১. অনুমানপঞ্হো

১. অথ খো মিলিন্দো রাজা যেনাযস্মা নাগসেনো তেনুপসঙ্কমি, উপসঙ্কমিত্ৰা আযস্মন্তং নাগসেনং অভিৰাদেত্ৰা একমন্তং নিসীদি, একমন্তং নিসিন্নো খো মিলিন্দো রাজা ঞাতুকামো সোতুকামো ধারেতুকামো ঞাণালোকং দট্ঠুকামো অঞ্ঞাণং ভিন্দিতুকামো ঞাণালোকং উপ্পাদেতুকামো অৰিজ্জন্ধকারং নাসেতুকামো অধিমত্তং ধিতিঞ্চ উস্সাহঞ্চ সতিঞ্চ সম্পজঞ্ঞঞ্চ উপট্ঠপেত্ৰা আযস্মন্তং নাগসেনং এতদৰোচ ‘‘ভন্তে নাগসেন, কিং পন বুদ্ধো তযা দিট্ঠো’’তি. ‘‘ন হি, মহারাজা’’তি. ‘‘কিং পন তে আচরিযেহি বুদ্ধো দিট্ঠো’’তি? ‘‘ন হি, মহারাজা’’তি. ‘‘ভন্তে নাগসেন, ন কির তযা বুদ্ধো দিট্ঠো, নাপি কির তে আচরিযেহি বুদ্ধো দিট্ঠো, তেন হি, ভন্তে নাগসেন, নত্থি বুদ্ধো, ন হেত্থ বুদ্ধো পঞ্ঞাযতী’’তি.

‘‘অত্থি পন তে, মহারাজ, পুব্বকা খত্তিযা, যে তে তৰ খত্তিযৰংসস্স পুব্বঙ্গমা’’তি? ‘‘আম, ভন্তে. কো সংসযো, অত্থি পুব্বকা খত্তিযা, যে মম খত্তিযৰংসস্স পুব্বঙ্গমা’’তি. ‘‘দিট্ঠপুব্বা তযা, মহারাজ, পুব্বকা খত্তিযা’’তি? ‘‘ন হি ভন্তে’’তি. ‘‘যে পন তং, মহারাজ, অনুসাসন্তি পুরোহিতা সেনাপতিনো অক্খদস্সা মহামত্তা, তেহি পুব্বকা খত্তিযা দিট্ঠপুব্বা’’তি? ‘‘ন হি ভন্তে’’তি. ‘‘যদি পন তে, মহারাজ, পুব্বকা খত্তিযা ন দিট্ঠা, নাপি কির তে অনুসাসকেহি পুব্বকা খত্তিযা দিট্ঠা, তেন হি নত্থি পুব্বকা খত্তিযা, ন হেত্থ পুব্বকা খত্তিযা পঞ্ঞাযন্তী’’তি.

‘‘দিস্সন্তি, ভন্তে নাগসেন, পুব্বকানং খত্তিযানং অনুভূতানি পরিভোগভণ্ডানি. সেয্যথিদং, সেতচ্ছত্তং উণ্হীসং পাদুকা ৰালবীজনী খগ্গরতনং মহারহানি চ সযনানি. যেহি মযং জানেয্যাম সদ্দহেয্যাম ‘অত্থি পুব্বকা খত্তিযা’তি. ‘‘এৰমেৰ খো, মহারাজ, মযম্পেতং ভগৰন্তং জানেয্যাম সদ্দহেয্যাম. অত্থি তং কারণং, যেন মযং কারণেন জানেয্যাম সদ্দহেয্যাম ‘অত্থি সো ভগৰা’তি. কতমং তং কারণং? অত্থি খো, মহারাজ, তেন ভগৰতা জানতা পস্সতা অরহতা সম্মাসম্বুদ্ধেন অনুভূতানি পরিভোগভণ্ডানি. সেয্যথিদং, চত্তারো সতিপট্ঠানা চত্তারো সম্মপ্পধানা চত্তারো ইদ্ধিপাদা পঞ্চিন্দ্রিযানি পঞ্চ বলানি সত্ত বোজ্ঝঙ্গা অরিযো অট্ঠঙ্গিকো মগ্গো, যেহি সদেৰকো লোকো জানাতি সদ্দহতি ‘অত্থি সো ভগৰা’তি. ইমিনা, মহারাজ, কারণেন ইমিনা হেতুনা ইমিনা নযেন ইমিনা অনুমানেন ঞাতব্বো ‘অত্থি সো ভগৰা’তি.

‘‘‘বহূ জনে তারযিত্ৰা, নিব্বুতো উপধিক্খযে;

অনুমানেন ঞাতব্বং, অত্থি সো দ্ৰিপদুত্তমো’’’তি.

‘‘ভন্তে নাগসেন, ওপম্মং করোহী’’তি. ‘‘যথা, মহারাজ, নগরৰড্ঢকী নগরং মাপেতুকামো পঠমং তাৰ সমং অনুন্নতমনোনতং অসক্খরপাসাণং নিরুপদ্দৰমনৰজ্জং রমণীযং ভূমিভাগং অনুৰিলোকেত্ৰা যং তত্থ ৰিসমং, তং সমং কারাপেত্ৰা খাণুকণ্টকং ৰিসোধাপেত্ৰা তত্থ নগরং মাপেয্য সোভনং ৰিভত্তং ভাগসো মিতং উক্কিণ্ণপরিখাপাকারং দল়্হগোপুরট্টালকোট্টকং পুথুচচ্চরচতুক্কসন্ধিসিঙ্ঘাটকং সুচিসমতলরাজমগ্গং সুৰিভত্তঅন্তরাপণং আরামুয্যানতল়াকপোক্খরণিউদপানসম্পন্নং বহুৰিধদেৰট্ঠানপ্পটিমণ্ডিতং সব্বদোসৰিরহিতং, সো তস্মিং নগরে সব্বথা ৰেপুল্লত্তং পত্তে অঞ্ঞং দেসং উপগচ্ছেয্য, অথ তং নগরং অপরেন সমযেন ইদ্ধং ভৰেয্য ফীতং সুভিক্খং খেমং সমিদ্ধং সিৰং অনীতিকং নিরুপদ্দৰং নানাজনসমাকুলং, পুথূ খত্তিযা ব্রাহ্মণা ৰেস্সা সুদ্দা হত্থারোহা অস্সারোহা রথিকা পত্তিকা ধনুগ্গহা থরুগ্গহা চেলকা চলকা পিণ্ডদাযকা উগ্গা রাজপুত্তা পক্খন্দিনো মহানাগা সূরা ৰম্মিনো যোধিনো দাসিকপুত্তা ভটিপুত্তা [দাসপুত্তা ভট্টিপুত্তা (সী. পী.)] মল্লকা গণকা আল়ারিকা সূদা কপ্পকা নহাপকা চুন্দা মালাকারা সুৰণ্ণকারা সজ্ঝুকারা সীসকারা তিপুকারা লোহকারা ৰট্টকারা অযোকারা মণিকারা পেসকারা কুম্ভকারা ৰেণুকারা লোণকারা চম্মকারা রথকারা দন্তকারা রজ্জুকারা কোচ্ছকারা সুত্তকারা ৰিলীৰকারা ধনুকারা জিযকারা উসুকারা চিত্তকারা রঙ্গকারা রজকা তন্তৰাযা তুন্নৰাযা হেরঞ্ঞিকা দুস্সিকা গন্ধিকা তিণহারকা কট্ঠহারকা ভতকা পণ্ণিকা ফলিকা [ফল্লিকা (সী. পী.)] মূলিকা ওদনিকা পূৰিকা মচ্ছিকা মংসিকা মজ্জিকা নটকা নচ্চকা লঙ্ঘকা ইন্দজালিকা ৰেতালিকা মল্লা ছৰডাহকা পুপ্ফছড্ডকা ৰেনা নেসাদা গণিকা লাসিকা কুম্ভদাসিযো সক্কযৰনচীনৰিলাতা উজ্জেনকা ভারুকচ্ছকা কাসিকোসলা পরন্তকা মাগধকা সাকেতকা সোরেয্যকা [সোরট্ঠকা (সী. পী.)] পাৰেয্যকা কোটুম্বরমাথুরকা অলসন্দকস্মীরগন্ধারা তং নগরং ৰাসায উপগতা নানাৰিসযিনো জনা নৰং সুৰিভত্তং অদোসমনৰজ্জং রমণীযং তং নগরং পস্সিত্ৰা অনুমানেন জানন্তি ‘ছেকো ৰত ভো সো নগরৰড্ঢকী, যো ইমস্স নগরস্স মাপেতা’তি. এৰমেৰ খো, মহারাজ, সো ভগৰা অসমো অসমসমো অপ্পটিসমো অসদিসো অতুলো অসঙ্খ্যেযো অপ্পমেয্যো অপরিমেয্যো অমিতগুণো গুণপারমিপ্পত্তো অনন্তধিতি অনন্ততেজো অনন্তৰীরিযো অনন্তবলো বুদ্ধবলপারমিং গতো সসেনমারং পরাজেত্ৰা দিট্ঠিজালং পদালেত্ৰা অৰিজ্জং খেপেত্ৰা ৰিজ্জং উপ্পাদেত্ৰা ধম্মুক্কং ধারযিত্ৰা সব্বঞ্ঞুতং পাপুণিত্ৰা ৰিজিতসঙ্গামো ধম্মনগরং মাপেসি.

‘‘ভগৰতো খো, মহারাজ, ধম্মনগরং সীলপাকারং হিরিপরিখং ঞাণদ্ৰারকোট্ঠকং ৰীরিযঅট্টালকং সদ্ধাএসিকং সতিদোৰারিকং পঞ্ঞাপাসাদং সুত্তন্তচচ্চরং অভিধম্মসিঙ্ঘাটকং ৰিনযৰিনিচ্ছযং সতিপট্ঠানৰীথিকং, তস্স খো পন, মহারাজ, সতিপট্ঠানৰীথিযং এৰরূপা আপণা পসারিতা হোন্তি. সেয্যথীদং, পুপ্ফাপণং গন্ধাপণং ফলাপণং অগদাপণং ওসধাপণং অমতাপণং রতনাপণং সব্বাপণ’’ন্তি.

‘‘ভন্তে নাগসেন, কতমং বুদ্ধস্স ভগৰতো পুপ্ফাপণ’’ন্তি? ‘‘অত্থি খো পন, মহারাজ, তেন ভগৰতা জানতা পস্সতা অরহতা সম্মাসম্বুদ্ধেন আরম্মণৰিভত্তিযো অক্খাতা. সেয্যথীদং, অনিচ্চসঞ্ঞা দুক্খসঞ্ঞা অনত্তসঞ্ঞা অসুভসঞ্ঞা আদীনৰসঞ্ঞা পহানসঞ্ঞা ৰিরাগসঞ্ঞা নিরোধসঞ্ঞা সব্বলোকে অনভিরতিসঞ্ঞা সব্বসঙ্খারেসু অনিচ্চসঞ্ঞা আনাপানস্সতি উদ্ধুমাতকসঞ্ঞা ৰিনীলকসঞ্ঞা ৰিপুব্বকসঞ্ঞা ৰিচ্ছিদ্দকসঞ্ঞা ৰিক্খাযিতকসঞ্ঞা ৰিক্খিত্তকসঞ্ঞা হতৰিক্খিত্তকসঞ্ঞা লোহিতকসঞ্ঞা পুল়ৰকসঞ্ঞা অট্ঠিকসঞ্ঞা মেত্তাসঞ্ঞা করুণাসঞ্ঞা মুদিতাসঞ্ঞা উপেক্খাসঞ্ঞা মরণানুস্সতি কাযগতাসতি, ইমে খো, মহারাজ, বুদ্ধেন ভগৰতা আরম্মণৰিভত্তিযো অক্খাতা. তত্থ যো কোচি জরামরণা মুচ্চিতুকামো, সো তেসু অঞ্ঞতরং আরম্মণং গণ্হাতি, তেন আরম্মণেন রাগা ৰিমুচ্চতি, দোসা ৰিমুচ্চতি, মোহা ৰিমুচ্চতি, মানতো ৰিমুচ্চতি, দিট্ঠিতো ৰিমুচ্চতি, সংসারং তরতি, তণ্হাসোতং নিৰারেতি, তিৰিধং মলং ৰিসোধেতি, সব্বকিলেসে উপহন্ত্ৰা অমলং ৰিরজং সুদ্ধং পণ্ডরং অজাতিং অজরং অমরং সুখং সীতিভূতং অভযং নগরুত্তমং নিব্বাননগরং পৰিসিত্ৰা অরহত্তে চিত্তং ৰিমোচেতি, ইদং ৰুচ্চতি মহারাজ ‘ভগৰতো পুপ্ফাপণ’ন্তি.

‘‘‘কম্মমূলং গহেত্ৰান, আপণং উপগচ্ছথ;

আরম্মণং কিণিত্ৰান, ততো মুচ্চথ মুত্তিযা’’’তি.

‘‘ভন্তে নাগসেন, কতমং বুদ্ধস্স ভগৰতো গন্ধাপণ’’ন্তি? ‘‘অত্থি খো পন, মহারাজ, তেন ভগৰতা সীলৰিভত্তিযো অক্খাতা, যেন সীলগন্ধেন অনুলিত্তা ভগৰতো পুত্তা সদেৰকং লোকং সীলগন্ধেন ধূপেন্তি সম্পধূপেন্তি, দিসম্পি অনুদিসম্পি অনুৰাতম্পি পটিৰাতম্পি ৰাযন্তি অতিৰাযন্তি, ফরিত্ৰা তিট্ঠন্তি. কতমা তা সীলৰিভত্তিযো? সরণসীলং পঞ্চঙ্গসীলং অট্ঠঙ্গসীলং দসঙ্গসীলং পঞ্চুদ্দেসপরিযাপন্নং পাতিমোক্খসংৰরসীলং. ইদং ৰুচ্চতি, মহারাজ, ‘ভগৰতো গন্ধাপণ’ন্তি. ভাসিতম্পেতং, মহারাজ, ভগৰতা দেৰাতিদেৰেন –

‘‘‘ন পুপ্ফগন্ধো পটিৰাতমেতি, ন চন্দনং তগ্গরমল্লিকা ৰা;

সতঞ্চ গন্ধো পটিৰাতমেতি, সব্বা দিসা সপ্পুরিসো পৰাযতি [পৰাতি (সী. পী.) ধ. প. ৫৪ পস্সিতব্বং].

‘‘‘চন্দনং তগরং ৰাপি, উপ্পলং অথ ৰস্সিকী;

এতেসং গন্ধজাতানং, সীলগন্ধো অনুত্তরো.

‘‘‘অপ্পমত্তো অযং গন্ধো, য্ৰাযং তগরচন্দনং;

যো চ সীলৰতং গন্ধো, ৰাতি দেৰেসু উত্তমো’’’তি.

‘‘ভন্তে নাগসেন, কতমং বুদ্ধস্স ভগৰতো ফলাপণ’’ন্তি? ‘‘ফলানি খো, মহারাজ, ভগৰতা অক্খাতানি. সেয্যথীদং, সোতাপত্তিফলং সকদাগামিফলং অনাগামিফলং অরহত্তফলং সুঞ্ঞতফলসমাপত্তি অনিমিত্তফলসমাপত্তি অপ্পণিহিতফলসমাপত্তি. তত্থ যো কোচি যং ফলং ইচ্ছতি, সো কম্মমূলং দত্ৰা পত্থিতং ফলং কিণাতি. যদি সোতাপত্তিফলং, যদি সকদাগামিফলং, যদি অনাগামিফলং, যদি অরহত্তফলং, যদি সুঞ্ঞতফলসমাপত্তিং, যদি অনিমিত্তফলসমাপত্তিং, যদি অপ্পণিহিতফলসমাপত্তিং. যথা, মহারাজ, কস্সচি পুরিসস্স ধুৰফলো অম্বো ভৰেয্য, সো ন তাৰ ততো ফলানি পাতেতি, যাৰ কযিকা ন আগচ্ছন্তি, অনুপ্পত্তে পন কযিকে মূলং গহেত্ৰা এৰং আচিক্খতি ‘অম্ভো পুরিস এসো খো ধুৰফলো অম্বো, ততো যং ইচ্ছসি, এত্তকং ফলং গণ্হাহি সলাটুকং ৰা দোৰিলং ৰা কেসিকং ৰা আমং ৰা পক্কং ৰা’তি, সো তেন অত্তনা দিন্নমূলেন যদি সলাটুকং ইচ্ছতি, সলাটুকং গণ্হাতি, যদি দোৰিলং ইচ্ছতি, দোৰিলং গণ্হাতি, যদি কেসিকং ইচ্ছতি, কেসিকং গণ্হাতি, যদি আমকং ইচ্ছতি, আমকং গণ্হাতি, যদি পক্কং ইচ্ছতি, পক্কং গণ্হাতি. এৰমেৰ খো, মহারাজ, যো যং ফলং ইচ্ছতি, সো কম্মমূলং দত্ৰা পত্থিতং ফলং গণ্হাতি, যদি সোতাপত্তিফলং…পে… যদি অপ্পণিহিতফলসমাপত্তিং, ইদং ৰুচ্চতি, মহারাজ, ‘ভগৰতো ফলাপণ’ন্তি.

‘‘‘কম্মমূলং জনা দত্ৰা, গণ্হন্তি অমতম্ফলং;

তেন তে সুখিতা হোন্তি, যে কীতা অমতপ্ফল’’’ন্তি.

‘‘ভন্তে নাগসেন, কতমং বুদ্ধস্স ভগৰতো অগদাপণ’’ন্তি? ‘‘অগদানি খো, মহারাজ, ভগৰতা অক্খাতানি, যেহি অগদেহি সো ভগৰা সদেৰকং লোকং কিলেসৰিসতো পরিমোচেতি. কতমানি পন তানি অগদানি? যানিমানি, মহারাজ, ভগৰতা চত্তারি অরিযসচ্চানি অক্খাতানি. সেয্যথীদং, দুক্খং অরিযসচ্চং দুক্খসমুদযং অরিযসচ্চং দুক্খনিরোধং অরিযসচ্চং দুক্খনিরোধগামিনী পটিপদা অরিযসচ্চং, তত্থ যে কেচি অঞ্ঞাপেক্খা চতুসচ্চং ধম্মং সুণন্তি, তে জাতিযা পরিমুচ্চন্তি, জরায পরিমুচ্চন্তি, মরণা পরিমুচ্চন্তি, সোকপরিদেৰদুক্খদোমনস্সুপাযাসেহি পরিমুচ্চন্তি, ইদং ৰুচ্চতি মহারাজ ‘ভগৰতো অগদাপণ’ন্তি.

‘‘‘যে কেচি অগদা লোকে [লোকে অগদা (পী.)], ৰিসানং পটিবাহকা;

ধম্মাগদসমং নত্থি, এতং পিৰথ ভিক্খৰো’’’তি.

‘‘ভন্তে নাগসেন, কতমং বুদ্ধস্স ভগৰতো ওসধাপণ’’ন্তি? ‘‘ওসধানি খো, মহারাজ, ভগৰতা অক্খাতানি, যেহি ওসধেহি সো ভগৰা দেৰমনুস্সে তিকিচ্ছতি. সেয্যথীদং, চত্তারো সতিপট্ঠানা চত্তারো সম্মপ্পধানা চত্তারো ইদ্ধিপাদা পঞ্চিন্দ্রিযানি পঞ্চ বলানি সত্ত বোজ্ঝঙ্গা অরিযো অট্ঠঙ্গিকো মগ্গো, এতেহি ওসধেহি ভগৰা মিচ্ছাদিট্ঠিং ৰিরেচেতি, মিচ্ছাসঙ্কপ্পং ৰিরেচেতি, মিচ্ছাৰাচং ৰিরেচেতি, মিচ্ছাকম্মন্তং ৰিরেচেতি, মিচ্ছাআজীৰং ৰিরেচেতি, মিচ্ছাৰাযামং ৰিরেচেতি, মিচ্ছাসতিং ৰিরেচেতি, মিচ্ছাসমাধিং ৰিরেচেতি, লোভৰমনং কারেতি, দোসৰমনং কারেতি, মোহৰমনং কারেতি, মানৰমনং কারেতি, দিট্ঠিৰমনং কারেতি, ৰিচিকিচ্ছাৰমনং কারেতি, উদ্ধচ্চৰমনং কারেতি, থিনমিদ্ধৰমনং কারেতি, অহিরিকানোত্তপ্পৰমনং কারেতি, সব্বকিলেসৰমনং কারেতি, ইদং ৰুচ্চতি, মহারাজ, ‘ভগৰতো ওসধাপণ’ন্তি.

‘‘‘যে কেচি ওসধা লোকে, ৰিজ্জন্তি ৰিৰিধা বহূ;

ধম্মোসধসমং নত্থি, এতং পিৰথ ভিক্খৰো.

‘‘‘ধম্মোসধং পিৰিত্ৰান, অজরামরণা সিযুং;

ভাৰযিত্ৰা চ পস্সিত্ৰা, নিব্বুতা উপধিক্খযে’’’তি.

‘‘ভন্তে নাগসেন, কতমং বুদ্ধস্স ভগৰতো অমতাপণ’’ন্তি? ‘‘অমতং খো, মহারাজ, ভগৰতা অক্খাতং, যেন অমতেন সো ভগৰা সদেৰকং লোকং অভিসিঞ্চি, যেন অমতেন অভিসিত্তা দেৰমনুস্সা জাতিজরাব্যাধিমরণসোকপরিদেৰদুক্খদোমনস্সুপাযাসেহি পরিমুচ্চিংসু. কতমং তং অমতং? যদিদং কাযগতাসতি. ভাসিতম্পেতং, মহারাজ, ভগৰতা দেৰাতিদেৰেন ‘অমতং তে, ভিক্খৰে, পরিভুঞ্জন্তি, যে কাযগতাসতিং পরিভুঞ্জন্তী’তি. ইদং ৰুচ্চতি, মহারাজ, ‘ভগৰতো অমতাপণ’ন্তি.

‘‘‘ব্যাধিতং জনতং দিস্ৰা, অমতাপণং পসারযি;

কম্মেন তং কিণিত্ৰান, অমতং আদেথ ভিক্খৰো’’’তি.

‘‘ভন্তে নাগসেন, কতমং বুদ্ধস্স ভগৰতো রতনাপণ’’ন্তি? ‘‘রতনানি খো, মহারাজ, ভগৰতা অক্খাতানি, যেহি রতনেহি ৰিভূসিতা ভগৰতো পুত্তা সদেৰকং লোকং ৰিরোচন্তি ওভাসেন্তি পভাসেন্তি জলন্তি পজ্জলন্তি উদ্ধং অধো তিরিযং আলোকং দস্সেন্তি. কতমানি তানি রতনানি? সীলরতনং সমাধিরতনং পঞ্ঞারতনং ৰিমুত্তিরতনং ৰিমুত্তিঞাণদস্সনরতনং পটিসম্ভিদারতনং বোজ্ঝঙ্গরতনং.

‘‘কতমং, মহারাজ, ভগৰতো সীলরতনং? পাতিমোক্খসংৰরসীলং ইন্দ্রিযসংৰরসীলং আজীৰপারিসুদ্ধিসীলং পচ্চযসন্নিস্সিতসীলং চূল়সীলং মজ্ঝিমসীলং মহাসীলং মগ্গসীলং ফলসীলং. সীলরতনেন খো, মহারাজ, ৰিভূসিতস্স পুগ্গলস্স সদেৰকো লোকো সমারকো সব্রহ্মকো সস্সমণব্রাহ্মণী পজা পিহযতি পত্থেতি, সীলরতনপিল়ন্ধো খো, মহারাজ, ভিক্খু দিসম্পি অনুদিসম্পি উদ্ধম্পি অধোপি তিরিযম্পি ৰিরোচতি অতিৰিরোচতি [অতিরোচতি (সী. পী.)], হেট্ঠতো অৰীচিং উপরিতো ভৰগ্গং উপাদায এত্থন্তরে সব্বরতনানি অতিক্কমিত্ৰা [অতিসযিত্ৰা (সী. পী.)] অভিভৰিত্ৰা অজ্ঝোত্থরিত্ৰা তিট্ঠতি, এৰরূপানি খো, মহারাজ, সীলরতনানি ভগৰতো রতনাপণে পসারিতানি, ইদং ৰুচ্চতি মহারাজ ‘ভগৰতো সীলরতন’ন্তি.

‘‘‘এৰরূপানি সীলানি, সন্তি বুদ্ধস্স আপণে;

কম্মেন তং কিণিত্ৰান, রতনং ৰো পিল়ন্ধথা’তি.

‘‘কতমং, মহারাজ, ভগৰতো সমাধিরতনং? সৰিতক্কসৰিচারো সমাধি, অৰিতক্কৰিচারমত্তো সমাধি, অৰিতক্কঅৰিচারো সমাধি, সুঞ্ঞতো সমাধি, অনিমিত্তো সমাধি, অপ্পণিহিতো সমাধি. সমাধিরতনং খো, মহারাজ, পিল়ন্ধস্স ভিক্খুনো যে তে কামৰিতক্কব্যাপাদৰিতক্কৰিহিংসাৰিতক্কমানুদ্ধচ্চদিট্ঠিৰিচিকিচ্ছাকিলেসৰত্থূনি ৰিৰিধানি চ কুৰিতক্কানি, তে সব্বে সমাধিং আসজ্জ ৰিকিরন্তি ৰিধমন্তি ৰিদ্ধংসন্তি ন সণ্ঠন্তি [ন সণ্ঠহন্তি (সী.)] ন উপলিম্পন্তি [ন উপলিপ্পন্তি (সী. পী.)]. যথা, মহারাজ, ৰারি পোক্খরপত্তে ৰিকিরতি ৰিধমতি ৰিদ্ধংসতি ন সণ্ঠাতি ন উপলিম্পতি. তং কিস্স হেতু? পরিসুদ্ধত্তা পদুমস্স. এৰমেৰ খো, মহারাজ, সমাধিরতনং পিল়ন্ধস্স ভিক্খুনো যে তে কামৰিতক্কব্যাপাদৰিতক্কৰিহিংসাৰিতক্কমানুদ্ধচ্চ দিট্ঠিৰিচিকিচ্ছাকিলেসৰত্থূনি ৰিৰিধানি চ কুৰিতক্কানি, তে সব্বে সমাধিং আসজ্জ ৰিকিরন্তি ৰিধমন্তি ৰিদ্ধংসন্তি ন সণ্ঠন্তি ন উপলিম্পন্তি. তং কিস্স হেতু? পরিসুদ্ধত্তা সমাধিস্স. ইদং ৰুচ্চতি, মহারাজ, ‘ভগৰতো সমাধিরতন’ন্তি, এৰরূপানি খো, মহারাজ, সমাধিরতনানি ভগৰতো রতনাপণে পসারিতানি.

‘‘‘সমাধিরতনমালস্স, কুৰিতক্কা ন জাযরে;

ন চ ৰিক্খিপতে চিত্তং, এতং তুম্হে পিল়ন্ধথা’তি.

‘‘কতমং, মহারাজ, ভগৰতো পঞ্ঞারতনং? যায, মহারাজ, পঞ্ঞায অরিযসাৰকো ‘ইদং কুসল’ন্তি যথাভূতং পজানাতি, ‘ইদং অকুসল’ন্তি যথাভূতং পজানাতি, ‘ইদং সাৰজ্জং, ইদং অনৰজ্জং, ইদং সেৰিতব্বং, ইদং ন সেৰিতব্বং, ইদং হীনং, ইদং পণীতং, ইদং কণ্হং, ইদং সুক্কং, ইদং কণ্হসুক্কসপ্পটিভাগ’ন্তি যথাভূতং পজানাতি, ‘ইদং দুক্খ’ন্তি যথাভূতং পজানাতি, ‘অযং দুক্খসমুদযো’তি যথাভূতং পজানাতি, ‘অযং দুক্খনিরোধো’তি যথাভূতং পজানাতি, ‘অযং দুক্খনিরোধগামিনী পটিপদা’তি যথাভূতং পজানাতি. ইদং ৰুচ্চতি মহারাজ ‘ভগৰতো পঞ্ঞারতন’ন্তি.

‘‘‘পঞ্ঞারতনমালস্স, ন চিরং ৰত্ততে ভৰো;

খিপ্পং ফস্সেতি [ফুস্সেতি (স্যা.), পস্সতি (ক.)] অমতং, ন চ সো রোচতে ভৰে’তি.

‘‘কতমং, মহারাজ, ভগৰতো ৰিমুত্তিরতনং’’? ‘‘ৰিমুত্তিরতনং [ৰিমুত্তিরতনন্তি (সী. পী.)] খো, মহারাজ, অরহত্তং ৰুচ্চতি, অরহত্তং পত্তো খো, মহারাজ, ভিক্খু ‘ৰিমুত্তিরতনং পিল়ন্ধো’তি ৰুচ্চতি. যথা, মহারাজ, পুরিসো মুত্তাকলাপমণিকলাপপৰাল়কলাপাভরণপ্পটিমণ্ডিতো [পৰাল়াভরণপটিপণ্ডিতো (সী. পী.)] অগলুতগরতালীসকলোহিতচন্দনানুলিত্তগত্তো নাগপুন্নাগসালসলল়চম্পকযূথিকাতিমুত্তকপাটলুপ্পলৰস্সিকমল্লিকাৰিচিত্তো সেসজনে অতিক্কমিত্ৰা ৰিরোচতি অতিৰিরোচতি ওভাসতি পভাসতি সম্পভাসতি জলতি পজ্জলতি অভিভৰতি অজ্ঝোত্থরতি মালাগন্ধরতনাভরণেহি, এৰমেৰ খো, মহারাজ, অরহত্তং পত্তো খীণাসৰো ৰিমুত্তিরতনপিল়ন্ধো উপাদাযুপাদায ৰিমুত্তানং ভিক্খূনং অতিক্কমিত্ৰা সমতিক্কমিত্ৰা ৰিরোচতি অতিৰিরোচতি ওভাসতি পভাসতি সম্পভাসতি জলতি পজ্জলতি অভিভৰতি অজ্ঝোত্থরতি ৰিমুত্তিযা. তং কিস্স হেতু? অগ্গং, মহারাজ, এতং পিল়ন্ধনং সব্বপিল়ন্ধনানং, যদিদং ৰিমুত্তিপিল়ন্ধনং. ইদং ৰুচ্চতি, মহারাজ, ‘ভগৰতো ৰিমুত্তিরতন’ন্তি.

‘‘‘মণিমালাধরং গেহ, জনো [গেহং, জনো (ক.)] সামিং উদিক্খতি;

ৰিমুত্তিরতনমালন্তু, উদিক্খন্তি সদেৰকা’তি.

‘‘কতমং মহারাজ, ভগৰতো ৰিমুত্তিঞাণদস্সনরতনং? পচ্চৰেক্খণঞাণং, মহারাজ, ভগৰতো ৰিমুত্তিঞাণদস্সনরতনন্তি ৰুচ্চতি, যেন ঞাণেন অরিযসাৰকো মগ্গফলনিব্বানানি পহীনকিলেসাৰসিট্ঠকিলেসে চ পচ্চৰেক্খতি.

‘‘‘যে ঞাণেন বুজ্ঝন্তি, অরিযা কতকিচ্চতং;

তং ঞাণরতনং লদ্ধুং, ৰাযমেথ জিনোরসা’তি.

‘‘কতমং, মহারাজ, ভগৰতো পটিসম্ভিদারতনং? চতস্সো খো, মহারাজ, পটিসম্ভিদাযো অত্থপটিসম্ভিদা ধম্মপটিসম্ভিদা নিরুত্তিপটিসম্ভিদা পটিভানপটিসম্ভিদাতি. ইমেহি খো, মহারাজ, চতূহি পটিসম্ভিদারতনেহি সমলঙ্কতো ভিক্খু যং যং পরিসং উপসঙ্কমতি, যদি খত্তিযপরিসং, যদি ব্রাহ্মণপরিসং, যদি গহপতিপরিসং, যদি সমণপরিসং, ৰিসারদো উপসঙ্কমতি অমঙ্কুভূতো অভীরু অচ্ছম্ভী অনুত্রাসী ৰিগতলোমহংসো পরিসং উপসঙ্কমতি.

‘‘যথা, মহারাজ, যোধো সঙ্গামসূরো সন্নদ্ধপঞ্চাৰুধো অচ্ছম্ভিতো [অসম্ভীতো (সী. পী.)] সঙ্গামং ওতরতি, ‘সচে অমিত্তা দূরে ভৰিস্সন্তি উসুনা পাতযিস্সামি, ততো ওরতো ভৰিস্সন্তি সত্তিযা পহরিস্সামি, ততো ওরতো ভৰিস্সন্তি কণযেন পহরিস্সামি, উপগতং সন্তং মণ্ডলগ্গেন দ্ৰিধা ছিন্দিস্সামি, কাযূপগতং ছুরিকায ৰিনিৰিজ্ঝিস্সামী’তি [ৰিজ্ঝিস্সামীতি (সী.)], এৰমেৰ খো, মহারাজ, চতুপটিসম্ভিদারতনমণ্ডিতো ভিক্খু অচ্ছম্ভিতো পরিসং উপসঙ্কমতি. যো কোচি মং অত্থপটিসম্ভিদে পঞ্হং পুচ্ছিস্সতি, তস্স অত্থেন অত্থং কথযিস্সামি, কারণেন কারণং কথযিস্সামি, হেতুনা হেতুং কথযিস্সামি, নযেন নযং কথযিস্সামি, নিস্সংসযং করিস্সামি, ৰিমতিং ৰিৰেচেস্সামি, তোসযিস্সামি পঞ্হৰেয্যাকরণেন.

‘‘যো কোচি মং ধম্মপটিসম্ভিদে পঞ্হং পুচ্ছিস্সতি, তস্স ধম্মেন ধম্মং কথযিস্সামি, অমতেন অমতং কথযিস্সামি, অসঙ্খতেন অসঙ্খতং কথযিস্সামি, নিব্বানেন নিব্বানং কথযিস্সামি, সুঞ্ঞতেন সুঞ্ঞতং কথযিস্সামি, অনিমিত্তেন অনিমিত্তং কথযিস্সামি, অপ্পণিহিতেন অপ্পণিহিতং কথযিস্সামি, অনেজেন অনেজং কথযিস্সামি, নিস্সংসযং করিস্সামি, ৰিমতিং ৰিৰেচেস্সামি, তোসযিস্সামি পঞ্হাৰেয্যাকরণেন.

‘‘যো কোচি মং নিরুত্তিপটিসম্ভিদে পঞ্হং পুচ্ছিস্সতি, তস্স নিরুত্তিযা নিরুত্তিং কথযিস্সামি, পদেন পদং কথযিস্সামি, অনুপদেন অনুপদং কথযিস্সামি, অক্খরেন অক্খরং কথযিস্সামি, সন্ধিযা সন্ধিং কথযিস্সামি, ব্যঞ্জনেন ব্যঞ্জনং কথযিস্সামি, অনুব্যঞ্জনেন অনুব্যঞ্জনং কথযিস্সামি, ৰণ্ণেন ৰণ্ণং কথযিস্সামি, সরেন সরং কথযিস্সামি, পঞ্ঞত্তিযা পঞ্ঞত্তিং কথযিস্সামি, ৰোহারেন ৰোহারং কথযিস্সামি, নিস্সংসযং করিস্সামি, ৰিমতিং ৰিৰেচেস্সামি, তোসযিস্সামি পঞ্হৰেয্যাকরণেন.

‘‘যো কোচি মং পটিভানপটিসম্ভিদে পঞ্হং পুচ্ছিস্সতি, তস্স পটিভানেন পটিভানং কথযিস্সামি, ওপম্মেন ওপম্মং কথযিস্সামি, লক্খণেন লক্খণং কথযিস্সামি, রসেন রসং কথযিস্সামি, নিস্সংসযং করিস্সামি, ৰিমতিং ৰিৰেচেস্সামি, তোসযিস্সামি পঞ্হৰেয্যাকরণেনাতি, ইদং ৰুচ্চতি, মহারাজ, ‘ভগৰতো পটিসম্ভিদারতন’ন্তি.

‘‘‘পটিসম্ভিদা কিণিত্ৰান, ঞাণেন ফস্সযেয্য যো;

অচ্ছম্ভিতো অনুব্বিগ্গো, অতিরোচতি সদেৰকে’তি.

‘‘কতমং, মহারাজ, ভগৰতো বোজ্ঝঙ্গরতনং? সত্তিমে, মহারাজ, বোজ্ঝঙ্গা, সতিসম্বোজ্ঝঙ্গো ধম্মৰিচযসম্বোজ্ঝঙ্গো ৰীরিযসম্বোজ্ঝঙ্গো পীতিসম্বোজ্ঝঙ্গো পস্সদ্ধিসম্বোজ্ঝঙ্গো সমাধিসম্বোজ্ঝঙ্গো উপেক্খাসম্বোজ্ঝঙ্গো. ইমেহি খো, মহারাজ, সত্তহি বোজ্ঝঙ্গরতনেহি পটিমণ্ডিতো ভিক্খু সব্বং তমং অভিভুয্য সদেৰকং লোকং ওভাসেতি পভাসেতি আলোকং জনেতি. ইদং ৰুচ্চতি, মহারাজ, ‘ভগৰতো বোজ্ঝঙ্গরতন’ন্তি.

‘‘‘বোজ্ঝঙ্গরতনমালস্স, উট্ঠহন্তি [উপট্ঠহন্তি (ক.), উদিক্খন্তি (স্যা.)] সদেৰকা;

কম্মেন তং কিণিত্ৰান, রতনং ৰো পিল়ন্ধথা’’’তি.

‘‘ভন্তে নাগসেন, কতমং বুদ্ধস্স ভগৰতো সব্বাপণ’’ন্তি? ‘‘সব্বাপণং খো, মহারাজ, ভগৰতো নৰঙ্গং বুদ্ধৰচনং সারীরিকানি পারিভোগিকানি চেতিযানি সঙ্ঘরতনঞ্চ. সব্বাপণে, মহারাজ, ভগৰতা জাতিসম্পত্তি পসারিতা, ভোগসম্পত্তি পসারিতা, আযুসম্পত্তি পসারিতা, আরোগ্যসম্পত্তি পসারিতা, ৰণ্ণসম্পত্তি পসারিতা, পঞ্ঞাসম্পত্তি পসারিতা, মানুসিকসম্পত্তি পসারিতা, দিব্বসম্পত্তি পসারিতা, নিব্বানসম্পত্তি পসারিতা. তত্থ যে তং তং সম্পত্তিং ইচ্ছন্তি, তে কম্মমূলং দত্ৰা পত্থিতপত্থিতং সম্পত্তিং কিণন্তি, কেচি সীলসমাদানেন কিণন্তি, কেচি উপোসথকম্মেন কিণন্তি, অপ্পমত্তকেনপি কম্মমূলেন উপাদাযুপাদায সম্পত্তিযো পটিলভন্তি. যথা, মহারাজ, আপণিকস্স আপণে তিলমুগ্গমাসে পরিত্তকেনপি তণ্ডুলমুগ্গমাসেন অপ্পকেনপি মূলেন উপাদাযুপাদায গণ্হন্তি, এৰমেৰ খো, মহারাজ, ভগৰতো সব্বাপণে অপ্পমত্তকেনপি কম্মমূলেন উপাদাযুপাদায সম্পত্তিযো পটিলভন্তি. ইদং ৰুচ্চতি, মহারাজ, ‘ভগৰতো সব্বাপণ’ন্তি.

‘‘‘আযু অরোগতা ৰণ্ণং, সগ্গং উচ্চাকুলীনতা;

অসঙ্খতঞ্চ অমতং, অত্থি সব্বাপণে জিনে.

‘‘‘অপ্পেন বহুকেনাপি, কম্মমূলেন গয্হতি;

কিণিত্ৰা সদ্ধামূলেন, সমিদ্ধা হোথ ভিক্খৰো’তি.

‘‘ভগৰতো খো, মহারাজ, ধম্মনগরে এৰরূপা জনা পটিৰসন্তি, সুত্তন্তিকা ৰেনযিকা আভিধম্মিকা ধম্মকথিকা জাতকভাণকা দীঘভাণকা মজ্ঝিমভাণকা সংযুত্তভাণকা অঙ্গুত্তরভাণকা খুদ্দকভাণকা সীলসম্পন্না সমাধিসম্পন্না পঞ্ঞাসম্পন্না বোজ্ঝঙ্গভাৰনারতা ৰিপস্সকা সদত্থমনুযুত্তা আরঞ্ঞিকা রুক্খমূলিকা অব্ভোকাসিকা পলালপুঞ্জিকা সোসানিকা নেসজ্জিকা পটিপন্নকা ফলট্ঠা সেক্খা ফলসমঙ্গিনো সোতাপন্না সকদাগামিনো অনাগামিনো অরহন্তো তেৰিজ্জা ছল়ভিঞ্ঞা ইদ্ধিমন্তো পঞ্ঞায পারমিংগতা সতিপট্ঠানসম্মপ্পধানইদ্ধিপাদইন্দ্রিযবলবোজ্ঝঙ্গমগ্গৰরঝানৰিমোক্খরূ পারূপসন্তসুখসমাপত্তিকুসলা, তেহি অরহন্তেহি আকুলং সমাকুলং আকিণ্ণং সমাকিণ্ণং নল়ৰনসরৰনমিৰ ধম্মনগরং অহোসি. ভৰতীহ –

‘‘‘ৰীতরাগা ৰীতদোসা, ৰীতমোহা অনাসৰা;

ৰীততণ্হা অনাদানা, ধম্মনগরে ৰসন্তি তে.

‘‘‘আরঞ্ঞিকা ধুতধরা, ঝাযিনো লূখচীৰরা;

ৰিৰেকাভিরতা ধীরা, ধম্মনগরে ৰসন্তি তে.

‘‘‘নেসজ্জিকা সন্থতিকা, অথোপি ঠানচঙ্কমা;

পংসুকূলধরা সব্বে, ধম্মনগরে ৰসন্তি তে.

‘‘‘তিচীৰরধরা সন্তা, চম্মখণ্ডচতুত্থকা;

রতা একাসনে ৰিঞ্ঞূ, ধম্মনগরে ৰসন্তি তে.

‘‘‘অপ্পিচ্ছা নিপকা ধীরা, অপ্পাহারা অলোলুপা;

লাভালাভেন সন্তুট্ঠা, ধম্মনগরে ৰসন্তি তে.

‘‘‘ঝাযী ঝানরতা ধীরা, সন্তচিত্তা সমাহিতা;

আকিঞ্চঞ্ঞং পত্থযানা, ধম্মনগরে ৰসন্তি তে.

‘‘‘পটিপন্না ফলট্ঠা চ, সেক্খা ফলসমঙ্গিনো;

আসীসকা [আসিংসকা (সী. পী.)] উত্তমত্থং, ধম্মনগরে ৰসন্তি তে.

‘‘‘সোতাপন্না চ ৰিমলা, সকদাগামিনো চ যে;

অনাগামী চ অরহন্তো, ধম্মনগরে ৰসন্তি তে.

‘‘‘সতিপট্ঠানকুসলা, বোজ্ঝঙ্গভাৰনারতা;

ৰিপস্সকা ধম্মধরা, ধম্মনগরে ৰসন্তি তে.

‘‘‘ইদ্ধিপাদেসু কুসলা, সমাধিভাৰনারতা;

সম্মপ্পধানানুযুত্তা, ধম্মনগরে ৰসন্তি তে.

‘‘‘অভিঞ্ঞাপারমিপ্পত্তা, পেত্তিকে গোচরে রতা;

অন্তলিক্খম্হি চরণা, ধম্মনগরে ৰসন্তি তে.

‘‘‘ওক্খিত্তচক্খূ মিতভাণী, গুত্তদ্ৰারা সুসংৰুতা;

সুদন্তা উত্তমে দম্মে [ধম্মে (সী. পী.)], ধম্মনগরে ৰসন্তি তে.

‘‘‘তেৰিজ্জা ছল়ভিঞ্ঞা চ, ইদ্ধিযা পারমিং গতা;

পঞ্ঞায পারমিপ্পত্তা, ধম্মনগরে ৰসন্তি তে’তি.

‘‘যে খো তে, মহারাজ, ভিক্খূ অপরিমিতঞাণৰরধরা অসঙ্গা অতুলগুণা [অতুলিযগুণা (সী. পী. ক.)] অতুলযসা অতুলবলা অতুলতেজা ধম্মচক্কানুপ্পৰত্তকা পঞ্ঞাপারমিং গতা, এৰরূপা খো, মহারাজ, ভিক্খূ ভগৰতো ধম্মনগরে ‘ধম্মসেনাপতিনো’তি ৰুচ্চন্তি.

‘‘যে পন তে, মহারাজ, ভিক্খূ ইদ্ধিমন্তো অধিগতপ্পটিসম্ভিদাপত্তৰেসারজ্জা গগনচরা দুরাসদা দুপ্পসহা অনালম্বচরা সসাগরমহিধরপথৰিকম্পকো চন্দসূরিযপরিমজ্জকা ৰিকুব্বনাধিট্ঠানাভিনীহারকুসলা ইদ্ধিযা পারমিং গতা, এৰরূপা খো, মহারাজ, ভিক্খূ ভগৰতো ধম্মনগরে ‘পুরোহিতা’তি ৰুচ্চন্তি.

‘‘যে পন তে, মহারাজ, ভিক্খূ ধুতঙ্গমনুগতা অপ্পিচ্ছা সন্তুট্ঠা ৰিঞ্ঞত্তিমনেসনজিগুচ্ছকা পিণ্ডায সপদানচারিনো ভমরাৰ গন্ধমনুঘাযিত্ৰা পৰিসন্তি ৰিৰিত্তকাননং, কাযে চ জীৰিতে চ নিরপেক্খা অরহত্তমনুপ্পত্তা ধুতঙ্গগুণে অগ্গনিক্খিত্তা, এৰরূপা খো, মহারাজ, ভিক্খূ ভগৰতো ধম্মনগরে ‘অক্খদস্সা’তি ৰুচ্চন্তি.

‘‘যে পন তে, মহারাজ, ভিক্খূ পরিসুদ্ধা ৰিমলা নিক্কিলেসা চুতূপপাতকুসলা দিব্বচক্খুম্হি পারমিং গতা, এৰরূপা খো, মহারাজ, ভিক্খূ ভগৰতো ধম্মনগরে ‘নগরজোতকা’তি ৰুচ্চন্তি.

‘‘যে পন তে, মহারাজ, ভিক্খূ বহুস্সুতা আগতাগমা ধম্মধরা ৰিনযধরা মাতিকাধরা সিথিলধনিতদীঘরস্সগরুকলহুকক্খরপরিচ্ছেদকুসলা নৰঙ্গসাসনধরা, এৰরূপা খো, মহারাজ, ভিক্খূ ভগৰতো ধম্মনগরে ‘ধম্মরক্খা’তি ৰুচ্চন্তি.

‘‘যে পন তে, মহারাজ, ভিক্খূ ৰিনযঞ্ঞূ ৰিনযকোৰিদা ঠানাট্ঠানকুসলা [নিদানপঠনকুসলা (সী. পী.), নিদানৰত্থুকুসলা (স্যা.)] আপত্তানাপত্তিগরুকলহুকসতেকিচ্ছঅতেকিচ্ছৰুট্ঠানদেসনানিগ্গহ- পটিকম্মওসারণনিস্সারণপটিসারণকুসলা ৰিনযে পারমিং গতা, এৰরূপা খো, মহারাজ, ভিক্খূ ভগৰতো ধম্মনগরে ‘রূপরক্খা’তি [রূপদক্খাতি (সী. স্যা. পী.)] ৰুচ্চন্তি.

‘‘যে পন তে, মহারাজ, ভিক্খূ ৰিমুত্তিৰরকুসুমমালবদ্ধা ৰরপৰরমহগ্ঘসেট্ঠভাৰমনুপ্পত্তা বহুজনকন্তমভিপত্থিতা, এৰরূপা খো, মহারাজ, ভিক্খূ ভগৰতো ধম্মনগরে ‘পুপ্ফাপণিকা’তি ৰুচ্চন্তি.

‘‘যে পন তে, মহারাজ, ভিক্খূ চতুসচ্চাভিসমযপ্পটিৰিদ্ধা দিট্ঠসচ্চা ৰিঞ্ঞাতসাসনা চতূসু সামঞ্ঞফলেসু তিণ্ণৰিচিকিচ্ছা পটিলদ্ধফলসুখা অঞ্ঞেসম্পি পটিপন্নানং তে ফলে সংৰিভজন্তি, এৰরূপা খো, মহারাজ, ভিক্খূ ভগৰতো ধম্মনগরে ‘ফলাপণিকা’তি ৰুচ্চন্তি.

‘‘যে পন তে, মহারাজ, ভিক্খূ সীলসংৰরগন্ধমনুলিত্তা [সীলৰরসুগন্ধমনুলিত্তা (সী. পী.)] অনেকৰিধবহুগুণধরা কিলেসমলদুগ্গন্ধৰিধমকা, এৰরূপা খো, মহারাজ, ভিক্খূ ভগৰতো ধম্মনগরে ‘গন্ধাপণিকা’তি ৰুচ্চন্তি.

‘‘যে পন তে, মহারাজ, ভিক্খূ ধম্মকামা পিযসমুদাহারা অভিধম্মে অভিৰিনযে উল়ারপামোজ্জা অরঞ্ঞগতাপি রুক্খমূলগতাপি সুঞ্ঞাগারগতাপি ধম্মৰররসং পিৰন্তি, কাযেন ৰাচায মনসা ধম্মৰররসমোগাল়্হা অধিমত্তপটিভানা ধম্মেসু ধম্মেসনপ্পটিপন্না ইতো ৰা ততো ৰা যত্থ যত্থ অপ্পিচ্ছকথা সন্তুট্ঠিকথা পৰিৰেককথা অসংসগ্গকথা ৰীরিযারম্ভকথা সীলকথা সমাধিকথা পঞ্ঞাকথা ৰিমুত্তিকথা ৰিমুত্তিঞাণদস্সনকথা, তত্থ তত্থ গন্ত্ৰা তং তং কথারসং পিৰন্তি, এৰরূপা খো, মহারাজ, ভিক্খূ ভগৰতো ধম্মনগরে ‘সোণ্ডা পিপাসা’তি ৰুচ্চন্তি.

‘‘যে পন তে, মহারাজ, ভিক্খূ পুব্বরত্তাপররত্তং জাগরিযানুযোগমনুযুত্তা নিসজ্জট্ঠানচঙ্কমেহি রত্তিন্দিৰং ৰীতিনামেন্তি, ভাৰনানুযোগমনুযুত্তা কিলেসপটিবাহনায সদত্থপ্পসুতা, এৰরূপা খো, মহারাজ, ভিক্খূ ভগৰতো ধম্মনগরে ‘নগরগুত্তিকা’তি ৰুচ্চন্তি.

‘‘যে পন তে, মহারাজ, ভিক্খূ নৰঙ্গং বুদ্ধৰচনং অত্থতো চ ব্যঞ্জনতো চ নযতো চ কারণতো চ হেতুতো চ উদাহরণতো চ ৰাচেন্তি অনুৰাচেন্তি ভাসন্তি অনুভাসন্তি, এৰরূপা খো, মহারাজ, ভিক্খূ ভগৰতো ধম্মনগরে ‘ধম্মাপণিকা’তি ৰুচ্চন্তি.

‘‘যে পন তে, মহারাজ, ভিক্খূ ধম্মরতনভোগেন আগমপরিযত্তিসুতভোগেন ভোগিনো ধনিনো নিদ্দিট্ঠসরব্যঞ্জনলক্খণপ্পটিৰেধা ৰিঞ্ঞূ ফরণা, এৰরূপা খো, মহারাজ, ভিক্খূ ভগৰতো ধম্মনগরে ‘ধম্মসেট্ঠিনো’তি ৰুচ্চন্তি.

‘‘যে পন তে, মহারাজ, ভিক্খূ উল়ারদেসনাপটিৰেধা পরিচিণ্ণারম্মণৰিভত্তিনিদ্দেসা সিক্খাগুণপারমিপ্পত্তা, এৰরূপা খো, মহারাজ, ভিক্খূ ভগৰতো ধম্মনগরে ‘ৰিস্সুতধম্মিকা’তি ৰুচ্চন্তি.

‘‘এৰং সুৰিভত্তং খো, মহারাজ, ভগৰতো ধম্মনগরং এৰং সুমাপিতং এৰং সুৰিহিতং এৰং সুপরিপূরিতং এৰং সুৰৰত্থাপিতং এৰং সুরক্খিতং এৰং সুগোপিতং এৰং দুপ্পসয্হং পচ্চত্থিকেহি পচ্চামিত্তেহি, ইমিনা, মহারাজ, কারণেন ইমিনা হেতুনা ইমিনা নযেন ইমিনা অনুমানেন ঞাতব্বং অত্থি সো ভগৰাতি.

‘‘‘যথাপি নগরং দিস্ৰা, সুৰিভত্তং মনোরমং;

অনুমানেন জানন্তি, ৰড্ঢকিস্স মহত্তনং.

‘‘‘তথেৰ লোকনাথস্স, দিস্ৰা ধম্মপুরং ৰরং;

অনুমানেন জানন্তি, অত্থি সো ভগৰা ইতি.

‘‘‘অনুমানেন জানন্তি, ঊমিং দিস্ৰান সাগরে;

যথাযং দিস্সতে ঊমি, মহন্তো সো ভৰিস্সতি.

‘‘‘তথা বুদ্ধং সোকনুদং, সব্বত্থমপরাজিতং;

তণ্হক্খযমনুপ্পত্তং, ভৰসংসারমোচনং.

‘‘‘অনুমানেন ঞাতব্বং, ঊমিং দিস্ৰা সদেৰকে;

যথা ধম্মূমিৰিপ্ফারো, অগ্গো বুদ্ধো ভৰিস্সতি.

‘‘‘অনুমানেন জানন্তি, দিস্ৰা অচ্চুগ্গতং গিরিং;

যথা অচ্চুগ্গতো এসো, হিমৰা সো ভৰিস্সতি.

‘‘‘তথা দিস্ৰা ধম্মগিরিং, সীতীভূতং নিরূপধিং;

অচ্চুগ্গতং ভগৰতো, অচলং সুপ্পতিট্ঠিতং.

‘‘‘অনুমানেন ঞাতব্বং, দিস্ৰান ধম্মপব্বতং;

তথা হি সো মহাৰীরো, অগ্গো বুদ্ধো ভৰিস্সতি.

‘‘‘যথাপি গজরাজস্স, পদং দিস্ৰান মানুসা;

অনুমানেন জানন্তি, মহা এসো গজো ইতি.

‘‘‘তথেৰ বুদ্ধনাগস্স, পদং দিস্ৰা ৰিভাৰিনো;

অনুমানেন জানন্তি, উল়ারো সো ভৰিস্সতি.

‘‘‘অনুমানেন জানন্তি, ভীতে দিস্ৰান কুম্মিগে;

মিগরাজস্স সদ্দেন, ভীতামে কুম্মিগা ইতি.

‘‘‘তথেৰ তিত্থিযে দিস্ৰা, ৰিত্থতে ভীতমানসে;

অনুমানেন ঞাতব্বং, ধম্মরাজেন গজ্জিতং.

‘‘‘নিব্বুতং পথৰিং দিস্ৰা, হরিতপত্তং মহোদিকং;

অনুমানেন জানন্তি, মহামেঘেন নিব্বুতং.

‘‘‘তথেৰিমং জনং দিস্ৰা, আমোদিতপমোদিতং;

অনুমানেন ঞাতব্বং, ধম্মমেঘেন তপ্পিতং.

‘‘‘লগ্গং দিস্ৰা ভুসং পঙ্কং, কললদ্দগতং মহিং;

অনুমানেন জানন্তি, ৰারিক্খন্ধো মহা গতো.

‘‘‘তথেৰিমং জনং দিস্ৰা, রজপঙ্কসমোহিতং;

ৰহিতং ধম্মনদিযা, ৰিসট্ঠং ধম্মসাগরে.

‘‘‘ধম্মামতগতং দিস্ৰা, সদেৰকমিমং মহিং;

অনুমানেন ঞাতব্বং, ধম্মক্খন্ধো মহা গতো.

‘‘‘অনুমানেন জানন্তি, ঘাযিত্ৰা গন্ধমুত্তমং;

যথাযং ৰাযতে গন্ধো, হেস্সন্তি পুপ্ফিতা দুমা.

‘‘‘তথেৰাযং সীলগন্ধো, পৰাযতি সদেৰকে;

অনুমানেন ঞাতব্বং, অত্থি বুদ্ধো অনুত্তরো’তি.

‘‘এৰরূপেন খো, মহারাজ, কারণসতেন কারণসহস্সেন হেতুসতেন হেতুসহস্সেন নযসতেন নযসহস্সেন ওপম্মসতেন ওপম্মসহস্সেন সক্কা বুদ্ধবলং উপদস্সযিতুং. যথা, মহারাজ, দক্খো মালাকারো নানাপুপ্ফরাসিম্হা আচরিযানুসিট্ঠিযা পচ্চত্তপুরিসকারেন ৰিচিত্তং মালাগুণরাসিং করেয্য, এৰমেৰ খো, মহারাজ, সো ভগৰা ৰিচিত্তপুপ্ফরাসি ৰিয অনন্তগুণো অপ্পমেয্যগুণো, অহমেতরহি জিনসাসনে মালাকারো ৰিয পুপ্ফগন্থকো পুব্বকানং আচরিযানং মগ্গেনপি ময্হং বুদ্ধিবলেনপি অসঙ্খ্যেয্যেনপি কারণেন অনুমানেন বুদ্ধবলং দীপযিস্সামি, ত্ৰং পনেত্থ ছন্দং জনেহি সৰনাযা’’তি.

‘‘দুক্করং, ভন্তে নাগসেন, অঞ্ঞেসং এৰরূপেন কারণেন অনুমানেন বুদ্ধবলং উপদস্সযিতুং, নিব্বুতোস্মি, ভন্তে নাগসেন, তুম্হাকং পরমৰিচিত্তেন পঞ্হৰেয্যাকরণেনা’’তি.

অনুমানপঞ্হো পঠমো.