১০. কপ্পমাণৰপুচ্ছানিদ্দেসো

৬১. মজ্ঝে সরস্মিং তিট্ঠতং, [ইচ্চাযস্মা কপ্পো]

ওঘে জাতে মহব্ভযে;

জরামচ্চুপরেতানং, দীপং পব্রূহি মারিস;

ত্ৰঞ্চ মে দীপমক্খাহি, যথাযিদং নাপরং সিযা.

মজ্ঝে সরস্মিং তিট্ঠতন্তি সরো ৰুচ্চতি সংসারো আগমনং গমনং গমনাগমনং কালং গতি ভৰাভৰো চুতি চ উপপত্তি চ নিব্বত্তি চ ভেদো চ জাতি চ জরা চ মরণঞ্চ. সংসারস্স পুরিমাপি কোটি ন পঞ্ঞাযতি, পচ্ছিমাপি কোটি ন পঞ্ঞাযতি; মজ্ঝেৰ সংসারে সত্তা ঠিতা পতিট্ঠিতা অল্লীনা উপগতা অজ্ঝোসিতা অধিমুত্তা.

কথং সংসারস্স পুরিমা কোটি ন পঞ্ঞাযতি? এত্তকা জাতিযো ৰট্টং ৰত্তি, ততো পরং ন ৰত্ততীতি হেৰং নত্থি, এৰম্পি সংসারস্স পুরিমা কোটি ন পঞ্ঞাযতি. এত্তকানি জাতিসতানি ৰট্টং ৰত্তি, ততো পরং ন ৰত্ততীতি হেৰং নত্থি, এৰম্পি সংসারস্স পুরিমা কোটি ন পঞ্ঞাযতি. এত্তকানি জাতিসহস্সানি ৰট্টং ৰত্তি, ততো পরং ন ৰত্ততীতি হেৰং নত্থি, এৰম্পি সংসারস্স পুরিমা কোটি ন পঞ্ঞাযতি. এত্তকানি জাতিসতসহস্সানি ৰট্টং ৰত্তি, ততো পরং ন ৰত্ততীতি হেৰং নত্থি, এৰম্পি সংসারস্স পুরিমা কোটি ন পঞ্ঞাযতি. এত্তকা জাতিকোটিযো ৰট্টং ৰত্তি, ততো পরং ন ৰত্ততীতি হেৰং নত্থি, এৰম্পি সংসারস্স পুরিমা কোটি ন পঞ্ঞাযতি. এত্তকানি জাতিকোটিসতানি ৰট্টং ৰত্তি, ততো পরং ন ৰত্ততীতি হেৰং নত্থি, এৰম্পি সংসারস্স পুরিমা কোটি ন পঞ্ঞাযতি. এত্তকানি জাতিকোটিসহস্সানি ৰট্টং ৰত্তি, ততো পরং ন ৰত্ততীতি, হেৰং নত্থি. এৰম্পি সংসারস্স পুরিমা কোটি ন পঞ্ঞাযতি. এত্তকানি জাতিকোটিসতসহস্সানি ৰট্টং ৰত্তি, ততো পরং ন ৰত্ততীতি হেৰং নত্থি, এৰম্পি সংসারস্স পুরিমা কোটি ন পঞ্ঞাযতি.

এত্তকানি ৰস্সানি ৰট্টং ৰত্তি, ততো পরং ন ৰত্ততীতি হেৰং নত্থি, এৰম্পি সংসারস্স পুরিমা কোটি ন পঞ্ঞাযতি. এত্তকানি ৰস্সসতানি ৰট্টং ৰত্তি, ততো পরং ন ৰত্ততীতি হেৰং নত্থি, এৰম্পি সংসারস্স পুরিমা কোটি ন পঞ্ঞাযতি. এত্তকানি ৰস্সসহস্সানি ৰট্টং ৰত্তি, ততো পরং ন ৰত্ততীতি হেৰং নত্থি, এৰম্পি সংসারস্স পুরিমা কোটি ন পঞ্ঞাযতি. এত্তকানি ৰস্সসতসহস্সানি ৰট্টং ৰত্তি, ততো পরং ন ৰত্ততীতি হেৰং নত্থি, এৰম্পি সংসারস্স পুরিমা কোটি ন পঞ্ঞাযতি. এত্তকা ৰস্সকোটিযো ৰট্টং ৰত্তি, ততো পরং ন ৰত্ততীতি হেৰং নত্থি, এৰম্পি সংসারস্স পুরিমা কোটি ন পঞ্ঞাযতি. এত্তকানি ৰস্সকোটিসতানি ৰট্টং ৰত্তি, ততো পরং ন ৰত্ততীতি হেৰং নত্থি, এৰম্পি সংসারস্স পুরিমা কোটি ন পঞ্ঞাযতি. এত্তকানি ৰস্সকোটিসহস্সানি ৰট্টং ৰত্তি, ততো পরং ন ৰত্ততীতি হেৰং নত্থি, এৰম্পি সংসারস্স পুরিমা কোটি ন পঞ্ঞাযতি. এত্তকানি ৰস্সকোটিসতসহস্সানি ৰট্টং ৰত্তি, ততো পরং ন ৰত্ততীতি হেৰং নত্থি, এৰম্পি সংসারস্স পুরিমা কোটি ন পঞ্ঞাযতি.

এত্তকানি কপ্পানি ৰট্টং ৰত্তি, ততো পরং ন ৰত্ততীতি হেৰং নত্থি, এৰম্পি সংসারস্স পুরিমা কোটি ন পঞ্ঞাযতি. এত্তকানি কপ্পসতানি ৰট্টং ৰত্তি, ততো পরং ন ৰত্ততীতি হেৰং নত্থি, এৰম্পি সংসারস্স পুরিমা কোটি ন পঞ্ঞাযতি. এত্তকানি কপ্পসহস্সানি ৰট্টং ৰত্তি, ততো পরং ন ৰত্ততীতি হেৰং নত্থি, এৰম্পি সংসারস্স পুরিমা কোটি ন পঞ্ঞাযতি. এত্তকানি কপ্পসতসহস্সানি ৰট্টং ৰত্তি, ততো পরং ন ৰত্ততীতি হেৰং নত্থি, এৰম্পি সংসারস্স পুরিমা কোটি ন পঞ্ঞাযতি. এত্তকা কপ্পকোটিযো ৰট্টং ৰত্তি, ততো পরং ন ৰত্ততীতি হেৰং নত্থি, এৰম্পি সংসারস্স পুরিমা কোটি ন পঞ্ঞাযতি. এত্তকানি কপ্পকোটিসতানি ৰট্টং ৰত্তি, ততো পরং ন ৰত্ততীতি হেৰং নত্থি, এৰম্পি সংসারস্স পুরিমা কোটি ন পঞ্ঞাযতি. এত্তকানি কপ্পকোটিসহস্সানি ৰট্টং ৰত্তি, ততো পরং ন ৰত্ততীতি হেৰং নত্থি, এৰম্পি সংসারস্স পুরিমা কোটি ন পঞ্ঞাযতি. এত্তকানি কপ্পকোটিসতসহস্সানি ৰট্টং ৰত্তি, ততো পরং ন ৰত্ততীতি হেৰং নত্থি, এৰম্পি সংসারস্স পুরিমা কোটি ন পঞ্ঞাযতি.

ৰুত্তঞ্হেতং ভগৰতা – ‘‘অনমতগ্গোযং, ভিক্খৰে, সংসারো, পুব্বা কোটি ন পঞ্ঞাযতি অৰিজ্জানীৰরণানং সত্তানং তণ্হাসংযোজনানং সন্ধাৰতং সংসরতং. এৰং দীঘরত্তং খো, ভিক্খৰে, দুক্খং পচ্চনুভূতং তিব্বং পচ্চনুভূতং ব্যসনং পচ্চনুভূতং, কটসী ৰড্ঢিতা [কটসীৰৰড্ঢিতং (স্যা.) পস্স সং. নি. ২.১২৪]. যাৰঞ্চিদং, ভিক্খৰে, অলমেৰ সব্বসঙ্খারেসু নিব্বিন্দিতুং অলং ৰিরজ্জিতুং অলং ৰিমুচ্চিতু’’ন্তি. এৰম্পি সংসারস্স পুরিমা কোটি ন পঞ্ঞাযতি.

কথং সংসারস্স পচ্ছিমা কোটি ন পঞ্ঞাযতি? এত্তকা জাতিযো ৰট্টং ৰত্তিস্সতি, ততো পরং ন ৰত্তিস্সতীতি হেৰং নত্থি, এৰম্পি সংসারস্স পচ্ছিমা কোটি ন পঞ্ঞাযতি. এত্তকানি জাতিসতানি, এত্তকানি জাতিসহস্সানি, এত্তকানি জাতিসতসহস্সানি, এত্তকা জাতিকোটিযো, এত্তকানি জাতিকোটিসতানি, এত্তকানি জাতিকোটিসহস্সানি, এত্তকানি জাতিকোটিসতসহস্সানি, এত্তকানি ৰস্সানি, এত্তকানি ৰস্সসতানি, এত্তকানি ৰস্সসহস্সানি, এত্তকানি ৰস্সসতসহস্সানি, এত্তকা ৰস্সকোটিযো, এত্তকানি ৰস্সকোটিসতানি, এত্তকানি ৰস্সকোটিসহস্সানি, এত্তকানি ৰস্সকোটিসতসহস্সানি, এত্তকানি কপ্পানি, এত্তকানি কপ্পসতানি, এত্তকানি কপ্পসহস্সানি, এত্তকানি কপ্পসতসহস্সানি, এত্তকা কপ্পকোটিযো, এত্তকানি কপ্পকোটিসতানি, এত্তকানি কপ্পকোটিসহস্সানি, এত্তকানি কপ্পকোটিসতসহস্সানি ৰট্টং ৰত্তিস্সতি, ততো পরং ন ৰত্তিস্সতীতি হেৰং নত্থি, এৰম্পি সংসারস্স পচ্ছিমা কোটি ন পঞ্ঞাযতি. এৰম্পি সংসারস্স পুরিমাপি কোটি ন পঞ্ঞাযতি, পচ্ছিমাপি কোটি ন পঞ্ঞাযতি, মজ্ঝেৰ সংসারে সত্তা ঠিতা পতিট্ঠিতা অল্লীনা উপগতা অজ্ঝোসিতা অধিমুত্তাতি – মজ্ঝে সরস্মিং তিট্ঠতং. ইচ্চাযস্মা কপ্পোতি. ইচ্চাতি পদসন্ধি…পে…. আযস্মাতি পিযৰচনং…পে…. কপ্পোতি তস্স ব্রাহ্মণস্স নামং…পে… অভিলাপোতি – ইচ্চাযস্মা কপ্পো.

ওঘে জাতে মহব্ভযেতি কামোঘে ভৰোঘে দিট্ঠোঘে অৰিজ্জোঘে জাতে সঞ্জাতে নিব্বত্তে অভিনিব্বত্তে পাতুভূতে. মহব্ভযেতি জাতিভযে জরাভযে ব্যাধিভযে মরণভযেতি – ওঘে জাতে মহব্ভযে.

জরামচ্চুপরেতানন্তি জরায ফুট্ঠানং পরেতানং সমোহিতানং সমন্নাগতানং. মচ্চুনা ফুট্ঠানং পরেতানং সমোহিতানং সমন্নাগতানং, জাতিযা অনুগতানং জরায অনুসটানং ব্যাধিনা অভিভূতানং মরণেন অব্ভাহতানং অতাণানং অলেণানং অসরণানং অসরণীভূতানন্তি – জরামচ্চুপরেতানং.

দীপং পব্রূহি মারিসাতি দীপং তাণং লেণং সরণং গতিং পরাযনং [গতিপরাযনং (স্যা.) এৰমুপরিপি] ব্রূহি আচিক্খাহি দেসেহি পঞ্ঞপেহি পট্ঠপেহি ৰিৰরাহি ৰিভজাহি উত্তানীকরোহি পকাসেহি. মারিসাতি পিযৰচনং গরুৰচনং সগারৰসপ্পতিস্সাধিৰচনমেতং মারিসাতি – দীপং পব্রূহি মারিস.

ত্ৰঞ্চ মে দীপমক্খাহীতি. ত্ৰন্তি ভগৰন্তং ভণতি. দীপমক্খাহীতি দীপং তাণং লেণং সরণং গতিং পরাযনং অক্খাহি আচিক্খাহি দেসেহি পঞ্ঞপেহি পট্ঠপেহি ৰিৰরাহি ৰিভজাহি উত্তানীকরোহি পকাসেহীতি – ত্ৰঞ্চ মে দীপমক্খাহি.

যথাযিদং নাপরং সিযাতি যথযিদং দুক্খং ইধেৰ নিরুজ্ঝেয্য ৰূপসমেয্য অত্থং গচ্ছেয্য পটিপ্পস্সম্ভেয্য পুনপটিসন্ধিকং দুক্খং ন নিব্বত্তেয্য, কামধাতুযা ৰা রূপধাতুযা ৰা অরূপধাতুযা ৰা কামভৰে ৰা রূপভৰে ৰা অরূপভৰে ৰা সঞ্ঞাভৰে ৰা অসঞ্ঞাভৰে ৰা নেৰসঞ্ঞানাসঞ্ঞাভৰে ৰা একৰোকারভৰে ৰা চতুৰোকারভৰে ৰা পঞ্চৰোকারভৰে ৰা পুনগতিযা ৰা উপপত্তিযা ৰা পটিসন্ধিযা ৰা ভৰে ৰা সংসারে ৰা ৰট্টে ৰা ন জনেয্য ন সঞ্জনেয্য ন নিব্বত্তেয্য নাভিনিব্বত্তেয্য. ইধেৰ নিরুজ্ঝেয্য ৰূপসমেয্য অত্থং গচ্ছেয্য পটিপ্পস্সম্ভেয্যাতি – যথাযিদং নাপরং সিযা. তেনাহ সো ব্রাহ্মণো –

‘‘মজ্ঝে সরস্মিং তিট্ঠতং, [ইচ্চাযস্মা কপ্পো]

ওঘে জাতে মহব্ভযে;

জরামচ্চুপরেতানং, দীপং পব্রূহি মারিস;

ত্ৰঞ্চ মে দীপমক্খাহি, যথাযিদং নাপরং সিযা’’তি.

৬২. মজ্ঝে সরস্মিং তিট্ঠতং, [কপ্পাতি ভগৰা]

ওঘে জাতে মহব্ভযে;

জরামচ্চুপরেতানং, দীপং পব্রূমি কপ্প তে.

মজ্ঝে সরস্মিং তিট্ঠতন্তি সরো ৰুচ্চতি সংসারো আগমনং গমনং গমনাগমনং কালং গতি ভৰাভৰো, চুতি চ উপপত্তি চ নিব্বত্তি চ ভেদো চ জাতি চ জরা চ মরণঞ্চ. সংসারস্স পুরিমাপি কোটি ন পঞ্ঞাযতি, পচ্ছিমাপি কোটি ন পঞ্ঞাযতি. মজ্ঝেৰ সংসারে সত্তা ঠিতা পতিট্ঠিতা অল্লীনা উপগতা অজ্ঝোসিতা অধিমুত্তা.

কথং সংসারস্স পুরিমা কোটি ন পঞ্ঞাযতি…পে… এৰং সংসারস্স পুরিমা কোটি ন পঞ্ঞাযতি. কথং সংসারস্স পচ্ছিমা কোটি ন পঞ্ঞাযতি…পে… এৰং সংসারস্স পচ্ছিমা কোটি ন পঞ্ঞাযতি. এৰং সংসারস্স পুরিমাপি কোটি ন পঞ্ঞাযতি, পচ্ছিমাপি কোটি ন পঞ্ঞাযতি. মজ্ঝেৰ সংসারে সত্তা ঠিতা পতিট্ঠিতা অল্লীনা উপগতা অজ্ঝোসিতা অধিমুত্তাতি – মজ্ঝে সরস্মিং তিট্ঠতং. কপ্পাতি ভগৰাতি. কপ্পাতি ভগৰা তং ব্রাহ্মণং নামেন আলপতি. ভগৰাতি গারৰাধিৰচনমেতং…পে… সচ্ছিকা পঞ্ঞত্তি, যদিদং ভগৰাতি – কপ্পাতি ভগৰা.

ওঘে জাতে মহব্ভযেতি কামোঘে ভৰোঘে দিট্ঠোঘে অৰিজ্জোঘে জাতে সঞ্জাতে নিব্বত্তে অভিনিব্বত্তে পাতুভূতে. মহব্ভযেতি জাতিভযে জরাভযে ব্যাধিভযে মরণভযেতি – ওঘে জাতে মহব্ভযে.

জরামচ্চুপরেতানন্তি জরায ফুট্ঠানং পরেতানং সমোহিতানং সমন্নাগতানং, মচ্চুনা ফুট্ঠানং পরেতানং সমোহিতানং সমন্নাগতানং জাতিযা অনুগতানং জরায অনুসটানং ব্যাধিনা অভিভূতানং মরণেন অব্ভাহতানং অতাণানং অলেণানং অসরণানং অসরণীভূতানন্তি – জরামচ্চুপরেতানং.

দীপং পব্রূমি কপ্প তেতি দীপং তাণং লেণং সরণং গতিং পরাযনং ব্রূমি আচিক্খামি দেসেমি পঞ্ঞপেমি পট্ঠপেমি ৰিৰরামি ৰিভজামি উত্তানীকরোমি পকাসেমীতি – দীপং পব্রূমি কপ্প তে. তেনাহ ভগৰা –

‘‘মজ্ঝে সরস্মিং তিট্ঠতং, [কপ্পাতি ভগৰা]

ওঘে জাতে মহব্ভযে;

জরামচ্চুপরেতানং, দীপং পব্রূমি কপ্প তে’’তি.

৬৩. অকিঞ্চনং অনাদানং, এতং দীপং অনাপরং;

নিব্বানং ইতি নং ব্রূমি, জরামচ্চুপরিক্খযং.

অকিঞ্চনং অনাদানন্তি. কিঞ্চনন্তি – রাগকিঞ্চনং দোসকিঞ্চনং মোহকিঞ্চনং মানকিঞ্চনং দিট্ঠিকিঞ্চনং কিলেসকিঞ্চনং দুচ্চরিতকিঞ্চনং; কিঞ্চনপ্পহানং কিঞ্চনৰূপসমং [কিঞ্চনৰূপসমো (স্যা.) এৰমীদিসেসু ঠানেসু] কিঞ্চনপটিনিস্সগ্গং [কিঞ্চনপটিনিস্সগ্গো (স্যা.)] কিঞ্চনপটিপ্পস্সদ্ধিং অমতং নিব্বানন্তি – অকিঞ্চনং. অনাদানন্তি আদানং ৰুচ্চতি তণ্হা. যো রাগো সারাগো…পে… অভিজ্ঝা লোভো অকুসলমূলং. আদানপ্পহানং আদানৰূপসমং আদানপটিনিস্সগ্গং আদানপটিপ্পস্সদ্ধিং অমতং নিব্বানন্তি – অকিঞ্চনং অনাদানং.

এতং দীপং অনাপরন্তি এতং দীপং তাণং লেণং সরণং গতি পরাযনং. অনাপরন্তি তম্হা পরো অঞ্ঞো দীপো নত্থি. অথ খো সো এৰং দীপো অগ্গো চ সেট্ঠো চ ৰিসেট্ঠো চ পামোক্খো চ উত্তমো চ পৰরো চাতি – এতং দীপং অনাপরং.

নিব্বানং ইতি নং ব্রূমীতি ৰানং ৰুচ্চতি তণ্হা. যো রাগো সারাগো…পে… অভিজ্ঝা লোভো অকুসলমূলং. ৰানপ্পহানং ৰানৰূপসমং ৰানপটিনিস্সগ্গং ৰানপটিপ্পস্সদ্ধিং অমতং নিব্বানং. ইতীতি পদসন্ধি পদসংসগ্গো পদপারিপূরী অক্খরসমৰাযো ব্যঞ্জনসিলিট্ঠতা পদানুপুব্বতাপেতং – ইতীতি. ব্রূমীতি ব্রূমি আচিক্খামি দেসেমি পঞ্ঞপেমি পট্ঠপেমি ৰিৰরামি ৰিভজামি উত্তানীকরোমি পকাসেমীতি – নিব্বানং ইতি নং ব্রূমি.

জরামচ্চুপরিক্খযন্তি জরামরণস্স পহানং ৰূপসমং পটিনিস্সগ্গং পটিপ্পস্সদ্ধিং অমতং নিব্বানন্তি – জরামচ্চুপরিক্খযং. তেনাহ ভগৰা –

‘‘অকিঞ্চনং অনাদানং, এতং দীপং অনাপরং;

নিব্বানং ইতি নং ব্রূমি, জরামচ্চুপরিক্খয’’ন্তি.

৬৪. এতদঞ্ঞায যে সতা, দিট্ঠধম্মাভিনিব্বুতা;

ন তে মারৰসানুগা, ন তে মারস্স পদ্ধগূ [পট্ঠগূ (স্যা. ক.)] .

এতদঞ্ঞায যে সতাতি. এতন্তি অমতং নিব্বানং. যো সো সব্বসঙ্খারসমথো সব্বূপধিপটিনিস্সগ্গো তণ্হক্খযো ৰিরাগো নিরোধো নিব্বানং. অঞ্ঞাযাতি অঞ্ঞায জানিত্ৰা তুলযিত্ৰা তীরযিত্ৰা ৰিভাৰযিত্ৰা ৰিভূতং কত্ৰা, ‘‘সব্বে সঙ্খারা অনিচ্চা’’তি…পে… ‘‘যং কিঞ্চি সমুদযধম্মং, সব্বং তং নিরোধধম্ম’’ন্তি অঞ্ঞায জানিত্ৰা তুলযিত্ৰা তীরযিত্ৰা ৰিভাৰযিত্ৰা ৰিভূতং কত্ৰা. যেতি অরহন্তো খীণাসৰা. সতাতি চতূহি কারণেহি সতা – কাযে কাযানুপস্সনাসতিপট্ঠানং ভাৰেন্তা [ভাৰিতত্তা (ক.)] সতা…পে… তে ৰুচ্চন্তি সতাতি – এতদঞ্ঞায যে সতা.

দিট্ঠধম্মাভিনিব্বুতাতি. দিট্ঠধম্মাতি দিট্ঠধম্মা ঞাতধম্মা তুলিতধম্মা তীরিতধম্মা ৰিভূতধম্মা ৰিভাৰিতধম্মা. অভিনিব্বুতাতি রাগস্স নিব্বাপিতত্তা নিব্বুতা, দোসস্স…পে… সব্বাকুসলাভিসঙ্খারানং সন্তত্তা সমিতত্তা ৰূপসমিতত্তা নিজ্ঝাতত্তা নিব্বুতত্তা পটিপ্পস্সদ্ধত্তা সন্তা উপসন্তা ৰূপসন্তা নিব্বুতা পটিপ্পস্সদ্ধাতি – দিট্ঠধম্মাভিনিব্বুতা.

ন তে মারৰসানুগাতি. মারোতি যো সো মারো কণ্হো অধিপতি অন্তগূ নমুচি পমত্তবন্ধু. ন তে মারৰসানুগাতি ন তে মারস্স ৰসে ৰত্তন্তি, নাপি মারো তেসু ৰসং ৰত্তেতি. তে মারঞ্চ মারপক্খঞ্চ মারপাসঞ্চ মারবল়িসঞ্চ [মারবলিসঞ্চ (ক.)] মারামিসঞ্চ মারৰিসযঞ্চ মারনিৰাসঞ্চ মারগোচরঞ্চ মারবন্ধনঞ্চ অভিভুয্য অভিভৰিত্ৰা অজ্ঝোত্থরিত্ৰা পরিযাদিযিত্ৰা মদ্দিত্ৰা চরন্তি ৰিহরন্তি ইরিযন্তি ৰত্তেন্তি পালেন্তি যপেন্তি যাপেন্তীতি – ন তে মারৰসানুগা.

ন তে মারস্স পদ্ধগূতি ন তে মারস্স পদ্ধা পদ্ধচরা [পট্ঠা পট্ঠচরা (স্যা. ক.)] পরিচারিকা সিযা; বুদ্ধস্স তে ভগৰতো পদ্ধা পদ্ধচরা পরিচারিকা সিযাতি – ন তে মারস্স পদ্ধগূ. তেনাহ ভগৰা –

‘‘এতদঞ্ঞায যে সতা, দিট্ঠধম্মাভিনিব্বুতা;

ন তে মারৰসানুগা, ন তে মারস্স পদ্ধগূ’’তি.

সহ গাথাপরিযোসানা…পে… সত্থা মে ভন্তে ভগৰা, সাৰকোহমস্মীতি.

কপ্পমাণৰপুচ্ছানিদ্দেসো দসমো.