১৭. পারাযনত্থুতিগাথানিদ্দেসো

৯৩. ইদমৰোচ ভগৰা মগধেসু ৰিহরন্তো পাসাণকে চেতিযে, পরিচারকসোল়সানং [পরিচারিতসোল়সন্নং (স্যা. ক.)] ব্রাহ্মণানং অজ্ঝিট্ঠো পুট্ঠো পুট্ঠো পঞ্হং ব্যাকাসি.

ইদমৰোচ ভগৰাতি ইদং পারাযনং অৰোচ. ভগৰাতি গারৰাধিৰচনমেতং…পে… সচ্ছিকা পঞ্ঞত্তি, যদিদং ভগৰাতি – ইদমৰোচ ভগৰা. মগধেসু ৰিহরন্তোতি মগধনামকে জনপদে ৰিহরন্তো ইরিযন্তো ৰত্তেন্তো পালেন্তো যপেন্তো যাপেন্তো. পাসাণকে চেতিযেতি পাসাণকচেতিযং ৰুচ্চতি বুদ্ধাসনন্তি – মগধেসু ৰিহরন্তো পাসাণকে চেতিযে. পরিচারকসোল়সানং ব্রাহ্মণানন্তি পিঙ্গিযো [সিঙ্গিযো (ক.)] ব্রাহ্মণো বাৰরিস্স ব্রাহ্মণস্স পদ্ধো পদ্ধচরো পরিচারকো [পরিচারিকো (স্যা. ক.)] সিস্সো. পিঙ্গিযেন [তেন (ক.)] তে সোল়সাতি – এৰম্পি পরিচারকসোল়সানং ব্রাহ্মণানং. অথ ৰা, তে সোল়স ব্রাহ্মণা বুদ্ধস্স ভগৰতো পদ্ধা পদ্ধচরা পরিচারকা সিস্সাতি – এৰম্পি পরিচারকসোল়সানং ব্রাহ্মণানং.

অজ্ঝিট্ঠো পুট্ঠো পুট্ঠো পঞ্হং ব্যাকাসীতি. অজ্ঝিট্ঠোতি অজ্ঝিট্ঠো অজ্ঝেসিতো. পুট্ঠো পুট্ঠোতি পুট্ঠো পুট্ঠো পুচ্ছিতো পুচ্ছিতো যাচিতো যাচিতো অজ্ঝেসিতো অজ্ঝেসিতো পসাদিতো পসাদিতো. পঞ্হং ব্যাকাসীতি পঞ্হং ব্যাকাসি আচিক্খি দেসেসি পঞ্ঞপেসি পট্ঠপেসি ৰিৰরি ৰিভজি উত্তানীআকাসি পকাসেসীতি – অজ্ঝিট্ঠো পুট্ঠো পুট্ঠো পঞ্হং ব্যাকাসি. তেনেতং ৰুচ্চতি –

‘‘ইদমৰোচ ভগৰা মগধেসু ৰিহরন্তো পাসাণকে চেতিযে, পরিচারকসোল়সানং ব্রাহ্মণানং অজ্ঝিট্ঠো পুট্ঠো পুট্ঠো পঞ্হং ব্যাকাসী’’তি.

৯৪. একমেকস্স চেপি পঞ্হস্স অত্থমঞ্ঞায ধম্মমঞ্ঞায ধম্মানুধম্মং পটিপজ্জেয্য, গচ্ছেয্যেৰ জরামরণস্স পারং. পারঙ্গমনীযা ইমে ধম্মাতি. তস্মা ইমস্স ধম্মপরিযাযস্স ‘‘পারাযন’’ন্তেৰ অধিৰচনং.

একমেকস্স চেপি পঞ্হস্সাতি একমেকস্স চেপি অজিতপঞ্হস্স, একমেকস্স চেপি তিস্সমেত্তেয্যপঞ্হস্স, একমেকস্স চেপি পুণ্ণকপঞ্হস্স, একমেকস্স চেপি মেত্তগূপঞ্হস্স, একমেকস্স চেপি ধোতকপঞ্হস্স, একমেকস্স চেপি উপসীৰপঞ্হস্স, একমেকস্স চেপি নন্দকপঞ্হস্স, একমেকস্স চেপি হেমকপঞ্হস্স, একমেকস্স চেপি তোদেয্যপঞ্হস্স, একমেকস্স চেপি কপ্পপঞ্হস্স, একমেকস্স চেপি জতুকণ্ণিপঞ্হস্স, একমেকস্স চেপি ভদ্রাৰুধপঞ্হস্স, একমেকস্স চেপি উদযপঞ্হস্স, একমেকস্স চেপি পোসালপঞ্হস্স, একমেকস্স চেপি মোঘরাজপঞ্হস্স, একমেকস্স চেপি পিঙ্গিযপঞ্হস্সাতি – একমেকস্স চেপি পঞ্হস্স.

অত্থমঞ্ঞায ধম্মমঞ্ঞাযাতি স্ৰেৰ পঞ্হো ধম্মো, ৰিসজ্জনং [ৰিস্সজ্জনং (ক.)] অত্থোতি অত্থং অঞ্ঞায জানিত্ৰা তুলযিত্ৰা তীরযিত্ৰা ৰিভাৰযিত্ৰা ৰিভূতং কত্ৰাতি – অত্থমঞ্ঞায. ধম্মমঞ্ঞাযাতি ধম্মং অঞ্ঞায জানিত্ৰা তুলযিত্ৰা তীরযিত্ৰা ৰিভাৰযিত্ৰা ৰিভূতং কত্ৰাতি – ধম্মমঞ্ঞাযাতি – অত্থমঞ্ঞায ধম্মমঞ্ঞায. ধম্মানুধম্মং পটিপজ্জেয্যাতি সম্মাপটিপদং অনুলোমপটিপদং অপচ্চনীকপটিপদং অন্ৰত্থপটিপদং ধম্মানুধম্মপটিপদং পটিপজ্জেয্যাতি – ধম্মানুধম্মং পটিপজ্জেয্য. গচ্ছেয্যেৰ জরামরণস্স পারন্তি জরামরণস্স পারং ৰুচ্চতি অমতং নিব্বানং. যো সো সব্বসঙ্খারসমথো সব্বূপধিপ্পটিনিস্সগ্গো তণ্হক্খযো ৰিরাগো নিরোধো নিব্বানং. গচ্ছেয্যেৰ জরামরণস্স পারন্তি জরামরণস্স পারং গচ্ছেয্য, পারং অধিগচ্ছেয্য, পারং অধিফস্সেয্য, পারং সচ্ছিকরেয্যাতি – গচ্ছেয্যেৰ জরামরণস্স পারং. পারঙ্গমনীযা ইমে ধম্মাতি ইমে ধম্মা পারঙ্গমনীযা. পারং পাপেন্তি পারং সম্পাপেন্তি পারং সমনুপাপেন্তি, জরামণস্স তরণায [তারণায (স্যা.)] সংৰত্তন্তীতি – পারঙ্গমনীযা ইমে ধম্মাতি.

তস্মা ইমস্স ধম্মপরিযাযস্সাতি. তস্মাতি তস্মা তংকারণা তংহেতু তপ্পচ্চযা তংনিদানাতি – তস্মা. ইমস্স ধম্মপরিযাযস্সাতি ইমস্স পারাযনস্সাতি – তস্মা ইমস্স ধম্মপরিযাযস্স. পারাযনন্তেৰ অধিৰচনন্তি পারং ৰুচ্চতি অমতং নিব্বানং…পে… নিরোধো নিব্বানং. অযনং ৰুচ্চতি মগ্গো, সেয্যথিদং – সম্মাদিট্ঠি…পে… সম্মাসমাধি. অধিৰচনন্তি সঙ্খা সমঞ্ঞা পঞ্ঞত্তি ৰোহারো নামং নামকম্মং নামধেয্যং নিরুত্তি ব্যঞ্জনং অভিলাপোতি – পারাযনন্তেৰ অধিৰচনং. তেনেতং ৰুচ্চতি –

‘‘একমেকস্স চেপি পঞ্হস্স অত্থমঞ্ঞায ধম্মমঞ্ঞায ধম্মানুধম্মং পটিপজ্জেয্য, গচ্ছেয্যেৰ জরামরণস্স পারং. পারঙ্গমনীযা ইমে ধম্মাতি. তস্মা ইমস্স ধম্মপরিযাযস্স ‘পারাযন’ন্তেৰ অধিৰচন’’ন্তি.

৯৫. অজিতো তিস্সমেত্তেয্যো, পুণ্ণকো অথ মেত্তগূ;

ধোতকো উপসীৰো চ, নন্দো চ অথ হেমকো.

৯৬. তোদেয্যকপ্পা দুভযো, জতুকণ্ণী চ পণ্ডিতো;

ভদ্রাৰুধো উদযো চ, পোসালো চাপি ব্রাহ্মণো;

মোঘরাজা চ মেধাৰী, পিঙ্গিযো চ মহাইসি.

৯৭. এতে বুদ্ধং উপাগচ্ছুং, সম্পন্নচরণং ইসিং;

পুচ্ছন্তা নিপুণে পঞ্হে, বুদ্ধসেট্ঠং উপাগমুং.

এতে বুদ্ধং উপাগচ্ছুন্তি. এতেতি সোল়স পারাযনিযা ব্রাহ্মণা. বুদ্ধোতি যো সো ভগৰা সযম্ভূ অনাচরিযকো পুব্বে অননুস্সুতেসু ধম্মেসু সামং সচ্চানি অভিসম্বুজ্ঝি, তত্থ চ সব্বঞ্ঞুতং পত্তো বলেসু চ ৰসীভাৰং. বুদ্ধোতি কেনট্ঠেন বুদ্ধো? বুজ্ঝিতা সচ্চানীতি বুদ্ধো, বোধেতা পজাযাতি বুদ্ধো, সব্বঞ্ঞুতায বুদ্ধো, সব্বদস্সাৰিতায বুদ্ধো, অভিঞ্ঞেয্যতায বুদ্ধো, ৰিসৰিতায বুদ্ধো, খীণাসৰসঙ্খাতেন বুদ্ধো, নিরুপলেপসঙ্খাতেন বুদ্ধো, একন্তৰীতরাগোতি বুদ্ধো, একন্তৰীতদোসোতি বুদ্ধো, একন্তৰীতমোহোতি বুদ্ধো, একন্তনিক্কিলেসোতি বুদ্ধো, একাযনমগ্গং গতোতি বুদ্ধো, একো অনুত্তরং সম্মাসম্বোধিং অভিসম্বুদ্ধোতি বুদ্ধো, অবুদ্ধিৰিহতত্তা বুদ্ধিপটিলাভাতি বুদ্ধো. বুদ্ধোতি নেতং নামং মাতরা কতং ন পিতরা কতং ন ভাতরা কতং ন ভগিনিযা কতং ন মিত্তামচ্চেহি কতং ন ঞাতিসালোহিতেহি কতং ন সমণব্রাহ্মণেহি কতং ন দেৰতাহি কতং. ৰিমোক্খন্তিকমেতং বুদ্ধানং ভগৰন্তানং বোধিযা মূলে সহ সব্বঞ্ঞুতঞাণস্স পটিলাভা সচ্ছিকা পঞ্ঞত্তি, যদিদং বুদ্ধোতি. এতে বুদ্ধং উপাগচ্ছুন্তি এতে বুদ্ধং উপাগমিংসু উপসঙ্কমিংসু পযিরুপাসিংসু পরিপুচ্ছিংসু পরিপঞ্হিংসূতি – এতে বুদ্ধং উপাগচ্ছুং.

সম্পন্নচরণং ইসিন্তি চরণং ৰুচ্চতি সীলাচারনিব্বত্তি. সীলসংৰরোপি চরণং, ইন্দ্রিযসংৰরোপি চরণং, ভোজনে মত্তঞ্ঞুতাপি চরণং, জাগরিযানুযোগোপি চরণং, সত্তপি সদ্ধম্মা চরণং, চত্তারিপি ঝানানি চরণং. সম্পন্নচরণন্তি সম্পন্নচরণং সেট্ঠচরণং ৰিসেট্ঠচরণং [ৰিসিট্ঠচরণং (ক.)] পামোক্খচরণং উত্তমচরণং পৰরচরণং. ইসীতি ইসি ভগৰা মহন্তং সীলক্খন্ধং এসী গৰেসী পরিযেসীতি ইসি…পে… মহেসক্খেহি ৰা সত্তেহি এসিতো গৰেসিতো পরিযেসিতো – ‘‘কহং বুদ্ধো, কহং ভগৰা, কহং দেৰদেৰো কহং নরাসভো’’তি – ইসীতি – সম্পন্নচরণং ইসিং.

পুচ্ছন্তা নিপুণে পঞ্হেতি. পুচ্ছন্তাতি পুচ্ছন্তা যাচন্তা অজ্ঝেসন্তা পসাদেন্তা. নিপুণে পঞ্হেতি গম্ভীরে দুদ্দসে দুরনুবোধে সন্তে পণীতে অতক্কাৰচরে নিপুণে পণ্ডিতৰেদনীযে পঞ্হেতি – পুচ্ছন্তা নিপুণে পঞ্হে.

বুদ্ধসেট্ঠং উপাগমুন্তি. বুদ্ধোতি যো সো ভগৰা…পে… সচ্ছিকা পঞ্ঞত্তি, যদিদং বুদ্ধোতি. সেট্ঠন্তি অগ্গং সেট্ঠং ৰিসেট্ঠং পামোক্খং উত্তমং পৰরং বুদ্ধং উপাগমুং উপাগমিংসু উপসঙ্কমিংসু পযিরুপাসিংসু পরিপুচ্ছিংসু পরিপঞ্হিংসূতি – বুদ্ধসেট্ঠং উপাগমুং. তেনেতং ৰুচ্চতি –

‘‘এতে বুদ্ধং উপাগচ্ছুং, সম্পন্নচরণং ইসিং;

পুচ্ছন্তা নিপুণে পঞ্হে, বুদ্ধসেট্ঠং উপাগমু’’ন্তি.

৯৮. তেসং বুদ্ধো পব্যাকাসি, পঞ্হং পুট্ঠো যথাতথং;

পঞ্হানং ৰেয্যাকরণেন, তোসেসি ব্রাহ্মণে মুনি.

তেসং বুদ্ধো পব্যাকাসীতি. তেসন্তি সোল়সানং পারাযনিযানং ব্রাহ্মণানং. বুদ্ধোতি যো সো ভগৰা…পে… সচ্ছিকা পঞ্ঞত্তি, যদিদং বুদ্ধোতি. পব্যাকাসীতি তেসং বুদ্ধো পব্যাকাসি আচিক্খি দেসেসি পঞ্ঞপেসি পট্ঠপেসি ৰিৰরি ৰিভজি উত্তানীঅকাসি পকাসেসীতি – তেসং বুদ্ধো পব্যাকাসি.

পঞ্হং পুট্ঠো যথাতথন্তি. পঞ্হং পুট্ঠোতি পঞ্হং পুট্ঠো পুচ্ছিতো যাচিতো অজ্ঝেসিতো পসাদিতো. যথাতথন্তি যথা আচিক্খিতব্বং তথা আচিক্খি, যথা দেসিতব্বং তথা দেসেসি, যথা পঞ্ঞপেতব্বং তথা পঞ্ঞপেসি, যথা পট্ঠপেতব্বং তথা পট্ঠপেসি, যথা ৰিৰরিতব্বং তথা ৰিৰরি, যথা ৰিভজিতব্বং তথা ৰিভজি, যথা উত্তানীকাতব্বং তথা উত্তানীঅকাসি, যথা পকাসিতব্বং তথা পকাসেসীতি – পঞ্হং পুট্ঠো যথাতথং.

পঞ্হানং ৰেয্যাকরণেনাতি পঞ্হানং ৰেয্যাকরণেন আচিক্খনেন দেসনেন পঞ্ঞপনেন পট্ঠপনেন ৰিৰরণেন ৰিভজনেন উত্তানীকম্মেন পকাসনেনাতি – পঞ্হানং ৰেয্যাকরণেন.

তোসেসি ব্রাহ্মণে মুনীতি. তোসেসীতি তোসেসি ৰিতোসেসি পসাদেসি আরাধেসি অত্তমনে অকাসি. ব্রাহ্মণেতি সোল়স পারাযনিযে ব্রাহ্মণে. মুনীতি মোনং ৰুচ্চতি ঞাণং…পে… সঙ্গজালমতিচ্চ সো মুনীতি – তোসেসি ব্রাহ্মণে মুনি. তেনেতং ৰুচ্চতি –

‘‘তেসং বুদ্ধো পব্যাকাসি, পঞ্হং পুট্ঠো যথাতথং;

পঞ্হানং ৰেয্যাকরণেন, তোসেসি ব্রাহ্মণে মুনী’’তি.

৯৯. তে তোসিতা চক্খুমতা, বুদ্ধেনাদিচ্চবন্ধুনা;

ব্রহ্মচরিযমচরিংসু, ৰরপঞ্ঞস্স সন্তিকে.

তে তোসিতা চক্খুমতাতি. তেতি সোল়স পারাযনিযা ব্রাহ্মণা. তোসিতাতি তোসিতা ৰিতোসিতা পসাদিতা আরাধিতা অত্তমনা কতাতি – তে তোসিতা. চক্খুমতাতি ভগৰা পঞ্চহি চক্খূহি চক্খুমা – মংসচক্খুনাপি চক্খুমা, দিব্বচক্খুনাপি চক্খুমা, পঞ্ঞাচক্খুনাপি চক্খুমা, বুদ্ধচক্খুনাপি চক্খুমা, সমন্তচক্খুনাপি চক্খুমা. কথং ভগৰা মংসচক্খুনাপি চক্খুমা…পে… এৰং ভগৰা সমন্তচক্খুনাপি চক্খুমাতি – তে তোসিতা চক্খুমতা.

বুদ্ধেনাদিচ্চবন্ধুনাতি. বুদ্ধোতি যো সো ভগৰা…পে… সচ্ছিকা পঞ্ঞত্তি, যদিদং বুদ্ধোতি. আদিচ্চবন্ধুনাতি আদিচ্চো ৰুচ্চতি সূরিযো. সো গোতমো গোত্তেন, ভগৰাপি গোতমো গোত্তেন, ভগৰা সূরিযস্স গোত্তঞাতকো গোত্তবন্ধু. তস্মা বুদ্ধো আদিচ্চবন্ধূতি – বুদ্ধেনাদিচ্চবন্ধুনা.

ব্রহ্মচরিযমচরিংসূতি ব্রহ্মচরিযং ৰুচ্চতি অসদ্ধম্মসমাপত্তিযা আরতি ৰিরতি পটিৰিরতি ৰেরমণী ৰিরমণং অকিরিযা অকরণং অনজ্ঝাপত্তি ৰেলাঅনতিক্কমো সেতুঘাতো. অপি চ, নিপ্পরিযাযৰসেন ব্রহ্মচরিযং ৰুচ্চতি অরিযো অট্ঠঙ্গিকো মগ্গো, সেয্যথিদং – সম্মাদিট্ঠি, সম্মাসঙ্কপ্পো, সম্মাৰাচা, সম্মাকম্মন্তো, সম্মাআজীৰো, সম্মাৰাযামো, সম্মাসতি, সম্মাসমাধি. ব্রহ্মচরিযমচরিংসূতি ব্রহ্মচরিযং চরিংসু অচরিংসু সমাদায ৰত্তিংসূতি – ব্রহ্মচরিযমচরিংসু.

ৰরপঞ্ঞস্স সন্তিকেতি ৰরপঞ্ঞস্স অগ্গপঞ্ঞস্স সেট্ঠপঞ্ঞস্স ৰিসেট্ঠপঞ্ঞস্স পামোক্খপঞ্ঞস্স উত্তমপঞ্ঞস্স পৰরপঞ্ঞস্স. সন্তিকেতি সন্তিকে সামন্তা আসন্নে অৰিদূরে উপকট্ঠেতি – ৰরপঞ্ঞস্স সন্তিকে. তেনেতং ৰুচ্চতি –

‘‘তে তোসিতা চক্খুমতা, বুদ্ধেনাদিচ্চবন্ধুনা;

ব্রহ্মচরিযমচরিংসু, ৰরপঞ্ঞস্স সন্তিকে’’তি.

১০০. একমেকস্স পঞ্হস্স, যথা বুদ্ধেন দেসিতং;

তথা যো পটিপজ্জেয্য, গচ্ছে পারং অপারতো.

একমেকস্স পঞ্হস্সাতি একমেকস্স অজিতপঞ্হস্স, একমেকস্স তিস্সমেত্তেয্যপঞ্হস্স…পে… একমেকস্স পিঙ্গিযপঞ্হস্সাতি – একমেকস্স পঞ্হস্স.

যথা বুদ্ধেন দেসিতন্তি. বুদ্ধোতি যো সো ভগৰা সযম্ভূ…পে… সচ্ছিকা পঞ্ঞত্তি, যদিদং বুদ্ধোতি. যথা বুদ্ধেন দেসিতন্তি যথা বুদ্ধেন আচিক্খিতং দেসিতং পঞ্ঞপিতং পট্ঠপিতং ৰিৰরিতং ৰিভজিতং [ৰিভত্তং (স্যা.)] উত্তানীকতং পকাসিতন্তি – যথা বুদ্ধেন দেসিতং.

তথা যো পটিপজ্জেয্যাতি সম্মাপটিপদং অনুলোমপটিপদং অপচ্চনীকপটিপদং অন্ৰত্থপটিপদং ধম্মানুধম্মপটিপদং পটিপজ্জেয্যাতি – তথা যো পটিপজ্জেয্য.

গচ্ছে পারং অপারতোতি পারং ৰুচ্চতি অমতং নিব্বানং…পে… নিরোধো নিব্বানং; অপারং ৰুচ্চন্তি কিলেসা চ খন্ধা চ অভিসঙ্খারা চ. গচ্ছে পারং অপারতোতি অপারতো পারং গচ্ছেয্য, পারং অধিগচ্ছেয্য, পারং ফস্সেয্য, পারং সচ্ছিকরেয্যাতি – গচ্ছে পারং অপারতো. তেনেতং ৰুচ্চতি –

‘‘একমেকস্স পঞ্হস্স, যথা বুদ্ধেন দেসিতং;

তথা যো পটিপজ্জেয্য, গচ্ছে পারং অপারতো’’তি.

১০১. অপারা পারং গচ্ছেয্য, ভাৰেন্তো মগ্গমুত্তমং;

মগ্গো সো পারং গমনায, তস্মা পারাযনং ইতি.

অপারা পারং গচ্ছেয্যাতি অপারং ৰুচ্চন্তি কিলেসা চ খন্ধা চ অভিসঙ্খারা চ; পারং ৰুচ্চতি অমতং নিব্বানং…পে… তণ্হক্খযো ৰিরাগো নিরোধো নিব্বানং. অপারা পারং গচ্ছেয্যাতি অপারা পারং গচ্ছেয্য, পারং অধিগচ্ছেয্য, পারং ফস্সেয্য, পারং সচ্ছিকরেয্যাতি – অপারা পারং গচ্ছেয্য.

ভাৰেন্তো মগ্গমুত্তমন্তি মগ্গমুত্তমং ৰুচ্চতি অরিযো অট্ঠঙ্গিকো মগ্গো, সেয্যথিদং – সম্মাদিট্ঠি…পে… সম্মাসমাধি. মগ্গমুত্তমন্তি মগ্গং অগ্গং সেট্ঠং ৰিসেট্ঠং পামোক্খং উত্তমং পৰরং. ভাৰেন্তোতি ভাৰেন্তো আসেৰন্তো বহুলীকরোন্তোতি – ভাৰেন্তো মগ্গমুত্তমং.

মগ্গো সো পারং গমনাযাতি –

মগ্গো পন্থো পথো পজ্জো [অদ্ধো (ক.)], অঞ্জসং ৰটুমাযনং;

নাৰা উত্তরসেতু চ, কুল্লো চ ভিসি সঙ্কমো [সঙ্গমো (স্যা. ক.) পস্স-ধাতুমালাযং মগ্গধাতুৰণ্ণনাযং].

পারং গমনাযাতি পারং গমনায পারং সম্পাপনায পারং সমনুপাপনায জরামরণস্স তরণাযাতি – মগ্গো সো পারং গমনায.

তস্মা পারাযনং ইতীতি. তস্মাতি তস্মা তংকারণা তংহেতু তপ্পচ্চযা তংনিদানা. পারং ৰুচ্চতি অমতং নিব্বানং…পে… নিরোধো নিব্বানং. অযনং ৰুচ্চতি মগ্গো. ইতীতি পদসন্ধি…পে… পদানুপুব্বতাপেতং ইতীতি – তস্মা পারাযনং ইতি. তেনেতং ৰুচ্চতি –

‘‘অপারা পারং গচ্ছেয্য, ভাৰেন্তো মগ্গমুত্তমং;

মগ্গো সো পারং গমনায, তস্মা পারাযনং ইতী’’তি.

পারাযনত্থুতিগাথানিদ্দেসো সত্তরসমো.