৬. জরসিঙ্গালঙ্গপঞ্হো

৬. ‘‘ভন্তে নাগসেন, ‘জরসিঙ্গালস্স দ্ৰে অঙ্গানি গহেতব্বানী’তি যং ৰদেসি, কতমানি তানি দ্ৰে অঙ্গানি গহেতব্বানী’’তি? ‘‘যথা, মহারাজ, জরসিঙ্গালো ভোজনং পটিলভিত্ৰা অজিগুচ্ছমানো যাৰদত্থং আহরযতি, এৰমেৰ খো, মহারাজ, যোগিনা যোগাৰচরেন ভোজনং পটিলভিত্ৰা অজিগুচ্ছমানেন সরীরযাপনমত্তমেৰ পরিভুঞ্জিতব্বং. ইদং, মহারাজ, জরসিঙ্গালস্স পঠমং অঙ্গং গহেতব্বং. ভাসিতম্পেতং, মহারাজ, থেরেন মহাকস্সপেন –

‘‘‘সেনাসনম্হা ওরুয্হ, গামং পিণ্ডায পাৰিসিং;

ভুঞ্জন্তং পুরিসং কুট্ঠিং, সক্কচ্চ নং উপট্ঠহিং.

‘‘‘সো মে পক্কেন হত্থেন, আলোপং উপনামযি;

আলোপং পক্খিপন্তস্স, অঙ্গুলিপেত্থ ছিজ্জথ.

‘‘‘কুট্টমূলঞ্চ নিস্সায, আলোপং তং অভুঞ্জিসং;

ভুঞ্জমানে ৰা ভুত্তে ৰা, জেগুচ্ছং মে ন ৰিজ্জতী’তি.

‘‘পুন চপরং, মহারাজ, জরসিঙ্গালো ভোজনং পটিলভিত্ৰা ন ৰিচিনাতি লূখং ৰা পণীতং ৰাতি, এৰমেৰ খো, মহারাজ, যোগিনা যোগাৰচরেন ভোজনং পটিলভিত্ৰা ন ৰিচিনিতব্বং ‘লূখং ৰা পণীতং ৰা সম্পন্নং ৰা অসম্পন্নং ৰা’তি, যথালদ্ধেন সন্তুস্সিতব্বং. ইদং, মহারাজ, জরসিঙ্গালস্স দুতিযং অঙ্গং গহেতব্বং. ভাসিতম্পেতং, মহারাজ, থেরেন উপসেনেন ৰঙ্গন্তপুত্তেন –

‘‘‘লূখেনপি চ সন্তুস্সে, নাঞ্ঞং পত্থে রসং বহুং;

রসেসু অনুগিদ্ধস্স, ঝানে ন রমতে [রমতী (সী. পী.)] মনো;

ইতরীতরেন সন্তুট্ঠো [সন্তুট্ঠে (সী. পী.)], সামঞ্ঞং পরিপূরতী’’’তি.

জরসিঙ্গালঙ্গপঞ্হো ছট্ঠো.