৪. ৰাযুঙ্গপঞ্হো

৪. ‘‘ভন্তে নাগসেন, ‘ৰাযুস্স পঞ্চ অঙ্গানি গহেতব্বানী’তি যং ৰদেসি, কতমানি তানি পঞ্চ অঙ্গানি গহেতব্বানী’’তি? ‘‘যথা, মহারাজ, ৰাযু সুপুপ্ফিতৰনসণ্ডন্তরং অভিৰাযতি, এৰমেৰ খো, মহারাজ, যোগিনা যোগাৰচরেন ৰিমুত্তিৰরকুসুমপুপ্ফিতারম্মণৰনন্তরে রমিতব্বং. ইদং, মহারাজ, ৰাযুস্স পঠমং অঙ্গং গহেতব্বং.

‘‘পুন চপরং, মহারাজ, ৰাযু ধরণীরুহপাদপগণে মথযতি, এৰমেৰ খো, মহারাজ, যোগিনা যোগাৰচরেন ৰনন্তরগতেন সঙ্খারে ৰিচিনন্তেন কিলেসা মথযিতব্বা. ইদং, মহারাজ, ৰাযুস্স দুতিযং অঙ্গং গহেতব্বং.

‘‘পুন চপরং, মহারাজ, ৰাযু আকাসে চরতি, এৰমেৰ খো, মহারাজ, যোগিনা যোগাৰচরেন লোকুত্তরধম্মেসু মানসং সঞ্চারযিতব্বং. ইদং, মহারাজ, ৰাযুস্স ততিযং অঙ্গং গহেতব্বং.

‘‘পুন চপরং, মহারাজ, ৰাযু গন্ধং অনুভৰতি, এৰমেৰ খো, মহারাজ, যোগিনা যোগাৰচরেন অত্তনো সীলৰরসুরভিগন্ধো [সীলসুরভিগন্দো (সী. পী.)] অনুভৰিতব্বো. ইদং, মহারাজ, ৰাযুস্স চতুত্থং অঙ্গং গহেতব্বং.

‘‘পুন চপরং, মহারাজ, ৰাযু নিরালযো অনিকেতৰাসী, এৰমেৰ খো, মহারাজ, যোগিনা যোগাৰচরেন নিরালযমনিকেতমসন্থৰেন সব্বত্থ ৰিমুত্তেন ভৰিতব্বং. ইদং, মহারাজ, ৰাযুস্স পঞ্চমং অঙ্গং গহেতব্বং. ভাসিতম্পেতং, মহারাজ, ভগৰতা দেৰাতিদেৰেন সুত্তনিপাতে –

‘‘‘সন্থৰাতো ভযং জাতং, নিকেতা জাযতে রজো;

অনিকেতমসন্থৰং, এতং ৰে মুনিদস্সন’’’ন্তি.

ৰাযুঙ্গপঞ্হো চতুত্থো.