২. সমুদ্দৰগ্গো

১. লাবুলতঙ্গপঞ্হো

১. ‘‘ভন্তে নাগসেন, ‘লাবুলতায একং অঙ্গং গহেতব্ব’ন্তি যং ৰদেসি, কতমং তং একং অঙ্গং গহেতব্ব’’ন্তি? ‘‘যথা, মহারাজ, লাবুলতা তিণে ৰা কট্ঠে ৰা লতায ৰা সোণ্ডিকাহি আলম্বিত্ৰা তস্সূপরি ৰড্ঢতি, এৰমেৰ খো, মহারাজ, যোগিনা যোগাৰচরেন অরহত্তে অভিৰড্ঢিতুকামেন মনসা আরম্মণং আলম্বিত্ৰা অরহত্তে অভিৰড্ঢিতব্বং. ইদং, মহারাজ, লাবুলতায একং অঙ্গং গহেতব্বং. ভাসিতম্পেতং, মহারাজ, থেরেন সারিপুত্তেন ধম্মসেনাপতিনা –

‘‘‘যথা লাবুলতা নাম, তিণে কট্ঠে লতায ৰা;

আলম্বিত্ৰা সোণ্ডিকাহি, ততো ৰড্ঢতি উপ্পরি.

‘‘‘তথেৰ বুদ্ধপুত্তেন, অরহত্তফলকামিনা;

আরম্মণং আলম্বিত্ৰা, ৰড্ঢিতব্বং অসেক্খফলে’’’তি.

লাবুলতঙ্গপঞ্হো পঠমো.

২. পদুমঙ্গপঞ্হো

২. ‘‘ভন্তে নাগসেন, ‘পদুমস্স তীণি অঙ্গানি গহেতব্বানী’তি যং ৰদেসি, কতমানি তানি তীণি অঙ্গানি গহেতব্বানী’’তি? ‘‘যথা, মহারাজ, পদুমং উদকে জাতং উদকে সংৰদ্ধং অনুপলিত্তং উদকেন, এৰমেৰ খো, মহারাজ, যোগিনা যোগাৰচরেন কুলে গণে লাভে যসে সক্কারে সম্মাননায পরিভোগপচ্চযেসু চ সব্বত্থ অনুপলিত্তেন ভৰিতব্বং. ইদং, মহারাজ, পদুমস্স পঠমং অঙ্গং গহেতব্বং.

‘‘পুন চপরং, মহারাজ, পদুমং উদকা অচ্চুগ্গম্ম ঠাতি. এৰমেৰ খো, মহারাজ, যোগিনা যোগাৰচরেন সব্বলোকং অভিভৰিত্ৰা অচ্চুগ্গম্ম লোকুত্তরধম্মে ঠাতব্বং. ইদং, মহারাজ, পদুমস্স দুতিযং অঙ্গং গহেতব্বং.

‘‘পুন চপরং, মহারাজ, পদুমং অপ্পমত্তকেনপি অনিলেন এরিতং চলতি. এৰমেৰ খো, মহারাজ, যোগিনা যোগাৰচরেন অপ্পমত্তকেসুপি কিলেসেসু সংযমো করণীযো, ভযদস্সাৰিনা ৰিহরিতব্বং. ইদং, মহারাজ, পদুমস্স ততিযং অঙ্গং গহেতব্বং. ভাসিতম্পেতং, মহারাজ, ভগৰতা দেৰাতিদেৰেন ‘অণুমত্তেসু ৰজ্জেসু ভযদস্সাৰী সমাদায সিক্খতি সিক্খাপদেসূ’তি.

পদুমঙ্গপঞ্হো দুতিযো.

৩. বীজঙ্গপঞ্হো

৩. ‘‘ভন্তে নাগসেন, ‘বীজস্স দ্ৰে অঙ্গানি গহেতব্বানী’তি যং ৰদেসি, কতমানি তানি দ্ৰে অঙ্গানি গহেতব্বানী’’তি? ‘‘যথা, মহারাজ, বীজং অপ্পকম্পি সমানং ভদ্দকে খেত্তে ৰুত্তং দেৰে সম্মা ধারং পৰেচ্ছন্তে সুবহূনি ফলানি অনুদস্সতি, এৰমেৰ খো, মহারাজ, যোগিনা যোগাৰচরেন যথা পটিপাদিতং সীলং কেৰলং সামঞ্ঞফলমনুদস্সতি. এৰং সম্মা পটিপজ্জিতব্বং. ইদং, মহারাজ, বীজস্স পঠমং অঙ্গং গহেতব্বং.

‘‘পুন চপরং, মহারাজ, বীজং সুপরিসোধিতে খেত্তে রোপিতং খিপ্পমেৰ সংৰিরূহতি, এৰমেৰ খো, মহারাজ, যোগিনা যোগাৰচরেন মানসং সুপরিগ্গহিতং সুঞ্ঞাগারে পরিসোধিতং সতিপট্ঠানখেত্তৰরে খিত্তং খিপ্পমেৰ ৰিরূহতি. ইদং, মহারাজ, বীজস্স দুতিযং অঙ্গং গহেতব্বং. ভাসিতম্পেতং, মহারাজ, থেরেন অনুরুদ্ধেন –

‘‘‘যথাপি খেত্তে [যথা খেত্তে (সী.)] পরিসুদ্ধে, বীজঞ্চস্স পতিট্ঠিতং;

ৰিপুলং তস্স ফলং হোতি, অপি তোসেতি কস্সকং.

‘‘‘তথেৰ যোগিনো চিত্তং, সুঞ্ঞাগারে ৰিসোধিতং;

সতিপট্ঠানখেত্তম্হি, খিপ্পমেৰ ৰিরূহতী’’’তি.

বীজঙ্গপঞ্হো ততিযো.

৪. সালকল্যাণিকঙ্গপঞ্হো

৪. ‘‘ভন্তে নাগসেন, ‘সালকল্যাণিকায একং অঙ্গং গহেতব্ব’ন্তি যং ৰদেসি, কতমং তং একং অঙ্গং গহেতব্ব’’ন্তি? ‘‘যথা, মহারাজ, সালকল্যাণিকা নাম অন্তোপথৰিযং যেৰ অভিৰড্ঢতি হত্থসতম্পি ভিয্যোপি, এৰমেৰ খো, মহারাজ, যোগিনা যোগাৰচরেন চত্তারি সামঞ্ঞফলানি চতস্সো পটিসম্ভিদা ছল়ভিঞ্ঞাযো কেৰলঞ্চ সমণধম্মং সুঞ্ঞাগারে যেৰ পরিপূরযিতব্বং. ইদং, মহারাজ, সালকল্যাণিকায একং অঙ্গং গহেতব্বং. ভাসিতম্পেতং, মহারাজ, থেরেন রাহুলেন –

‘‘‘সালকল্যাণিকা নাম, পাদপো ধরণীরুহো;

অন্তোপথৰিযং যেৰ, সতহত্থোপি ৰড্ঢতি.

‘‘‘যথা কালম্হি সম্পত্তে, পরিপাকেন সো দুমো;

উগ্গঞ্ছিত্ৰান একাহং, সতহত্থোপি ৰড্ঢতি.

‘‘‘এৰমেৰাহং মহাৰীর, সালকল্যাণিকা ৰিয;

অব্ভন্তরে সুঞ্ঞাগারে, ধম্মতো অভিৰড্ঢযি’’’ন্তি.

সালকল্যাণিকঙ্গপঞ্হো চতুত্থো.

৫. নাৰঙ্গপঞ্হো

৫. ‘‘ভন্তে নাগসেন, ‘নাৰায তীণি অঙ্গানি গহেতব্বানী’তি যং ৰদেসি, কতমানি তানি তীণি অঙ্গানি গহেতব্বানী’’তি? ‘‘যথা, মহারাজ, নাৰা বহুৰিধদারুসঙ্ঘাটসমৰাযেন বহুম্পি জনং তারযতি, এৰমেৰ খো, মহারাজ, যোগিনা যোগাৰচরেন আচারসীলগুণৰত্তপ্পটিৰত্তবহুৰিধধম্মসঙ্ঘাটসমৰাযেন সদেৰকো লোকো তারযিতব্বো. ইদং, মহারাজ, নাৰায পঠমং অঙ্গং গহেতব্বং.

‘‘পুন চপরং, মহারাজ, নাৰা বহুৰিধঊমিত্থনিতৰেগৰিসটমাৰট্টৰেগং সহতি, এৰমেৰ খো, মহারাজ, যোগিনা যোগাৰচরেন বহুৰিধকিলেসঊমিৰেগং লাভসক্কারযসসিলোকপূজনৰন্দনা পরকুলেসু নিন্দাপসংসাসুখদুক্খসম্মাননৰিমাননবহুৰিধদোসঊমিৰেগঞ্চ সহিতব্বং. ইদং, মহারাজ, নাৰায দুতিযং অঙ্গং গহেতব্বং.

‘‘পুন চপরং, মহারাজ, নাৰা অপরিমিতমনন্তমপারমক্খোভিতগম্ভীরে মহতিমহাঘোসে তিমিতিমিঙ্গলমকরমচ্ছগণাকুলে মহতিমহাসমুদ্দে চরতি, এৰমেৰ খো, মহারাজ, যোগিনা যোগাৰচরেন তিপরিৰট্ট দ্ৰাদসাকার চতুসচ্চাভিসমযপ্পটিৰেধে মানসং সঞ্চারযিতব্বং. ইদং, মহারাজ, নাৰায ততিযং অঙ্গং গহেতব্বং. ভাসিতম্পেতং, মহারাজ, ভগৰতা দেৰাতিদেৰেন সংযুত্তনিকাযৰরে সচ্চসংযুত্তে –

‘‘‘ৰিতক্কেন্তা চ খো তুম্হে, ভিক্খৰে, ‘‘ইদং দুক্খ’’ন্তি ৰিতক্কেয্যাথ, ‘‘অযং দুক্খসমুদযো’’তি ৰিতক্কেয্যাথ, ‘‘অযং দুক্খনিরোধো’’তি ৰিতক্কেয্যাথ, ‘‘অযং দুক্খনিরোধগামিনী পটিপদা’’তি ৰিতক্কেয্যাথা’’’তি.

নাৰঙ্গপঞ্হো পঞ্চমো.

৬. নাৰালগ্গনকঙ্গপঞ্হো

৬. ‘‘ভন্তে নাগসেন, ‘নাৰালগ্গনকস্স দ্ৰে অঙ্গানি গহেতব্বানী’তি যং ৰদেসি, কতমানি তানি দ্ৰে অঙ্গানি গহেতব্বানী’’তি? ‘‘যথা, মহারাজ, নাৰালগ্গনকং বহুঊমিজালাকুলৰিক্খোভিতসলিলতলে মহতিমহাসমুদ্দে নাৰং লগ্গেতি ঠপেতি, ন দেতি দিসাৰিদিসং হরিতুং, এৰমেৰ খো, মহারাজ, যোগিনা যোগাৰচরেন রাগদোসমোহূমিজালে মহতিমহাৰিতক্কসম্পহারে চিত্তং লগ্গেতব্বং, ন দাতব্বং দিসাৰিদিসং হরিতুং. ইদং, মহারাজ, নাৰালগ্গনকস্স পঠমং অঙ্গং গহেতব্বং.

‘‘পুন চপরং, মহারাজ, নাৰালগ্গনকং ন প্লৰতি [ন পিলৰতি (সী. পী.)] ৰিসীদতি, হত্থসতেপি উদকে নাৰং লগ্গেতি ঠানমুপনেতি, এৰমেৰ খো, মহারাজ, যোগিনা যোগাৰচরেন লাভযসসক্কারমাননৰন্দনপূজনঅপচিতীসু লাভগ্গযসগ্গেপি ন প্লৰিতব্বং, সরীরযাপনমত্তকে যেৰ চিত্তং ঠপেতব্বং. ইদং, মহারাজ, নাৰালগ্গনকস্স দুতিযং অঙ্গং গহেতব্বং. ভাসিতম্পেতং, মহারাজ, থেরেন সারিপুত্তেন ধম্মসেনাপতিনা –

‘‘‘যথা সমুদ্দে লগ্গনকং, ন প্লৰতি ৰিসীদতি;

তথেৰ লাভসক্কারে, মা প্লৰথ ৰিসীদথা’’’তি.

নাৰালগ্গনকঙ্গপঞ্হো ছট্ঠো.

৭. কূপঙ্গপঞ্হো

৭. ‘‘ভন্তে নাগসেন, ‘কূপস্স একং অঙ্গং গহেতব্ব’ন্তি যং ৰদেসি, কতমং তং একং অঙ্গং গহেতব্ব’’ন্তি? ‘‘যথা, মহারাজ, কূপো রজ্জুঞ্চ ৰরত্তঞ্চ লঙ্কারঞ্চ ধারেতি, এৰমেৰ খো, মহারাজ, যোগিনা যোগাৰচরেন সতিসম্পজঞ্ঞসমন্নাগতেন ভৰিতব্বং, অভিক্কন্তে পটিক্কন্তে আলোকিতে ৰিলোকিতে সমিঞ্জিতে পসারিতে সঙ্ঘাটিপত্তচীৰরধারণে অসিতে পীতে খাযিতে সাযিতে উচ্চারপস্সাৰকম্মে গতে ঠিতে নিসিন্নে সুত্তে জাগরিতে ভাসিতে তুণ্হীভাৰে সম্পজানকারিনা ভৰিতব্বং. ইদং, মহারাজ, কূপস্স একং অঙ্গং গহেতব্বং. ভাসিতম্পেতং, মহারাজ, ভগৰতা দেৰাতিদেৰেন ‘সতো, ভিক্খৰে, ভিক্খু ৰিহরেয্য সম্পজানো, অযং ৰো অম্হাকং অনুসাসনী’’’তি.

কূপঙ্গপঞ্হো সত্তমো.

৮. নিযামকঙ্গপঞ্হো

৮. ‘‘ভন্তে নাগসেন, ‘নিযামকস্স তীণি অঙ্গানি গহেতব্বানী’তি যং ৰদেসি, কতমানি তানি তীণি অঙ্গানি গহেতব্বানী’’তি? ‘‘যথা, মহারাজ, নিযামকো রত্তিন্দিৰং সততং সমিতং অপ্পমত্তো যত্তপ্পযত্তো নাৰং সারেতি, এৰমেৰ খো, মহারাজ, যোগিনা যোগাৰচরেন চিত্তং নিযামযমানেন রত্তিন্দিৰং সততং সমিতং অপ্পমত্তেন যত্তপ্পযত্তেন যোনিসো মনসিকারেন চিত্তং নিযামেতব্বং. ইদং, মহারাজ, নিযামকস্স পঠমং অঙ্গং গহেতব্বং. ভাসিতম্পেতং, মহারাজ, ভগৰতা দেৰাতিদেৰেন ধম্মপদে –

‘‘‘অপ্পমাদরতা হোথ, সচিত্তমনুরক্খথ;

দুগ্গা উদ্ধরথত্তানং, পঙ্কে সন্নোৰ [সত্তোৰ (সী. পী.)] কুঞ্জরো’তি.

‘‘পুন চপরং, মহারাজ, নিযামকস্স যং কিঞ্চি মহাসমুদ্দে কল্যাণং ৰা পাপকং ৰা, সব্বং তং ৰিদিতং হোতি, এৰমেৰ খো, মহারাজ, যোগিনা যোগাৰচরেন কুসলাকুসলং সাৰজ্জানৰজ্জং হীনপ্পণীতং কণ্হসুক্কসপ্পটিভাগং ৰিজানিতব্বং. ইদং, মহারাজ, নিযামকস্স দুতিযং অঙ্গং গহেতব্বং.

‘‘পুন চপরং, মহারাজ, নিযামকো যন্তে মুদ্দিকং দেতি ‘মা কোচি যন্তং আমসিত্থা’তি, এৰমেৰ খো, মহারাজ, যোগিনা যোগাৰচরেন চিত্তে সংৰরমুদ্দিকা দাতব্বা ‘মা কিঞ্চি পাপকং অকুসলৰিতক্কং ৰিতক্কেসী’তি, ইদং, মহারাজ, নিযামকস্স ততিযং অঙ্গং গহেতব্বং. ভাসিতম্পেতং, মহারাজ, ভগৰতা দেৰাতিদেৰেন সংযুত্তনিকাযৰরে ‘মা, ভিক্খৰে, পাপকে অকুসলে ৰিতক্কে ৰিতক্কেয্যাথ, সেয্যথীদং, কামৰিতক্কং ব্যাপাদৰিতক্কং ৰিহিংসাৰিতক্ক’’’ন্তি.

নিযামকঙ্গপঞ্হো অট্ঠমো.

৯. কম্মকারঙ্গপঞ্হো

৯. ‘‘ভন্তে নাগসেন, ‘কম্মকারস্স একং অঙ্গং গহেতব্ব’ন্তি যং ৰদেসি, কতমং তং একং অঙ্গং গহেতব্ব’’ন্তি? ‘‘যথা, মহারাজ, কম্মকারো এৰং চিন্তযতি ‘ভতকো অহং ইমায নাৰায কম্মং করোমি, ইমাযাহং নাৰায ৰাহসা ভত্তৰেতনং লভামি, ন মে পমাদো করণীযো, অপ্পমাদেন মে অযং নাৰা ৰাহেতব্বা’তি, এৰমেৰ খো, মহারাজ, যোগিনা যোগাৰচরেন এৰং চিন্তযিতব্বং ‘ইমং খো অহং চাতুমহাভূতিকং কাযং সম্মসন্তো সততং সমিতং অপ্পমত্তো উপট্ঠিতস্সতি সতো সম্পজানো সমাহিতো একগ্গচিত্তো জাতিজরাব্যাধিমরণসোকপরিদেৰদুক্খদোমনস্সুপাযাসেহি পরিমুচ্চিস্সামীতি অপ্পমাদো মে করণীযো’তি, ইদং, মহারাজ, কম্মকারস্স একং অঙ্গং গহেতব্বং. ভাসিতম্পেতং, মহারাজ, থেরেন সারিপুত্তেন ধম্মসেনাপতিনা –

‘‘‘কাযং ইমং সম্মসথ, পরিজানাথ পুনপ্পুনং;

কাযে সভাৰং দিস্ৰান, দুক্খস্সন্তং করিস্সথা’তি.

কম্মকারঙ্গপঞ্হো নৰমো.

১০. সমুদ্দঙ্গপঞ্হো

১০. ‘‘ভন্তে নাগসেন, ‘সমুদ্দস্স পঞ্চ অঙ্গানি গহেতব্বানী’তি যং ৰদেসি, কতমানি তানি পঞ্চ অঙ্গানি গহেতব্বানী’’তি? ‘‘যথা, মহারাজ, মহাসমুদ্দো মতেন কুণপেন সদ্ধিং ন সংৰসতি, এৰমেৰ খো, মহারাজ, যোগিনা যোগাৰচরেন রাগদোসমোহমানদিট্ঠিমক্খপল়াসইস্সামচ্ছরিযমাযাসাঠেয্যকুটিলৰিসমদুচ্চরিতকিলেসমলেহি সদ্ধিং ন সংৰসিতব্বং. ইদং, মহারাজ, সমুদ্দস্স পঠমং অঙ্গং গহেতব্বং.

‘‘পুন চপরং, মহারাজ, মহাসমুদ্দো মুত্তামণিৰেল়ুরিযসঙ্খসিলাপৰাল়ফলিকমণিৰিৰিধরতননিচযং ধারেন্তো পিদহতি, ন বহি ৰিকিরতি. এৰমেৰ খো, মহারাজ, যোগিনা যোগাৰচরেন মগ্গফলঝানৰিমোক্খসমাধিসমাপত্তিৰিপস্সনাভিঞ্ঞাৰিৰিধগুণরতনানি অধিগন্ত্ৰা পিদহিতব্বানি, ন বহি নীহরিতব্বানি. ইদং, মহারাজ, সমুদ্দস্স দুতিযং অঙ্গং গহেতব্বং.

‘‘পুন চপরং, মহারাজ, মহাসমুদ্দো মহন্তেহি মহাভূতেহি সদ্ধিং সংৰসতি. এৰমেৰ খো, মহারাজ, যোগিনা যোগাৰচরেন অপ্পিচ্ছং সন্তুট্ঠং ধুতৰাদং সল্লেখৰুত্তিং আচারসম্পন্নং লজ্জিং পেসলং গরুং ভাৰনীযং ৰত্তারং ৰচনক্খমং চোদকং পাপগরহিং ওৰাদকং অনুসাসকং ৰিঞ্ঞাপকং সন্দস্সকং সমাদপকং সমুত্তেজকং সম্পহংসকং কল্যাণমিত্তং সব্রহ্মচারিং নিস্সায ৰসিতব্বং. ইদং, মহারাজ, মহাসমুদ্দস্স ততিযং অঙ্গং গহেতব্বং.

‘‘পুন চপরং, মহারাজ, মহাসমুদ্দো নৰসলিলসম্পুণ্ণাহি গঙ্গাযমুনাঅচিরৰতীসরভূমহীআদীহি নদীসতসহস্সেহি অন্তলিক্খে সলিলধারাহি চ পূরিতোপি সকং ৰেলং নাতিৰত্ততি. এৰমেৰ খো, মহারাজ, যোগিনা যোগাৰচরেন লাভসক্কারসিলোকৰন্দনমাননপূজনকারণা জীৰিতহেতুপি সঞ্চিচ্চ সিক্খাপদৰীতিক্কমো ন করণীযো. ইদং, মহারাজ, মহাসমুদ্দস্স চতুত্থং অঙ্গং গহেতব্বং. ভাসিতম্পেতং, মহারাজ, ভগৰতা দেৰাতিদেৰেন –

‘সেয্যথাপি, মহারাজ [পহারাধ (সী. পী.)], মহাসমুদ্দো ঠিতধম্মো ৰেলং নাতিক্কমতি, এৰমেৰ খো, মহারাজ, যং মহা সাৰকানং সিক্খাপদং পঞ্ঞত্তং, তং মম সাৰকা জীৰিতহেতুপি নাতিক্কমন্তী’তি.

‘‘পুন চপরং, মহারাজ, মহাসমুদ্দো সব্বসৰন্তীহি গঙ্গাযমুনাঅচিরৰতীসরভূমহীহি অন্তলিক্খে উদকধারাহিপি ন পরিপূরতি. এৰমেৰ খো, মহারাজ, যোগিনা যোগাৰচরেন উদ্দেসপরিপুচ্ছাসৰনধারণৰিনিচ্ছযঅভিধম্মৰিনযগাল়্হসুত্তন্তৰিগ্গহপদনিক্খেপপদসন্ধি পদৰিভত্তিনৰঙ্গজিনসাসনৰরং সুণন্তেনাপি ন তপ্পিতব্বং. ইদং, মহারাজ, মহাসমুদ্দস্স পঞ্চমং অঙ্গং গহেতব্বং. ভাসিতম্পেতং, মহারাজ, ভগৰতা দেৰাতিদেৰেন সুতসোমজাতকে –

‘‘‘অগ্গি যথা তিণকট্ঠং দহন্তো, ন তপ্পতি সাগরো ৰা নদীহি;

এৰম্পি চে [এৰম্পি ৰে (স্যা.), এৰং হি মে (ক.) জা. ১ অসীতিনিপাতে] পণ্ডিতা রাজসেট্ঠ, সুত্ৰা ন তপ্পন্তি সুভাসিতেনা’’’তি.

সমুদ্দঙ্গপঞ্হো দসমো.সমুদ্দৰগ্গো দুতিযো.

তস্সুদ্দানং –

লাবুলতা চ পদুমং, বীজং সালকল্যাণিকা;

নাৰা চ নাৰালগ্গনং, কূপো নিযামকো তথা;

কম্মকারো সমুদ্দো চ, ৰগ্গো তেন পৰুচ্চতীতি.