেতসা ৰিহরন্তন্তি – অকিঞ্চনং কামভৰে অসত্তং. তেনাহ ভগৰা –

‘‘নিরাসসো সো ন চ আসসানো, পঞ্ঞাণৰা সো ন চ পঞ্ঞকপ্পী;

এৰম্পি তোদেয্য মুনিং ৰিজান, অকিঞ্চনং কামভৰে অসত্তন্তি.

সহ গাথাপরিযোসানা…পে… সত্থা মে ভন্তে ভগৰা, সাৰকোহমস্মীতি.

তোদেয্যমাণৰপুচ্ছানিদ্দেসো নৰমো.